1. Nim no tib neeg feem coob kheev qhuas leej twg xwb?

 NIM NO tib neeg tsuas xav txog lawv tus kheej xwb. Xws li ib txhia muab lawv lub neej tso tawm hauv tej vej xaij kom tib neeg paub thiab qhuas txog tej uas lawv tau ua. Tiam sis niaj hnub nim no tsis muaj pes tsawg leej xav qhuas Vajtswv Yehauvas. Nyob hauv zaj no peb yuav kawm tias kev qhuas Yehauvas yog li cas tiag, vim li cas peb ho xav qhuas Yehauvas, peb yuav ua li cas thiaj qhuas tau Yehauvas li tsim nyog qhuas, thiab Yehauvas yuav qhuas nws lub npe li cas rau yav tom ntej.

KEV QHUAS YEHAUVAS YOG LI CAS TIAG?

2. Yehauvas tau ua dab tsi ntawm lub Roob Xinais? (Saib daim duab ntawm lub khaum.)

² Phau Vajlugkub qhia tshwm tias Vajtswv Yehauvas muaj hwj chim kawg nkaus li. Tsis tau ntev tom qab Yehauvas cawm nws haiv neeg dim cev qhev hauv teb chaws Iyiv, cov Ixayees txawm mus sawv ntawm taw Roob Xinais mloog seb Yehauvas yuav hais li cas rau lawv. Ua ciav txawm muaj pa ncho auv niab tsaus nti puv nkaus saum Roob Xinais, lub roob co ua zog koog, xob nrov nroo ntws cig laim liab pes vog, thiab ib lub suab raj txawm nrov heev tuaj. (Khiav Dim 19:16-18; 24:17; Phau Ntawv Nkauj 68:8) Thaum cov Ixayees pom thiab hnov tej no, ntshe ua rau lawv phim hwj thiab qhuas Vajtswv Yehauvas kawg nkaus vim nws muaj hwj chim heev.

3. Qhuas Yehauvas yog li cas tiag?

³ Ua li peb puas muaj rab peev xwm qhuas tau Yehauvas? Peb yeej qhuas tau nws. Ib qho uas peb qhuas tau Yehauvas yog peb piav txog nws lub hwj chim thiab nws tej yeeb yam. Tsis tas li ntawd, thaum qhia rau lwm tus tias nws tau pab peb li cas rau li cas twb yog peb qhuas nws ntag. (Yaxayas 26:12) Vaj Ntxwv  Daviv tso tau ib tug yam ntxwv rau peb xyaum kom txawj qhuas Yehauvas. Thaum Daviv thov Yehauvas tab meeg cov Ixayees, nws hais rau Yehauvas tias, ‘Yehauvas, koj yog tus uas muaj zog nchav, muaj hwjchim, muaj tshwjchim ci ntsa iab, yog tus uas zoo kawg nkaus thiab yog tus nyob mus ibtxhis. Txhua yam uas nyob saum nruab ntug thiab hauv ntiajteb no puavleej yog koj li.’ Tom qab Daviv thov tas, “tagnrho cov pejxeem uas tuaj sib sau ua ke ntawd thiaj . . . qhuas [Yehauvas].”​—1 Xwmtxheej Vajntxwv 29:11, 20.

4. Yexus qhuas Yehauvas li cas?

⁴ Thaum Yexus nyob hauv ntiaj teb, qhov uas nws qhuas nws Leej Txiv yog nws qhia rau tib neeg tias nws Txiv yog tus muab tej hwj chim rau nws ua txuj ci. (Malakaus 5:18-20) Tsis tas li ntawd, Yexus hais tej yam zoo zoo txog nws Txiv rau tib neeg paub. Muaj ib hnub thaum Yexus tab tom qhia hauv lub tsev sab laj, muaj ib tug poj niam uas raug dab tau 18 lub xyoos kuj nyob ntawd mloog thiab. Dab ua rau nws khoov duav sawv tsis taus ntseg li. Nws ua neej txom nyem ntsuav. Yexus hlub tus poj niam ntawd heev, nws thiaj mus rau ntawm tus poj niam ntawd thiab hais tias, “Koj twb dim koj tus mob lawm.” Yexus txawm tsa tes npuab tus poj niam ntawd ces tus poj niam ntawd “txawm sawv tau ntseg tam sid thiab tsa ncauj qhuas Vajtswv.” (Lukas 13:10-13) Yeej tsim nyog tus poj niam qhuas Yehauvas li ntawd. Peb los yuav tau qhuas Yehauvas tib yam nkaus.

