Kuv txiv thiab kuv niam nkawd coj txoj kev cai Kav Tos Liv nruj heev. Tiam sis thaum nkawd kawm hauv phau Vajlugkub tias Vajtswv lub npe hu ua Yehauvas, nkawd txawm hloov los ua Yehauvas Cov Tim Khawv lawm. Kuv txiv kuj tseg tsis txaug cov moj zeej Yexus ntxiv lawm. Tiam sis nws kuj muab peb lub tsev ib cha hloov ua thawj lub Tsev Nceeg Vaj nyob hauv lub nroog Xees Huas Di-aus Motes (San Juan del Monte) uas nyob tsis deb ntawm lub nroog Manila hauv teb chaws Fis Liv Pis (Philippines).

Tom qab kuv yug rau xyoo 1952, kuv niam thiab kuv txiv nkawd pib qhia rau kuv txog Yehauvas tib yam nkaus li nkawd tau qhia rau kuv plaub tug tij laug thiab peb tug muam lawv. Thaum kuv loj zuj zus tuaj, kuv txiv txhawb kom kuv nyeem ib tshooj hauv phau Vajlugkub zuj zus txhua txhua hnub thiab nws kuj siv tej ntaub ntawv los mus qhia rau kuv. Muaj tej zaud kuv txiv nkawd kuj caw cov saib xyuas thaj tsam thiab cov ua hauj lwm hauv Npe-ee tuaj so hauv peb tsev. Qhov no txhawb thiab ua rau peb tsev neeg zoo siab heev vim peb tau hnov tej yam zoo zoo uas cov kwv tij ntsib thaum lawv mus tshaj tawm txoj xov zoo. Thaum peb hnov tej no ua rau peb muab Yehauvas tes hauj lwm tso ua ntej hauv peb lub neej.

Kuv kawm tau ntau ntau yam los ntawm kuv niam thiab kuv txiv nkawd vim nkawd tuav rawv nkawd txoj kev ntseeg rau Yehauvas. Tom qab kuv niam mob thiab tuag tag, kuv txiv wb txawm pib ua ob tug tho kev rau xyoo 1971. Xyoo 1973 thaum kuv muaj 20 xyoo, kuv txiv txawm nruam sim lawm thiab. Kuv niam thiab kuv txiv nkawd tuag tag mas ua rau kuv kho siab khuav thiab ntsuag nos heev. Tiam sis txoj kev vam kev cia siab uas hais nyob hauv phau Vajlugkub pab kom kuv tuav kuv txoj kev ntseeg “ruaj ruaj.” (Henplais 6:19) Tsis ntev tom qab kuv txiv tag sim neej lawm, kuv tau txais tes hauj lwm ua ib tug tho kev tshwj xeeb ntawm lub pov txwv Khaulas (Coron) hauv lub xeev Palavas (Palawan).

Kuv muaj 21 xyoos thaum kuv mus txog rau hauv Khaulas. Kuv ib txwm nyob hauv nroog loj mas  mus nyob rau hauv ib lub pov txwv uas tsis muaj hluav taws xob, muaj dej, thiab muaj tsheb mas kuv tsis fim nyob kiag li. Txawm yog muaj ob peb tug kwv tij los tsis muaj leej twg nrog kuv tho kev ua ke ces tej thaum kuv ib leeg mus qhia Vajlugkub xwb. Thawj lub hlis mas kuv nco kuv tsev neeg thiab kuv tej phooj ywg kawg nkaus li. Thaum tsaus ntuj, kuv ntsia tej hnub qub saum nruab ntug mas ua rau kuv lub kua muag ntws si laim los ntxaum kuv lub plhu. Kuv xav muab kuv tes hauj lwm tso tseg kiag es khiav rov qab mus tsev.

