1, 2. Yehauvas ntaus phoojywg zoo nrog leejtwg?

KOJ nyiam ntaus phoojywg nrog cov tibneeg zoo li cas? Feem ntau, tibneeg nyiam ntaus phoojywg nrog cov neeg uas xav li lawv xav, thiab nyiam li lawv nyiam, puas yog? Thiab tibneeg nyiam nrog cov neeg uas siab dawb siab zoo ua phoojywg.

² Txij thaum chiv keeb los, Vajtswv tau xaiv ib co neeg los nrog nws sib raug zoo. Xws li Aplahas, Davi thiab Daniyee. Yehauvas tau muab Aplahas hu ua nws tus phoojywg, kwvluag. (Nyeem Yaxaya 41:8; Yakaunpau 2:23.) Vajtswv kuj hais li no txog Davi: “Kuv tau nrhiav Yexi tus tub Davi, uas [haum] kuv siab.” Yehauvas hais li no rau qhov Davi coj tau lub neej raws li Yehauvas lub siab nyiam. (Tubtxib Tes Haujlwm 13:22) Thiab Yehauvas tau hais tias Daniyee “yog tus uas ntxim hlub.”​—Daniyee 9:23.

3. Vim li cas Yehauvas suav tias Aplahas, Davi, thiab Daniyee yog nws cov phoojywg?

³ Vim li cas Yehauvas suav tias Aplahas, Davi, thiab Daniyee yog nws cov phoojywg? Yehauvas tau qhia li no rau  Aplahas: “Vim koj mloog kuv tej lus.” (Chiv Keeb 22:18) Yog li ntawd, Yehauvas tsuas nrog cov uas txo hwjchim mloog nws lus, sib raug zoo xwb. Nws tau hais li no rau cov Yixayee: “Yuav tsum mloog kuv lus kuv thiaj ua nej tus Vajtswv thiab nej yuav ua kuv haiv neeg.” (Yelemi 7:23) Yog tias koj mloog Yehauvas lus, koj yeej yuav ua tau nws tus phoojywg thiab!

4, 5. Yehauvas yuav siv nws lub hwjchim los pab nws cov tibneeg li cas?

⁴ Thaum peb nrog Vajtswv ntaus phoojywg, Nws yuav pab peb ntau yam. Phau Vajlugkub hais tias Yehauvas nrhiav kev “ua nws lub hwjchim tshwm los pab cov uas lub siab xib rau nws.” (2 Vaj Keeb Kwm 16:9) Yehauvas yuav siv nws lub hwjchim los pab koj li cas ? Ntawv Nkauj 32:8 qhia tias, ib txojkev uas Yehauvas pab peb yog li no: “Kuv [Yehauvas] yuav coj thiab qhia koj txog txojkev uas tsim nyog koj taug. Kuv yuav ntsia ntsoov koj taw qhia koj.”

⁵ Nqe no txhawb tau peb lub zog kawg li, rau qhov nqe no qhia tias Yehauvas hlub tshua peb! Nws yog tus cob qhia peb thiab thaum peb ua raws li nws tej lus, nws yuav saib xyuas peb. Vajtswv xav kom koj nyiaj dhau tej kev sim siab thiab kev nyuaj siab uas los raug koj. (Nyeem Ntawv Nkauj 55:22.) Yog li ntawd, yog tias koj teev tiam Yehauvas kawg siab kawg ntsws, koj yeej muaj chaw vam ib yam li tus sau nkauj tau hais: “Kuv muab [Yehauvas] tso rau ntawm kuv lub hauv ntej tsis tu li. Vim nws nyob ntawm kuv sab xis kuv thiaj tsis ua zog.” (Ntawv Nkauj 16:8; 63:8) Yog li ntawd, Yehauvas yeej pab tau koj coj lub neej uas haum nws siab. Tiamsis, zoo li koj twb kawm lawm, Vajtswv muaj ib tug yeeb ncuab uas xav txwv kom koj txhob ua tau li ntawd.