VIM LI CAS PEB HO XAV QHUAS YEHAUVAS?

5. Ua li cas peb thiaj hwm Yehauvas?

⁵ Thaum peb hwm Yehauvas yuav rub tau peb los qhuas nws. Tos peb hwm Yehauvas los vim nws yog tus muaj hwj chim loj kawg nkaus thiab nws yog tus muaj zog loj zog nchav. (Phau Ntawv Nkauj 96:4-7) Tsis tas li ntawd, txhua yam uas Vajtswv tsim yeej nthuav tshwm nws lub tswv yim. Nws yog lub hauv paus siav uas pab kom peb ciaj taus ua neeg. (Tshwmsim 4:11) Nws yuav tsis tso peb pov tseg ib zaug li. (Tshwmsim 15:4) Txhua yam uas nws npaj tseg nws yeej yuav ua kom muaj tiav, thiab nws cog lus li cas lawd nws yeej yuav ua kom tiav. (Yausuas 23:14) Twb yog vim li no Yelemis tus uas cev Yehauvas lus thiaj hais li no txog Yehauvas tias: “Koj yog tus uas tsimnyog peb hwm. Txhua haivneeg tej neeg txawj ntse lossis lawv tej vajntxwv tsis muaj ib tug zoo npaum li koj.” (Yelemis 10:6, 7) Raws li hais no yeej tsim nyog rau peb hwm peb Leej Txiv Yehauvas. Tiam sis tsis yog peb hwm Yehauvas xwb tiam sis peb hlub nws tag nrho peb lub siab lub ntsws.

6. Vim li cas peb thiaj hlub Yehauvas?

⁶ Thaum peb hlub Yehauvas yuav rub tau peb los qhuas nws. Yehauvas muaj ntau yam yeeb yam qhuas lug. Xws li nws muaj kev khuv leej thiab kev hmov tshua txog lwm tus. (Phau Ntawv Nkauj 103:13; Yaxayas 49:15) Nws paub tej uas peb raug thiab kuj mob nws siab heev. (Xakhaliyas 2:8) Nws kuj pab kom peb los paub nws thiab nrog nws sib raug zoo tam li ib tug phooj ywg. (Phau Ntawv Nkauj 25:14; Tes Hauj Lwm 17:27) Nws txo hwj chim heev, “nws nyob saud saib tuaj rau lub ntuj thiab lub ntiajteb. Nws tsa cov neeg pluag sawv hauv av los.” (Phau Ntawv Nkauj 113:6, 7) Vim Yehauvas muaj tej yeeb yam no peb thiaj li tsa ncauj hlo los qhuas nws.​—Phau Ntawv Nkauj 86:12.

7. Peb muaj rab peev xwm qhia rau tib neeg li cas?

⁷ Thaum peb xav kom lwm tus paub Yehauvas ces yuav rub tau peb qhuas nws. Coob leej ntau tus tib neeg tsis tau paub qhov tseeb txog Yehauvas vim Xatas dag ntau yam txog Yehauvas ua rau tib neeg mus ntseeg tej lus dag ntawd. (2 Kauleethaus 4:4) Xatas dag tib  neeg tias Yehauvas yog ib tug Vajtswv uas tsiv tsaim, tsis quav ntsej txog leej twg, thiab ua rau tib neeg nyob thoob plaws ntiaj teb raug kev txom nyem. Tiam sis peb tsis ntseeg tej lus haub ntxias ntawd! Peb muaj rab peev xwm qhia tau rau tib neeg tias Vajtswv tsis zoo li ntawd xwv lawv thiaj los qhuas nws tib yam nkaus li peb. (Yaxayas 43:10) Phau Ntawv Nkauj 96 tsuas hais tsi ntsees txog qhov uas qhuas Yehauvas li cas rau li cas. Cia peb mam ua tib zoo kawm seb yuav qhuas Yehauvas li cas thiaj tsim nyog.

