VAJTSWV xav kom peb tau ib lub neej zoo tshaj lub neej peb muaj tamsim no. Vajtswv xav kom muaj cov tibneeg uas hwm nws, txhawb nws lub hwjchim kav, thiab kom lawv txawj sib hlub sib pab. Vajtswv xav kom sawvdaws nyob kaj siab lug, muaj tub muaj ki, kawm txuj kawm ci, thiab tu lub ntiajteb no ua ib lub vaj kaj siab.

• “Nws ua rau tej kev tsov kev rog hauv ntiajteb no tiaj tus.”​—Phau Ntawv Nkauj 46:9.

• “Twb txog lub sijhawm uas koj yuav rhuav cov neeg uas ua rau lub ntiajteb no puastsuaj.”​—Tshwmsim 11:18.

• “Yuav tsis muaj leejtwg nroo hais tias, ‘Kuv muaj mob.’”​—Yaxayas 33:24.

• “Lawv yuav zoo siab rau txhua yam uas lawv txhais tes ua tau los.”​—Yaxayas 65:22.

Ua li cas thiaj yuav muaj raws li cov lus cog tseg no? Vajtswv twb tsa nws tus Tub, Yexus, ua Vajntxwv kav nws lub tseem fwv saum ntuj ceebtsheej lawm. Lub tseem fwv no yuav kav thoob plaws ntiajteb. Phau Vajlugkub muab lub tseem fwv no hu ua Vajtswv lub Nceeg Vaj. (Daniyees 2:44) Phau Vajlugkub hais tias: “Vajtswv yuav tsa nws ua vajntxwv . . .  nws yuav ua vajntxwv kav.”​—Lukas 1:32, 33.

Thaum Yexus los hauv ntiajteb, nws tau ua ntau yam txujci uas qhia tias thaum nws kav lub ntiajteb, peb yuav tau lub neej zoo tshaj plaws.

• Tus mob li cas los nws kho tau tagnrho ces nws yeej yuav kho txhua yam kev mob kev nkeeg.​—Mathais 9:35.

• Nws txwv tau dej thiab cua ces nws yeej yuav tiv thaiv tibneeg ntawm tej huab cua phem.​—Malakaus 4:36-39.

• Nws pub rau coob leej ntau tus noj ces nws yeej yuav tsis cia leejtwg tuag tshaib li.​—Malakaus 6:41-44.

• Thaum noj tshoob, nws muab dej hloov ua cawv ces nws yuav pab kom tibneeg txaus siab ua neej.​—Yauhas 2:7-11.

Ua li cas peb thiaj tau lub neej uas Vajtswv cog tseg no? Yog xav tau mas peb yuav tsum taug “txojkev” uas phau Vajlugkub hais tias yuav “coj mus tau txojsia.”​—Mathais 7:14.

Txojkev coj mus tau txojsia yog dabtsi? Vajtswv hais tias: “Kuv yog [Yehauvas] uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug.” (Yaxayas 48:17) Yog tias peb ua li nqe no hais, peb yuav tau lub neej zoo tshaj plaws.

 Yexus hais tias: “Kuv yog txojkev, yog qhov tseeb thiab yog txojsia.” (Yauhas 14:6) Yog peb ua raws li Yexus qhia thiab xyaum ua li nws, peb yuav muaj ib txojkev sib raug zoo nrog Vajtswv thiab tau ib lub neej zoo.

Peb yuav taug txojkev twg thiaj tau txojsia? Muaj ntau txojkev ntseeg, nyias ntseeg nyias lawm ib yam. Yexus thiaj hais tias: “Tsis yog txhua tus uas hu kuv hais tias, ‘Tus Tswv! tus Tswv,’ ces yuav tau mus Ntuj Ceebtsheej. Tiamsis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.” (Mathais 7:21) Yexus hais ntxiv tias: “Thaum nej pom lawv tes haujlwm nej yuav paub.” (Mathais 7:16) Yog peb nyeem thiab kawm phau Vajlugkub, yuav pab peb paub seb txojkev ntseeg twg thiaj yog txoj tseeb.​—Yauhas 17:17.

Peb yuav taug li cas thiaj tau txojsia? Peb yuav tsum sib raug zoo nrog Vajtswv, tus uas muab sia rau peb. Peb yuav tau kawm seb nws yog leejtwg, nws hu li cas, nws zoo li cas, nws ua dabtsi, thiab nws xav kom peb ua li cas thiaj haum nws siab. a

Vajtswv tsis xav kom peb tsuas khwv noj khwv haus, ua si lomzem, thiab saib xyuas lub cuab lub yig xwb. Nws xav kom peb muaj ib txojkev sib raug zoo nrog nws. Nws kuj xav kom peb hlub nws thiab ua li nws lub siab nyiam. Yexus hais tias: “Txojsia ntev dhawv mus ibtxhis ntawd yog qhov uas lawv paub koj thiab paub hais tias koj tib leeg thiaj yog Vajtswv.”​—Yauhas 17:3.

Thaum peb paub txog tej uas Vajtswv xav kom peb ua, muaj tej yam uas peb yuav tau hloov. Thaum thawj, yeej yuav nyuaj rau peb hloov. Tiamsis yog peb hloov, peb yuav pom tias peb lub neej zoo dua qub. Yog koj xav paub txog Vajtswv ntxiv, mus saib hauv lub vej xaij www.jw.org/hmn. Yehauvas Cov Timkhawv zoo siab tuaj qhia Vajlugkub pub dawb rau lub sijhawm uas koj khoom.