1, 2. (1) Tus tubtxib saum ntuj hais li cas rau cov pojniam uas mus tom Yexus lub qhov ntxa? (2) Yexus hais li cas rau cov pojniam ntawd?

 HNUB TIM 16 lub hli Nixam xyoo 33, muaj ib co pojniam sawv ntxov ntxov mus tom Yexus lub qhov ntxa uas 2 hnub ua ntej ntawd lawv coj nws lub cev mus zais. Cov pojniam ntawd hlub Vajtswv thiab nyuaj siab quaj ntsuag lawv tus tswv Yexus Khetos heev. Lawv nqa tshuaj tsw qab thiab roj tsw qab mus pleev Yexus lub cev tiamsis thaum lawv mus txog ntawm lub qhov ntxa ua cas tsis pom Yexus lub cev lawm! Ib tug tubtxib saum ntuj hais rau cov pojniam ntawd tias Yexus twb sawv hauv qhov tuag rov los lawm. Nws hais ntxiv tias: “[Yexus] yuav ua nej ntej mus rau pem Kalilais; thiab nej yuav ntsib nws ped.”​—Mathais 28:1-7; Lukas 23:56; 24:10.

² Thawj yam uas Yexus ua thaum nws sawv rov qab los yog hais kom nws cov thwjtim mus ntsib nws. Nws muaj lus tseem ceeb heev yuav hais rau lawv. Yog li ntawd, thaum cov pojniam tawm ntawm lub qhov ntxa los, Yexus thiaj los rau ntawm lawv thiab hais tias: “Cia li mus qhia kuv cov thwjtim kom lawv mus rau pem Kalilais, lawv yuav pom kuv ped.”​—Mathais 28:10.

3, 4. Ua cas peb thiaj paub tias cov lus sam hwm hauv Mathais 28:19, 20 tsis yog hais rau Yexus cov tubtxib xwb? (Saib daim duab ntawm lub khaum.)

³ Nyeem Mathais 28:16-20. Thaum Yexus cov thwjtim mus ntsib Yexus, nws qhia rau lawv txog ib txoj haujlwm tseem ceeb heev uas nws xav kom lawv ua. Txoj haujlwm ntawd yog tib txoj uas peb ua niaj hnub no thiab. Yexus hais tias: “Nej cia li tawm mus qhia txhua haivneeg hauv qab ntuj no, kom lawv los  ua kuv cov thwjtim. . . . Thiab qhia kom lawv paub coj raws li txhua yam uas kuv tau qhia rau nej lawm.”

⁴ Thaum Yexus mus ntsib nws cov thwjtim saum lub roob hauv Kalilais thiab hais kom lawv mus coj tibneeg los ua nws cov thwjtim, puas yog nws hais rau nws 11 tug tubtxib xwb? Tsis yog. Yexus xav kom tag nrho nws cov thwjtim mus tshaj tawm. Ua cas peb ho paub li no? Nco ntsoov tias tus tubtxib saum ntuj hais rau cov pojniam tias: “Nej yuav ntsib nws [hauv Kalilais].” Yog li ntawd cov pojniam kuj mus ntsib Yexus thaum ntawd thiab. Tsis tas li ntawd xwb, tus tubtxib Paulus hais tias Yexus “los tshwm rau tsib puas tawm leej pom” thiab. (1 Kauleethaus 15:6) Yexus tshwm los rau lawv pom nyob qhovtwg?

5. Ua cas peb thiaj paub tias 1 Kauleethaus 15:6 yog hais txog Mathais tshooj 28 uas yog thaum Yexus ntsib nrog nws cov thwjtim saum lub roob hauv Kalilais?

⁵ Tus tubtxib Paulus cov lus hauv 1 Kauleethaus 15:6 yog hais txog Mathais tshooj 28 uas yog thaum Yexus ntsib nrog nws cov thwjtim saum lub roob hauv Kalilais. Vim li cas peb thiaj paub li ntawd? Rau qhov (1) Yexus cov thwjtim feem coob nyob hauv Kalilais. Yog li ntawd yuav yoojyim rau lawv mus ntsib Yexus saum ib lub roob hauv Kalilais dua li mus ntsib ntawm ib lub tsev hauv Yeluxalees. (2) Thaum Yexus sawv rov los nws twb ntsib nws 11 tug tubtxib ntawm ib lub tsev hauv Yeluxalees lawm. Yog Yexus tsuas xav kom nws 11 tug tubtxib mus tshaj tawm xwb ces nws yeej hais rau lawv thaum ntawd lawm. Tsis tas nws yuav ntsib nrog cov tubtxib, cov pojniam, thiab lwm cov thwjtim hauv Kalilais ntxiv.​—Lukas 24:33, 36.