YUAV UA LI CAS THIAJ QHUAS TAU YEHAUVAS LI TSIM NYOG?

8. Muaj ib yam uas peb qhuas tau Yehauvas yog li cas? (Phau Ntawv Nkauj 96:1-3)

⁸ Nyeem Phau Ntawv Nkauj 96:1-3. Tej lus peb hais txog Yehauvas qhuas tau nws. Cov nqe Vajlugkub no hais tias cia li “hu nkauj qhuas [Yehauvas],” “piav nws txojkev cawm dim rau sawvdaws mloog,” thiab “piav nws tes haujlwm tseemceeb rau txhua haivneeg tau hnov.” Tej no yog tej uas peb qhuas peb Leej Txiv tus uas nyob saum ntuj. Cov Yudais uas muab siab npuab Vajtswv thiab cov Khixatias nyob thawj 100 xyoo yeej kub siab lug qhia kom tib neeg paub txog tej uas Yehauvas tau ua rau lawv. Thiab lawv tsis pub ib yam twg ua puas tsuas rau Vajtswv lub npe. (Daniyees 3:16-18; Tes Hauj Lwm 4:29) Ua li peb yuav xyaum lawv li cas?

9-10. Koj khaws tau li cas los ntawm Lig tus yam ntxwv? (Saib daim duab.)

⁹ Cia peb mus tham txog ib tug muam npe hu ua Lig a uas nyob hauv teb chaws Yunathim Xatej (United States). Nws muaj siab tawv qhawv txheem Vajtswv lub npe ntawm nws qhov chaw ua hauj lwm. Nws nyuam qhuav txais txoj hauj lwm uas nws ua no. Yog li ntawd, txhua tus uas tuaj tshiab yuav tau piav qho me ntsis txog nws tus kheej rau sawv daws mloog. Nws thiaj tau npaj ib co duab tso txog nws lub neej tias ua Yehauvas ib tug Tim Khawv zoo npaum li cas rau li cas. Ua ntej Lig piav txog nws zaj, muaj ib tug txiv neej tham txog tias txij thaum nws yau los nws niam nws txiv yeej yog Yehauvas Cov Tim Khawv. Tus txiv neej no txawm pib thuam Yehauvas Cov Tim Khawv thiab tej yam uas lawv ntseeg. Lig hais tias: “Kuv lub siab dhia pig poog. Kuv txawm xav twj ywm tias: ‘Kuv yuav tsis ua twj ywm tiam sis kuv yuav qhia tias Yehauvas zoo npaum li cas.’”

 ¹⁰ Thaum tus txiv neej piav nws zaj tag, Lig txawm thov Yehauvas tsawg tsuag hauv nruab siab ces nws ua tib zoo hais rau tus txiv neej ntawd tias: “Kuv kuj loj hlob ntawm ib tse neeg uas ntseeg Yehauvas ib yam li koj. Tam sim no los kuv haj tseem yog Yehauvas ib tug Tim Khawv.” Txawm Lig ntshai heev los nws ua siab tus tus. Nws muab cov duab uas yog nws thiab nws cov phooj ywg lawv teev tiam Yehauvas zoo siab hlo tso rau sawv daws saib. Ces nws mam li piav qhia rau sawv daws txog nws txoj kev ntseeg. (1 Petus 3:15) Thaum Lig piav tag, tus txiv neej ntawd lub siab kuj nqig lawm thiab. Tus txiv neej nco txog thaum nws tseem yau, nws kuj zoo siab hlo nrog Yehauvas Cov Tim Khawv ua ke. Lig hais tias: “Yeej tsim nyog rau peb txheem Yehauvas lub koob lub npe vim nws yeej tsim nyog qhuas.” Raws li zaj uas hais tas no, txawm lwm tus yuav rhuav Yehauvas lub koob lub npe los peb yeej muaj rab peev xwm los qhuas thiab txheem tau.

