TABTOM muaj dabtsi hauv daim duab no? Cov tibneeg tabtom noj ib rooj mov loj heev. Npanpiloo tus vajntxwv tau caw 1,000 leej tuaj koom rooj mov no. Lawv tabtom siv tej khob nyiaj khob kub thiab tej tais uas lawv coj tim Yehauvas lub tuam tsev los. Tiamsis tamsim ntawd txawm muaj ib txhais tes neeg tshwm plaws thiab sau ib co lus rau ntawm phab ntsa. Sawvdaws ntshai kawg li.

Tus vajntxwv ntawd yog Nenpukhanexa tus tub xeeb ntxwv Npeesaxa. Nws qw kom lawv coj nws cov neeg txawj ntse los ntawm nws. Vajntxwv hais tias: ‘Yog leejtwg nyeem tau cov lus no thiab txhais tau lub ntsiab rau kuv, ces kuv yuav muab ntau yam khoom pub rau tus ntawd, thiab tsa tus ntawd ua tus nom 3 uas kav hauv lub nceeg vaj no.’ Tiamsis tsis muaj ib tug neeg txawj ntse uas yuav nyeem tau thiab txhais tau cov lus ntawd.

Thaum vajntxwv niam hnov lawv qw nws thiaj los rau hauv chav noj mov. Nws hais rau vajntxwv tias: ‘Tsis txhob poob siab. Muaj ib tug txivneej hauv koj lub nceeg vaj uas paub cov vajtswv dawb huv. Thaum Nenpukhanexa tseem ua vajntxwv, nws tau muab tus txivneej ntawd tsa ua cov neeg txawj ntse tus thawj. Tus txivneej ntawd hu ua Daniyee. Cia li hu nws tuaj. Daniyee yuav txhais tau lub ntsiab rau koj.’

Tamsim ntawd lawv txawm coj Daniyee tuaj ntawm Npeesaxa. Daniyee hais rau vajntxwv tias nws tsis kam yuav cov khoom pub uas vajntxwv muab. Ces Daniyee mam li piav txog lub sijhawm uas Yehauvas muab Nenpukhanexa tshem tawm, tsis pub nws ua vajntxwv. Daniyee hais tias: ‘Nenpukhanexa khav theeb heev. Yehauvas thiaj rau txim rau nws.’

Daniyee hais rau Npeesaxa tias: ‘Koj twb paub txog tej no, tiamsis koj tseem khav theeb ib yam li Nenpukhanexa thiab. Koj mus muab tej khob thiab tej tais coj hauv Yehauvas lub tuam tsev los siv. Koj qhuas tej vajtswv uas muab zeb muab ntoo ua, tiamsis koj tsis hwm tus Tswv Tsim. Twb yog vim li ntawd Vajtswv thiaj ua ib txhais tes sau cov lus ntawd.’

Daniyee hais ntxiv tias: ‘Cov lus no sau tias: MENE, MENE, TEKHEE thiab PAXI.’

‘MENE txhais tau tias Vajtswv twb teem caij nyoog rau qhov uas koj ua vajntxwv, thiab nws tsuas pub koj ua vajntxwv kav txij li no xwb. TEKHEE txhais tau tias koj raug muab luj hauv rab teev, tiamsis pom tias koj tsis zoo rau qhov koj sib heev. PAXI txhais tias yuav muab koj lub nceeg vaj faib rau cov Midia thiab cov Pawxia.’

Hmo uas Daniyee hais tej lus ntawd, cov Midia thiab cov Pawxia txeeb tau lub nroog Npanpiloo thiab muab Npeesaxa tua kiag lawm. Hmo ntawd tau muaj tseeb raws li cov lus uas sau ntawm phab ntsa! Tiamsis nimno yuav ua li cas rau cov Yixayee? Peb tseem yuav kawm ntxiv txog qhov no, tiamsis ua ntej ntawd cia peb kawm saib ua li cas rau Daniyee.