1. Ua cas peb thiaj paub tias peb nyob rau tiam kawg lawm?

PUAS yog koj yug tom qab xyoo 1914? Yog koj yug tom qab xyoo 1914 ces koj yeej loj hlob rau tiam kawg. (2 Timautes 3:1) Yexus twb hais ua ntej lawm tias yuav muaj xwm txheej li cas rau tiam kawg. Peb txhua tus yeej hnov xov xwm txog kev tsov kev rog, kev tshaib kev nqis, av qeeg, kev muaj mob muaj nkeeg, kev phem ntau zuj zus, thiab Yehauvas cov tibneeg raug tsim txom rau tiam uas peb nyob no. (Mathais 24:3, 7-9, 12; Lukas 21:10-12) Tsis tas li ntawd xwb, tibneeg tiam no los kuj coj raws li tus tubtxib Paulus tej lus faj lem thiab. (Mus saib lub ntsiab me “ Nimno Tibneeg Coj Li Cas.”) Peb yog Yehauvas Cov Timkhawv, peb yeej paub tias peb nyob rau tiam kawg lawm tiag.​—Mikhas 4:1.

2. Peb yuav teb 2 lo lus nug twg?

² Txij xyoo 1914 los txog nimno, yeej ntev heev lawm. Yog li ntawd, peb yeej nyob rau lub sijhawm uas tiam kawg twb yuav xaus lawm. Vim lub sim ceeb no twb yuav dua mus peb xav paub tias: Yuav muaj dabtsi tshwm sim rau lub sijhawm uas tiam kawg yuav xaus? Thiab ua ntej ntawd, Yehauvas xav kom peb ua dabtsi?

3. Raws li lo lus faj lem hauv 1 Thexalaunikes 5:3, tej nom tswv yuav tshaj tawm li cas?

³ Phau Vajlugkub hais li no tias: “Nej yeej paub tias [“Yehauvas,” NWT ] hnub ntawd yuav los yam li tub sab tuaj hmo ntuj.” (1 Thexalaunikes 5:2, TT ) Nyob rau nqe no, “Yehauvas hnub”  yuav pib thaum luag tawm tsam “lub nroog Npanpiloos uas loj dua ntais” uas yog tag nrho tej kev ntseeg cuav thiab yuav xaus rau Amankedoos. (Tshwmsim 16:14, 16; 17:5) Ua ntej “Yehauvas hnub” los txog, tej nom tswv hauv ntiajteb yuav hais tias “peb tau zoo noj thiab tau zoo nyob kawg li lawm.” (Muaj tej phau Vajlugkub txhais nqe no hais tias: “Nyob tiaj nyob tus nyob tso siab plhuav.”) (Nyeem 1 Thexalaunikes 5:3.) Tej thaud, tej nom tswv hais li ntawd thaum lawv tham txog kev sib haum xeeb ntawm tej tebchaws. * Thaum tej nom tswv tshaj tawm tias “peb tau zoo noj thiab tau zoo nyob kawg li lawm,” yuav ua rau coob tus xav tias nom tswv yeej ua tau lub ntiajteb nyob tiaj tus lawm tiag. Tiamsis phau Vajlugkub hais tias “tamsim ntawd lawv yuav raug kev puastsuaj.”​—Mathais 24:21.

4. (1) Tseem tshuav dabtsi uas peb tsis paub txog tej nom tswv cov lus tshaj tawm tias “peb tau zoo noj thiab tau zoo nyob kawg li lawm”? (2) Peb twb paub li cas txog cov lus tshaj tawm ntawd lawm?

⁴ Peb tsis paub vim li cas tej nom tswv yuav tshaj tawm tias “peb tau zoo noj thiab tau zoo nyob kawg li lawm.” Thiab peb tsis paub xyov lawv yuav tshaj tawm ib qho zuj zus los yuav ua tib zaug tshaj tawm rau sawvdaws. Txawm lawv yuav tshaj tawm li cas los xij, peb yuav tsis qaug quav rau cov lus ntawd rau qhov peb paub tias tej nom tswv yeej ua tsis tau kom lub ntiajteb muaj kev thaj yeeb. Phau Vajlugkub qhia tias thaum peb hnov cov lus tshaj tawm ntawd ces “Yehauvas hnub” twb yuav pib!