11. Cov uas teev tiam Yehauvas ib txwm coj raws li lub hauv paus ntsiab lus ntawm Phau Ntawv Nkauj 96:8 li cas?

¹¹ Nyeem Phau Ntawv Nkauj 96:8. b Tej khoom peb muab yuav qhuas tau Yehauvas.) Cov uas teev tiam Yehauvas yeej ib txwm siv tej yam lawv muaj los qhuas Yehauvas. (Pajlug 3:9) Yav thaum ub cov Ixayees kuj nqa nyiaj txiag thiab tej khoom ub khoom no tuaj pab tsim tsa thiab kho lub tuam tsev. (2 Vajntxwv 12:4, 5; 1 Xwmtxheej Vajntxwv 29:3-9) Yexus cov thwj tim ib txhia kuj “siv lawv tej nyiaj txiag thiab qhov txhia chaw” los txhawb nqa Yexus thiab cov tub txib kom lawv thiaj muaj txawm peem. (Lukas 8:1-3) Tsis tas li ntawd, nyob rau thawj 100 xyoo cov Khixatias kuj xa nyiaj mus pab rau lwm cov Khixatias uas raug kev tshaib nqhis. (Tes Hauj Lwm 11:27-29) Tej dej siab uas peb muab niaj hnub nim no kuj qhuas tau Yehauvas.

12. Peb tej dej siab ho qhuas tau Yehauvas li cas? (Saib daim duab.)

¹² Cia peb mus tham txog ib tug yam ntxwv seb qhov uas muab dej siab ho qhuas tau Yehauvas li cas rau li cas. Nyob rau xyoo 2020, txawm muaj ntuj qhua teb nkig los raug teb chaws Zinpaves (Zimbabwe) ua rau qas txhiab qas plhom leej tsis muaj txaus noj txaus haus. Muaj ib tug muam npe hu ua Paj kuj nyob rau thaum muaj lub caij ntawd. Txawm muaj li ntawd los Paj haj tseem phwb tes tsog mus  qhia txoj xov zoo rau Hnub 3 (Wednesday) thiab Hnub 5 (Friday) tsis tu ncua. Txawm yog lub caij laij teb los nws haj tseem mus tshaj tawm txoj xov zoo tib yam nkaus li qub. Tej neeg zej zog thuam nws zom zaws tias, “Koj tsis mus laij teb ces koj yuav tsis muaj dab tsi nrog luag noj.” Tiam sis Paj txawm teb tias, “Yehauvas yeej yuav tsis tso nws cov tib neeg tseg.” Tsis ntev tom qab ntawd Yehauvas lub koom haum txawm xa zaub mov thiab tej khoom ub khoom no tuaj rau Paj. Tos Yehauvas lub koom haum pab tau Paj thiab lwm tus los twb yog vim sawv daws muab dej siab. Thaum tej neeg zej zog pom li no lawv hais rau Paj tias, “Vajtswv yeej pab koj kawg li. Peb kuj xav paub nws thiab.” Txawm muaj xya leej tuaj koom tej kev sib txoos.

13. Qhov uas peb coj cwj pwm zoo yuav qhuas tau Yehauvas li cas? (Phau Ntawv Nkauj 96:9)

¹³ Nyeem Phau Ntawv Nkauj 96:9. Peb coj cwj pwm zoo yuav qhuas tau Yehauvas. Cov pov thawj uas tuav hauj lwm hauv Yehauvas lub tuam tsev yuav tsum ntxuav tes ntxuav taw ua ntej lawv ua hauj lwm. (Khiav Dim 40:30-32) Tsis yog peb tu lub cev ntaj ntsug kom dawb huv xwb tiam sis peb yuav tsum tswj tsis txhob ua tej yam uas Yehauvas ntxub. (Phau Ntawv Nkauj 24:3, 4; 1 Petus 1:15, 16) Peb yuav tau muab “lub siab qub” tso pov tseg thiab “ua neeg tshiab.” Qhov no qhia tias peb yuav tau muab tej kev xav thiab tej cwj pwm uas tsis haum Yehauvas siab tso pov tseg. Peb yuav tau xyaum xav thiab coj ib yam li Yehauvas. (Kaulauxais 3:9, 10) Yehauvas yeej pab tau ib tug neeg phem hloov kom ua tau ib tug neeg tshiab.