6. Xatas tau hais lus kom noob neej li cas?

 ⁶ Tshooj 11 hauv phau ntawv no qhia tias Xatas tau sawv tawm tsam Vajtswv lub hwjchim kav. Xatas tau twv tias Vajtswv hais lus dag thiab ua tsis ncaj rau Adas thiab Eva. Nws liam tias Vajtswv tsis pub Adas thiab Eva txiav txim rau nkawd tus kheej tias yam twg zoo thiab yam twg phem. Tom qab Adas thiab Eva poob kev txhaum thiab nkawd cov xeeb ntxwv huam vam mus nyob thoob ntiajteb, Xatas kuj hais lus kom tag nrho noob neej thiab. Xatas kom hais tias, ‘Tibneeg tsis hlub Vajtswv tiag. Yog tias kuv sim lawv, txawm leejtwg los yuav tig tawm tsam Vajtswv.’ Ua li cas peb ho paub tias Xatas yeej xav li ntawd tiag? Thaum peb nyeem txog tus txivneej hu ua Yauj, peb yuav pom tias Xatas yeej xav li ntawd tiag. Yauj yog leejtwg, thiab Xatas tau hais lus kom nws li cas?

7, 8. (1) Vim li cas nyob rau Yauj tiam, tsis muaj ib tug neeg zoo npaum li Yauj? (2) Xatas tau liam li cas txog Yauj?

⁷ Yauj ua neej nyob kwvlam li 3,600 xyoo dhau los lawm. Nws yog ib tug neeg zoo. Peb paub li no rau qhov Yehauvas hais tias: “Tag nrho lub ntiajteb tsis muaj leejtwg zoo cuag li nws, nws yog tus neeg zoo tsis muaj chaw thuam li thiab ua ncaj ncees, nws hwm thiab paub ntshai Vajtswv thiab tseg tsis ua txojkev phem.” (Yauj 1:8) Yog li ntawd, Yauj yog ib tug neeg uas ua haum Vajtswv siab.

⁸ Xatas liam tias Yauj tsis hlub Yehauvas tiag tiag. Ntxwg Nyoog tau hais li no rau Yehauvas: “Koj tsis tau xov laj kab puag ncig [Yauj] thiab nws tsev neeg thiab txhua yam uas nws muaj lov? Koj twb foom koob hmoov rau tej haujlwm uas nws txhais tes ua thiab nws tej tsiaj txhu huaj vam coob kawg rau hauv lub tebchaws. Nimno cia li cev kiag koj txhais tes thiab kov txhua yam uas nws muaj, mas nws yeej yuav tsawm foom koj tab meeg koj.”​—Yauj 1:10, 11.

9. Yehauvas teb Xatas cov lus iab liam li cas?

 ⁹ Xatas liam tias Yauj teev tiam Vajtswv vim Yauj xav tau tej yam zoo ntawm Vajtswv xwb. Ntxwg Nyoog kuj liam ntxiv tias, yog Yauj raug sim, ces Yauj yeej yuav tig tawm tsam Vajtswv. Yehauvas teb Xatas cov lus iab liam ntawd li cas? Yehauvas cia Xatas sim Yauj. Yog vim li cas? Yehauvas cia Xatas sim li ntawd kom thiaj paub tseeb seb Yauj puas hlub Vajtswv tiag tiag, los tsis hlub.

10. Yauj raug sim li cas, thiab nws coj li cas thaum nws raug tej ntawd?

¹⁰ Tom qab uas Xatas hais tej lus ntawd rau Yehauvas, nws txawm pib nrhiav kev los sim Yauj. Xatas ua rau Yauj cov tsiaj txhu ib txhia raug tua, ib txhia raug tub sab nyiag. Yauj cov tub qhe feem coob raug tua tuag tas. Tej no ua rau Yauj kev khwv noj khwv haus nyuaj kawg nkaus li. Tiamsis qhov uas ua rau Yauj nyuaj siab tshaj yog thaum muaj cua daj cua dub ua rau Yauj 10 tus menyuam tuag tas. Txawm tias muaj tej xwm txheej phem no los, phau Vajlugkub hais tias “Yauj tsis ua txhaum lossis hais tias Vajtswv ua txhaum.”​—Yauj 1:22.

11. (1) Xatas hais lus kom Yauj li cas ntxiv, thiab Yehauvas puas cia Xatas sim Yauj ntxiv? (2) Txawm tias Yauj tau ib tug mob phem heev los, nws coj li cas xwb?