5. Ib Thexalaunikes 5:4-6 pab kom peb npaj tau rau “Yehauvas hnub” li cas?

⁵ Nyeem 1 Thexalaunikes 5:4-6. Paulus qhia tias peb yuav tsum ua li cas peb thiaj npaj tau rau “Yehauvas hnub.” Nws hais tias peb yuav tsum “tsis txhob tsaug zog li lwm tus” tiamsis “ceevfaj zov tos.” Xws li peb yuav tsum ceev faj tsis txhob tuaj ib roog nom tswv twg tog li thiab tsis txhob koom nrog tej nom tswv ua txij tog txij peg. Yog peb nrog lawv ces lawv yuav rub tau peb mus “ua raws li neeg ntiajteb ua.” (Yauhas 15:19) Peb paub tias tsuas yog Vajtswv lub Nceeg Vaj nkaus xwb thiaj li yuav ua tau kom lub ntiajteb no muaj kev thaj yeeb.

6. Peb yuav tsum pab tibneeg li cas, thiab yog vim li cas?

⁶ Tsis yog peb yuav ceev faj zov tos peb xwb tiamsis peb kuj yuav tsum pab lwm tus los paub phau Vajlugkub tej lus faj lem txog lub ntiajteb no thiab. Peb yuav tsum nco ntsoov tias thaum lub sijhawm uas txom nyem kawg nkaus los txog lawd, yuav lig dhau rau tibneeg los teev tiam Yehauvas. Yog vim li ntawd thiaj tseem ceeb heev rau peb mus ua tes haujlwm tshaj tawm tamsim no. *

7. Yehauvas xav kom peb ua dabtsi tamsim no?

⁷ Yehauvas xav kom peb rau siab ntso mus tshaj tawm txoj xov zoo rau qhov “Yehauvas  hnub” twb los yuav txog. Yog li ntawd peb yuav tsum tshuaj xyuas peb tus kheej seb peb puas “rau siab ntso ua tus Tswv tes haujlwm.” (1 Kauleethaus 15:58) Thaum Yexus hais txog tej xwm txheej uas yuav tshwm sim rau tiam kawg no nws kuj hais ntxiv tias nws cov thwjtim yuav ua dabtsi. Nws hais tias lawv “yuav tsum . . . mus qhia Txojmoo Zoo rau txhua haivneeg ua ntej tso.” (Malakaus 13:4, 8, 10; Mathais 24:14) Txhua zaus uas koj mus tshaj tawm txoj xov zoo, twb yog koj pab ua kom cov lus faj lem no muaj tiav ntag!

8. Peb tes haujlwm mus tshaj tawm txoj xov zoo txog Vajtswv lub Nceeg Vaj mus zoo li cas lawm xwb?

⁸ Peb tes haujlwm mus tshaj tawm txoj xov zoo txog Vajtswv lub Nceeg Vaj mus zoo li cas lawm xwb? Nyob rau xyoo 1914 tsuas muaj 5,155 tus tshaj tawm hauv 43 lub tebchaws xwb. Tiamsis nyob rau tiam kawg no cov tshaj tawm muaj coob zuj zus tuaj lawm. Nimno muaj li 8.5 plhom tus tshaj tawm hauv 240 lub tebchaws diam! Peb pom tias txhua txhua xyoo yeej muaj neeg coob zuj zus los hnov txog txoj xov zoo. Txawm li ntawd los, peb tes haujlwm tsis tau tiav. Peb yuav tsum rau siab ntso mus tshaj tawm tias tsuas yog Vajtswv lub Nceeg Vaj xwb, thiaj li yuav daws tau tibneeg tej teebmeem.​—Phau Ntawv Nkauj 145:11-13.

