ZAJ KAWM 11
Yuav Ua Cas Thiaj Khaws Tau Tej Uas Nyob Hauv Phau Vajlugkub
Cia muab xav tias koj yuav pib cog qoob loo rau ib daim teb uas loj thiab dav heev. Koj puas tau xav rau hauv nruab siab tias yuav ua cas cog tas daim teb ntawd? Yuav kom koj muaj siab ua tas daim teb, koj yuav tau txhob xav txog tias daim teb ntawd loj npaum li cas. Tiam sis koj yuav tau ua ib ntsug teb zuj zus ces tos koj nco koj twb ua tiav lawm. Thaum peb nyeem phau Vajlugkub los peb yuav tau ua tib yam li ntawd thiab. Tej zaum koj yuav xav tias xyov yuav pib qhov twg. Nyob rau hauv zaj kawm no, peb yuav mus tham txog qho yam uas peb ua tau kom pab peb xav nyeem thiab kawm phau Vajlugkub.
1. Vim li cas peb yuav tau nyeem phau Vajlugkub tsis tu ncua?
Ib tug neeg uas nyeem phau Vajlugkub los sis Yehauvas txoj kev cai tsis tu ncua yuav muaj kev zoo siab thiab ua lub neej kaj siab lug tso siab plhuav. (Nyeem Phau Ntawv Nkauj 1:1-3.) Thaum pib, ib hnub no xyaum nyeem ob peb feeb xwb los tau. Yog koj yim huab paub Vajtswv txoj lus zoo, ces koj yim huab yuav xav nyeem phau Vajlugkub.
2. Peb yuav tau ua li cas peb thiaj khaws tau tej uas peb nyeem hauv phau Vajlugkub?
Yuav kom peb khaws tau tej uas peb nyeem hauv phau Vajlugkub kom tau ntau dua, peb yuav tsum nyeem thiab muab tej uas peb nyeem ntawd coj los ua tib zoo xav. Thaum koj nyeem, xav li no: ‘Tej uas kuv nyeem qhia li cas txog Yehauvas rau kuv? Kuv yuav muab coj los siv li cas rau hauv kuv lub neej? Kuv yuav muab siv li cas los mus pab lwm tus?’
3. Yuav ua cas peb thiaj nrhiav tau sij hawm los nyeem phau Vajlugkub?
Yeej tsis yooj yim rau peb coob tus nrhiav tau sij hawm los nyeem phau Vajlugkub kiag li. Yog li ntawd, peb yuav tau “siv txhua lub sijhawm kom muaj nqis.” (Efexus 5:16) Koj yuav ua tau li no yog tias koj teem sij hawm txhua hnub los nyeem phau Vajlugkub. Ib txhia teem sij hawm los nyeem Vajlugkub thaum sawv ntxov, ib txhia nyeem thaum lawv noj su, thiab ib txhia nyeem rau yav tsaus ntuj ua ntej lawv mus pw. Lub sij hawm twg thiaj zoo rau koj los nyeem phau Vajlugkub?
KAWM NTXIV
Mus kawm seb yuav ua cas koj thiaj xav nyeem phau Vajlugkub. Saib seb yuav npaj li cas koj thiaj khaws tau tej uas koj kawm hauv phau Vajlugkub.
Zoo ib yam li peb xyaum tau kom xis noj tej zaub mov uas peb tsis tau noj dua, peb kuj xyaum tau kom peb xav nyeem phau Vajlugkub thiab
4. Kawm kom xav nyeem phau Vajlugkub
Tej zaum yuav tsis yooj yim thaum peb nyuam qhuav pib nyeem phau Vajlugkub. Txawm li ntawd los, peb yuav tau xyaum kam tiag kom thiaj xav nyeem phau Vajlugkub ib yam li thaum peb xyaum noj kom xis tej zaub mov uas peb tsis tau noj dua. Nyeem 1 Petus 2:2, thiab tham txog lo lus no:
-
Koj puas xav tias yog koj nyeem phau Vajlugkub txhua hnub, koj yuav nyiam thiab xav nyeem dua tuaj?
Saib zaj YEEB YAJ KIAB seb ua cas ib txhia thiaj pib nyiam nyeem phau Vajlugkub lawm. Thiab tham txog cov lus no.
-
Nyob hauv zaj yeeb yaj kiab, ua cas ho nyuaj rau cov hluas nyeem phau Vajlugkub?
-
Lawv tau ua li cas kom pab tau lawv xav nyeem phau Vajlugkub tsis tseg?
-
Lawv tau ua li cas kom thiaj li lom zem thaum lawv nyeem phau Vajlugkub?
