1, 2. Vim li cas zoo rau peb muaj lus nug?

PEB sawvdaws yeej paub tias thaum menyuam yaus txawj hais lus lawm, feem coob muaj lus nug ntau heev, puas yog? Lawv xav paub txog ntau yam. Tej zaum lawv yuav tsa muag ntsia koj thiab nug tias: Vim li cas lub ntuj ntsuab ntsuab? Cov hnub qub yog dabtsi? Ua li cas tej me noog txawj quaj? Tej zaum koj tsis paub xyov yuav teb lawv li cas. Txawm yog koj teb tau lawv los, tej zaum lawv tseem nug ntxiv tias: Vim li cas ho muaj li ntawd?

² Tsis yog tej menyuam yaus muaj lus nug xwb. Cov laus los kuj muaj lus nug tib yam nkaus thiab. Peb muaj lus nug vim peb xav paub tias yam twg zoo thiab yam twg tsis zoo rau peb ua. Peb kuj muaj lus nug vim peb xav paub txog tej yam tshiab. Tiamsis muaj tej yam tseem ceeb uas tibneeg yuav tsum tau paub txog. Feem coob tsis tshua xav nug txog tej yam tseem ceeb ntawd lawm. Muaj  tej txhia kuj xav paub, tiamsis lawv tsis tshawb nrhiav cov lus teb ntxiv lawm.

3. Vim li cas coob leej tsis kam tshawb nrhiav cov lus teb rau tej lus nug tseem ceeb?

³ Xav txog lo lus nug uas nyob ntawm lub khaum ntawv no. Xav txog cov lus nug uas nyob ntawm sab 3 thiab sab 6. Thiab xav txog thawj 4 lo lus nug hauv Tshooj 1 no. Cov lus nug ntawd tseem ceeb tshaj plaws li. Tiamsis feem coob tso tseg tsis tshawb nrhiav cov lus teb lawm. Yog vim li cas? Muaj ib txhia tsis paub xyov phau Vajlugkub puas teb tau cov lus nug ntawd. Ib txhia ho xav tias nyuaj to taub phau Vajlugkub cov lus teb. Lwm cov txaj muag nug, vim lawv ntshai tsam poob ntsej muag. Muaj dua lwm cov xav tias tsuas yog cov thawj coj ntawm tej kev ntseeg, thiab cov xibhwb thiaj teb tau cov lus nug ntawd xwb. Ua li koj ho xav li cas?

4, 5. Cov lus nug tseem ceeb tshaj yog dabtsi, thiab vim li cas tseem ceeb rau peb nrhiav cov lus teb?

⁴ Koj puas xav paub cov lus teb rau tej lus nug tseem ceeb no: ‘Ua li cas ho muaj tibneeg? Lub neej no puas yog tas li no lawm xwb? Vajtswv zoo li cas tiag?’ Peb sawvdaws yeej xav paub. Tej zaum koj twb xav txog cov lus nug no lawm thiab. Zoo rau peb nug txog tej no, thiab tseem ceeb rau koj nrhiav cov lus teb. Rau siab ntso nrhiav, koj thiaj nrhiav tau cov lus teb uas yuav pab tau koj tiag. Yexus Khetos yog tus xibhwb nto moo tshaj plaws. Yexus tau qhia li no: “Cia li thov mas yuav muab rau nej, cia li nrhiav nej thiaj ntsib, cia li khob mas yuav qheb rau nej.”​—Mathai 7:7.

⁵ Rau siab ntso “nrhiav” cov lus teb rau tej lus nug tseem ceeb no. Yog tias koj ua li ntawd, ces koj yuav tau txais nqe zog. (Paj Lug 2:1-5) Txawm luag lwm tus tau hais li cas rau koj los xij, rau siab ntso kawm tiag. Yeej muaj lus teb rau tej lus nug ntawd. Koj yuav nrhiav tau cov lus teb ntawd nyob hauv phau Vajlugkub. Cov lus teb tsis nyuaj to taub. Cov  lus teb ntawd tseem yuav pab kom koj muaj chaw cia siab thiab muaj kev xyiv fab. Tsis tas li ntawd xwb, yuav pab kom koj txaus siab rau koj lub neej tamsim no. Cia peb pib kawm txog ib lo lus nug uas coob leej teb tsis tau li.