¹¹ Xatas tsis yog sim Yauj li no xwb. Tej zaum Xatas xav tias Yauj nyiaj taus qhov uas nws plam nws lub cuab tam, nws cov tub qhe, thiab nws cov menyuam. Tiamsis yog Xatas ua kom Yauj mob, Xatas xav tias Yauj yeej yuav tsum tig tawm tsam Vajtswv xwb xwb li. Yehauvas cia Xatas sim Yauj li ntawd. Xatas ua rau Yauj tau ib tug mob phem heev thiab sab kawg li. Txawm tias Yauj tau tus mob phem li ntawd, los nws yeej tsis tag kev cia siab rau Vajtswv. “Yauj lub qhov ncauj tsis hais ib los txhaum li,” lossis nws tsis hais lus tawm tsam Vajtswv kiag li.​—Yauj 2:10.

12. Yauj qhia tau li cas tias, Xatas tej lus kom tsis muaj tseeb tiag?

 ¹² Lub sijhawm ntawd, Yauj tsis paub tias Xatas yog tus tsim tej kev ntxhov siab no rau nws. Yauj tsis paub zoo txog qhov uas Xatas tau hais lus tawm tsam Yehauvas lub hwjchim kav. Yog li ntawd, Yauj txhawj tsam Vajtswv yog tus uas tsim tej kev ntxhov siab no rau nws. (Yauj 6:4; 16:11-14) Txawm li ntawd los, Yauj tseem muab siab npuab Yehauvas tsis tseg. Qhov uas Yauj muaj kev ntseeg ruaj nreeg qhia tau li cas? Qhia tau tias, Xatas tej lus kom tias Yauj tsis hlub Yehauvas tiag, yeej tsis muaj tseeb kiag li!

13. Vim Yauj muab siab npuab Yehauvas tsis tseg, tau muaj li cas xwb?

¹³ Yauj muab siab npuab Yehauvas heev. Yehauvas thiaj muab Yauj tus qauv no los pab teb Xatas tej lus twv. Yauj yog Yehauvas ib tug phoojywg tiag tiag li. Thaum kawg, Vajtswv foom koob hmoov rau Yauj vim nws muab siab npuab Vajtswv tiag.​—Yauj 42:12-17.

14, 15. Ua li cas peb ho paub tias Xatas tej lus twv Yauj, yeej yog hais rau noob neej tag nrho?

¹⁴ Xatas tsis yog kom Yauj tib leeg xwb. Xatas kuj liam tias koj tsis muab siab npuab Vajtswv tiag thiab. Hauv Paj Lug 27:11, Yehauvas Txojlus hais li no: “Kuv tub’e, cia li ntse thiab ua rau kuv zoo siab, xwv kuv thiaj li teb tau cov neeg uas thuam kuv.” Yehauvas tshoov kom neeg sau nqe no rau thaum twg lawd? Yog sau ntau pua xyoo tom qab Yauj tuag lawm. Yog li ntawd, nqe no qhia tias Xatas tseem yog tus uas thuam Vajtswv heev tshaj. Nws tseem niaj hnub hais lus kom Vajtswv cov tub qhe qees. Thaum peb coj ib lub neej uas haum Yehauvas siab, peb tus qauv yuav qhia tau tias Xatas tej lus kom, tsis muaj tseeb tiag. Tej no ua rau Vajtswv zoo siab. Koj xav li cas txog qhov  ntawd? Peb sawvdaws yeej muaj feem pab tawm tsam Ntxwg Nyoog tej lus dag. Qhov ntawd zoo kawg li, puas yog? Tej zaum peb yuav tau hloov peb lub neej, peb thiaj ua tau li ntawd.

¹⁵ Ua li cas peb ho paub tias Xatas tej lus twv Yauj, yeej yog hais rau noob neej huv tibsi? Vim Xatas tau hais li no: “Neeg yeem muab txhua yam uas nws muaj pauv nws txojsia.” (Yauj 2:4) Xatas hais tias “neeg” yeem ua li ntawd. Yog li, tsis yog nws hais lus kom Yauj tib leeg xwb. Tiamsis nws hais lus kom noob neej tag nrho huvsi. Tseem ceeb heev uas peb to taub li ntawd rau qhov Xatas tau liam tias, koj kuj tsis muab siab npuab Vajtswv tiag thiab. Ntxwg Nyoog xav kom koj hla Vajtswv tej kevcai thiab tso txojkev ncaj ncees tseg thaum koj raug kev nyuaj siab. Xatas yuav sim koj li cas?

16. (1) Xatas siv tswvyim li cas los ua kom tibneeg tso Vajtswv tseg? (2) Tej zaum Ntxwg Nyoog yuav siv tej tswvyim no los ntxias thiab tawm tsam koj li cas?

