1. Vim li cas txhua txhua xyoo, hnub ua kev cai nco txog Yexus ho yog hnub tseem ceeb tshaj? (Lukas 22:19, 20)

 TXHUA txhua xyoo, Yehauvas cov tib neeg yeej saib hnub ua kev cai nco txog Yexus tias yog hnub uas tseem ceeb tshaj. Hnub ntawd yog hnub uas Yexus sam hwm nws cov thwj tim kom nco ntsoov ua. (Nyeem Lukas 22:19, 20.) Cia peb mus tham seb vim li cas peb ho tos tsis hnyu yuav mus koom qhov ua kev cai nco txog Yexus.

2. Tej yam twg ua rau peb tos ntsoov hnub ua kev cai nco txog Yexus?

² Thaum peb ua kev cai nco txog Yexus, pab tau kom peb nco ntsoov tias tus nqi theej txhoj tseem ceeb npaum li cas, pab kom peb ris txiaj ntsig rau qhov uas Yexus los tuag txhiv peb, thiab peb “ib leeg txhawb tau ib leeg txoj kev ntseeg.” (2 Kauleethaus 5:14, 15; Loos 1:12) Txhua txhua xyoo kuj muaj cov kwv tij nkauj muam uas tsis tuaj kev sib txoos thiab mus qhia Vajlugkub tau ntev loo lawm tuaj koom thiab. Thaum lawv tuaj es pom sawv daws tos txais lawv, kuj rub tau lawv rov qab los teev tiam Yehauvas dua. Thaum cov uas tuaj thawj zaug nyiam tej yam uas lawv pom thiab hnov ces kuj ua rau lawv xav kawm Vajlugkub. Twb yog vim li ntawd, qhov uas ua kev cai nco txog Yexus thiaj tseem ceeb ua luaj li rau peb!

3. Ua kev cai nco txog Yexus pab kom Yehauvas Cov Tim Khawv thooj siab koom ntsws li cas? (Saib daim duab.)

³ Peb tos ntsoov hnub ua kev cai nco txog Yexus vim peb paub tias cov kwv tij nkauj muam sawv daws yuav thooj siab koom ntsws ua ke li no thoob plaws ntiaj teb. Yehauvas Cov Tim Khawv yuav tuaj sib sau tom qab hnub poob, mloog ib zaj lus qhuab qhia txog tus nqi theej txhoj, hu ob zaj nkauj qhuas Vajtswv,  cev lub ncuav thiab khob cawv, thov Vajtswv plaub zaug thiab hais “amees” txhua zaus tom qab thov Vajtswv tag. Kwv lam li 24 txoos teev xwb, cov koom txoos nyob thoob plaws ntiaj teb twb ua li hais tag los no lawm.

4. Nyob rau hauv zaj kawm no peb yuav tham txog dab tsi?

⁴ Nyob rau hauv zaj kawm no, peb yuav tham txog cov lus nug no: Peb yuav npaj peb lub siab li cas ua ntej mus ua kev cai nco txog Yexus? Peb yuav mus pab lwm tus li cas? Thiab peb yuav pab cov uas tsis tuaj kev sib txoos thiab mus qhia Vajlugkub tau ntev loo lawm li cas rau li cas? Tom qab peb kawm txog tej no tas lawm ces peb yuav npaj txhij zog rau hnub ntawd.

PEB YUAV NPAJ PEB LUB SIAB LI CAS?

5. (1) Vim li cas peb yuav tau xav seb tus nqi theej txhoj muaj nqis npaum li cas? (Phau Ntawv Nkauj 49:7, 8) (2) Koj khaws tau dab tsi los ntawm zaj yeeb yaj kiab Vim Li Cas Yexus Thiaj Tuag?