6. Thaum tibneeg pom kev txom nyem, vim li cas coob leej xav tias Vajtswv tsis muaj kev hlub?

⁶ Coob leej xav tias Vajtswv tsis hlub tibneeg tiag. Lawv xav tias: ‘Yog Vajtswv mob siab txog peb tiag, ua li cas lub qab ntuj muaj kev phem ua luaj li?’ Nyob puag ncig peb, tsuas pom muaj kev tsov kev rog, kev sib ntxub, thiab kev nyuaj siab puv ntia lub qab ntuj xwb. Peb txhua tus muaj mob muaj nkeeg, raug kev txom nyem, thiab cov neeg uas peb hlub raug kev ploj kev tuag. Twb yog vim li ntawd, coob leej thiaj hais ntxiv tias: ‘Yog Vajtswv hlub peb thiab txhawj txog peb tej teeb meem tiag, ces nws yeej yuav tsis pub tej kev nyuaj siab ntawd los raug peb li, puas yog?’

7. (1) Tej kev ntseeg qhia li cas thiaj ua rau coob leej xav tias Vajtswv tsis mob siab txog tibneeg? (2) Phau Vajlugkub qhia li cas tiag txog tej kev phem uas tibneeg raug?

⁷ Cov thawj coj ntawm tej kev ntseeg ua rau tibneeg hajyam xav tias Vajtswv tsis mob siab txog tibneeg. Cov thawj coj tau qhia li cas? Thaum muaj kev puas ntsoog, cov thawj coj ntawd qhia tias Vajtswv yeej pom zoo muaj li ntawd. Thaum lawv hais li ntawd ces twb yog lawv cem tias tej kev puas ntsoog ntawd yog tim Vajtswv. Tiamsis puas muaj tseeb li ntawd? Phau Vajlugkub qhia li cas tiag? Yakaunpau 1:13 teb li no: “Leejtwg raug dag ntxias nws tsis txhob hais tias, ‘Kuv raug Vajtswv ntxias,’ rau qhov Vajtswv yeej tsis raug txojkev phem ntxias thiab nws kuj tsis ntxias leejtwg li.” Yog li ntawd, Vajtswv yeej tsis yog tus ntxias peb. Nws tsis yog tus tsim tej kev limhiam uas muaj hauv lub qab ntuj no. (Nyeem Yauj 34:10-12.) Vajtswv cia kom  muaj tej xwm txheej no. Tiamsis nco ntsoov tias qhov uas yus cia muaj, txawv ntawm qhov uas yus tsim kom muaj.

8, 9. (1) Siv lus piv txwv los piav seb qhov yus cia muaj teeb meem thiab tsim teeb meem sib txawv li cas. (2) Puas tsim nyog peb liam tias Vajtswv coj tsis ncaj vim nws cia tibneeg ua phem?

⁸ Muab ua piv txwv li no: Muaj ib tug tub uas twb hlob tiav txiv lawm, tseem nrog nws txiv nyob. Nws txiv hlub nws kawg li. Tiamsis tus tub ntawd cia li pib tawv ncauj tsis mloog leej txiv hais, thiab nws npaj siab tawm tsev. Nws txiv kuj tsis txwv nws. Thaum tus tub tawm tsev lawm, nws mus coj lub neej phem thiab raug ntau yam teeb meem. Leej txiv puas yog tus tsim teeb meem rau tus tub ntawd? Yeej tsis yog li. (Luka 15:11-13) Ib yam li ntawd, thaum tibneeg xav ua phem, Vajtswv tsis txwv lawv. Thaum lawv raug teeb meem, yeej tsis yog Vajtswv tsim tej teeb meem ntawd. Yog li ntawd, yeej tsis ncaj rau tibneeg liam tias yog tim Vajtswv noob neej thiaj raug teeb meem.

⁹ Vim li cas Vajtswv ho cia tibneeg ua phem li ntawd? Tsis yog Vajtswv lam cia muaj tej kev phem xwb. Vajtswv yog peb tus Tswv Tsim uas ntse thiab muaj hwjchim loj kawg li. Tsis tas nws yuav qhia rau peb tias, yog vim li cas nws thiaj cia muaj tej kev phem ntawd. Tiamsis vim nws hlub peb, nws thiaj qhia rau peb. Koj yuav kawm ntxiv txog qhov no nyob rau Tshooj 11 hauv phau ntawv no. Tso siab tias Vajtswv tsis yog tus tsim tej teeb meem uas peb raug. Tiamsis qhov tseeb tiag, nws tib leeg thiaj yog tus uas yuav daws tau tej teeb meem no xwb!​—Yaxaya 33:2.

