1-2. (1) Vim li cas tus tub txib Povlauj hais tias kev hlub “yog yam uas tseemceeb dua ntais?” (2) Peb yuav mus tham txog peb lo lus nug twg?

 THAUM tus tub txib Povlauj hais txog kev ntseeg, kev cia siab, thiab kev hlub, nws hais tias “kev hlub yog yam uas tseemceeb dua ntais huv tibsi.” (1 Kauleethaus 13:13) Tos Povlauj hais li no los, yeeb vim yog kev hlub rau Yehauvas thiab tib neeg peb yuav tsum muaj mus li tiam sis kev ntseeg thiab cia siab peb tsis tas nrhiav lawm vim Yehauvas tej lus cog tseg muaj tiav lawm.

² Peb yuav mus tham txog peb lo lus nug uas hais txog kev hlub. Qhov ib, vim li cas ib leeg yuav tau hlub ib leeg? Qhov ob, ib leeg yuav tsum hlub ib leeg li cas? Qhov peb, yuav ua li cas peb txoj kev hlub thiaj yuav nyob ruaj khov khwb kho?

3. Vim li cas peb ib leeg yuav tau hlub ib leeg?

³ Peb ib leeg yuav tau hlub ib leeg vim peb yog Yexus cov tseem thwj tim. Yexus hais tias: “Yog nej ib leeg hlub ib leeg, sawvdaws thiaj yuav paub hais tias nej yog kuv cov thwjtim.” (Yauhas 13:35) Hos Povlauj kuj hais tias: “nej ib tug yuav tsum hlub ib tug tiag tiag. Yog nej ua li no, nej thiaj yuav nyob taus ua ke.” (Kaulauxais 3:14) Tiam sis yam uas tshwj xeeb tshaj yog ua raws li Yauhas hais no: “Tus uas hlub Vajtswv, tus ntawd yuav tsum hlub nws kwv nws tij.” (1 Yauhas 4:21) Yog li thaum peb hlub peb cov kwv tij nkaum muam twb yog peb hlub Vajtswv ntag.

4-5. Piav seb vim li cas peb txoj kev hlub rau cov kwv tij nkauj muam ho qhia tias peb hlub Vajtswv.

 ⁴ Vim li cas qhov uas peb hlub cov kwv tij nkauj muam ho qhia tau tias peb muaj kev hlub rau Vajtswv? Muab ua piv txwv li no tias nyob rau hauv peb lub nrog cev, muaj ntau txoj leeg los mus cob rau hauv peb lub plawv. Thaum kws tshuaj ntsuas peb meem teg, nws yeej paub hais tias peb lub plawv muaj zog los sis tsis muaj zog. Peb khaws tau dab tsi los ntawm qhov no?

⁵ Zoo ib yam li tus kws tshuaj paub tias peb lub plawv muaj zog li cas rau li cas thaum nws ntsuas peb meem teg, peb yuav paub tias peb txoj kev hlub rau Vajtswv tseem ruaj khov khwb kho yog peb ua zoo tshuaj seb peb hlub cov kwv tij nkauj muam npaum li cas. Yog peb pom tias peb tsis tshua ncawg thiab hlub cov kwv tij nkauj muam li yav tag los lawm ces qhov no qhia tias peb txoj kev hlub rau Vajtswv kuj tsuag zuj zus lawm thiab. Tiam sis yog peb hlub hlub cov kwv tij nkauj muam ntseeg ces peb txoj kev hlub rau Vajtswv tseem ruaj khov khwb kho.

6. Vim li cas thaum peb txoj kev hlub rau cov kwv tij nkauj muam tsuag zuj zus ho yog ib qho teeb meem loj heev? (1 Yauhas 4:7-9, 11)

⁶ Thaum peb txoj kev hlub rau cov kwv tij nkauj muam tsuag zuj zus lawm mas kuj yog ib qho teeb meem loj heev rau peb vim qhov no qhia tias peb txoj kev sib raug zoo nrog Yehauvas kuj tsuag zuj zus lawm thiab. Tus tub txib Yauhas thiaj ceeb toom peb tias: “Yog nws twb tsis hlub nws kwv nws tij tus uas nws qhovmuag pom, nws yuav ua li cas hlub Vajtswv tus uas nws qhovmuag tsis pom.” (1 Yauhas 4:20) Peb khaws tau tej lus no li cas? Peb khaws tau tias Yehauvas yuav txaus siab heev rau peb yog tias ‘peb ib leeg hlub ib leeg.’​—Nyeem 1 Yauhas 4:7-9, 11.