6. (1) Ua cas peb thiaj paub tias Yexus cov lus hauv Mathais 28:20 yog hais rau peb tiam no thiab? (2) Niaj hnub nimno tibneeg puas tseem ua li Yexus sam hwm thiab?

⁶ Qhov (3), Yexus tsis yog hais kom nws 11 tug tubtxib mus tshaj tawm nkaus xwb rau qhov Yexus hais tias: “Kuv niaj hnub yuav nrog nraim nej mus txog lub sijhawm kawg.” (Mathais 28:20, TT ) Yog li ntawd, Yexus tsis yog hais kom cov Khixatia thawj 100 xyoo mus coj tibneeg los ua nws cov thwjtim xwb. Niaj hnub nimno los tseem muaj coob tus mus coj tibneeg los ua Yexus cov thwjtim thiab. Txhua txhua xyoo muaj txog li 300,000 leej los ua kevcai raus dej ua Yexus cov thwjtim thiab Yehauvas Cov Timkhawv. Qhov no zoo kawg li!

7. Peb yuav tham txog dabtsi hauv zaj no thiab yog vim li cas?

⁷ Peb yeej xav kom cov kawm Vajlugkub txhua tus coj raws li tej lawv kawm thiab los ua Khetos cov thwjtim. Yeej muaj coob tus uas kawm Vajlugkub ua kevcai raus dej lawm. Txawm li ntawd los, muaj ib txhia nyiam kawm Vajlugkub tiamsis ho tsis xav ua kevcai rau dej. Hauv zaj no peb yuav kawm seb peb yuav ua li cas thiaj pab tau cov kawm Vajlugkub los hlub Yehauvas thiab kom lawv txojkev ntseeg hlob zuj zus. Vim li cas peb thiaj yuav tham txog qhov no? Rau qhov muaj tej zaud peb yuav tau xav seb puas tsim nyog peb kawm Vajlugkub nrog lawv ntxiv lawm.

8. Vim li cas muaj tej thaum thiaj tsis yoojyim rau peb pab ib tug los hlub Yehauvas?

⁸ Yehauvas xav kom tibneeg teev tiam nws vim lawv hlub nws. Yog li ntawd, peb yuav tsum qhia cov kawm Vajlugkub kom lawv paub tias Yehauvas hlub lawv heev thiab nws yog tus “tu cov menyuam ntsuag thiab tsomkwm cov pojntsuam.” (Phau Ntawv Nkauj 68:5) Thaum tus kawm Vajlugkub pom tias Yehauvas hlub nws npaum li cas ces nws yuav pib hlub Yehauvas thiab. Tej zaum yuav nyuaj rau cov kawm Vajlugkub uas lawv txiv tsis  hlub lawv xav li ntawd txog peb Leej Txiv Yehauvas. (2 Timautes 3:1, 3) Thaum koj qhia Vajlugkub rau lawv, koj yuav tsum qhia lawv txog Yehauvas tej yam ntxwv zoo. Pab lawv pom tias Vajtswv xav kom lawv tau txojsia ib txhis tsis kawg thiab nws yuav pab lawv. Puas muaj lwm yam uas peb yuav pab tau lawv ntxiv thiab?

9, 10. Peb siv 2 phau ntawv twg los qhia Vajlugkub rau lwm tus thiab yog vim li cas?

⁹ Siv “Phau Vajlugkub Qhia Txog Dabtsi Tiag?” thiab phau “Nyob Hauv Vajtswv Txojkev Hlub” los kawm nrog lawv. Ob phau ntawv no yog sau los pab cov kawm Vajlugkub hlub Yehauvas. Xws li tshooj 1 ntawm phau Vajlugkub Qhia yuav teb cov lus nug no: Vajtswv puas hlub thiab mob siab txog peb?, Vajtswv xav li cas txog tej kev tsis ncaj ncees uas peb raug?, thiab Koj txav puas tau ze rau Yehauvas? Phau “Vajtswv Txojkev Hlub” yuav pab tus kawm kom paub muab tej hauv paus ntsiab lus hauv phau Vajlugkub los siv rau nws lub neej thiab pab nws txav ze rau Yehauvas. Txawm tias koj twb paub 2 phau ntawv no  zoo lawm los, ua ntej koj mus qhia ib tug twg koj yuav tsum ua tib zoo npaj rau tus ntawd vim ib tug neeg zoo txawv ib tug.

