Para mag-function ang imo lawas, kinahanglan sang imo dugo ang insakto nga kadamuon sang electrolytes, pareho sang calcium. Pero kada adlaw, lainlain ang kadamuon sang electrolytes nga nagasulod sa imo lawas. Gani, ano ang ginahimo sang imo lawas para may ara ka pirme insakto nga kadamuon sang electrolytes?

 Ang healthy nga lawas sang tawo makakontrol sang kadamuon sang electrolytes paagi sa paghimo, pagtago, kag pagpagua sang mga hormone sa imo dugo. Ang mga hormone mga kemikal nga nagabulig para makontrol ang sarisari nga function sang lawas. Gani bisan ang diutay kaayo nga hormone may daku nga epekto sa imo lawas. Ang Encyclopedia Britannica nagsiling nga ang pagpagua sang mga hormone “indi pinalagpat lang, kundi isa ini ka komplikado kag insakto gid nga proseso.”

 Halimbawa, mabal-an sang parathyroid gland sa liog bisan ang gamay nga mga pagbag-o sa kadamuon sang calcium sa dugo. Ini nga mga gland, nga sa masami apat ka bilog, daw mga pasi lang sang bugas ang kadakuon.

 Kon magnubo ang kadamuon sang calcium nga kinahanglan sang imo lawas, mabal-an ini dayon sang parathyroid gland. Dayon sa sulod lang sang mga segundos, madasig ini nga nagapagua sang hormone. Ginasugo sini nga hormone ang imo tul-an nga magpagua sang calcium, nga natago diri, sa imo dugo. Ginasugo man sini nga hormone ang imo mga kidney nga untatan anay ang pagkuha sang calcium halin sa imo dugo kag ang imo small intestine nga mag-absorb sang mas madamo nga calcium halin sa imo ginakaon.

 Pero kon nasobrahan naman kadamo ang calcium sa dugo, ang lain pa gid nga gland, nga ginatawag thyroid, ang nagapagua sang lain naman nga klase sang hormone. Ginasugo sini nga hormone ang mga tul-an nga mag-absorb kag magtago sang mas madamo nga calcium. Ginasugo man sini ang mga kidney nga ipagua ang mas madamo nga calcium sangsa kinaandan.

 Ini nga mga hormone, duha pa lang sa sobra ginatos ka hormone nga ginagamit sang lawas sang tawo para i-adjust kag kontrolon ang sarisari nga mga proseso.

 Ano sa banta mo? Ang ikasarang bala sang mga hormone sa pagkontrol sang function sang imo lawas resulta sang ebolusyon? Ukon gindesinyo ini?