1. Ua cas peb ho paub tias Vajtswv Txoj Lus ho tseem ceeb rau Yexus?

 YOG peb nyob rau Yexus lub caij thiab hnov nws hais Vajtswv Txoj Lus txhais pes rhe, ntshe peb yuav xav tsis tag li. Tom qab Yexus ua kev cai raus dej thiab lub sij hawm ua ntej nws tuag, nws puav leej siv Vajtswv Txoj Lus. b (2 Kevcai 8:3; Phau Ntawv Nkauj 31:5; Lukas 4:4; 23:46) Thaum Yexus tshaj tawm txoj xov zoo tau peb xyoos thiab rau hli, nws yeej nyeem Vajtswv Txoj Lus, rov mus hais txog Vajtswv Txoj Lus thiab txhais pes rhe Txoj Lus ntawd tab meeg ib zej tsoom.​—Mathais 5:17, 18, 21, 22, 27, 28; Lukas 4:16-20.

2. Thaum Yexus loj zuj zus tuaj, ua cas nws ho paub Vajtswv Txoj Lus zoo zoo? (Saib daim duab ntawm lub khaum.)

² Tau ntau ntau xyoo ua ntej Yexus pib mus tshaj tawm txoj xov zoo, nws nyeem thiab mloog Vajtswv Txoj Lus tas zaj tas zog. Thaum nws nyob hauv tsev, nws yeej hnov Maivliag thiab Yauxej nkawd siv Vajtswv Txoj Lus. c (2 Kevcai 6:6, 7) Peb yeej paub zoo tias Yexus nrog nws tsev neeg mus rau ntawm lub tsev sab laj rau hnub Xanpataus txhua zaus. (Lukas 4:16) Thaum nws mus rau ntawd, tej zaum nws ua tib zoo mloog Vajtswv Txoj Lus. Ntev mus ntev tuaj, Yexus kuj txawj nyeem Vajtswv Txoj lus lawm  thiab. Tom qab no Yexus paub Vajtswv Txoj Lus zoo zoo, nyiam Txoj Lus ntawd kawg li, thiab muab Txoj lus ntawd siv rau hauv nws lub neej. Xws li thaum Yexus muaj 12 xyoos thiab mus rau ntawm lub tuam tsev. Cov xib hwb uas paub Mauxes Txoj Kev Cai zoo zoo “hnov [Yexus] teb, xav tsis thoob rau nws tej kev txawj ntse ntawd li.”​—Lukas 2:46, 47, 52.

3. Nyob rau hauv zaj kawm no yuav piav txog dab tsi?

³ Peb yeej muaj rab peev xwm nyiam thiab paub tau Vajtswv Txoj Lus yog peb nyeem nws Txoj lus tsis tu ncua. Yuav ua li cas khaws tau tej uas peb nyeem los siv rau lub neej? Cia peb khaws Yexus cov lus uas nws tau hais rau cov uas twb paub Mauxes Txoj Kev Cai tsis hais cov xib hwb, cov Falixais, thiab cov Xadukais. Cov thawj coj no nyeem Vajtswv Txoj Lus heev kawg tiam sis lawv tsis muab siv rau lawv lub neej. Yexus hais txog peb yam uas cov txiv neej no nyeem Vajtswv Txoj Lus tiam sis pab tsis tau lawv. Nws cov lus uas hais rau lawv yuav tsav tau kom (1) peb to taub tej peb nyeem, (2) nrhiav tau tej ntsiab lus tseem ceeb, thiab (3) cia Vajtswv Txoj Lus kho peb lub neej.