9. Vim li cas peb yuav tsum rau siab ntso mus tshaj tawm txoj xov zoo txog lub Nceeg Vaj?

⁹ Peb yuav ua tes haujlwm tshaj tawm txoj xov zoo mus txog thaum Yehauvas hais tias tiav lawm. Yog li ntawd, tshuav sijhawm ntev npaum li cas xwb rau tibneeg los paub txog Vajtswv Yehauvas thiab Yexus Khetos nkawd? (Yauhas 17:3) Peb tsis paub. Tiamsis peb paub tias ua ntej lub sijhawm uas txom nyem kawg nkaus los txog, cov uas muaj lub siab xib Vajtswv tseem muaj sijhawm los txais yuav qhov tseeb thiab teev tiam nws. (Tes Haujlwm 13:48, NWT ) Peb yuav ua li cas pab tau lawv ua ntej lig dhau lawm?

10. Yehauvas muab dabtsi los pab peb qhia qhov tseeb rau lwm tus?

¹⁰ Yehauvas lub koom haum tau tsim ntau yam los pab peb mus qhia qhov tseeb rau lwm tus. Xws li thaum peb mus Kev Sib Txoos 1, peb kawm kom paub nrog tibneeg tham thawj zaug peb ntsib lawv thiab tham thaum peb rov mus xyuas lawv. Tsis tas li ntawd xwb, peb kuj kawm kom paub qhia Vajlugkub rau lwm tus thiab. Yehauvas lub koom haum kuj tsim tau Cov Twj Mus Ua Vajtswv Tes Num los pab peb thiab. Cov twj no pab tau peb li cas?

•   Pab kom peb txawj nrog neeg tham,

• txawj hais lus raug siab,

• txawj hais kom tibneeg xav kawm ntxiv txog phau Vajlugkub,

• txawj qhia qhov tseeb hauv phau Vajlugkub rau lawv, thiab

• caw cov uas nyiam Vajlugkub mus xyuas peb lub vej xaij thiab peb lub Tsev Nceeg Vaj.

Tej twj no yeej zoo kawg li, tiamsis yog peb tsis siv ces yuav pab tsis tau lwm tus. * Yog li ntawd, tom qab peb nrog ib tug twg tham, zoo rau peb muab ib daim ntawv tseb lossis ib phau ntawv rau nws nyeem ua ntej peb rov mus xyuas nws. Peb yuav tsum rau siab ntso mus tshaj tawm npaum li peb mus tau txhua lub hlis.

11. Vim li cas thiaj tsim kom muaj tej zaj Kawm Vajlugkub Hauv Is Taws Nej?

¹¹ Ib yam ntxiv uas Yehauvas siv los pab tibneeg paub qhov tseeb yog tej zaj Kawm Vajlugkub Hauv Is Taws Nej (Online Bible Study Lessons) hauv jw.org^®. Vim li cas thiaj tsim muaj tej zaj kawm no? Txhua lub hlis, muaj neeg coob coob thoob plaws ntiajteb tshawb nrhiav kev kawm Vajlugkub hauv Is Taws Nej. Tej zaj kawm hauv peb lub vej xaij pab tau tibneeg los paub qhov tseeb txog phau Vajlugkub. Tsis tas li ntawd xwb, kuj muaj tej tug uas peb ntsib uas muaj ntsis txaj muag kawm Vajlugkub. Yog li ntawd, kuj zoo rau peb muab lub vej xaij no rau lawv saib lossis xa tej zaj kawm no hauv e-mail lossis hauv xov tooj mus rau lawv. Yog tsis tau muaj ua nws yam lus, qhia kom nws mus saib lwm yam lus uas nws paub. *

12. Kev Kawm Vajlugkub Hauv Is Taws Nej muaj tej ntsiab lus twg?

¹² Kev Kawm Vajlugkub Hauv Is Taws Nej muaj tej ntsiab lus no: “Phau Vajlugkub Thiab Tus Tshoov Neeg Sau Phau Vajlugkub,” “Cov Neeg Tseem Ceeb Hauv Phau Vajlugkub,” thiab “Phau Vajlugkub Txoj Xov Zoo.” Cov ntsiab lus no qhia txog dabtsi xwb?

• Phau Vajlugkub yuav pab tau koj li cas

• Yehauvas, Yexus, thiab cov tubtxib saum ntuj yog leejtwg

• Vim li cas Vajtswv thiaj tsim muaj tibneeg

• Vim li cas thiaj muaj kev txom nyem thiab kev lim hiam

Tej zaj kawm kuj qhia seb Yehauvas yuav . . .