⁵ Ib qho uas peb npaj tau peb lub siab mus ua kev cai nco txog Yexus yog xav seb tus nqi theej txhoj muaj nqis npaum li cas rau li cas. Xws li, txawm peb ua zaj ua ntxeev los peb yeej daws tsis tau peb tus kheej ntawm kev txaug kev txhaum thiab kev ploj kev tuag. (Nyeem Phau Ntawv Nkauj 49:7, 8; mus saib zaj yeeb yaj kiab Vim Li Cas Yexus Thiaj Tuag?) a Yog li ntawd, Yehauvas thiaj li npaj Yexus los mus tuag txhiv peb. Muab xav los mas, lub nra no yeej hnyav kawg li rau nkawd ris. (Loos 6:23) Yog peb yim xav txog tej uas Yehauvas thiab Yexus nkawd tau ua rau peb mas yuav ua rau peb yim ris txiaj ntsig rau tus nqi theej txhoj. Peb yuav mus tham me ntswb me ntsis txog tej yam uas tsis yooj yim los Yehauvas thiab Yexus nkawd yeej txaus siab hlo ua pub rau peb. Tiam sis ua ntej ntawd, cia peb mus tham seb lub hauv paus yog li cas es thiaj yuav tau muaj tus nqi theej txhoj.

6. Ua li cas yuav tau muaj tus nqi theej txhoj?

⁶ Tus nqi theej txhoj yog tus nqi them kom txhiv tau ib yam dab tsi rov qab los. Thaum Vajtswv tsim Adas, Adas tsis muaj kev txaug kev txhaum. Tiam sis thaum nws poob kev txaug kev txhaum ces nws tsis tau txoj sia ntev dhawv mus ib txhis thiab nws kuj ua puas tsuas rau nws tej xeeb leej xeeb ntxwv tag huv tib si. Yexus yuav tau los tuag theej thiaj daws tau qhov uas Adas ua no. Thaum Yexus tseem nyob hauv ntiaj teb no, nws “tsis tau ua ib qho txhaum, thiab tsis muaj leejtwg hnov nws hais ib lo lus dag li.” (1 Petus 2:22) Yog li ntawd, thaum Yexus tuag, nws thiaj li daws tau qhov uas Adas tau ua vim Yexus tsis muaj kev txaug kev txhaum.​—1 Kauleethaus 15:45; 1 Timautes 2:6.

7. Thaum Yexus tseem nyob hauv ntiaj teb no, nws raug tej kev sim siab twg?

⁷ Thaum Yexus tseem nyob hauv ntiaj teb no, nws yeej mloog Yehauvas lus tab txawm nws raug ntau yam kev sim siab. Xws li thaum nws tseem yau, nws yuav tau mloog nws niam thiab nws txiv uas yog noob txaug neeg txhaum lus. (Lukas 2:51) Thaum nws tiav hluas, tej zaum nws yuav tau zam tej tug neeg uas haub ntxias kom nws tsis txhob mloog nws niam nws txiv thiab Yehauvas lus. Tsis tas li ntawd, thaum nws laus lawm los Xatas kuj sim kom nws ua txhaum thiab tso Yehauvas tseg. (Mathais 4:1-11) Xatas lub hom phiaj yog ntxias kom tau Yexus poob kev txhaum xwv Yexus thiaj tuag theej tsis tau neeg lub txhoj.

8. Yexus yuav tau thev tej kev sim siab twg ntxiv?

⁸ Yexus thev ntau yam kev sim siab ntxiv thaum nws mus tshaj tawm txoj xov zoo hauv ntiaj teb no. Xws li muaj neeg tsim txom nws thiab nrhiav nrhw kev xav muab nws tua. (Lukas 4:28, 29; 13:31) Tsis tas li ntawd, nws haj tseem yuav tau ua siab ntev rau nws cov thwj  tim vim lawv yog noob txaug neeg txhaum thiab ua ntau yam yuam kev. (Malakaus 9:33, 34) Thaum luag ntes nws mus hais plaub, luag kuj thuam thiab muab nws tsim txom. Tom qab ntawd, luag kuj muab nws coj mus tua ib yam li ib tug neeg raug txim thiab nws tuag txom nyem ntsuav. (Henplais 12:1-3) Qhov kev sim siab zaum kawg no, nws yuav tau thev nws ib leeg, tsis muaj Yehauvas pab nws. b​—Mathais 27:46.