Thaum lub sij hawm ntawd, kuv qhib siab hlo qhia txhua yam rau Yehauvas. Kuv thiaj li nco dheev txog tej uas kuv tau nyeem nyob hauv phau Vajlugkub thiab hauv tej ntaub ntawv uas Yehauvas lub koom haum luam tawm. Nqe Vajlugkub hauv Phau Ntawv Nkauj 19:14 txhawb tau kuv lub zog heev. Yehauvas yog “kuv txhib zeb thiab yog tus uas txhiv kuv” yog tias kuv xav txog tej yam uas haum Yehauvas siab, xws li Yehauvas tes hauj lwm thiab nws tej yeeb yam. Phau Tsom Faj uas muaj zaj kawm hu ua “Koj Tsis Ntsuag Nos” (“You Are Never Alone”) a pab tau kuv heev. Kuv thiaj muab nyeem mus nyeem los ntau ntau zaus. Thaum kuv nyob kuv ib leeg, kuv paub tias Yehauvas yeej nrog nraim kuv ces kuv thiaj li siv lub sij hawm ntawd los thov Vajtswv, kawm Vajlugkub, thiab xav txog tej uas kuv tau kawm.

Tsis ntev tom qab kuv tuaj txog hauv lub pov txwv Khaulas, kuv txawm tau rais los ua ib tug txwj laus. Kuv ib leeg xwb thiaj yog txwj laus ces kuv yuav tau ua tus coj thaum muaj Kev Kawm Tshaj Tawm, Kev Kawm Ua Vajtswv Tes Num, Koom Txoos Kev Kawm Vajlugkub, thiab Kev Kawm Phau Tsom Faj. Tsis tas li ntawd, kuv kuj cev lus qhuab qhia txhua txhua lub lim tiam thiab. Tam sim no kuv tsis muaj sij hawm xav tias kuv ntsuag nos vim kuv muaj ntau tsav ntau yam ua lawm.

Kuv txoj kev tshaj tawm nyob rau hauv Khaulas kuj mus tau zoo kawg li vim kuv muaj ib co uas kawm Vajlugkub nrog kuv ua kev cai raus dej lawm. Tiam sis kuj muaj tej qho uas nyuaj me ntswb me ntsis thiab. Muaj qee lub sij hawm kuv yuav tau taug kev ib tag hnub, kuv mam li mus txog ib koog tshaj tawm. Tej thaud kuv twb tsis paub xyov kuv mus txog no, kuv yuav mus pw qhov twg. Muaj tej lub pov txwv me me uas kuv yuav tau mus qhia rau thiab. Yuav kom mus cuag lawv, kuv yuav tau caij nkoj mus tiam sis kuv twb tsis txawj ua luam dej thiab kuj muaj cua ntsawj dej ntas mus ntas los. Ncua sij hawm no mas muaj Yehauvas pab thiab tiv thaiv kuv xwb. Tom qab no kuv mam li xam pom tias twb yog Yehauvas npaj kuv rau kuv tes hauj lwm uas kuv tseem yuav mus ua tom ntej.

Nyob rau xyoo 1978, Yehauvas lub koom haum kuj tau xa kuv mus rau hauv Phapua Nus Nkinim (Papua New Guinea) uas yog sab qaum teb ntawm Auxitalia (Australia). Phapua Nus Nkinim ua roob ua hav thiab loj yuav luag li teb chaws Xapee (Spain). Thaum kuv hnov tias muaj li peb plhom leej nyob rau ntawd thiab hais tshaj li 800 yam lus mas ua rau kuv ntseeg tsis taus li. Tiam sis feem ntau tib neeg kuj hais tsis tau lus Melanexias Phintsees (Melanesian Pidgin), uas luag kuj hu tias Thos Pixees (Tok Pisin).

Thaum kuv mus txog rau lub nroog Phauj Maulenpis (Port Moresby), kuv mus rau lub koom txoos Askiv tau ib nyuag ntu. Tom qab ntawd, kuv txawm mus rau lub koom txoos Thos Pixees thiab kuv mus kawm lawv hom lus. Kuv kawm tau tsawg lo kuv kuj muab coj mus qhia txoj xov zoo. Ua li no thiaj pab tau kuv kawm lawv yam lus sai sai. Tsis tau ntev  xwb, kuv twb mus tham lus qhuab qhia saum sam thiaj ua lus Thos Pixees. Tau yuav luag ib tog xyoo nyob hauv Phapua Nus Nkinim, kuv kuj tau mus ua ib tug saib xyuas thaj tsam rau cov koom txoos uas hais lus Thos Pixees.

