KOJ puas pom tus txivneej uas nyob hauv dej? Nws tabtom ntsib teeb meem, puas yog? Tus ntses ntawd tabtom yuav muab nws nqos! Koj puas paub tus txivneej ntawd yog leejtwg? Nws lub npe hu ua Yauna. Cia peb kawm saib vim li cas nws ntsib qhov teeb meem no.

Yauna yog ib tug neeg cev Yehauvas lus. Tsis ntev tom qab Elisa tuag lawm, ces Yehauvas qhia rau Yauna tias: ‘Mus rau lub nroog loj Ninave. Cov tibneeg ntawd ua phem kawg nkaus li, kuv xav kom koj mus qhia lawv txog qhov no.’

Tiamsis Yauna tsis kam mus. Yog li ntawd, Yauna thiaj caij nkoj mus rau lwm qhov chaw kom deb ntawm Ninave. Yehauvas tsis txaus siab rau qhov uas Yauna khiav mus li ntawd. Yehauvas thiaj ua cua daj cua dub hlob heev los nplawm dej hiavtxwv, ua rau lub nkoj yuav tog. Cov neeg tsav nkoj ntshai kawg li, lawv thiaj quaj thov lawv tej vajtswv pab.

Yog li ntawd, Yauna thiaj hais rau lawv tias: ‘Kuv pe hawm Yehauvas, tus Vajtswv uas tsim lub ntuj thiab lub ntiajteb. Twb yog kuv khiav ntawm Yehauvas mus, kuv thiaj tsis tau ua li Yehauvas hais.’ Yog li ntawd, cov neeg tsav nkoj thiaj nug tias: ‘Peb yuav ua li cas rau koj, cua thiaj tus?’

Yauna hais tias: ‘Muab kuv pov rau hauv dej, cua thiaj tus.’ Cov neeg tsav nkoj tsis kam muab nws pov rau hauv dej, tiamsis cua daj cua dub pheej ntsawj hlob zuj zus ntxiv. Thaum kawg lawv thiaj muab nws pov rau hauv dej. Tamsim ntawd, cua daj cua dub thiab dej hiavtxwv cia li tus lawm.

Thaum Yauna tog kiag mus rau hauv dej, tus ntses loj loj txawm muab nws nqos kiag. Tiamsis Yauna tsis tuag. Nws nyob hauv ntses lub plab tau 3 hnub 3 hmos. Yauna nyuaj siab heev txog qhov uas nws tsis mus rau lub nroog Ninave raws li Yehauvas tau hais. Yog li ntawd, koj puas paub Yauna ua li cas xwb?

Yauna thiaj thov Yehauvas pab nws. Ces Yehauvas thiaj ua rau tus ntses coj Yauna mus ntuav rau tim ntug dej. Tom qab ntawd Yauna mam mus rau lub nroog Ninave. Qhov no qhia tias tseem ceeb heev rau peb ua raws li Yehauvas hais, puas yog?