• rhuav tshem kev txom nyem thiab kev ploj kev tuag li cas,

• tsa cov tuag sawv rov los muaj sia nyob li cas, thiab

• muab nws lub Nceeg Vaj los hloov tibneeg tej tseem fwv li cas.

13. Thaum ib tug kawm tas cov zaj hauv lub vej xaij, nws puas tseem yuav tau kawm Vajlugkub nrog ib tug Timkhawv thiab? Piav seb.

¹³ Tej zaj kawm Vajlugkub hauv peb lub vej xaij yuav tsis hloov peb txojkev kawm Vajlugkub nrog lwm tus. Yexus tau muab tes haujlwm mus coj lwm tus los ua nws cov thwjtim rau peb ua. Peb cia siab tias cov uas kawm Vajlugkub hauv peb lub vej xaij yuav nyiam tej uas lawv kawm thiab yuav xav kawm ntxiv. Thiab peb vam tias lawv yuav pib kawm Vajlugkub nrog ib tug Timkhawv. Txhua zaus nws kawm tas ib zaj, peb yeej caw nws mus rau npe kawm Vajlugkub nrog ib tug Timkhawv. Thoob plaws lub ntiajteb muaj li 230 leej rau npe kawm Vajlugkub hauv peb lub vej xaij txhua txhua hnub. Yeej tseem ceeb heev rau lawv kawm Vajlugkub nrog Yehauvas Cov Timkhawv ib tug!

14. Raws li Yexus cov lus hauv Mathais 28:19, 20 peb yuav tsum rau siab ntso ua dabtsi thiab yog vim li cas?

¹⁴ Nyeem Mathais 28:19, 20. Thaum peb qhia Vajlugkub rau lwm tus, peb yuav tsum ua li  peb ua tau pab “lawv los ua [Yexus] cov thwjtim . . . thiab qhia kom lawv paub coj raws li txhua yam uas [Yexus] tau qhia.” Peb yuav tsum pab kom lawv pom tias tseem ceeb heev rau lawv los teev tiam Yehauvas thiab txhawb nqa nws lub Nceeg Vaj. Yog li ntawd peb yuav tsum txhawb kom lawv muab tej uas lawv kawm los siv rau lawv lub neej, muab lawv tus kheej cob rau Yehauvas, thiab ua kevcai raus dej. Ua li no lawv thiaj yuav dim Yehauvas hnub.​—1 Petus 3:21.

15. Peb tsis muaj sijhawm ua dabtsi, thiab yog vim li cas?

¹⁵ Raws li peb tau kawm lawm, tshuav tsis ntev xwb lub sim ceeb no twb yuav kawg. Vim li ntawd, peb tsis muaj sijhawm mus qhia Vajlugkub rau cov uas tsis kam hloov lawv lub neej los ua Yexus ib tug thwjtim. (1 Kauleethaus 9:26) Tseem ceeb heev rau peb mus tshaj tawm rau cov uas tsis tau hnov txoj xov zoo txog lub Nceeg Vaj ua ntej lig dhau lawm.

16. Raws li Tshwmsim 18:2, 4, 5, 8, peb yuav tau ua li cas? (Saib cov lus hauv qab taw qhia.)

¹⁶ Nyeem Tshwmsim 18:2, 4, 5, 8. Cov nqe Vajlugkub no qhia tias tseem tshuav lwm yam uas Yehauvas xav kom nws cov tibneeg ua thiab. Txhua tus tseem Khixatia yuav tsum tsis txhob koom nrog txojkev ntseeg cuav ib qho li. Ua ntej ib tug kawm Vajlugkub los paub qhov tseeb, tej zaum nws yog ib tug tswv cuab ntawm ib txojkev ntseeg cuav twg. Tej zaum nws kuj mus koom lawv tej kev sib txoos, nrog lawv ua ntau tsav ntau yam, lossis tso nyiaj txiag txhawb lawv. Yog nws xav ua ib tug tshaj tawm ua ntej ua kevcai raus dej nws yuav tsum rho npe tawm thiab tsis txhob muaj ib feem dabtsi nrog kev ntseeg cuav li lawm. *