14. Koj khaws tau li cas los ntawm Vam lub neej? (Saib daim duab.)

¹⁴ Cia peb kawm txog ib tug txiv neej npe hu ua Vam uas tsiv tsaim heev, luag thiaj muab nws tis npe hu ua Dab. Vim tej nws tau ua, luag thiaj teem txim muab nws tua. Thaum nws nyob hauv tsev loj cuj, Yehauvas ib tug Tim Khawv qhia Vajlugkub rau nws. Txawm Vam tau ua ntau yam phem los thaum nws kawm nws txawm hloov zuj zus thiab ua kev cai raus dej. Vam hloov tau nws tus cwj pwm zoo heev mas hnub uas lawv teem muab nws tua ua rau cov zov tsev loj cuj quaj zom zaws thaum lawv hais lus tu nws moo. Ib tug thawj hauv lub tsev loj cuj ntawd hais tias: “Yav thaud Vam yog tus phem tshaj tiam sis nim no  nws yog tus zoo tshaj.” Lub lim tiam tom qab uas Vam raug tua tuag tag lawm, cov kwv tij txawm rov qab mus sib txoos hauv lub tsev loj cuj dua. Lawv pom ib tug txiv neej uas raug txim tuaj sib txoos thawj zaug ua ke. Vim nws pom Vam lub neej, nws thiaj xav paub seb yuav ua li cas nws thiaj teev tiam tau Yehauvas. Zaj no qhia tias peb tus cwj pwm yeej ua tau rau lwm tus qhuas Yehauvas tib yam nkaus!​—1 Petus 2:12.

YEHAUVAS YUAV QHUAS NWS LUB NPE LI CAS YAV TOM NTEJ?

15. Yehauvas yuav qhuas nws lub npe li cas rau yav tom ntej? (Phau Ntawv Nkauj 96:10-13)

¹⁵ Nyeem Phau Ntawv Nkauj 96:10-13. Cov lus xaus uas hais nyob rau hauv Phau Ntawv Nkauj 96 piav tias Yehauvas yog Vaj Ntxwv thiab yog ib tug Txiav Txim uas nyiam qhov ncaj qhov ncees. Yav tom ntej Yehauvas yuav qhuas nws lub npe thaum nws muab lub nroog Npanpiloos uas loj dua ntais rhuav tshem vim tej kev ntseeg cuav ntawd tau dag ntau yam txog nws. (Tshwmsim 17:5, 16; 19:1, 2) Tej zaum thaum ntawd ib txhia uas pom, thiab yuav txiav txim siab los pe hawm Yehauvas. Thaum txog Amankedoos, Yehauvas yuav muab lub sim ceeb uas Xatas kav rhuav tshem huv tib si mus xws li cov uas tawm tsam Nws thiab tuam mom Nws lub npe. Tiam sis Yehauvas yuav cawm txhua tus uas hlub, mloog nws lus, thiab txaus siab hlo qhuas nws kom dim. (Malakaus 8:38; 2 Thexalaunikes 1:6-10) Thaum ntawd Khetos yuav kav 1,000 xyoo ces mam li muaj txoj kev sim siab zaum kawg. Tom qab ntawd, Yehauvas yuav qhia rau txhua leej txhua tus uas teev tiam nws paub hais tias nws tib leeg xwb thiaj li tsim nyog qhuas. (Tshwmsim 20:7-10) Nyob rau ncua sij hawm ntawd, “lub ntiajteb yuav puv nkaus [Yehauvas] txojkev txawj ntse thiab lub tshwjchim ib yam li muaj dej puv nkaus hiavtxwv.”​—Hanpakus 2:14.

16. Koj yuav tau sib zog ntsos ua dab tsi? (Saib daim duab.)

¹⁶ Thaum txog lub sij hawm ntawd, yuav zoo heev li vim txhua tus uas muaj sia zees nyob yuav qhuas Yehauvas tus uas tsim nyog qhuas! Tiam sis ua ntej hnub ntawd los txog, cia peb txhua leej txhua tus ua npaum li peb ua tau los qhuas Yehauvas. Yog li ntawd, Pab Uas Ntaus Thawj thiaj li xaiv Phau Ntawv Nkauj 96:8 ua nqe Vajlugkub rau xyoo 2025 uas hais tias: “Cia li qhuas Yehauvas vim nws lub npe thiaj tsim nyog qhuas.”