¹⁶ Zoo li peb tau kawm hauv Tshooj 10, Xatas muaj ntau yam tswvyim los ua kom tibneeg tso Vajtswv tseg. Tej lub sijhawm, nws yuav tawm tsam neeg “zoo yam nkaus li tus tsov ntxhuav nyooj laws nrhiav tus uas yuav tom tau noj.” (1 Petus 5:8) Nws ua li ntawd li cas? Tej zaum thaum koj kawm Vajlugkub thiab xyaum raws li koj tau kawm, koj tsev neeg lossis koj cov kwvtij neej tsa yuav tawm tsam koj, thiab txwv tsis pub koj kawm. * (Yauhas 15:19, 20) Tej lub sijhawm, Xatas kuj nyiam “txia ua [ib tug] tubtxib saum ntuj uas tawm hauv qhov kaj tuaj.” (2 Khaulee 11:14) Ntxwg Nyoog ua li ntawd li cas?  Tej zaum nws yuav siv tej yam uas zoo li tsis phem ua luaj twg, los ntxias kom peb tso lub neej uas haum Vajtswv siab tseg. Lossis tej zaum nws yuav nrhiav kev los ua kom peb qaug zog, kom peb xav tias peb yeej ua tsis tau raws li Vajtswv lub siab nyiam. (Paj Lug 24:10) Txawm tias Xatas yuav tawm tsam peb zoo li tus “tsov ntxhuav,” lossis ua txuj txia zoo li ib tug “tubtxib saum ntuj” ntxias peb, los peb yuav tsum nco ntsoov tias nws tseem niaj hnub siv tej qub lus los tawm tsam peb: Nws liam tias thaum peb raug kev nyuaj siab lossis raug sim, peb yuav tso kev teev tiam Vajtswv tseg. Koj yuav ua li cas thiaj qhia tau tias Xatas tej lus kom ntawd tsis muaj tseeb, thiab qhia tau tias koj yeej muab siab npuab Vajtswv ib yam li Yauj?

17. Vim li cas peb mloog Yehauvas tej lus sam hwm?

¹⁷ Yog tias koj coj ib lub neej uas haum Vajtswv siab, ces koj tus qauv yuav pab qhia tias Xatas tej lus kom tsis muaj tseeb tiag. Peb yuav coj lub neej uas haum Vajtswv siab li cas? Phau Vajlugkub qhia tias: “Koj yuav tsum hlub [Yehauvas] uas yog koj tus Vajtswv kawg siab kawg ntsws, thiab kawg dag kawg zog.” (Kevcai 6:5) Thaum koj txojkev hlub rau Vajtswv loj hlob zuj zus, koj yuav xav ua raws li Vajtswv lub siab nyiam. Tus tubtxib Yauhas sau tseg tias: “Qhov uas peb hlub Vajtswv yog li no, yog qhov uas peb tuav rawv nws tej lus nkaw.” Yog tias koj hlub Yehauvas kawg siab kawg ntsws, koj yuav pom tias “nws tej lus nkaw tsis ua nra hnyav.”​—1 Yauhas 5:3.

18, 19. (1) Yehauvas tau sam hwm li cas? (Saib lub ntsiab hu ua “ Zam Tej Uas Yehauvas Ntxub.”) (2) Ua li cas peb ho paub tias Yehauvas yeej yuav tsis hais kom peb ua tej yam uas peb ua tsis tau?

¹⁸ Yehauvas tau sam hwm li cas? Yehauvas tau sam hwm txog tej yam uas peb yuav tsum tau zam. Peb yuav tsum  tau zam tej yam twg? Mus nyeem lub ntsiab hauv qab hu ua “ Zam Tej Uas Yehauvas Ntxub.” Thaum koj xub kawm txog tej uas phau Vajlugkub txwv, tej zaum yuav zoo li tsis phem ua luaj twg. Tiamsis yog tias koj ua tib zoo xav txog cov nqe Vajlugkub hauv lub ntsiab ntawd, koj yuav pom tias zoo rau peb coj li Yehauvas tej lus sam hwm. Thaum koj pib hloov koj lub neej kom raws li Vajtswv lub siab nyiam, tej zaum yuav tsis yoojyim kiag li. Tiamsis, yog koj ua haum Vajtswv siab, ces koj yuav txaus siab rau koj lub  neej thiab koj yuav muaj kev zoo siab tiag tiag. (Yaxaya 48:17, 18) Koj yeej hloov tau koj lub neej li no. Ua li cas peb ho paub li ntawd?