Tej yam uas pab tau koj pib nyeem phau Vajlugkub:
-
Xaiv phau uas txhais raug lub ntsiab thiab siv cov lus uas koj to taub. Sim nyeem phau Vajtswv Txoj Lus Rau Cov Nyob Lub Qab Ntuj Tshiab ua yam lus uas koj to taub zoo.
-
Nyeem tej lub ntsiab uas koj xav paub ua ntej. Yog koj tsis paub xyov yuav pib qhov twg ces mus saib sab uas hu ua “Cia Li Pib Nyeem Phau Vajlugkub.”
-
Ceev tseg seb koj nyeem qhov twg txog twg lawm. Siv sab uas hu ua “Ceev Tseg Cov Nqe Vajlugkub Uas Koj Nyeem” uas nyob hauv phau ntawv no.
-
Siv lub app JW Library®. Txawm nyob rau qhov twg los koj yeej siv tau koj lub xov tooj ntawm tes los nyeem thiab mloog phau Vajlugkub hauv lub app no.
-
Saib Cov Lus Qhia Ntxiv hauv phau Vajtswv Txoj Lus Rau Cov Nyob Lub Qab Ntuj Tshiab. Yuav kom koj to taub thiab xav nyeem phau Vajlugkub, ntawm no muaj cov duab qhia teb chaws, lwm yam duab qhia, thiab cov lus txhais.
5. Npaj rau thaum koj kawm Vajlugkub
Nyeem Phau Ntawv Nkauj 119:34, thiab tham txog lo lus no:
-
Thaum koj yuav nyeem phau Vajlugkub los sis npaj kawm Vajlugkub, vim li cas zoo rau koj thov Vajtswv ua ntej tso?
Txhua zaus koj kawm Vajlugkub, yuav ua li cas thiaj khaws tau tej uas koj kawm ntawd ntau dua? Thaum koj npaj rau ib zaj kawm hauv phau ntawv no, sim ua raws li hais nram no:
-
Nyeem thawj ob peb nqes hauv zaj kawm.
-
Nrhiav thiab nyeem cov nqe Vajlugkub, thiab saib seb ua cas ho muab los siv rau hauv zaj kawm ntawd.
-
Kos cov lus uas teb rau cov lus nug kom koj thiaj paub tham txog zaj kawm no nrog tus uas qhia Vajlugkub rau koj.
Koj puas paub?
Yehauvas Cov Tim Khawv tau siv ntau phau Vajlugkub los lawm. Txawm li ntawd los, peb kheev siv phau Vajtswv Txoj Lus Rau Cov Nyob Lub Qab Ntuj Tshiab tshaj rau qhov phau no txhais tau raug, meej, thiab muaj Vajtswv lub npe nyob rau hauv.—Mus nyeem txog zaj uas muaj lub ntsiab hu ua “Yehauvas Cov Tim Khawv Puas Muaj Lawv Ib Phau Vajlugkub?”
IB TXHIA HAIS TIAS: “Kuv tsis muaj sij hawm kawm Vajlugkub.”
-
Koj xav li cas txog kev kawm Vajlugkub?
KOJ KAWM TAU DAB TSI
Yuav kom peb khaws tau tej uas peb kawm hauv phau Vajlugkub ntau dua, peb yuav tau teem sij hawm los nyeem, thov Vajtswv pab peb nkag siab tej uas peb yuav nyeem, thiab npaj ua ntej peb yuav kawm Vajlugkub.
Rov Tham Dua
-
Peb yuav tau ua li cas peb thiaj khaws tau tej uas peb kawm hauv phau Vajlugkub ntau dua?
-
Koj teem sij hawm los nyeem thiab kawm Vajlugkub rau thaum twg?
-
Vim li cas zoo rau koj npaj rau thaum koj kawm Vajlugkub?
TSHAWB NTXIV
Mus saib tej uas yuav pab peb khaws tau tej peb nyeem hauv phau Vajlugkub kom tau ntau dua.
“Nyeem Vajlugkub Li Cas Thiaj Raug Siab” (Phau Tsom Faj Phau 1 Xyoo 2017)
Kawm peb txoj kev uas koj siv tau los nyeem phau Vajlugkub.
“Phau Vajlugkub Pab Puas Tau Kuv?—Zaj 1: Nyeem Vajlugkub” (Nyeem hauv jw.org/hmn)
Mus saib seb yuav ua cas thiaj xav nyeem phau Vajlugkub.
Mus kawm ntawm cov uas nyeem phau Vajlugkub tau ntev niaj ntau xyoo lawm.
Tej Yam No Yuav Pab Tau Koj Thiab
TEJ UAS COOB TUS NUG TXOG
Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv qhia Vajlugkub dawb xwb. Koj xav siv phau Vajlugkub twg los kawm los yeej tau. Koj yeej caw tau tag nrho koj tsev neeg thiab koj tej phooj ywg tuaj nrog koj kawm.