4. Nyob rau hauv Lukas 10:25-29 qhia peb li cas txog qhov uas nyeem Vajtswv Txoj Lus?

⁴ Thaum peb nyeem Vajtswv Txoj Lus, peb xav khaws kom tau lub ntsiab lus. Tsis li ces yuav pab tsis tau peb dab tsi hlo li. Xws li Yexus tau hais rau ib tug txiv neej uas paub Mauxes Txoj Kev Cai zoo. (Nyeem Lukas 10:25-29.) Thaum tus txiv neej nug Yexus tias nws yuav ua li cas thiaj tau txoj sia ntev dhawv mus ib txhis, Yexus muab Vajtswv Txoj Lus los teb nws li no tias: “[Mauxes Txoj Kev Cai] qhia li cas? Tej uas koj nyeem ntawd, koj totaub li cas?” Tus txiv neej ntawd kuj teb tau yog lawm rau qhov nws siv Vajtswv Txoj Lus uas hais txog yuav tsum hlub Vajtswv thiab hlub tej kwv tij zej zog. (Levis Kevcai 19:18; 2 Kevcai 6:5) Tiam sis tus txiv neej hais tias: “Tus twg thiaj yog kuv tej kwvtij zejzog?” Qhov uas nws nug li no qhia tias nws tsis to taub tej uas nws nyeem thiab nws tsis txawj muab cov lus no siv rau hauv nws lub neej.

5. Kev thov Vajtswv thiab maj mam ua tib zoo nyeem yuav pab kom peb nkag siab tej uas peb nyeem li cas?

⁵ Peb yuav to taub Vajtswv Txoj Lus dua yog peb ua tib zoo npaj siab nyeem. Muaj qho yam uas yuav pab tau peb. Xws li thov Vajtswv ua ntej nyeem. Peb yuav tsum tau Yehauvas pab xwv peb thiaj yuav to taub nws Txoj Lus. Yog li ntawd cia peb thov kom nws tso nws lub hwj huam dawb huv los pab peb, peb thiaj nyob tswm tswm thiab tsis cia ib yam dab tsi los cuam tshuam peb txoj kev nyeem Vajlugkub. Thaum peb nyeem los maj mam ua tib zoo nyeem. Yog peb ua li no, yuav pab kom peb to taub tej uas peb nyeem ntawd. Tej zaum yog peb nyeem nrov nrov los sis nyeem raws lub suab uas kaw tseg cia, yuav pab tau peb nkag siab dua. Yog tias peb mloog cov lus uas kaw tseg cia ntawd thiab saib raws cov ntawv uas sau tseg ces peb yuav to taub, nco tau zoo dua, thiab khaws tau coj mus siv. (Yausuas 1:8) Thaum peb nyeem tag, thov Vajtswv dua thiab ua nws tsaug rau nws Txoj Lus thiab thov kom nws pab peb muab tej uas peb tau nyeem siv rau hauv peb lub neej.

6. Thaum nyeem Vajlugkub, xav txog cov neeg koj nyeem thiab muab sau tseg yuav pab tau koj li cas? (Saib daim duab.)

⁶ Muaj ob yam ntxiv uas yuav pab tau peb kom huab yam nkag siab phau Vajlugkub zoo dua tuaj. Thaum koj nyeem Vajlugkub, xav txog tej koj nyeem. Thaum koj nyeem txog ib yam twg hauv phau Vajlugkub, saib seb koj puas teb tau cov lus no: ‘Zaj no hais txog tus twg? Tus twg tab tom hais lus? Nws hais rau leej twg thiab vim li  cas nws ho hais? Nws nyob rau qhov chaw twg thiab ncua sij hawm twg?’ Cov lus nug no yuav pab tau kom koj ua zoo xav txog thiab khaws tau lub ntsiab rau zaj uas koj tau nyeem ntawd. Tsis tas li ntawd, muab tej koj tau nyeem sau tseg. Thaum koj muab tej koj tau nyeem sau ces yuav ua rau kom koj huab yam xav txog tej koj nyeem ntawd thiab yuav pab tau koj nkag siab zaj koj nyeem ntawd zoo dua. Yog koj yim sau tej koj nyeem ces koj yuav cim tau zoo dua. Koj sau tau tej yam xws li lus nug, tej koj tshawb nrhiav pom, tej ntsiab lus tseem ceeb, seb koj yuav muab siv li cas rau li cas los sis seb koj xav li cas txog zaj ntawd. Thaum koj muab coj los sau li no yuav ua rau koj pom zoo yam li Vajtswv cov lus hais cob coos rau koj ntag.