9. Peb xav li cas txog qhov uas Yexus tuag theej peb lub txhoj? (1 Petus 1:8)

⁹ Yog li ntawd, Yexus yeej raug ntau yam xwv nws thiaj theej tau peb lub txhoj. Thaum peb ua tib zoo xav txog tej uas nws txaus siab ua los pab peb mas ua rau peb tig rov hlub nws heev.​—Nyeem 1 Petus 1:8.

10. Yehauvas tuaj yeem ua li cas xwv Yexus thiaj los tuag theej peb lub txhoj?

¹⁰ Ua li Yehauvas tuaj yeem ua li cas xwv Yexus thiaj los tuag theej peb lub txhoj? Yehauvas thiab Yexus nkawd sib raug zoo tshaj plaws li. (Pajlug 8:30) Ntshe thaum Yehauvas pom Yexus thev ntau yam kev sim siab hauv ntiaj teb no ntshe ua rau nws lub siab dua rhe. Tej zaum mob Yehauvas siab heev thaum nws pom luag ua saib tsis taus Yexus, tsis lees yuav nws, thiab raug luag ua phem.

11. Piav seb qhov lus piv txwv twg pab tau peb nkag siab Yehauvas txoj kev xav thaum Yexus tuag.

¹¹ Ib tug niam ib tug txiv twg, yog nws muaj ib tug me nyuam uas tag sim neej lawm, nws yeej paub hais tias mob siab npaum li cas. Txawm peb paub hais tias yav tom ntej Yehauvas yuav tsa cov uas peb hlub sawv rov qab los muaj sia dua los peb lub siab haj tseem mob ntsim qhe vim tus ntawd nruam sim lawm. Yog peb muab xav li no peb thiaj nkag siab tias mob Yehauvas lub siab npaum li cas thaum nws ntsia ntsoov nws tus Tub raug tsim txom thiab tuag rau xyoo 33 tom qab Yexus yug. c​—Mathais 3:17.

12. Ua ntej yuav ua kev cai nco txog Yexus, peb yuav tau npaj li cas?

¹² Tam sim no mus txog rau thaum ua kev cai nco txog Yexus, kav tsij lauj sij hawm los kawm txog tus nqi txhiv koj tus kheej los sis ua ib tse neeg. Mus saib Yehauvas Cov Tim Khawv Phau Ntawv Tshawb Nrhiav Vajlugkub los sis lwm yam ntaub ntawv uas Yehauvas lub koom haum luam tawm los pab koj nkag  siab ntxiv txog tus nqi theej txhoj. d Tsis tas li ntawd, mus nyeem cov nqe Vajlugkub uas muab kom tseg rau lub caij ua kev cai nco txog Yexus hauv Lub Neej Thiab Tes Hauj Lwm Khixatia​—Phau Kawm. Hnub ua kev cai nco txog Yexus ntawd, nco ntsoov mus saib zaj yeeb yaj kiab tshwj xeeb uas tham Vajlugkub ua ke rau hnub ua kev cai nco txog Yexus. Thaum peb npaj peb lub siab lub ntsws ua kev cai nco txog Yexus yam li no ces peb yuav muaj lub siab pab tau lwm tus.​—Exalas 7:10.

