ZAJ KAWM 55
Txhawb Koj Lub Koom Txoos
Yehauvas Cov Tim Khawv thoob qab ntuj zoo siab heev uas lawv tau pe hawm Yehauvas nrog lawv cov kwv tij nkauj muam hauv lawv tej koom txoos. Lawv ris txiaj ntsig rau tej kev cob qhia uas los ntawm lub koom txoos los thiab lawv nrhiav kev ntshis los txhawb lawv lub koom txoos. Koj puas xav li ntawd txog koj lub koom txoos thiab?
1. Koj yuav siv koj lub sij hawm thiab lub dag lub zog los txhawb koj lub koom txoos li cas?
Peb txhua leej txhua tus yeej pab tau lub koom txoos. Muab piv txwv li no, yog muaj cov laus thiab cov uas tsis taus nyob hauv koj lub koom txoos, koj puas pab coj tau lawv mus kev sib txoos? Los sis pab lwm yam xws li, mus yuav zaub mov thiab lwm yam tom kiab tom khw rau lawv? (Nyeem Yakaunpaus 1:27.) Peb kuj mus pab tu thiab pab kho lub Tsev Nceeg Vaj thiab. Peb tuaj “yeem” ua tej no, tsis yog peb raug yuam, tiam sis yog vim peb hlub Vajtswv thiab hlub peb cov kwv tij nkauj muam.—Phau Ntawv Nkauj 110:3.
Kuj muaj lwm yam uas cov ua kev cai raus dej lawm ua tau los txhawb lawv lub koom txoos thiab. Cov kwv tij uas muaj yam ntxwv zoo raws li phau Vajlugkub hais yuav ua tau tub leg num thiab ntev mus kuj yuav ua tau txwj laus. Thiab txhua tus, tsis hais poj niam los sis txiv neej, puav leej ua tau ib tug tho kev txhawb lub koom txoos kev tshaj tawm txoj xov zoo. Yehauvas Cov Tim Khawv kuj muaj ib txhia mus pab ua Tsev Nceeg Vaj thiab muaj ib txhia tsiv mus pab cov koom txoos uas cheem tsum kev pab.
2. Peb yuav siv nyiaj txiag thiab lwm yam uas peb muaj los txhawb lub koom txoos li cas?
Peb kuj muab tau tej uas peb muaj uas muaj nqis los pub rau Yehauvas. (Pajlug 3:9) Peb zoo siab thiab xam tias yog ib qho koob hmoov zoo uas peb muab tau nyiaj txiag thiab tej qhov txhia chaw uas peb muaj mus pab lub koom txoos thiab txhawb kev tshaj tawm thoob qab ntuj. (Nyeem 2 Kauleethaus 9:7.) Muaj ib txhia qee ntshis “tej nyiaj uas [lawv] khwv tau los me ntsis khaws cia” kom lawv thiaj muaj nyiaj siab dawb mus pab lub koom haum thiab pab cov uas raug xwm txheej phem. (Nyeem 1 Kauleethaus 16:2.) Peb tso tau nyiaj siab dawb rau hauv lub me nyuam thawv tso nyiaj tom Tsev Nceeg Vaj los sis hauv lub vej xaij donate.jw.org. Peb ua Yehauvas tsaug uas nws tseem cia peb muab peb tej qhov txhia chaw thiab nyiaj txiag rau nws.
KAWM NTXIV
Xav seb puas muaj tej yam uas koj ua tau los txhawb koj lub koom txoos.
3. Muab nyiaj txiag thiab tej qhov txhia chaw mus pab
Yehauvas thiab Yexus nkawd hlub cov uas zoo siab hlo pub rau lwm tus. Yexus thiaj qhuas tus poj ntsuam txom txom nyem uas khee hlo nws ob nyuag lub txiaj toog coj mus tso rau hauv lub thawv tso nyiaj. Nyeem Lukas 21:1-4 thiab tham txog ob lo lus no:
-
Puas yog peb yuav tsum tso nyiaj ntau ntau, Yehauvas thiaj txaus siab rau peb?
-
Thaum peb zoo siab hlo pub rau Yehauvas thiab Yexus nkawd, nkawd xav li cas?
Saib zaj YEEB YAJ KIAB seb peb cov nyiaj siab dawb siv mus ua dab tsi. Ces tham txog lo lus no:
-
Cov nyiaj siab dawb pab tau cov koom txoos thoob plaws ntiaj teb li cas?