7. Qhov yeeb yam twg yuav pab tau peb thaum nyeem Vajlugkub, thiab yog vim li cas? (Mathais 24:15)

⁷ Yexus hais tias thaum nyeem, peb yuav tau ua tib zoo xav peb thiaj yuav nkag siab Vajtswv Txoj Lus. (Nyeem Mathais 24:15.) Tus tib neeg uas ua tib zoo xav yuav paub tias ib nqes hais dhos rau ib nqes li cas. Thiab nws kuj txawj muab tej uas nws tau nyeem piv rau tej yam uas nws paub los sis nws pom. Raws li Yexus cov lus, peb yuav tau ua tib zoo xav txog tej peb nyeem, peb thiaj yuav paub muab tej faj lem hauv phau Vajlugkub dhos rau tej caij nyoog peb nyob. Tsis tas li ntawd, qhov yeeb yam no haj tseem yuav pab peb nkag siab txhua yam uas peb tau nyeem nyob hauv phau Vajlugkub.

8. Yuav ua li cas peb thiaj yuav txawj ua tib zoo xav thaum peb nyeem?

⁸ Yog peb ib tug twg xav muaj lub tswv yim kom txawj ua tib zoo xav, tsis txhob ua siab deb, kav tsij thov Yehauvas pab. Nws yeej tos tsis hnyu yuav pab peb. (Pajlug 2:6) Yuav ua li cas koj thiaj li ua tau raws li tej lus koj thov? Qhov uas koj ua tau ntawd yog ua zoo tshuaj tej uas koj nyeem thiab muab xav seb tej ntawd hais dhos rau tej uas koj paub lawm li cas rau li cas. Yuav kom koj huab yam nkag siab ntxiv, kav tsij mus tshawb nrhiav peb tej ntaub ntawv Vajlugkub xws li Yehauvas Cov Tim Khawv Phau Ntawv  Tshawb Nrhiav Vajlugkub. Cov ntaub ntawv no yuav pab kom koj nkag siab nqe Vajlugkub koj nyeem ntawd seb yog txhais li cas tiag thiab koj yuav muab nqe ntawd siv hauv koj lub neej li cas. (Henplais 5:14) Thaum koj ua tib zoo xav txog tej koj nyeem ces koj yuav nkag siab phau Vajlugkub zuj zus.

9. Cov Xadukais tsis kam lees yam uas hais muaj tseeb twg nyob hauv Vajtswv txoj lus?

⁹ Cov Xadukais yeej paub thawj tsib phau ntawv uas yog Cov Nqe Lus Henplais tiam sis lawv tsis lees yuav tej yam uas hais muaj tseeb nyob rau hauv. Xws li thaum cov Xadukais hais lus twv Yexus txog qhov uas cov tuag sawv rov los, Yexus nug lawv tias: “Nej tsis tau nyeem lod? Hauv zaj uas Mauxes sau txog tsob ntoo pos, Vajtswv hais rau nws tias, ‘Kuv yog Anplahas tus Vajtswv, yog Ixaj tus Vajtswv, thiab yog Yakhauj tus Vajtswv.’” (Malakaus 12:18, 26) Txawm cov Xadukais nyeem txog zaj uas Yexus hais ntawd ntau ntau zaus los qhov uas Yexus nug lawv qhia tau tias lawv tsis lees qhov tseeb tias cov tuag sawv tau rov los.​—Malakaus 12:27; Lukas 20:38. d

10. Peb yuav tau ua zoo soj ntsuas txog tej peb nyeem li cas?

¹⁰ Peb khaws tau li cas los ntawm zaj hais tas no? Thaum peb nyeem Vajlugkub, peb yuav tau ua tib zoo soj ntsuas seb nqe uas peb nyeem los sis zaj uas peb nyeem yog hais li cas tiag. Peb tsis txhob mloog ntiav ntiav xwb tiam sis yuav tsum nrhiav kom tau tej ntsiab lus uas hais tob tob xwv peb thiaj paub qhov tseeb thiab tej hauv paus ntsiab lus uas hais ntawd.