PAB LWM TUS

13. Thawj yam uas peb ua tau los pab lwm tus tuaj koom yog dab tsi?

¹³ Peb pab tau lwm tus tuaj ua kev cai nco txog Yexus yog peb tsa ncauj caw lawv. Peb caw tau cov peb ntsib thaum mus tshaj tawm txoj xov zoo, peb cov nruab ze, cov neeg peb ua hauj lwm nrog, cov peb kawm ntawv nrog, thiab cov neeg uas peb paub. Yog tias peb tsis muaj daim ntawv caw lawd, peb kuj xa tau daim ntawv caw uas theej tawm mus rau lawv. Cia peb ua npaum li peb ua tau vim peb tsis paub tias tus twg yuav tuaj koom!​—Tej Lus Qhia 11:6.

14. Piav seb daim ntawv caw lwm tus muaj nuj nqis npaum li cas.

¹⁴ Yog peb muab kiag ib daim ntawv caw los sis daim peb theej tawm rau lwm tus, tej zaum kuj yuav ua rau lawv muaj siab tuaj koom. Muaj ib tug muam uas nws tus txiv tsis tau ntseeg Yehauvas. Muaj ib xyoos nws tus txiv qhia rau nws tias nws tus txiv yuav nrog nws mus ua kev cai nco txog Yexus. Qhov no ua rau tus muam ntseeg tsis tau li vim yav tag los lawm nws tau hais kom nws tus txiv nrog nws mus tiam sis nws tus txiv yeej tsis ua ntab ntws li. Muaj dab tsi ua rau nws tus txiv hloov siab? Nws tus txiv hais tias, “Kuv tau txais ib daim ntawv caw.” Twb yog ib tug txwj laus uas nws paub muab daim ntawv caw rau nws. Xyoo ntawd nws thiaj li tuaj koom thiab tom qab no los nws kuj tuaj koom tsis tseg tsis tu.

15. Peb yuav tau nco ntsoov li cas thaum peb caw tib neeg tuaj ua kev cai nco txog Yexus?

¹⁵ Nco ntsoov tias cov neeg uas peb caw tuaj  ua kev cai nco txog Yexus tej zaum yuav nug seb peb txoj kev sib txoos ntawd yuav zoo li cas rau li cas. Yog li ntawd, peb yuav tau ua tib zoo npaj xwv peb thiaj txawj teb. (Kaulauxais 4:6) Tej zaum lawv yuav nug tej yam xws li: ‘Nej ua zoo li cas?’ ‘Yuav ntev npaum li cas?’ ‘Yuav hnav tsoos tsho li cas tuaj?’ ‘Tuaj koom puas them nyiaj?’ ‘Nej puas cev tais sau nyiaj?’ Peb kuj siv tau cov yeej kiab los pab lawv xws li Ua Kev Cai Nco Txog Yexus Txoj Kev Tuag thiab Mus Ua Dabtsi Tom Tsev Nceeg Vaj? Thiab peb kuj siv tau phau Nyob Kaj Siab Lug Mus Ib Txhis zaj kawm 28.

16. Cov uas tuaj ua kev cai nco txog Yexus yuav muaj lus nug txog tej twg ntxiv?

¹⁶ Tom qab ua kev cai nco txog Yexus, tej zaum cov uas tuaj koom thawj zaug yuav nug peb tej yam xws li vim li cas tsis muaj leej twg noj lub ncuav thiab haus khob cawv, vim li cas ho muaj qho tus noj thiab haus xwb, hov ntev li peb mam li ua kev cai nco txog Yexus, thiab Yehauvas Cov Tim Khawv tej kev sib txoos puas zoo thooj li thaum ua kev cai nco txog Yexus. Txawm tias thaum lawv tuaj ua kev cai nco txog Yexus es tus kwv tij twb hais muaj nyob hauv nws zaj lus qhuab qhia lawm los tej thaum cov tuaj thawj zaug ntawd kuj xav kom peb piav ntxaws ntxaws rau lawv mloog. Peb kuj siv tau zaj hu ua “Tus Tswv Pluas Hmo” los pab lawv. Yog li ntawd, cia peb ua npaum li peb ua tau ua ntej, thaum txog caij, thiab tom qab ua kev cai nco txog Yexus los pab cov uas muaj lub siab xib nrhiav Vajtswv.​—Tes Haujlwm 13:48.

