Vajtswv yog Plig, cov tubtxib saum ntuj los kuj yog plig thiab. Lawv “tsis muaj nqaij muaj txha.” Cov tubtxib saum ntuj uas muab siab npuab Yehauvas sawv ntawm Vajtswv xubntiag.​—Luka 24:39; Mathai 18:10; Yauhas 4:24.

Muaj qee zaus, Vajtswv tau txib cov tubtxib saum ntuj los rau hauv ntiajteb. Thaum lawv los, lawv txia ua neeg tiamsis tom qab ua haujlwm tiav, lawv rov txia ua plig mus saum ntuj lawm.​—Cov Thawj 6:11-23; 13:15-20.

Thaum cov tubtxib saum ntuj los rau hauv ntiajteb, lawv tsuas txia ua txivneej xwb. Txawm li ntawd los, lawv tsis yog pojniam txivneej. Lawv tsis muaj sib yuav, tsis yug menyuam. Vajtswv tsis tau tsim kom lawv xub los ua neeg, tsis hais ua menyuam mos ab, menyuam yaus, lossis neeg laus. Lawv yog Vajtswv tsim, phau Vajlugkub thiaj muab lawv hu ua “Vajtswv cov tub.”​—Yauj 1:6, NW; Ntawv Nkauj 148:2, 5.

Phau Vajlugkub hais txog “tej lus uas neeg hais lossis tej lus uas tubtxib saum ntuj hais.” Qhov no qhia tias cov tubtxib saum ntuj kuj txawj hais lus. Txawm Vajtswv tau siv lawv los nrog tibneeg tham los, nws tsis tau tso cai rau peb pe hawm lawv thiab thov lawv.​—1 Khaulee 13:1; Qhia Tshwm 22:8, 9.

Cov tubtxib saum ntuj muaj qas txhiab qas vam leej. Tej zaum kuj muaj tsheej plhom leej thiab.​—Daniyee 7:10; Qhia Tshwm 5:11.

Cov tubtxib saum ntuj “muaj zog thiab muaj hwjchim” tshaj tibneeg. Lawv muaj tswvyim thiab txawj ntse tshaj. Lawv ya ceev heev, tsis muaj ib yam dabtsi hauv ntiajteb uas yuav ya ceev npaum lawv.​—Ntawv Nkauj 103:20, TMZ; Daniyee 9:20-23.

Txawm lawv ntse thiab muaj hwjchim tshaj peb los, tseem muaj qho yam uas lawv ua tsis tau thiab paub tsis txog.​—Mathai 24:36; 1 Petus 1:12.

Cov tubtxib saum ntuj nyias muaj nyias yam ntxwv thiab cwj pwm. Lawv kuj muaj kev ywj pheej thiab, yog li ntawd, lawv muaj cuab kav xaiv ua qhov zoo lossis ua qhov phem li tibneeg. Tu siab kawg uas cov tubtxib saum ntuj ib txhia tau txiav txim siab fav xeeb rau Vajtswv lawm.​—Yuda 6.