11. Koj yuav siv 2 Timautes 3:16, 17 li cas xwv thiaj nrhiav tau tej tseem ntsiab lus hauv phau Vajlugkub?

¹¹ Nyob rau ntawm 2 Timautes 3:16, 17, yuav pab tau kom peb nrhiav tau tej tseem ntsiab lus hauv phau Vajlugkub. (Nyeem.) Nqe no hais tias “Vajtswv Txojlus txhua zaj puav leej” (1) qhia qhov tseeb, (2) qhuab ntuas tus uas ua txhaum, (3) pab tau tus uas ua yuam kev, thiab (4) qhia kom sawvdaws paub ua lub neej ncaj ncees. Plaub yam no kuj pab tau koj thaum koj nyeem lwm zaj hauv phau Vajlugkub. Thaum koj nyeem ib nqes Vajlugkub twg, ua zoo soj ntsuas seb qhia koj li cas txog Yehauvas, nws lub ntsiab los sis nws tej hauv paus ntsiab lus. Soj ntsuas ntxiv seb cov lus ntawd qhuab ntuas koj li cas. Cov lus ntawd yuav pab tau kom koj txawj zam tej cwj pwm los sis tej uas lub siab ntshaw xwv koj thiaj li sawv ruaj khov khwb kho rau ntawm Yehauvas. Txuas ntxiv ntawd, soj ntsuas seb puas muaj tej yam uas pab koj thaum xav yuam kev xwv koj thiaj paub hloov koj txoj kev xav. Xws li tej lus tsis tseeb uas koj hnov thaum mus qhia txoj xov zoo. Tsis tas li ntawd, soj ntsuas seb puas muaj tej yam uas yuav qhia kom koj paub ua lub neej ncaj ncees xwv koj ua ib yam twg los thiaj xav li Yehauvas xav. Yog koj khaws plaub yam no cia, yuav pab tau koj heev thaum koj nyeem Vajlugkub.

12. Vim li cas Yexus ho nug cov Falixais tias “Nej tsis tau nyeem . . . lod?”

¹² Yexus siv qhov lus nug “Nej tsis tau nyeem . . . lod?” los qhia tias cov Falixais txoj kev xav txog Vajtswv Txoj Lus yuam kev lawm. (Mathais 12:1-7) e Lub caij ntawd, cov Falixais liam Yexus cov thwj tim tias lawv ua tej uas txwv tsis pub ua rau hnub Xanpataus. Yexus thiaj siv ob zaj lus piv txwv thiab Hauxeya cov lus los ntuas cov Falixais tias lawv paub txoj cai Xanpataus tsis tshab, lawv thiaj tsis hlub tshua txog ib tug twg. Vim li cas Vajtswv Txoj Lus ho kho tsis tau cov Falixais lub siab ntsws? Kho tsis tau, yeeb vim yog lawv siab nkhaus thiab khav theeb heev. Lawv muaj lub siab zoo li no thiaj pab tsis tau lawv kom nkag siab tej uas lawv tau nyeem.​—Mathais 23:23; Yauhas 5:39, 40.

13. Peb tus cwj pwm yuav tsum zoo li cas thaum nyeem Vajlugkub, thiab vim li cas?

¹³ Peb khaws tau Yexus cov lus tias thaum peb nyeem Vajlugkub, yuav tsum muaj cwj pwm zoo. Peb yuav tsum txo hwj chim thiab txaus siab hlo kawm, tsis txhob coj yam li cov Falixais. Peb yuav tau “ua siab mos siab muag txais tej lus uas muab cog cia rau hauv [peb].” (Yakaunpaus 1:21) Yog peb muaj siab mos siab muag ces peb yuav cia Vajtswv Txoj Lus kho peb lub neej. Peb yuav tau zam tus cwj pwm khav theeb thiab ua siab nkhaus xwv Vajtswv Txoj Lus thiaj yuav pab tau kom peb muaj lub siab khuv leej, hmov tshua, thiab muaj lub siab hlub.