17. Ib tug Khixatia yuav tsum tsis txhob ua tej haujlwm twg thiab yog vim li cas?

¹⁷ Ib tug tseem Khixatia yuav tsum tsis txhob ua ib txoj haujlwm twg uas muaj feem txuam nrog kev ntseeg cuav. (2 Kauleethaus 6:14-17) Nws yuav tsis mus ua haujlwm hauv ib lub tsev teev ntuj lossis ib lub tshawj. Tsis tas li ntawd xwb, ib tug tseem Khixatia uas ua haujlwm rau lwm tus, yuav tsum tsis txhob mus ua haujlwm ntau dhau rau hauv tej tsev teev ntuj. Yog nws ua haujlwm rau nws tus kheej, nws tsis txhob mus twv lossis txais ib txoj haujlwm uas muaj feem nrog kev ntseeg cuav. Vim li cas peb yuav tsum txiav txim siab tuag nthi tias peb yuav tsis ua tej no? Rau qhov Vajtswv saib tias kev ntseeg cuav tej lus qhuab qhia thiab tej uas lawv ua tsis huv. (Yaxayas 52:11) Peb thiaj  yuav tsum tsis txhob muaj ib feem nrog lawv hlo li. *

18. Ib tug kwvtij mloog phau Vajlugkub tej hauv paus ntsiab lus txog kev ua haujlwm li cas?

¹⁸ Ntau xyoo dhau los lawm, muaj ib tug kws kho tsev hu tuaj rau ib tug txwj laus seb nws puas kam pab ua ib txoj haujlwm me me hauv ib lub tshawj. Tus kws kho tsev yeej paub tias tus kwvtij tsis kam ua haujlwm kho tej tshawj, tiamsis zaum no nws nrhiav tsis tau leejtwg ua. Txawm li ntawd los tus kwvtij tsis kam txais txoj haujlwm ntawd. Lub limtiam tom qab, ib daim ntawv xov xwm tso tawm ib daim duab muaj ib tug txivneej muab tus ntoo khaublig ntsia rau ntawm lub tshawj. Yog tus txwj laus tseem txais ua txoj haujlwm ntawd, ces tej zaum nws yuav yog tus uas nyob hauv daim duab ntawd ntag. Xav seb nws yuav poob ntsej muag npaum cas thiab Yehauvas yuav tu siab npaum li cas.

19, 20. (1) Peb kawm tau li cas? (2) Peb yuav kawm dabtsi ntxiv?

¹⁹ Phau Vajlugkub qhia tias tsis ntev tom ntej no xwb ib lo lus faj lem tseem ceeb yuav muaj tiav. Lo lus faj lem no hais tias tej nom tswv yuav tshaj tawm tias “peb tau zoo noj thiab tau zoo nyob kawg li lawm.” Vim muaj Yehauvas qhia peb, peb thiaj paub tias tej nom tswv hauv ntiajteb yeej coj tsis tau kev thaj yeeb los rau tibneeg li. Ua ntej nom tswv tshaj tawm li no thiab kev puas tsuaj los txog, Yehauvas xav kom peb ua dabtsi? Yehauvas xav kom peb rau siab ntso mus tshaj tawm txoj xov zoo txog lub Nceeg Vaj thiab mus coj tibneeg los ua thwjtim. Tsis tas li ntawd xwb peb yuav tsum tsis txhob muaj feem koom nrog kev ntseeg cuav ib qho li. Yog li ntawd peb yuav tsum rho npe tawm ntawm tej kev ntseeg cuav thiab tsis txhob ua tej txoj haujlwm uas txuam nrog kev ntseeg cuav.

²⁰ Tseem tshuav lwm yam uas yuav tshwm sim rau lub sijhawm uas tiam kawg yuav xaus. Thiab tseem tshuav lwm yam uas Yehauvas xav kom peb ua. Tej ntawd yog dabtsi? Thiab peb yuav npaj peb tus kheej li cas rau tej uas yuav tshwm sim tsis ntev tom ntej no? Zaj tom ntej, peb yuav teb 2 lo lus nug no.