7-8. Peb ib leeg yuav hlub ib leeg li cas?

⁷ Nyob rau hauv Vajtswv Txoj Lus, nws yeej sam hwm tas zaj tas zog tias peb “ib leeg yuav tsum hlub ib leeg.” (Yauhas 15:12, 17; Loos 13:8; 1 Thexalaunikes 4:9; 1 Petus 1:22; 1 Yauhas 4:11) Txoj kev hlub yog tshwm tuaj hauv nruab nrog, yeej tsis muaj leej twg pom tias peb xav li cas rau li cas. Yog li ntawd, yuav ua li cas cov kwv tij nkauj muam thiaj li paub tias peb hlub lawv? Qhov uas lawv paub yog tej peb hais los sis tej peb ua rau lawv.

⁸ Yeej muaj ntau ntau txoj hau kev uas peb qhia tau tias peb hlub cov kwv tij nkauj muam. Xws li: “Ib leeg yuav tsum hais lus tseeb rau ib leeg.” (Xakhaliyas 8:16) “Nyob sib haum xeeb.” (Malakaus 9:50) “Cia li xub hwm luag, txhob tos luag hwm yus.” (Loos 12:10) “Ib leeg yuav tsum zoo siab hlo txais tos ib leeg.” (Loos 15:7) “Ib tug yuav tsum zam txim rau ib tug” mus li. (Kaulauxais 3:13) “Yuav tsum sib pab ris nra.” (Kalatias 6:2) “Nplig txhua tus lub siab.” (1 Thexalaunikes 4:18) “Ib tug pab ib tug.” (1 Thexalaunikes 5:11) “Ib tug thov Vajtswv pab rau ib tug.”​—Yakaunpaus 5:16.

9. Vim li cas qhov uas peb nplig ib tug twg siab ho qhia tau tias peb hlub tshua nws? (Saib daim duab.)

⁹ Cia peb mus ua zoo soj ntsuas seb peb yuav qhia kev hlub li cas rau lwm tus. Povlauj hais tias kom nco ntsoov “nplig txhua tus lub siab” tas zaj tas zog. Vim li cas qhov uas peb nplig lwm tus lub siab ho qhia tias peb hlub lawv? Muaj ib phau ntawv uas hais txog phau Vajlugkub hais tias thaum Povlauj siv lo lus “nplig,” yog nws hais txog “nyob ntawm ib tug twg ib sab thiab txhawb tus ntawd lub zog thaum nws tab tom raug kev nyuaj siab.” Yog  li ntawd, thaum ib tug kwv tij nkauj muam twg raug kev nyuaj siab, qhov uas peb mus nyob rau ntawd thiab hais lo puav nplig nws siab yuav pab tau kom nws rau siab teev tiam Yehauvas. Txhua zaus uas peb mus nplig ib tug kwv tij nkauj muam twg, yeej qhia tau rau nws tias peb hlub tshua nws heev.​—2 Kauleethaus 7:6, 7, 13.

10. Yuav kom peb txawj nplig lwm tus, vim li cas peb yuav tau xub muaj kev hmov tshua?

¹⁰ Peb yuav tau xyaum kam tiag kom peb txawj hmov tshua lwm tus peb thiaj li yuav mus nplig lwm tus lub siab thaum lawv xav tau kev pab. Thaum ib tug tib neeg twg hmov tshua lwm tus uas raug kev nyuaj siab ces nws yeej yuav mus nplig thiab mus pab tus ntawd. Povlauj hais tias Yehauvas txoj kev hmov tshua rau tib neeg pab tau kom Nws txawj mus nplig lwm tus thiab. Povlauj thiaj li hais tias Yehauvas yog “Leej Txiv tus uas yog Vajtswv, nws hlub peb thiab txhawb peb lub zog.” (2 Kauleethaus 1:3) Povlauj piav tias Vajtswv yog tus uas chiv kev hlub vim Nws hmov tshua tib neeg heev. “Thaum peb raug txhua yam kev nyuaj siab,” nws thiaj li nrhiav kev los mus nplig peb. (2 Kauleethaus 1:4) Zoo ib yam li cov dej cag uas haus daws tau txoj kev nqhis, Yehauvas kuj daws thiab nplig cov uas raug kev nyuaj siab. Ib yam uas pab tau peb kom xyaum tau Yehauvas yog xyaum kom muaj tej cwj pwm uas yuav pab kom peb hmov tshua lwm tus xwv peb thiaj mus nplig lawv. Ua li cov cwj pwm no yog li cas rau li cas tiag?