PAB COV TSIS TUAJ NTEV LAWM

17. Cov txwj laus pab tau cov uas tsis tuaj kev sib txoos thiab mus qhia Vajlugkub tau ntev loo lawm li cas? (Exekees 34:12, 16)

¹⁷ Thaum txog lub caij ua kev cai nco txog Yexus, cov txwj laus yuav pab cov uas tsis tuaj kev sib txoos thiab mus qhia Vajlugkub tau ntev loo lawm li cas rau li cas? Cov txwj laus yuav tau pab kom lawv pom tias cov txwj laus yeej txhawj xeeb txog lawv tiag. (Nyeem Exekees 34:12, 16.) Tsis tas li ntawd, ua ntej yuav ua kev cai nco txog Yexus, cov txwj laus yuav tau mus saib lawv coob npaum li coob tau. Cov txwj laus yuav tau qhia rau lawv tias cov txwj  laus yeej xav pab thiab txhawj xeeb txog lawv heev. Cov txwj laus kuj caw lawv tuaj ua kev cai nco txog Yexus. Yog pom lawv ib tug twg tuaj koom, nco ntsoov mus hu lawv luag ntxhi. Tom qab ua kev cai nco txog Yexus tag lawm, cov txwj laus yuav tau nco ntsoov nug lawv moo thiab seb puas muaj dab tsi cov txwj laus ua tau kom pab tau lawv rov qab los teev tiam Yehauvas.​—1 Petus 2:25.

18. Peb sawv daws yuav pab cov uas tsis tuaj kev sib txoos thiab mus qhia Vajlugkub tau ntev loo lawm li cas? (Loos 12:10)

¹⁸ Thaum cov uas tsis tuaj kev sib txoos thiab mus qhia Vajlugkub tau ntev loo lawm tuaj ua kev cai nco txog Yexus, txhua tus hauv lub koom txoos yuav tau hlub, ua zoo, thiab saib taus lawv. (Nyeem Loos 12:10.) Nco ntsoov tias cov uas tsis tau tuaj ntev lawm yeej txaj txaj muag rov qab tuaj. Tej zaum lawv ntshai tsam muaj neeg ua dub muag rau lawv. e Yog li ntawd, tsis txhob nug los sis hais tej yam uas yuav ua rau lawv txaj muag los sis tu siab. (1 Thexalaunikes 5:11) Yav thaum ub cov kwv tij nkauj muam no yeej ib txwm nrog peb teev tiam Yehauvas ces peb yeej tos tsis hnyu yuav nrog lawv teev tiam Yehauvas dua!​—Phau Ntawv Nkauj 119:176; Tes Haujlwm 20:35.

19. Yog peb ua kev cai nco txog Yexus, yuav pab tau peb li cas?

¹⁹ Peb ris txiaj ntsig kawg li uas Yexus faj lus tseg kom peb nco ntsoov ua kev cai nco txog hnub nws tuag txhua txhua xyoo. Thaum peb mus koom qhov ua kev cai nco txog Yexus, peb yuav pab tau peb tus kheej thiab lwm tus, peb txoj kev hlub rau Yehauvas thiab Yexus nkawd yuav loj zuj zus, peb qhia tias peb ris Yehauvas thiab Yexus nkawd txiaj ntsig, peb txoj kev sib raug zoo nrog cov kwv tij nkauj muam los yuav loj zuj zus, thiab peb yuav pab tau lwm tus xam pom tias tus nqi txhiv tseem ceeb npaum li cas. (Yaxayas 48:17, 18) Cia peb txhua leej txhua tus npaj kom txhij zog rau hnub ua kev cai nco txog Yexus uas yog hnub tseem ceeb tshaj plaws!