4. Peb txhua tus yeej pab tau
Phau Vajlugkub hais tias yav thaum ub Yehauvas cov neeg kub siab lug thiab sib pab nroos tu lawv qhov chaw pe hawm Yehauvas. Ces lawv tsis yog muab nyiaj txiag pab nkaus xwb tiam sis lawv ua ntau tshaj ntawd. Nyeem 2 Xwmtxheej Vajntxwv 34:9-11 thiab tham txog lo lus no:
-
Txhua tus Ixayees pab tu Yehauvas lub tuam tsev li cas?
Saib zaj YEEB YAJ KIAB seb Yehauvas Cov Tim Khawv niaj hnub no ho xyaum cov Ixayees li cas. Ces tham txog ob lo lus no:
-
Vim li cas thiaj tseem ceeb rau peb yuav tsum tu peb lub Tsev Nceeg Vaj kom zoo thiab huv si?
-
Puas muaj tej yam uas koj pab tau thiab?
5. Cov kwv tij muaj cuab kav yuav pab tau lub koom txoos ntau ntxiv
Phau Vajlugkub txhawb kom cov txiv neej Khixatias ua li lawv ua tau los txhawb lub koom txoos. Saib zaj YEEB YAJ KIAB txog ib tug qauv. Ces tham txog lo lus no:
-
Hauv zaj yeeb yaj kiab no, Lis Foom ua li cas nws thiaj li pab tau lub koom txoos ntau tshaj qub?
Phau Vajlugkub qhia tias cov kwv tij uas xav ua tub leg num thiab ua txwj laus yuav tau ua li cas. Nyeem 1 Timautes 3:1-13 thiab tham txog cov lus no:
-
Cov kwv tij uas xav ua tub leg num thiab ua txwj laus yuav tsum coj li cas thiab muaj tus yam ntxwv zoo li cas?
-
Lawv tsev neeg yuav tsum coj li cas?—Saib nqe 4 thiab 11.
-
Thaum cov kwv tij rau siab ua li cov nqe Vajlugkub no hais, pab tau cov kwv tij nkauj muam hauv lub koom txoos li cas?
TEJ TUG YUAV NUG TIAS: “Yehauvas Cov Tim Khawv cov nyiaj uas lawv siv ua lawv tes hauj lwm los qhov twg los?”
-
Koj yuav teb li cas?
KOJ KAWM TAU DAB TSI
Peb ua rau Yehauvas zoo siab heev thaum peb siv peb lub sij hawm, lub dag lub zog, nyiaj txiag, thiab peb tej qhov txhia chaw mus txhawb lub koom txoos.
Rov Tham Dua
-
Peb yuav siv peb lub sij hawm thiab lub dag lub zog mus txhawb lub koom txoos li cas?
-
Peb yuav muab peb tej qhov txhia chaw thiab nyiaj txiag mus txhawb lub koom txoos li cas?
-
Koj yuav ua li cas los txhawb koj lub koom txoos?
TSHAWB NTXIV
Nyeem seb yog vim li cas Yehauvas thiaj tsis kom cov uas pe hawm nws tso ib feem kaum lawm.
“Phau Vajlugkub Hais Li Cas Txog Qhov Tso Ib Feem Kaum?” (Nyeem hauv jw.org/hmn)
Phau Vajlugkub muab hauj lwm rau cov txiv neej uas ua kev cai raus dej lawd ua. Tiam sis yog tus poj niam uas ua kev cai raus dej lawm yuav tsum saib xyuas tes hauj lwm ntawd, nws yuav tau ua li cas?
“Vajtswv Tsa Cov Txwj Laus Ua Cov Saib Xyuas Lub Koom Txoos” (Phau Tsom Faj lub 2 Hlis Xyoo 2021)
Mus saib cov kwv tij uas ua siab tawv qhawv tsis ntshai coj peb tej ntaub ntawv mus rau cov kwv tij nkauj muam.
Tej nyiaj txiag uas peb tau los ua peb tes hauj lwm txawv ntawm lwm txoj kev ntseeg.
“Yehauvas Cov Tim Khawv Tau Nyiaj Txiag Qhov Twg Los Ua Lawv Tes Hauj Lwm?” (Nyeem hauv jw.org/hmn)
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