10. Vim li cas peb tso siab tau tias Vajtswv yuav kho tag nrho tej kev nyuaj siab uas tibneeg raug?

¹⁰ Tsis tas li ntawd xwb, Vajtswv yog tus dawb huv. (Yaxaya 6:3) Nws tsis muaj ib qho phem li. Nws zoo txhua fab. Yog li ntawd, peb yeej tso siab plhuav rau nws. Tiamsis peb tso siab tsis tau li ntawd rau tibneeg. Tibneeg txawj hloov  siab mus ua phem ua nkhaus. Txawm tias ib tug nom yuav coj ncaj npaum li cas los, nws yeej tsis muaj hwjchim kho tau tej kev phem uas tibneeg ua. Tiamsis Vajtswv yog tus muaj hwjchim loj dua ntais. Vajtswv yuav kho tag nrho tej kev nyuaj siab uas noob neej tau raug los ntawm tej kev limhiam hauv qab ntuj no. Vajtswv yeej ua tau li ntawd. Thaum Vajtswv kho tej ntawd, yuav tsis muaj kev phem limhiam ib zaug ntxiv li lawm!​—Nyeem Ntawv Nkauj 37:9-11.

11. (1) Vajtswv xav li cas txog txojkev tsis ncaj ncees? (2) Vajtswv xav li cas txog tej kev txom nyem uas koj raug?

¹¹ Ua li Vajtswv xav li cas xwb, rau tej kev tsis ncaj ncees hauv koj lub neej thiab hauv lub qab ntuj no? Phau Vajlugkub qhia rau peb tias Vajtswv “nyiam qhov uas ua ncaj.” (Ntawv Nkauj 37:28) Yog li ntawd, Vajtswv xav kom tibneeg ua ncaj ua ncees. Qhov ntawd tseem ceeb heev rau Vajtswv. Nws ntxub txhua txojkev tsis ncaj ncees uas tibneeg ua. Phau Vajlugkub qhia tias yav thaum ub, Vajtswv “tu siab heev” thaum nws pom kev phem puv ntia lub ntiajteb. (Chiv Keeb 6:5, 6) Vajtswv tseem xav ib yam li ntawd. (Malakhi 3:6) Niaj hnub no thaum Vajtswv pom muaj kev txom nyem puv ntia lub qab ntuj, nws yeej ntxub tej ntawd heev. Nws tsis xav pom tibneeg raug kev txom nyem ceeblaj. Phau Vajlugkub qhia tias: “Nws mob siab [koj].”​—Nyeem 1 Petus 5:7.

12, 13. (1) Vim li cas peb muaj kev hlub, thiab kev hlub ua rau peb xav li cas txog tej kev tsis ncaj ncees hauv lub qab ntuj no? (2) Ua li cas peb thiaj paub tseeb tias Vajtswv yeej yuav kho tej teeb meem hauv lub qab ntuj no?

¹² Puas muaj pov thawj ntxiv uas pab kom peb paub tseeb tias, Vajtswv ntxub thaum tibneeg raug kev txom nyem? Yeej muaj, cia peb kawm seb phau Vajlugkub qhia  li cas ntxiv. Phau Vajlugkub hais tias Vajtswv tsim neeg kom muaj yam ntxwv zoo li nws. (Chiv Keeb 1:26) Twb yog vim li ntawd, peb thiaj paub coj zoo lossis muaj tej yeeb yam zoo, rau qhov Vajtswv coj zoo. Zoo li thaum koj pom tibneeg zoo raug kev txom nyem, puas mob koj siab? Yog tias tej kev txom nyem ntawd twb ua rau koj mob siab, ces yimhuab yuav ua rau Vajtswv mob siab.