11. Raws li Kaulauxais 3:12 thiab 1 Petus 3:8, peb yuav tau muaj tej cwj pwm twg xwv peb thiaj hlub peb cov kwv tij nkauj muam thiab muaj lub siab xav nplig lawv?

¹¹ Tej cwj pwm uas peb yuav tau muaj mus li yog ib leeg xam pom ib leeg, ib leeg hlub ib leeg ib yam li kwvtij sib hlub, thiab muaj lub siab mos siab muag. (Nyeem Kaulauxais 3:12; 1 Petus 3:8.) Muaj tej cwj pwm no yuav pab tau peb li cas? Thaum peb muaj tej cwj pwm no peb yuav kheev hmov tshua peb cov kwv tij nkauj muam thiab pab lawv thaum lawv cheem tsum kev pab. Yexus hais tias, “lub siab xav li cas, lub ncauj hais tawm li ntawd. Tus neeg zoo xav ntsoov txog yam zoo hauv nruab siab, nws thiaj hais tawm yam zoo xwb.” (Mathais 12:34, 35) Peb qhia tias peb hlub peb cov kwv tij nkauj muam thaum peb nplig lawv siab.

12. (1) Yexus tau ceeb toom li cas txog kev hlub? (2) Peb yuav mus tham txog lo lus nug twg?

¹² “Peb ib leeg yuav tsum hlub ib leeg.” (1 Yauhas 4:7) Yexus tau ceeb toom tias “coob tus txoj kev hlub yuav tsuag zuj zus mus.” (Mathais 24:12) Yexus tsis tau hais tias nws cov thwj tim feem coob txoj kev hlub yuav tsuag zuj zus mus. Tiam sis Yexus tsuas yog ceeb toom kom peb txhob cia lub qab ntuj no lub siab txias zias ua rau peb ib tug txoj kev hlub rau ib tug tsuag zuj zus. Yog li ntawd, peb yuav ua li cas peb thiaj paub tias peb txoj kev hlub rau cov kwv tij nkauj muam tseem nyob ruaj khov khwb kho?

13. Dab tsi yuav pab tau peb paub tias peb txoj kev hlub tseem nyob ruaj khov khwb kho?

¹³ Ib yam uas pab tau peb paub tias peb txoj kev hlub tseem nyob ruaj khov khwb kho yog nyob ntawm seb peb coj li cas. (2 Kauleethaus 8:8) Xws li Petus tau hais tias: ‘Qhov uas tseemceeb tshaj plaws huv tibsi, yog nej ib leeg yuav tsum hlub ib leeg tiag tiag, rau qhov txojkev hlub npog tau txhua yam kev txhaum huv tibsi.’ (1 Petus 4:8) Ces peb yuav paub tau tias peb txoj kev hlub ruaj khov khwb kho los ntawm seb peb coj li cas thaum  peb cov kwv tij nkauj muam ntseeg ua yuam kev los sis ua rau peb tu siab.

14. Piav seb raws li 1 Petus 4:8, peb yuav tau muaj txoj kev hlub zoo li cas.

¹⁴ Cia peb ua tib zoo saib ntxiv Petus cov lus. Nyob rau nqe 8, Petus hais kom peb ‘ib leeg yuav tsum hlub ib leeg tiag tiag,’ nws kuj hais ntxiv tias “txojkev hlub npog tau txhua yam kev txhaum huv tibsi.” Thaum Petus hais kom peb ib leeg hlub ib leeg tiag tiag, zoo ib yam li thaum lub rooj muaj ib qho puas los sis tsis zoo nkauj ces yuav tsum muab ib daim ntaub nthuav kom dav dav thiaj npog tau txhua yam. Ces zoo tib yam li daim ntaub uas npog lub rooj ntawd, yog peb hlub peb cov kwv tij nkauj muam tiag tiag ces peb yuav tsum nthuav peb lub siab kom dav thiab zam txim rau lawv. Tsis yog zam ib ob zaug xwb tiam sis zam txhua zaus.