¹⁰ Tiamsis yog tias tus kawm Vajlugkub xav paub txog lwm yam uas tsis nyob hauv phau Vajlugkub Qhia lossis phau “Vajtswv Txojkev Hlub,” koj yuav ua li cas xwb? Tej zaum koj yuav tau ua zoo qhia nws tias tej uas nws xav paub ntawd nws yuav tau nyeem nws es neb thiaj li muaj sijhawm los kawm phau Vajlugkub Qhia lossis phau “Vajtswv Txojkev Hlub.”

11. (1) Thaum twg zoo rau peb pib thov Vajtswv nrog tus kawm Vajlugkub? (2) Peb yuav ua li cas tus kawm Vajlugkub thiaj to taub tias peb yuav tsum thov Vajtswv pab peb?

¹¹ Thov Vajtswv ua ntej kawm Vajlugkub. Thaum peb pib kawm Vajlugkub nrog ib tug twg, zoo rau peb thov Vajtswv ua ntej thaum peb kawm thiab thaum peb xaus. Qhia tus kawm Vajlugkub paub tias yuav kom peb to taub Vajtswv Txojlus peb yuav tsum muaj Vajtswv lub hwj huam dawb huv pab peb. Muaj ib txhia nyeem Yakaunpaus 1:5 los qhia rau cov kawm Vajlugkub tias vim li cas peb thiaj li thov Vajtswv pab thaum peb kawm Vajlugkub. Nqi Vajlugkub no hais tias: “Yog nej leejtwg tsis muaj tswvyim, kom nws cia li thov ntawm Vajtswv.” Tom qab nyeem nqi Vajlugkub no tus tshaj tawm mam li nug tus kawm Vajlugkub tias, “Yog peb xav kom peb muaj tswvyim ces peb yuav tau ua li cas?” Tus kawm Vajlugkub yuav pom tias peb yuav tsum tau thov Vajtswv.

12. Peb yuav siv Phau Ntawv Nkauj 139:2-4 los pab ib tug kawm Vajlugkub thov Vajtswv li cas?

¹² Qhia tus kawm Vajlugkub thov Vajtswv. Qhia nws tias Yehauvas xav hnov nws tej lus thov. Thaum nws thov Vajtswv nws qhia tau tej uas nyob hauv nws lub siab rau Yehauvas. Txawm muaj tej yam uas nws tsis xav qhia rau leejtwg paub los Yehauvas twb paub lawm. (Nyeem Phau Ntawv Nkauj 139:2-4.) Peb kuj txhawb kom nws thov Vajtswv pab nws hloov nws txojkev xav thiab hloov tej cwj pwm tsis zoo. Muab piv xam tias tus kawm Vajlugkub tso tsis tau tej koob tsheej uas txuam nrog kev ntseeg cuav tseg. Nws paub tias tej ntawd tsis zoo tiamsis nws nyiam ua tej ntawd heev. Txhawb kom nws qhia siab rau Yehauvas thiab kom nws thov Yehauvas pab nws nyiam tej Yehauvas nyiam xwb.​—Phau Ntawv Nkauj 97:10.

13. (1) Thaum peb pib kawm Vajlugkub nrog ib tug twg vim li cas thiaj zoo rau peb caw nws tuaj kev sib txoos? (2) Peb yuav ua li cas tus kawm Vajlugkub thiaj tsis ntshai tuaj kev sib txoos?