14. Ua cas peb ho paub tias peb cia tej lus nyob hauv phau Vajlugkub kho peb lub neej? (Saib cov duab.)

¹⁴ Peb coj cwj pwm rau lwm tus li cas ces qhia tias Vajtswv Txoj Lus yeej kho tau peb lub neej los sis kho tsis tau. Cov Falixais tsis cia Vajtswv Txoj Lus kho lawv tus cwj pwm, lawv thiaj “liam txim rau cov uas tsis tau ua txhaum.” (Mathais 12:7) Zoo ib yam li ntawd, qhov uas peb coj li  cas rau lwm tus yuav qhia tias peb cia los sis tsis cia Vajtswv Txoj Lus kho peb. Xws li peb puas kheev hais zoo txog lwm tus los sis thuam tej yam lawv ua tsis tau zoo nkaus nkaus xwb? Peb puas muaj lub siab khuv leej thiab tos tsis hnyu yuav zam lwm tus lub txim los sis yws thiab cib nyeej? Yog peb ua zoo tshuaj peb tus kheej yam li hais tas no ces yuav qhia tau tias peb cia los sis tsis cia tej yam peb nyeem kho tau peb txoj kev xav, lub siab ntsws, thiab tej yam peb ua.​—1 Timautes 4:12, 15; Henplais 4:12.

15. Yexus xav li cas txog Vajtswv Txoj Lus xwb?

¹⁵ Yexus nyiam Vajtswv Txoj Lus heev thiab nyob rau hauv Phau Ntawv Nkauj 40:8 faj lem tias nws nyiam Vajtswv Txoj Lus npaum li cas. Nqe ntawd hais tias: “Kuv tus Vajtswv, kuv yeej txaus siab ua zoo kom haum koj siab. Kuv yuav khaws koj tej lus qhia rau hauv kuv lub siab mus li.” Qhov uas nws nyiam Vajtswv Txoj Lus li no, ua rau nws zoo siab heev thiab kub siab lug teev tiam Yehauvas. Yog peb nyiam thiab nyeem Vajtswv Txoj Lus ces peb yuav muaj kev zoo siab thiab rau siab ntso teev tiam Yehauvas tib yam nkaus.​—Phau Ntawv Nkauj 1:1-3.

16. Thaum koj nyeem Vajtswv Txoj Lus, koj yuav tau ua li cas thiaj pab tau koj lub neej? (Saib lub ntsiab “ Yexus Cov Lus Yuav Pab Koj Nkag Siab Tej Koj Nyeem.”)

¹⁶ Cia Yexus cov lus thiab cov yam ntxwv uas peb tau kawm txhawb kom peb huab yam txawj nyeem Vajlugkub. Peb yuav to taub Vajtswv Txoj Lus zoo dua yog peb thov Vajtswv, maj mam ua tib zoo nyeem, xav txog cov neeg peb nyeem, thiab muab tej peb tau nyeem sau tseg. Yog peb ib tug twg xav muaj lub tswv yim kom txawj ua tib zoo xav, peb yuav tau ua tib zoo tshuaj ntsuas tej uas peb nyeem thiab mus tshawb nrhiav peb tej ntaub ntawv Vajlugkub. Peb yuav paub Vajlugkub zoo dua thiab tej zaj uas peb tsis tshua paub zoo yog tias peb ua tib zoo nrhiav tej ntsiab lus tseem ceeb. Thaum peb nyeem, peb yuav tsum muaj tus cwj pwm zoo xwv Vajtswv Txoj Lus thiaj kho tau peb lub neej. Cia peb ua npaum li peb ua tau los xyaum coj yam li hais tas no xwv peb thiaj yuav khaws tau ntau yam thaum peb nyeem Vajlugkub thiab peb txoj kev sib raug zoo nrog Yehauvas thiaj ruaj khov khwb kho lawm yav tom ntej.​—Phau Ntawv Nkauj 119:17, 18; Yakaunpaus 4:8.