1. Cov uas ua kevcai raus dej lawd yuav tsum rau siab ntso ua dabtsi?

 KOJ puas tau ua kevcai raus dej? Yog koj ua lawd ces koj twb qhia rau sawvdaws paub tias koj ntseeg thiab xav teev tiam Yehauvas nrog nws lub koom haum. b Txawm li ntawd los koj yuav tau tsav koj txojkev ntseeg kom ruaj khov tias Yehauvas yeej siv nws lub koom haum los ua nws tes haujlwm niaj hnub nimno.

2, 3. Niaj hnub nimno Yehauvas coj nws lub koom haum li cas?

² Niaj hnub nimno qhov uas Yehauvas coj nws lub koom haum qhia peb txog nws tus yam ntxwv, nws lub ntsiab rau noob neej, thiab nws tej kevcai. Thaum peb pom tias Yehauvas coj nws lub koom haum li cas peb yuav kawm tau 3 yam los ntawm nws.

³ Thawj yam, “Vajtswv tsis xaiv leejtwg ntsejmuag.” (Tes Haujlwm 10:34) Yehauvas hlub peb nws thiaj muab nws tus Tub “los theej sawvdaws lub txhoj.” (1 Timautes 2:6; Yauhas 3:16) Nws txib nws cov neeg mus tshaj tawm txoj xov zoo rau txhua tus uas xav tau txojkev cawm dim los ntawm tus nqi txhiv. Yam 2, Yehauvas xav kom txhua yam muaj hauv paus hauv ntsis thiab muaj kev sib haum xeeb. (1 Kauleethaus 14:33, 40) Cov uas teev tiam nws yuav tsum ua li ntawd thiab. Yam 3, Yehauvas yog tus Xibhwb zoo tshaj plaws. (Yaxayas 30:20, 21) Nws lub koom haum thiaj siv zog qhia tibneeg txog nws Txojlus hauv lub koom txoos thiab thaum mus tshaj tawm. Cov Khixatia thaum ub xyaum ua li Yehauvas li cas? Yehauvas cov neeg nimno xyaum coj li Yehauvas li cas? Thiab lub hwj huam dawb huv pab tau koj teev tiam Yehauvas nrog nws lub koom haum li cas?

4. Raws li Tes Haujlwm 1:8, Yexus sam hwm nws cov thwjtim kom ua dabtsi thiab lawv ua tau tes haujlwm ntawd li cas?

⁴ Nyob thawj 100 xyoo, txoj xov uas Yexus tshaj tawm pab tau noob neej muaj kev vam kev cia siab. (Lukas 4:43) Nws sam hwm nws cov thwjtim kom lawv rau siab ua nws tes haujlwm thiab ua timkhawv rau nws ‘mus thoob plaws qab ntuj kawg.’ (Nyeem Tes Haujlwm 1:8.) Tiamsis yog lawv xwb ces lawv yuav ua tsis tau tes haujlwm no. Yog li ntawd Yexus thiaj cog lus rau lawv tias lub hwj huam dawb huv yuav pab lawv.​—Yauhas 14:26; Xakhaliyas 4:6.

5, 6. Lub hwj huam dawb huv pab Yexus cov thwjtim li cas?

⁵ Hnub Peetekos xyoo 33, Vajtswv pub nws lub hwj huam dawb huv rau Yexus cov thwjtim. Lub hwj huam pab lawv mus tshaj tawm txoj xov zoo. Tsis ntev xwb txawm muaj neeg coob coob los ntseeg. (Tes Haujlwm 2:41; 4:4) Thaum tibneeg tawm tsam lawv, lawv tsis ntshai thiab tsis tso lawv tes haujlwm tseg tiamsis lawv thov Vajtswv tias: “Thov koj pab peb cov uas yog koj cov tubtxib kom muaj lub siab tawv qhia koj Txojlus.” Vajtswv thiaj muab nws lub hwj huam dawb huv pab lawv.​—Tes Haujlwm 4:18-20, 29, 31.