¹⁹ Yehauvas yeej paub tias peb ua tau tej yam twg. Thiab nws yeej yuav tsis hais kom peb ua tej yam uas peb ua tsis tau. (Nyeem Kevcai 30:11-14.) Yehauvas paub peb zoo tshaj li peb paub peb tus kheej. (Ntawv Nkauj 103:14) Tsis tas li ntawd xwb, Yehauvas yeej pub tau lub zog rau peb, kom peb thiaj ua tau raws li nws hais. Tus tubtxib Povlauj  sau li no: “Vajtswv yog tus uas peb tso siab tau, mas nws yuav tsis cia nej raug kev sim siab dhau li uas nej thev tsis taus, tiamsis thaum raug kev sim siab nws yuav qheb kev rau nej dim kom nej thiaj li thev taus.” (1 Khaulee 10:13) Yuav kom koj thev taus, Yehauvas yeej pub tau “lub hwjchim uas loj kawg nkaus” rau koj. (2 Khaulee 4:7) ­Tom qab uas Povlauj thev dhau ntau yam kev nyuaj siab, nws sau tias: “Kuv yeej ua tau txhua yam vim muaj Vajtswv uas txhawb kuv lub zog.”​—Filipi 4:13.

20. Vajtswv xav kom peb coj tus cwj pwm zoo li cas, thiab vim li cas tseem ceeb rau peb ua li no?

²⁰ Yuav kom peb ua haum Yehauvas siab, tsis yog peb yuav zam tej yam uas nws ntxub xwb. Tiamsis peb yuav tsum ua dabtsi ntxiv? Peb yuav tsum nyiam tej yam uas Yehauvas nyiam thiab. (Loos 12:9) Koj yeej nyiam ntaus phoojywg nrog cov neeg uas xav li koj xav, thiab nyiam li koj nyiam, puas yog? Yehauvas los kuj coj ib yam li ntawd thiab. Yog li ntawd, xyaum coj tus cwj pwm uas Yehauvas nyiam. Ntawv Nkauj 15 qhia txog tus cwj pwm ntawd thiab qhia txog cov uas Vajtswv suav tias yog nws cov phoojywg. (Nyeem Ntawv Nkauj 15:1-5.) Yehauvas cov phoojywg cia Vajtswv lub hwj huam dawb huv pab kom lawv coj tau tus cwj pwm zoo. Lub hwj huam dawb huv yuav pab tau lawv muaj “kev hlub, kev xyiv fab, kev siab tus, kev thev taus, kev khuvleej, kev ua zoo, kev ua ncaj, lub siab mos siab muag thiab paub tswj tus kheej.”​—Kalatia 5:22, 23.

21. Dabtsi yuav pab tau koj coj tus cwj pwm uas Yehauvas nyiam?

²¹ Thaum peb nyeem thiab kawm phau Vajlugkub tsis tu ncua, ces yuav pab tau kom peb coj tus cwj pwm uas  Yehauvas nyiam. Thaum peb paub tias Vajtswv xav kom peb ua dabtsi, ces peb yuav paub xav raws li Vajtswv lub siab nyiam. (Yaxaya 30:20, 21) Koj yimhuab hlub Yehauvas, ces koj yimhuab yuav xav coj lub neej uas haum Vajtswv siab.

22. Thaum koj coj ib lub neej uas haum Yehauvas siab, koj yuav qhia tau li cas?

²² Peb yuav tsum siv zog, peb thiaj coj tau lub neej uas haum Yehauvas siab. Phau Vajlugkub muab qhov uas yus hloov yus lub neej, piv rau qhov uas yus hnav dua ib ce tsoos tsho tshiab. Yus muab tus cwj pwm qub hle pov tseg, ces coj dua ib tug cwj pwm tshiab. (Khaulauxi 3:9, 10) Thaum peb hloov thiab coj raws li Yehauvas tej lus sam hwm, peb lub neej yuav zoo li cas? Tus sau nkauj tau hais li no: “Qhov uas tuav rawv tej lus no kuj tau yeeb koob loj kawg.” (Ntawv Nkauj 19:11) Thaum koj xyaum coj lub neej uas haum Vajtswv siab, koj yeej yuav txais ntau yam koob hmoov. Koj tus qauv yuav qhia tau tias Xatas tej lus kom tsis muaj tseeb tiag, thiab koj yuav ua rau Yehauvas zoo siab kawg li!