¹³ Thaum koj pib kawm Vajlugkub nrog ib tug twg, caw nws tuaj kev sib txoos. Tej uas nws hnov thiab pom tom peb tej kev sib txoos yuav pab nws los teev tiam Yehauvas thiab pab kom nws txojkev ntseeg loj hlob. Tso zaj yeeb yaj kiab Mus Ua Dabtsi Tom Tsev Nceeg Vaj? rau nws saib thiab caw nws nrog koj mus kev sib txoos. Qhia nws tias koj mam mus tos nws los tau. Kuj zoo rau koj coj lwm tus nrog koj mus kawm Vajlugkub nrog nws. Nws thiaj paub cov kwvtij nkauj muam nyob hauv lub koom txoos thiab tsis ntshai tuaj kev sib txoos.

14. Dabtsi yuav pab tus kawm Vajlugkub txojkev ntseeg loj hlob?

¹⁴ Peb xav kom tus kawm Vajlugkub txojkev ntseeg loj hlob zuj zus. (Efexus 4:13) Tej zaum muaj tej tug los kawm Vajlugkub rau qhov lawv xav paub seb puas pab tau lawv xwb. Tiamsis thaum nws paub Yehauvas lawm ces nws yuav hlub Yehauvas. Nws txojkev hlub rau Yehauvas yuav ua rau nws xav pab lwm tus, tsis hais cov nyob hauv lub koom txoos lossis cov tsis tau paub Yehauvas. (Mathais 22:37-39) Thaum zoo caij nyoog koj mam qhia  rau nws txog peb lub luag haujlwm muab nyiaj txiag mus txhawb tes haujlwm tshaj tawm txoj xov zoo txog lub Nceeg Vaj.

15. Peb yuav pab tus kawm Vajlugkub kom paub daws teeb meem li cas?

¹⁵ Pab tus kawm Vajlugkub kom paub daws teeb meem. Muab piv xam tias tus kawm Vajlugkub yog ib tug tshaj tawm uas tsis tau raus dej. Nws qhia koj tias muaj ib tug hauv lub koom txoos ua siab nws lawm. Koj yuav ua li cas? Tsis txhob tuaj leejtwg tog tiamsis muab phau Vajlugkub los qhia seb nws yuav ua li cas. Seb nws puas yuav zam txim tau rau tus ntawd thiab nws puas yuav kav liam tau. Yog nws kav liam tsis tau ces kom nws mus nrog tus ntawd ua tib zoo tham kom nkawd rov los ‘ua kwvtij’ sib hlub li qub. (Muab piv rau Mathais 18:15.) Pab tus kawm Vajlugkub npaj nws cov lus seb nws yuav hais li cas. Qhia kom nws paub siv JW Library^® hauv nws lub twj, phau Yehauvas Cov Timkhawv Phau Ntawv Tshawb Nrhiav Vajlugkub, thiab lub vej xaij jw.org^® los pab nws daws teeb meem. Yog nws paub daws teeb meem nrog lwm tus ua ntej nws ua kevcai raus dej ces thaum nws ua kevcai raus dej lawd nws yuav muaj kev sib raug zoo nrog cov nyob hauv lub koom txoos dua.

16. Vim li cas thiaj zoo rau koj coj lwm tus kwvtij nkauj muam nrog koj mus qhia tus kawm Vajlugkub?

¹⁶ Thaum koj mus qhia Vajlugkub rau ib tug, coj cov nyob hauv lub koom txoos thiab tus saib xyuas thaj tsam nrog koj mus. Zoo rau koj ua li no rau qhov tej yam uas koj tsis paub pab tus kawm Vajlugkub los lwm tus kwvtij nkauj muam yuav pab tau. Piv xam tias tus kawm Vajlugkub xav thum luam yeeb tiamsis nws ua pes tsawg zaus los nws ua tsis tau li. Koj kuj coj ib tug Timkhawv uas thaum ub nyuaj heev rau nws thum luam yeej nrog koj mus. Tej zaum tus ntawd yuav muaj tswvyim pab tus kawm Vajlugkub. Yog koj txaj muag vim tus kwvtij lossis tus muam uas nrog koj mus ho txawj qhia Vajlugkub dua koj ces cia nws ua tus qhia zaum ntawd los tau. Thaum koj coj lwm tus nrog koj mus, tus kawm Vajlugkub yuav kawm tau ntau yam ntawm lawv. Nco ntsoov tias peb xav kom tus kawm Vajlugkub txojkev ntseeg loj hlob zuj zus xwb.

17, 18. Ua ntej yuav txiav txim siab seb yuav tso tseg tsis kawm Vajlugkub nrog ib tug twg, peb yuav tau ua li cas?