⁶ Yexus cov thwjtim ntsib ntau yam teeb meem. Xws li lawv tsis muaj ntaub ntawv uas sau Vajtswv Txojlus ntau. Lawv tsis muaj ntaub ntawv pab lawv to taub Vajtswv Txojlus li peb muaj. Thiab lawv yuav tau tshaj tawm rau ntau haiv neeg uas hais lwm yam lus. Txawm lawv tes haujlwm nyuaj kawg li los lawv yeej kub siab lug mus tshaj tawm ces li 30 xyoo xwb lawv twb muab txoj xov zoo mus tshaj tawm “rau txhua tus uas nyob hauv qab ntuj no lawm.”​—Kaulauxais 1:6, 23.

7. Ua cas Yehauvas cov tub qhe 100 tawm xyoo dhau los lawm ho paub tias Yehauvas xav kom lawv ua dabtsi thiab lawv puas ua li ntawd?

⁷ Nyob rau peb tiam no, Yehauvas yeej tseem coj nws cov neeg thiab cuab lawv lub zog. Nws siv phau Vajlugkub uas nws lub hwj huam tshoov tibneeg sau los coj nws cov neeg. Phau Vajlugkub qhia peb txog Yexus tes haujlwm tshaj tawm thiab nws cov lus sam hwm kom nws cov thwjtim rau siab ntso ua tes haujlwm no. (Mathais 28:19, 20) Phau Tsom Faj lub 7 Hli xyoo 1881 hais tias: “Yehauvas tsis yog xaiv peb los kom peb muaj koob muaj npe lossis muaj nyiaj muaj txiaj tiamsis kom peb muab ib puas tsav yam uas peb muaj mus tshaj tawm txoj xov zoo.” Xyoo 1919 peb ib phau ntawv hais tias: “Yeej muaj haujlwm ntau heev ua tiamsis tej haujlwm no yog tus Tswv li thiab nws yuav pab peb.” Zoo ib yam li cov Khixatia thaum ub, cov kwvtij no ua siab tawv qhawv thiab rau siab ntso ua lawv tes haujlwm rau qhov lawv ntseeg tias Vajtswv lub hwj huam dawb huv yuav pab lawv mus tshaj tawm rau txhua haiv neeg. Niaj hnub nimno los peb ntseeg li ntawd thiab.

8, 9. Yehauvas lub koom haum tau ua li cas los pab peb tshaj tawm txoj xov zoo?

⁸ Yehauvas lub koom haum tsim ntau yam los pab peb mus tshaj tawm txoj xov zoo. Xws li yav tas los peb muaj zaj yeeb yaj kiab ua txog ntuj tsim teb raug (Photo-Drama of Creation), lub tshuab paj taub, lub tsheb muaj paj taub, xov tooj cua, ntaub ntawv Vajlugkub, thiab nimno peb muaj ntau yam nyob hauv koos pis tawj (computer) thiab saum huab saum cua. Vajtswv lub koom haum muab peb tej ntaub ntawv Vajlugkub txhais ua ntau yam lus dua yav tas los. Lub koom haum ua li no rau qhov Yehauvas tsis xaiv ntsej xaiv muag. Nws xav kom sawvdaws hnov txoj xov zoo ua lawv yam lus. Nws twb hais lawm tias txoj xov zoo yuav muab coj mus tshaj tawm rau txhua haiv  neeg txhua xeem thiab txhua yam lus huv tibsi.​—Tshwmsim 14:6, 7.