¹³ Ib yam zoo tshaj plaws uas tibneeg muaj, yog qhov uas peb muaj kev hlub. Kev hlub kuj yog Vajtswv ib qho yeeb yam thiab. Phau Vajlugkub thiaj qhia tias “Vajtswv yog txojkev hlub.” (1 Yauhas 4:8) Peb muaj kev hlub rau luag lwm tus vim Vajtswv muaj kev hlub. Koj yeej pom kev txom nyem thiab kev tsis ncaj ncees hauv lub qab ntuj no. Yog tias koj muaj hwjchim kho tau tej teeb meem ntawd, koj puas kho? Kev hlub rau tibneeg yeej yuav ua rau koj xav kho tej teeb meem ntawd! Yog tias peb twb xav kho tej teeb meem ntawd, ces Vajtswv yimhuab xav kho. Vajtswv yeej yuav tshem tawm tej kev txom nyem thiab kev tsis ncaj ncees. Yog li ntawd, tej lus cog tseg uas hais nyob rau sab 4 thiab sab 5, tsis yog npau suav lossis lam cia siab qhuav xwb. Yeej yuav muaj tseeb raws li Vajtswv tau cog tseg! Koj yuav tsum rau siab ntso kawm txog Vajtswv. Qhov uas koj ua li ntawd, yuav pab kom koj muaj kev ntseeg rau Vajtswv tej lus cog tseg.

14. Vajtswv lub npe hu li cas, thiab vim li cas zoo rau peb siv nws lub npe?

¹⁴ Yog tias koj xav kom lwm tus paub koj, koj yuav tsum ua li cas? Koj yeej yuav qhia koj lub npe rau nws ua ntej, puas yog? Vajtswv puas muaj ib lub npe? Ntau txojkev ntseeg qhia tias nws lub npe hu ua “Vajtswv” lossis “Tus Tswv.” Tiamsis cov npe ntawd tsis yog nws lub npe  tiag. Cov npe ntawd tsuas yog npe meej mom xws li “vajntxwv” thiab “huab tais” xwb. Phau Vajlugkub qhia tias Vajtswv muaj ntau lub npe meej mom, tiamsis Vajtswv tsuas muaj ib lub npe xwb. Nws lub npe hu ua Yehauvas. Ntawv Nkauj 83:18 hais tias: “Koj tib leeg xwb uas npe hu ua [Yehauvas] thiaj yog tus Vajtswv Loj Dua Ntais uas kav tag nrho thoob ntiajteb.” Yog tias lub npe ntawd tsis muaj nyob hauv koj phau Vajlugkub ces mus nyeem zaj hu ua “Paub Thiab Siv Vajtswv Lub Npe” hauv Cov Lus Qhia Ntxiv. Cov lus ntawd yuav qhia tias vim li cas ib txhia Vajlugkub tsis muaj Vajtswv lub npe. Qhov tseeb tiag, thaum xub sau phau Vajlugkub, Vajtswv lub npe muaj nyob rau hauv ntau tshaj li 7,000 zaus. Yog li ntawd, Vajtswv yeej xav kom koj paub thiab siv nws lub npe. Vajtswv thiaj npaj phau Vajlugkub, kom koj thiaj paub txog nws.​—Khiav Dim 3:14, hauv qab taw qhia.

15. Yehauvas lub npe txhais li cas?

¹⁵ Vajtswv lub npe tseem ceeb heev. Nws lub npe, Yehauvas, txhais tau li cas? Txhais tau tias nws ua tau raws li txhua yam uas nws hom tseg thiab cog tseg. * Tsis muaj ib lub npe twg yuav zoo li Vajtswv lub npe. Vajtswv tib leeg xwb, thiaj tsim nyog tau lub npe ntawd. Tsis muaj leejtwg yuav zoo li Yehauvas. Ua li cas ho tsis muaj leejtwg zoo li Yehauvas?

16, 17. Peb kawm tau li cas txog Yehauvas los ntawm cov npe meej mom no: (1) tus “muaj hwjchim loj kawg nkaus”? (2) tus “vajntxwv uas kav mus ib txhis”? (3) tus “Tswv Tsim”?