¹⁷ Yog tus kawm Vajlugkub pheej tsis hloov nws lub neej raws li tej nws tau kawm, koj yuav tsum ua tib zoo xav seb puas tsim nyog qhia Vajlugkub rau nws ntxiv lawm. Tus koj qhia Vajlugkub rau, puas ntxim li nws kawm tau raws li nws lub peev xwm? Nws puas xyaum “coj raws li” tej nws kawm? (Mathais 28:20) Muaj tej tug koj qhia me me xwb los nws twb kawm tau lawm. Muaj tej tug yuav siv sijhawm ntev heev nws mam los ua Khetos ib tug thwjtim. Txawm li cas los, nws yuav tsum hloov nws lub neej zuj zus.

 ¹⁸ Yog tus kawm Vajlugkub twb kawm tau ntev lawm tiamsis tsis ua dabtsi kiag li, koj yuav ua li cas xwb? Piv xam tias neb twb kawm phau Vajlugkub Qhia tag thiab twb pib kawm phau “Vajtswv Txojkev Hlub” lawm tiamsis nws yeej tsis tau tuaj kev sib txoos li. Hmo ua kevcai nco txog Yexus los nws yeej tsis tuaj thiab. Tsis tas li ntawd xwb, nws ib sij tsis khoom kawm Vajlugkub ib zaug. Yog tus uas koj kawm Vajlugkub nrog zoo li no ces koj yuav tau nrog nws tham kom meej. b

19. Koj yuav hais li cas rau ib tug kawm Vajlugkub uas tsis tau ua dabtsi kiag li? Thiab thaum koj paub tias nws xav li cas lawm, koj yuav ua li cas?

¹⁹ Thaum koj nrog tus kawm Vajlugkub tham, nug nws tias: ‘Qhov uas nyuaj tshaj plaws rau koj los ua Yehauvas ib tug Timkhawv yog dabtsi?’ Tej zaum nws yuav teb tias nws nyiam kawm Vajlugkub heev tiamsis nws yeej tsis xav ua Yehauvas ib tug Timkhawv. Yog nws hais li ntawd ces tej zaum zoo dua rau koj tso tseg tsis kawm Vajlugkub nrog nws ntxiv lawm. Tiamsis yog nws ho hais tias nws tsis kam ua Yehauvas ib tug Timkhawv los twb yog vim nws ntshai mus tshaj tawm ib lub tsev rau tsev. Thaum koj paub li no lawm, koj thiaj paub pab nws.

20. Tes Haujlwm 13:48 qhia tias peb yuav kawm Vajlugkub nrog leejtwg xwb?

²⁰ Tu siab kawg uas cov kawm Vajlugkub ib txhia zoo ib yam li cov Yixalayees nyob Exekees tiam. Yehauvas hais li no txog lawv rau Exekees: “Koj tsuas zoo li tus uas muaj lub suab zoo hu zaj nkauj sib hlub thiab txawj ntaus nkauj nogncas rau lawv mloog xwb. Lawv hnov tej lus uas koj hais, tiamsis lawv tsis ua raws li ntawd.” (Exekees 33:32) Tej zaum yuav nyuaj heev rau peb qhia tus kawm Vajlugkub tias peb yuav tsis kawm Vajlugkub nrog nws ntxiv lawm. Tiamsis “peb lub sijhawm twb dhau zuj zus lawm.” (1 Kauleethaus 7:29) Zoo dua rau peb tso cov uas pheej tsis hloov lawv lub neej raws li tej lawv kawm tseg es mus nrhiav cov uas muaj lub siab xav tau txojsia ntev dhawv mus ib txhis.​—Tes Haujlwm 13:48, NWT.

21. (1) Nqi Vajlugkub rau xyoo 2020 yog dabtsi? (2) Nqi no yuav pab peb li cas?

²¹ Nqi Vajlugkub rau xyoo 2020 yuav pab kom peb txawj mus coj tibneeg los ua Yexus cov thwjtim. Nqi Vajlugkub no hais txog Yexus cov lus uas nws hais nyob saum lub roob hauv Kalilais tias: Cia li mus qhia txhua haivneeg kom lawv los ua kuv cov thwjtim thiab muab lawv ua kevcai raus dej.​—Mathais 28:19.