⁹ Peb yuav mus tshaj tawm li cas rau cov uas peb ntsib tsis tau tom tsev vim lawv nyob tej tsev uas muaj ntau tshooj lossis muaj rooj vag xauv? Yehauvas pab nws lub koom haum qhib lwm txoj hau kev mus tshaj tawm rau lawv. Xyoo 2001 Pab Uas Ntaus Thawj tso cai rau cov kwvtij nkauj muam nyob Fab Kis teb teeb rooj teeb laub kom neeg pom peb tej ntaub ntawv. Tom qab ntawd Pab Uas Ntaus Thawj kuj tso cai rau lwm qhov chaw mus tshaj tawm li ntawd thiab. Muaj li cas xwb? Nyob rau xyoo 2011 tebchaws U.S.A. tau sim teeb rooj teeb laub tshaj tawm rau thaj chaw uas muaj neeg coob dua kev hauv Nus Yauj Xiti (New York City). Xyoo ntawd peb tseb tau 102,129 phau ntawv thiab 68,911 Phau Tsom Faj thiab phau Tsim Dheev! Thiab muaj 4,701 tus neeg xav kawm Vajlugkub! Qhov no qhia rau peb tias Yehauvas lub hwj huam dawb huv yeej pab peb ua tes haujlwm no. Pab Uas Ntaus Thawj thiaj tso cai rau cov kwvtij nkauj muam thoob ntiajteb mus teeb rooj teeb laub tshaj tawm.

10. Peb yuav ua li cas peb thiaj hajyam txawj mus tshaj tawm thiab mus qhia Vajlugkub?

¹⁰ Peb yuav ua dabtsi xwb? Tom kev sib txoos Yehauvas cob qhia kom peb txawj mus tshaj tawm. Yog li ntawd peb yuav tsum ua li nws cob qhia peb. Nco ntsoov mus tshaj tawm nrog koj pawg. Cov kwvtij nkauj muam hauv koj pawg yuav pab tau koj txawj tshaj tawm ntxiv thiab lawv tus qauv zoo yuav txhawb tau koj zog. Txawm nyuaj npaum li cas los rau siab ntso tshaj tawm txoj xov zoo. Tes haujlwm no yog Vajtswv li ces zoo li nqi Vajlugkub rau zaj kawm no hais, peb ua tau Vajtswv tes haujlwm tsis yog vim peb lub peevxwm tiamsis yog vim muaj Vajtswv lub hwj huam dawb huv pab peb.​—Xakhaliyas 4:6.

11. Nyob thawj 100 xyoo, pab uas ntaus thawj ua li cas Vajtswv cov neeg thiaj nyob tau ua ib pab ib pawg thiab muaj kev sib haum xeeb?

¹¹ Nyob thawj 100 xyoo, pab uas ntaus thawj hauv Yeluxalees rau siab ntso pab kom Vajtswv cov neeg nyob tau ua ib pab ib pawg thiab muaj  kev sib haum xeeb. (Tes Haujlwm 2:42) Xws li xyoo 49 muaj cov Khixatia coob tus sib cam txog qhov uas ua kevcai txiav. Yog lub koom txoos tsis muaj kev sib haum xeeb ces yuav tsis yoojyim rau lawv mus tshaj tawm txoj xov zoo. Pab uas ntaus thawj thiaj sab laj txog qhov no. Txawm cov tubtxib thiab cov txwj laus yog neeg Yudais los lawv tsis ua raws li cov Yudais tej kev lig kevcai lossis ua raws li cov uas pheej yuam lawv tej kev lig kevcai rau lwm tus. Lawv ua zoo tshawb Vajtswv Txojlus thiab thov kom Vajtswv lub hwj huam dawb huv pab lawv. (Tes Haujlwm 15:1, 2, 5-20, 28) Lub hwj huam dawb huv pab lawv txiav txim tau zoo. Yehauvas thiaj foom koob hmoov rau lub koom txoos nyob sib haum xeeb thiab rau siab ntso mus tshaj tawm.​—Tes Haujlwm 15:30, 31; 16:4, 5.

12. Ua cas peb thiaj paub tias Yehauvas cov neeg nyob tau ua ib pab ib pawg thiab muaj kev sib haum xeeb hauv Yehauvas lub koom haum?