 ¹⁶ Zoo li peb tau kawm, Ntawv Nkauj 83:18 qhia li no txog Yehauvas: “Koj tib leeg xwb . . . yog tus Vajtswv Loj Dua Ntais.” Tsis tas li ntawd, phau Vajlugkub muab Yehauvas tib leeg hu ua tus “muaj hwjchim loj kawg nkaus.” Qhia Tshwm 15:3 hais tias: “Au Vajtswv, tus Tswv [Yehauvas] uas muaj hwjchim loj kawg nkaus, koj tes haujlwm loj thiab phimhwj kawg. Au vajntxwv uas kav ib tsoom tebchaws, koj tej kev mas ncaj ncees thiab muaj tseeb.” Lub  npe meej mom ntawd qhia rau peb tias Yehauvas yog tus muaj hwjchim tshaj plaws, tsis muaj ib tug uas yuav muaj hwjchim sib luag nrog Yehauvas li. Thiab 1 Timaute 1:17 hais tias Yehauvas yog “tus vajntxwv uas kav mus ib txhis.” Qhov ntawd qhia tias yeej tsis muaj leejtwg yuav zoo li Yehauvas, vim nws ib txwm muaj nyob thaum ub los lawm. Ntawv Nkauj 90:2 hais tias: “Koj yeej yog Vajtswv ib txwm thaum ub los mus ib txhis tsis kawg.” Qhov ntawd yeej ua rau peb xav tsis thoob li, puas yog?

¹⁷ Kuj hais tau tias tsis muaj leejtwg zoo li Yehauvas vim tias nws yog tus Tswv Tsim. Qhia Tshwm 4:11 hais tias: “Au tus Tswv [Yehauvas] uas yog peb tus Vajtswv, koj tsim nyog tau meej mom thiab koob meej thiab hwjchim loj kawg, vim koj tsim ib puas tsav yam, thiab ib puas tsav yam muaj nyob thiab raug tsim los raws li koj twb  xav tseg.” Ib puas tsav yam, tsis hais cov tubtxib saum ntuj uas peb qhov muag tsis pom, tej hnub qub uas ci ntsa iab saum nruab ntug, tej txiv hmab txiv ntoo uas txi nrw niab, tej ntses uas ua luam dej laim ntoom hauv nruab deg, tag nrho txhua yam uas tau xeeb txawm no, puavleej yog Vajtswv Yehauvas ua tus tsim!

18. Vim li cas ib txhia xav tias lawv yuav tsis muaj cuab kav txav mus cuag Vajtswv, tiamsis phau Vajlugkub qhia li cas?

¹⁸ Thaum tibneeg kawm txog Yehauvas tej yeeb yam zoo, lawv xav li cas xwb? Tej txhia ntshai tias Vajtswv zoo dhau lawm, lawv yuav tsis muaj cuab kav txav ze rau ib tug Vajtswv zoo npaum li ntawd. Ib txhia ho xav tias lawv tsis muaj nqes rau Vajtswv kiag li. Tiamsis puas muaj li lawv xav ntawd? Phau Vajlugkub tsis qhia li lawv xav. Phau Vajlugkub hais li no txog Yehauvas: “Nws yeej tsis nyob deb ntawm peb txhua tus.” (Tubtxib Tes Haujlwm 17:27) Phau Vajlugkub tseem txhawb peb li no thiab: “Cia li txav los ze rau Vajtswv mas nws yuav los ze nej.”​—Yakaunpau 4:8.

19. (1) Peb yuav txav ze rau Vajtswv li cas, thiab qhov ntawd yuav pab peb li cas? (2) Koj nyiam Yehauvas cov yeeb yam twg tshaj?

¹⁹ Koj yuav txav ze rau Vajtswv li cas? Koj yuav tsum xub kawm txog Vajtswv, ib yam li koj ua tamsim no. Yexus hais tias: “Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv thiab paub Yexus Khetos uas koj txib los.” (Yauhas 17:3) Yog li ntawd, phau Vajlugkub qhia tias yog peb kawm txog Yehauvas thiab Yexus, ces yuav pab kom peb tau “txojsia ib txhis tsis kawg”! Peb twb kawm lawm tias, “Vajtswv yog txojkev hlub.” (1 Yauhas 4:16) Phau Vajlugkub qhia ntxiv li cas txog Yehauvas thiab? Yehauvas muaj ntau qhov yeeb yam zoo kawg nkaus. Phau  Vajlugkub qhia tias Yehauvas yog tus Vajtswv uas “khuvleej thiab hlub, nws tsis chim sai, nws txojkev hlub uas ruaj khov thiab nws txojkev ua ncaj uas tso siab tau muaj nplua mias.” (Khiav Dim 34:6) Nws “yog tus uas zoo kawg thiab [nws] zam txim.” (Ntawv Nkauj 86:5) Vajtswv ua siab ntev. (2 Petus 3:9) Nws yog tus uas ncaj ncees. (Ntawv Nkauj 18:25) Thaum koj kawm Vajlugkub ntxiv, koj yuav pom tias Yehauvas yeej coj li cov nqe ntawd tau hais. Tsis yog Yehauvas muaj tej yeeb yam no xwb, nws tseem muaj ntau qhov yeeb yam ntxiv thiab.