Vim cov koom txoos nyias nyob nyias deb deb, kuv yuav tau teem ntau lub rooj sib txoos thiab mus kev deb ntau zaus. Thaum thawj zoo yam li kuv ntsuag nos vim kuv mus rau ib lub teb chaws tshiab, tej lus los hais tshiab, thiab tej kev coj noj coj ua los puav leej tshiab. Vim lub teb chaws no ua roob ua hav heev ces kuv thiaj yuav tau ya dav hlau txhua txhua lub lim tiam. Muaj tej thaud yog kuv tib leeg caij dav hlau xwb. Lub dav hlau los qub heev mas ua rau kuv ntshai ib yam li thaum ub kuv caij nkoj!

Tsuas muaj qho leej thiaj muaj xov tooj xwb. Yog li ntawd, thaum kuv yuav hais dab tsi rau cov koom txoos, kuv yuav tau xa ntawv mus qhia rau lawv paub. Muaj tej thaud kuv haj tseem xub mus txog kuv tsab ntawv ces kuv yuav tau nrhiav seb cov Tim Khawv nyob rau qhov twg. Txhua zaus kuv nrhiav tau cov kwv tij mas lawv tos txais kuv zoo heev, ua rau kuv twb tsis khuv xim kuv lub zog li. Kuv pom Yehauvas txhawb kuv ntau heev rau txhua txoj kev mas kuv txoj kev sib raug zoo nrog nws loj zuj zus.

Thawj zaug kuv mus kev sib txoos hauv lub pov txwv Npukevi-aus (Bougainville), muaj ib khub niam txiv txawm luag ntxhi los cuag kuv thiab hais tias: “Koj puas nco qab wb lawm?” Kuv nco mas kuv tau qhia Vajlugkub rau nkawd thaum kuv tuaj txog rau hauv Phauj Maulenpis. Kuv kawm Vajlugkub nrog nkawd me ntsis ces kuv kom ib tug kwv tij ho qhia rau nkawd. Tam sim no nkawd ob niam txiv ua kev cai raus dej lawm! Nkawd kuj yog ib feem ntawm tej koob hmoov uas kuv tau thaum kuv mus nyob peb xyoos rau hauv Phapua Nus Nkinim.

Xyoo 1978 ua ntej kuv ncaim Khaulas, kuv ntsib Adi-aus (Adel) uas ntxim hlub thiab nquag nquag. Nws yog ib tug tho kev thiab nws kuj tu nws ob tug me nyuam hu ua Xamuas (Samuel) thiab Salis (Shirley). Nws kuj pab tu nws niam uas hnub nyoog nchav lawm thiab. Thaum lub 5 Hlis xyoo 1981, kuv rov qab mus rau Fis Liv Pis teb mus yuav Adi-aus ua poj niam. Tom qab wb sib yuav wb kuj tho kev ua ke thiab saib xyuas wb tsev neeg.

Xyoo 1983 txawm kuv muaj cuab muaj yig lawm los, lub koom haum kuj muab kuv tsa ua ib tug tho kev tshwj xeeb thiab kom peb mus rau lub pov txwv Linapakas (Linapacan) uas nyob ntawm lub xeev Palavas. Peb tsev neeg txawm tsiv tag nrho mus nyob rau ntawm qhov chaw ntawd tab txawm tsis muaj ib tug Tim Khawv li. Ib xyoo tom qab xwb, Adi-aus niam kuj tau tas sim neej lawm. Txawm li ntawd los peb rau siab ntso tshaj tawm txoj xov zoo kom thiaj pab peb thev taus tej kev nyuaj siab peb raug. Peb kawm Vajlugkub ntau heev nrog tib neeg ces lawv xav tuaj sib txoos. Peb thiaj li ua ib lub Tsev Nceeg Vaj. Peb xyoos tom qab peb tuaj ntawd, peb zoo siab kawg li tias 110 leej tuaj koom ua kev cai nco txog Yexus. Tom qab peb tsiv tawm ntawm qhov chaw ntawd lawm, muaj coob tus tau ua kev cai raus dej.