¹² Nyob rau peb tiam, Yehauvas lub koom haum tseem pab kom Vajtswv cov neeg nyob tau ua ib pab ib pawg thiab muaj kev sib haum xeeb. Muaj ib zaj hauv Phau Tsom Faj lub 11 Hlis tim 15 xyoo 1895 uas yog muab los ntawm 1 Kauleethaus 14:40 hais tias: “Cov tubtxib sau ntawv rau cov koom txoos ntau zaus kom txhua yam lawv ua lawv yuav tsum ua kom zoo thiab muaj chaw txawb chaw rau . . . Yog li ntawd yeej zoo rau peb ua raws li ‘Vajtswv txojlus uas thaum ub luag muab sau tseg rau hauv ntawv rau peb’ lawm.” (Loos 15:4) Yehauvas lub koom haum nimno los yeej tseem rau siab ntso pab kom lub koom txoos Khixatia nyob tau ua ib pab ib pawg thiab muaj kev sib haum xeeb li cov Khixatia thaum ub. Muab piv txwv li no: Yog koj yuav mus xyuas ib lub koom txoos tshiab, txawm yuav nyob lub tebchaws twg los koj yeej paub tias lawv yuav kawm Phau Tsom Faj twg thiab yuav kawm li cas. Koj thiaj li tsis ntshai thiab tsis txaj muag mus koom lawv. Tsuas yog Vajtswv lub hwj huam dawb huv xwb thiaj pab tau Vajtswv cov neeg koom ua tau ib lub siab ib lub ntsws.​—Xefaniyas 3:9.

13. Yakaunpaus 3:17 pab peb tshuaj peb tus kheej li cas?

¹³ Peb yuav ua li cas xwb? Yehauvas xav kom nws cov neeg ‘tsis txhob cia ib yam dabtsi ua rau lawv nyob tsis taus ua ke.’ (Efexus 4:1-3) Sim xav seb peb puas pab txhawb kom  lub koom txoos muaj kev sib haum xeeb? Peb puas mloog cov uas saib xyuas lub koom txoos lus? Yog peb tuav ib tes haujlwm hauv lub koom txoos cov kwvtij nkauj muam puas tso siab tau rau peb? Peb puas tuaj kev sib txoos kom ntxov? Peb puas nyiam pab lwm tus? (Nyeem Yakaunpaus 3:17.) Yog peb pom tias muaj tej yam uas peb yuav tau hloov ces thov Vajtswv lub hwj huam dawb huv pab peb. Yog peb ua li no cov kwvtij nkauj muam yuav ncawg peb thiab saib peb muaj nqis.

14. Raws li Kaulauxais 1:9, 10, Yehauvas cob qhia cov Khixatia thaum ub li cas?

¹⁴ Nyob thawj 100 xyoo, Yehauvas zoo siab qhia nws cov neeg. (Phau Ntawv Nkauj 32:8) Nws xav kom nws cov neeg los paub nws, muaj kev hlub rau nws, thiab muaj txojsia nyob ua nws cov metub menyuam mus ib txhis. Yog nws tsis cob qhia lawv ces lawv yeej ua tsis tau li ntawd. (Yauhas 17:3) Yehauvas siv lub koom txoos Khixatia thaum ub los cob qhia nws cov neeg. (Nyeem Kaulauxais 1:9, 10.) Thiab Vajtswv lub hwj huam dawb huv uas Yexus cog lus tseg rau nws cov thwjtim kuj pab lawv to taub Vajtswv Txojlus thiab pab lawv nco qab tej Yexus qhia lawv uas lawv muab sau cia rau hauv phau Mathais, Malakaus, Lukas thiab Yauhas. (Yauhas 14:16) Tej uas lawv paub no txhawb tau lawv txojkev ntseeg, kom lawv muaj kev hlub rau Vajtswv, nws tus Tub, thiab kom lawv ib leeg txawj hlub ib leeg.