15. Yog peb txoj kev hlub rau peb cov kwv tij nkauj muam ruaj khov khwb kho ces peb yuav coj li cas? (Kaulauxais 3:13)

¹⁵ Peb txoj kev hlub rau peb cov kwv tij nkauj muam yuav tsum ruaj khov khwb kho xwv peb thiaj tsis saib tej uas lawv ua meem txom thiab tej yam uas lawv ua tsis raws li peb lub siab nyiam. (Nyeem Kaulauxais  3:13.) Yog peb ua li no yuav qhia tias peb txoj kev hlub rau lawv ruaj khov khwb kho thiab yuav ua rau Yehauvas txaus siab. Muaj dab tsi ntxiv thiaj yuav pab kom peb tsis txhob saib tej uas lawv ua meem txom thiab thaum lawv ua tsis yog li peb lub siab nyiam?

16-17. Piav seb muaj dab tsi ntxiv yuav pab kom peb tsis txhob cim ntsoov tej nyuag uas lwm tus ua siab peb. (Saib daim duab.)

¹⁶ Peb yuav tau xav seb peb cov kwv tij nkauj muam coj zoo rau qhov twg thiab tsis txhob xav txog tej uas lawv ua tsis zoo. Cia peb muab ua piv txwv li no. Koj tab tom nrog ib co kwv tij nkauj muam sib sau ua ke. Nej nyob sov siab so lom zem heev. Ua ntej sawv daws yuav mus tsev, nej yees duab ua ke. Tsis yog yees ib daim xwb tiam sis yees ob peb daim. Thaum koj ua tib zoo tshuaj cov duab, koj ho pom ib daim duab uas muaj ib tug kwv tij tsis nco qab luag ntxhi lawm. Koj yuav ua li cas xwb? Koj yeej yuav muab daim duab ntawd pov tseg es khaws ob daim zoo zoo uas sawv daws luag ntxhwb ntxhi.

¹⁷ Cia peb muab ob daim duab no piv rau tej uas peb nco hauv peb lub cim xeeb. Feem ntau peb yeej nco tau lub sij hawm peb nrog peb cov kwv tij nkauj muam nyob luag ntxhwb ntxhi. Tiam sis muaj tej thaud ib tug kwv tij los sis ib tug muam yuav hais tau los sis ua tau tej yam uas siab peb. Puas tsim nyog peb cim ntsoov qhov ntawd cia? Zoo rau peb muab qhov ntawd pov tseg ib yam li  peb muab cov duab pov tseg. (Pajlug 19:11; Efexus 4:32) Peb yeej muaj peev xwm tshem tau qhov nyuag uas peb tus kwv tij los sis tus muam hais siab peb pov tseg es nco txog cov sij hawm uas peb muaj nrog nws ua ke luag ntxhwb ntxhi. Cov sij hawm ntawd yog cov uas peb xav muab cim cia mus li.

18. Nyob rau zaj kawm no peb kawm tau li cas txog kev hlub?

¹⁸ Vim li cas txoj kev hlub uas peb muaj rau peb cov kwv tij nkauj muam yuav tsum ruaj khov? Zoo li peb tau tham, yog peb hlub peb cov kwv tij nkauj muam ces twb yog peb hlub Yehauvas. Peb yuav hlub peb cov kwv tij nkauj muam li cas? Qhov uas peb hlub peb cov kwv tij nkauj muam ces yog peb nplig lawv. Yuav ua li cas txoj kev hlub peb muaj rau peb cov kwv tij nkauj muam thiaj ruaj khov khwb kho? Tsis txhob cim ntsoov tej uas lwm tus ua meem txom peb thiab tsis raws li peb lub siab nyiam tiag tiag.

19. Niaj hnub nim no vim li cas ho tseem ceeb rau peb hlub peb cov kwv tij nkauj muam?

¹⁹ Niaj hnub nim no vim li cas ho tseem ceeb rau peb ib leeg hlub ib leeg? Petus hais tias: ‘Twb yuav txog lub sijhawm uas ib puas tsav yam hauv ntiajteb no puastsuaj. Qhov uas tseemceeb tshaj plaws, . . . nej ib leeg yuav tsum hlub ib leeg tiag tiag.’ (1 Petus 4:7, 8) Vim lub qab ntuj phem no twb yuav dua mus, peb yuav raug dab tsi? Yexus qhia tias: “Txhua haiv neeg yuav ntxub nej vim nej yog kuv cov thwj tim.” (Mathais 24:9) Yuav kom peb thev taus tej kev ntxub ntxaug ntawd, peb yuav tau sib koom siab. Yog peb hlub peb cov kwv tij nkauj muam ces Xatas yuav ua tsis tau kom peb tawg ua sab ua sua rau qhov “txojkev hlub khi tau txhua yam sib koom ua ke.”​—Kaulauxais 3:14; Filipis 2:1, 2.