Xyoo 1986, lub koom haum xa kuv mus rau lub pov txwv Khuli-aus (Culion) uas muaj cov tib neeg mob ruas coob coob. Tom qab ntawd, lub koom haum kuj cia Adi-aus ua ib tug tho kev tshwj xeeb. Thaum thawj wb ntshai mus qhia rau cov tib  neeg mob ruas tiam sis cov kwv tij nkauj muam qhia rau wb tias cov tib neeg ntawd kws tshuaj twb muab tshuaj rau lawv noj lawm ces lawv cov mob tsis kis rau ib tug twg. Cov tib neeg no ib txhia kuj tuaj sib txoos rau hauv ib tug muam lub tsev. Tsis ntev xwb wb kuj yoog tau cov tib neeg no thiab wb kuj qhia Vajlugkub rau lawv kom muaj kev vam kev cia siab vim lawv yog cov neeg uas xav tias Vajtswv thiab tib neeg yeej tsis quaj ntsej lawv. Wb kuj zoo siab tias cov tib neeg muaj mob ntawd muaj kev zoo siab tias yav tom ntej lawv yuav tsis muaj mob muaj nkeeg ntxiv lawm.​—Lukas 5:12, 13.

Tej zaud nej yuav xav tias wb cov me nyuam puas nyiam nyob hauv Khuli-aus. Adi-aus wb caw ob tug ntxhais hluas hauv Khaulas tuaj nrog wb ob tug me nyuam kom nkawd txhob kho kho siab. Lawv plaub leeg kuj sib pab nroos qhia Vajlugkub rau cov me nyuam hos wb ob niam txiv kuj qhia rau cov niam cov txiv. Muaj ib zaug peb kawm nrog kaum ib tse tib neeg. Tsis tau ntev xwb cov uas peb qhia kuj los ntseeg Yehauvas ces peb thiaj pib tau ib lub koom txoos!

Thaum chiv thawj, tsuas muaj kuv ib leeg xwb thiaj yog txwj laus. Ces ceg Npe-ee thiaj li nug kom kuv pab coj tej kev sib txoos uas nyob hauv Khuli-aus thiab mus pab coj rau hauv lub zos hu ua Melelis (Marily) uas yuav tau caij nkoj li peb txoos teev thiaj mus txog. Tom qab kev sib txoos, peb tsev neeg yuav tau taug kev hla roob hla hav tsheej qas txoos teev mus qhia Vajlugkub rau hauv lub zos Haxis (Halsey).

Muaj tib neeg los ntseeg Yehauvas coob heev hauv Melelis thiab Haxis ces peb thiaj li tsa Tsev Nceeg Vaj rau ob thaj chaw ntawd. Nyob rau hauv Linapakas, cov kwv tij thiab cov uas nyiam kawm Vajlugkub npaj tej khoom tuaj ua Tsev Nceeg Vaj thiab lawv kuj tuaj pab dag pab zog huv tib si. Lub tsev uas tsa tau rau hauv Melelis ntim tau 200 leej thiab kuj muab ua tau kom loj dua ntawd thaum muaj rooj sib txoos.

Xyoo 1993 thaum ob tug me nyuam loj tag lawm, Adi-aus wb mus rau Fis Liv Pis teb ces kuv rov tau ua tus saib xyuas thaj tsam. Thaum xyoo 2000, kuv mus kawm Txoj Kev Kawm Rau Cov Tub Leg Num kom kuv thiaj paub ua ib tug qhia rau txoj kev kawm ntawd. Kuv ntshai nyob tsam qhia tsis tau tiam sis Adi-aus txhawb kuv tias Yehauvas mam li ntxiv dag ntxiv zog  kom kuv ua tau nws tes hauj lwm. (Filipis 4:13) Adi-aus hais li ntawd rau kuv vim nws twb muaj mob ntsuav los nws haj tseem ua Yehauvas tes hauj lwm.