15. Koj pom Yehauvas cov lus hauv Yaxayas 2:2, 3 muaj tiav rau peb tiam no li cas?

¹⁵ Nyob rau peb tiam no, Yehauvas twb hais lawm tias lub sijhawm kawg, ntau haiv neeg yuav ‘sau nthwv tuaj rau saum Vajtswv lub roob’ nrog Vajtswv cob tub qhe mloog Vajtswv tej lus qhuab qhia. (Nyeem Yaxayas 2:2, 3.) Peb pom tias nqi Vajlugkub no yeej muaj tiav rau peb tiam no. Qhov uas peb pe hawm Yehauvas zoo tshaj tej kev pe hawm cuav huv tibsi.  Thiab Yehauvas qhia peb ntau yam txog phau Vajlugkub! (Yaxayas 25:6) Nws siv tus qhev ncaj thiab ntse los cob qhia peb. Tus qhev ncaj thiab ntse siv ntau yam xws li tej zaj kawm, tej lus qhuab qhia, thiab tej yeeb yaj kiab los pab peb to taub phau Vajlugkub. (Mathais 24:45) Peb xav ib yam li Yauj tus phoojywg Elihus hais no: ‘Vajtswv yog tus xibhwb uas zoo tshaj tej xibhwb huv tibsi.’​—Yauj 36:22.

16. Peb yuav tau ua li cas Yehauvas tej lus cob qhia thiaj pab tau peb?

¹⁶ Peb yuav ua li cas xwb? Vajtswv lub hwj huam yuav pab kom peb muab tej uas peb kawm hauv Vajtswv Txojlus coj los siv rau peb lub neej. Thov Vajtswv li tus sau nkauj thov no: “Tus TSWV [“Yehauvas,” NWT ], thov koj qhia kom kuv paub ua raws li koj lub siab nyiam, kuv yuav hwm koj ntawm lub siab ncaj ncees; thov pub kom kuv muaj lub siab dawb paug pehawm koj.” (Phau Ntawv Nkauj 86:11) Rau siab ntso kawm tej ntaub ntawv Vajlugkub uas Yehauvas lub koom haum npaj rau peb. Peb yeej xav kom peb paub phau Vajlugkub tiamsis qhov tseem ceeb tshaj peb yuav tsum ntseeg tej uas peb nyeem thiab muab coj los siv hauv peb lub neej. Yehauvas lub hwj huam yuav pab kom peb ua tau li ntawd. Tsis tas li ntawd xwb peb yuav tau txhawb peb cov kwvtij nkauj muam thiab, rau qhov lawv yeej yog peb ib tse neeg. (Henplais 10:24, 25) Thov Vajtswv lub hwj huam pab kom peb teb tau zoo thaum mus kev sib txoos thiab kom peb npaj tau zoo rau ib zaj kawm lossis ib zaj lus qhuab qhia. Yog peb ua li no ces peb qhia tias peb hlub Yehauvas hlub nws tus Tub thiab hlub Yehauvas cov neeg.​—Yauhas 21:15-17.

17. Peb yuav txhawb Yehauvas lub koom haum li cas?

¹⁷ Kav tsij rau siab ntso txhawb Yehauvas lub koom haum. Tshuav tsis ntev xwb ces Yehauvas lub koom haum yuav yog tib lub uas nyob hauv ntiajteb no lawm xwb. Hlub txhua leej txhua tus ib yam li Vajtswv hlub es qhia txoj xov zoo rau txhua tus uas koj ntsib. Txhawb kom lub koom txoos nyob tau ua ib pab ib pawg thiab muaj kev sib haum xeeb. Mloog peb tus Xibhwb uas zoo tshaj plaws lus es kawm txhua yam uas Vajtswv lub koom haum npaj rau peb. Yog peb ua li no ces thaum Vajtswv rhuav tshem Xatas lub qab ntuj peb yuav tsis ntshai tiamsis peb yuav ua tau siab tawv qhawv sawv ntseg ntsees nrog cov uas muab siab npuab Yehauvas lub koom haum.