20-22. (1) Peb pom tsis tau Vajtswv, tiamsis piav seb peb yuav txav ze rau Vajtswv li cas. (2) Thaum koj kawm Vajlugkub, muaj ib txhia yuav hais li cas rau koj, tiamsis koj yuav tsum ua li cas?

²⁰ Vajtswv yog ib tug Plig, yog li ntawd, peb qhov muag pom tsis tau Vajtswv. (Yauhas 1:18; 1 Timaute 1:17) Txawm tias koj tsis pom Vajtswv los, thaum koj kawm txog nws hauv phau Vajlugkub, ces koj yuav los paub Vajtswv zoo ib yam li paub koj ib tug phoojywg. Zoo li tus sau nkauj tau hais, koj yuav pom Yehauvas “tej kev zoo kawg nkaus.” (Ntawv Nkauj 27:4, hauv qab taw qhia; Loos 1:20) Koj yimhuab kawm txog Yehauvas, ces koj yimhuab yuav paub nws zoo. Ces thaum koj paub Vajtswv zoo lawm, koj yuav hajyam muaj kev hlub rau nws thiab muaj kev sib raug zoo nrog nws.

²¹ Thaum koj paub Yehauvas lawm, koj yuav paub vim li cas phau Vajlugkub qhia tias Yehauvas zoo ib yam li peb Leej Txiv. (Mathai 6:9) Tsis yog Yehauvas pub txojsia rau peb xwb, tiamsis nws kuj xav kom peb tau lub neej zoo kawg nkaus, zoo ib yam li leej txiv xav kom nws cov menyuam tau zoo. (Ntawv Nkauj 36:9) Phau Vajlugkub kuj qhia tias peb ua tau Yehauvas tus phoojywg. (Yakaunpau 2:23) Qhov uas koj tau ua phoojywg nrog tus uas tsim lub qab ntuj no yuav zoo kawg li, puas yog?

²² Thaum koj kawm phau Vajlugkub ntxiv, tej zaum  yuav muaj ib txhia txhawj txog koj, thiab txwv tsis pub koj kawm. Tej zaum lawv txhawj tsam koj yuav hloov kev ntseeg. Tiamsis tsis txhob pub leejtwg txwv koj. Kev phoojywg nrog Yehauvas yog yam uas zoo tshaj plaws rau koj.

23, 24. (1) Vim li cas zoo rau koj muaj lus nug txog tej yam uas koj kawm? (2) Nyob rau Tshooj 2 peb yuav kawm txog dabtsi?

²³ Thaum koj pib kawm phau Vajlugkub, yeej yuav muaj tej yam uas koj tsis to taub. Tiamsis tsis txhob txaj muag nug lwm tus pab koj. Yexus hais tias zoo rau peb txo hwjchim li tus menyuam yaus. (Mathai 18:2-4) Peb sawvdaws yeej paub tias ib txwm menyuam yeej muaj lus nug ntau heev. Vajtswv xav kom koj nrhiav cov lus teb rau koj tej lus nug. Phau Vajlugkub qhuas cov uas mob siab kawm txog Vajtswv. Cov uas mob siab kawm ua tib zoo tshuaj seb tej uas lawv kawm puas muaj tseeb raws li Vajlugkub hais.​—Nyeem Tubtxib Tes Haujlwm 17:11.

²⁴ Yuav kom peb paub Yehauvas zoo, peb yuav tsum ua tib zoo kawm phau Vajlugkub. Tsis muaj ib phau ntawv zoo li phau Vajlugkub. Phau Vajlugkub txawv lwm phau ntawv li cas? Peb mam li kawm ntxiv txog qhov no hauv Tshooj 2.