Xyoo 2006 thaum kuv tseem qhia qhia ntawv, Adi-aus muaj tus mob Phokeexoos (Parkinson’s) mas ua rau wb yoob tas tsis pom qab ua li cas. Kuv hais tias kom wb tso wb tes hauj lwm tseg es kuv thiaj li tau tu nws tiam sis Adi-aus hais tias, “Thov pab nrhiav ib tug kws tshuaj uas txawj kho kuv tus mob. Kuv paub hais tias Yehauvas yeej yuav pab kom wb ua tau wb ob teg hauj lwm.” Tau rau lub xyoos tom qab ntawd, Adi-aus kuj tseem ua tau nws tes hauj lwm rau Yehauvas, tsis yws ib los li. Thaum nws mus tsis taus kev lawm los nws tseem caij lub luab mus qhia txoj xov zoo thiab. Thaum nws hais tsis tau lus los nws tseem peem tiag kom hais tau ib los sis ob lo lus thaum mus kev sib txoos. Sawv daws kuj sau ntawv qhia rau nws paub hais tias nws ua tau ib tug yam ntxwv zoo kawg li thiab lawv yeej ris nws tus txiaj tus ntsig. Adi-aus tuag rau xyoo 2013. Kuv yuav poj niam tshaj li 30 xyoo thiab nws kub siab lug teev tiam Yehauvas thiab yog ib tug niam tsev zoo heev. Tam sim no kuv quaj ntsuag thiab kho siab khuav.

Adi-aus xav kom kuv ua kuv tes hauj lwm twj ywm ces yog li ntawd kuv thiaj li ua li nws hais. Kuv ua hauj lwm ntau ntau kom kuv thiaj tsis muaj sij hawm kho siab. Xyoo 2014 txog 2017, kuv mus saib xyuas cov koom txoos hais lus Tankalas (Tagalog) uas nyob cov teb chaws uas txwv Yehauvas tes hauj lwm. Tom qab ntawd, kuv mus xyuas cov koom txoos hais lus Tankalas nyob hauv Tais Vam (Taiwan), Yunathim Xatej (United States), thiab Kanada (Canada). Xyoo 2019, kuv qhia cov Kev Kawm Rau Cov Qhia Lub Nceeg Vaj ua lus Askiv nyob rau Eedias (India) thiab Thaib teb. Kuv mus ua cov hauj lwm no mas ua rau kuv zoo siab heev. Thaum kuv ua Yehauvas tes hauj lwm mas kuv tsis ntxhov siab li.

Txhua tes hauj lwm uas kuv mus ua mas kuv tau nrog cov kwv tij nkauj muam sib raug zoo heev. Thaum kuv yuav ncaim lawv mas yeej tsis yooj yim kiag li. Tej lub sij hawm zoo li no kuv tso siab tag nrho rau Yehauvas. Kuv yeej xam pom tias Yehauvas yeej pab kuv heev ces txawm ib tes hauj lwm twg hloov los kuv yeej txaus siab mus ua. Niaj hnub nim no kuv yog ib tug tho kev tshwj xeeb nyob rau Fis Liv Pis. Lub koom txoos tshiab uas kuv mus tam sim no kuv nyiam kawg li. Lawv kuj txhawb thiab saib xyuas kuv tam li yog kuv tsev neeg. Tsis tas li ntawd, kuv qhuas Xamuas thiab Salis vim nkawd muaj kev ntseeg ib yam li nkawd niam ntag.​—3 Yauhas 4.

Kuv raug ntau ntau yam hauv kuv lub neej, tsis hais thaum kuv ntsia ntsoov kuv tus poj niam muaj mob muaj nkeeg thiab tau tag sim neej lawm. Tsis tas li ntawd, kuv yuav tau hloov ntau yam hauj lwm los kuv pom tias Yehauvas “nyob tsis deb ntawm peb txhua tus.” (Tes Hauj Lwm 17:27) Yehauvas yeej pab nws cov tib neeg. Nws “txhais tes tsis luv” txawm nws cov tib neeg yuav nyob rau qhov chaw twg los xij peem. (Yaxayas 59:1) Tag nrho kuv lub neej, Yehauvas yeej nrog nraim kuv thiab kuv ris nws txiaj ntsig kawg li. Kuv tsis ntsuag nos.