Ginapakita sa mga pagtuon nga ang mga tawo nga pirme nagapasalamat mas malipayon kag mas mapagros, mas kabalo sang ila himuon kon may problema, kag mas suod sa ila mga abyan. Suno sa researcher nga si Robert A. Emmons nga kon ang isa ka tawo pirme nagapasalamat “malikawan niya ang mga balatyagon nga makahalit sa iya pareho sang kahisa, pagdumot, pagkasakon, kag kaugot.” a

 Ano ang benepisyo sa mga bata kon pirme sila magpasalamat? May isa ka pagtuon nga ginhimo sa 700 ka pamatan-on sa sulod sang apat ka tuig. Nakita sa sini nga pagtuon nga ang kalabanan sa mga pamatan-on nga pirme nagapasalamat wala nagapangodigo sa test, wala naga-drugs kag nagapahubog, ukon wala sing malain nga ginahimo sa iban.

•   Wala nagapasalamat ang mga bata kay pamatyag nila obligado ang mga tawo nga ihatag sa ila ang tanan nila nga gusto. Madamo nga mga bata ang nagapati nga kinamatarong nila nga mabaton ang maayo nga mga butang. Wala gid sila nagapasalamat kay para sa ila ang maayo nga mga butang nga nabaton nila indi regalo kundi obligasyon sang mga tawo nga ihatag sa ila.

   Ina nga batasan makita gid bisan diin. “Sa aton kalibutan subong, ginatudluan ang mga tawo nga dapat makuha nila ang tanan nila nga gusto,” siling sang isa ka iloy nga si Katherine. “Makita naton sa mga magasin, sa TV, kag sa Internet ang mga piktyur sang madamo nga mga butang, kag ginasilingan kita nga ‘deserve’ naton ina ukon nagakabagay lang nga may ara kita sina kag dapat kita ang una nga makabakal.”

•   Puede tudluan ang kabataan nga magpasalamat samtang gamay pa sila. Ang isa ka iloy nga si Kaye nagsiling: “Hapos tudluan ang mga bata. Ang pagtudlo sa ila sang maayo nga pamatasan samtang gamay pa sila daw pareho sa pagtukod sa isa ka tanom para magtubo ini sing tadlong.”

•   Tudlui sila sang ila ihambal. Bisan gamay pa, puede mo na tudluan ang imo kabataan nga maghambal sing salamat kon may magregalo sa ila ukon kon ginhimuan sila sing maayo. Samtang nagadaku sila, amat-amat nila nga apresyahon pa gid ang kaalwan sang iban.

   Prinsipio sa Biblia: “Ipakita nga mapinasalamaton kamo.”—Colosas 3:15.

   “Ang amon tatlo ka tuig nga apo pirme gid nagahambal sing ‘salamat,’ kag kada may pangayuon sia pirme sia nagahambal sing ‘palihug.’ Natun-an niya ini sa iya mga ginikanan. Pirme sia nagapasalamat bangod nakita niya sa iya mga ginikanan ang maayo nga pamatasan kag pirme man sila nagapasalamat.”—Jeffrey.

•   Tudlui sila sang ila himuon. Halimbawa, sa sunod nga may magregalo sa ila, puede ninyo testingan nga magsulat para magpasalamat. Isa pa, puede mo man sila hatagan sing asaynment sa mga ulubrahon sa balay. Makabulig ini sa ila nga apresyahon ang ginahimo sang kada isa para ang inyo balay mangin maayo nga lugar para sa pamilya.

   Prinsipio sa Biblia: “Mas malipayon ang nagahatag sangsa nagabaton.”—Binuhatan 20:35.

   “Ang amon duha ka bata nga tin-edyer nagabulig sa amon pamilya paagi sa pagplano sang mga menu, pagluto, kag paghimo sang mga ulubrahon sa balay. Nakabulig ini sa ila nga maintiendihan ang sakripisyo nga ginahimo namon para sa ila bilang mga ginikanan. Nakabulig man ini sa ila nga apresyahon ang amon ginahimo para sa ila.”—Beverly.

•   Tudlui sila kon ano dapat ang ila panimuot. Ang pagpasalamat daw pareho sa tanom nga nagatubo sa maayo nga duta, kag ini nga duta amo ang pagkamapainubuson. Ginabaton sang mapainubuson nga mga tawo nga kinahanglan nila ang bulig sang iban. Bangod sini, nagapasalamat sila kon ginabuligan sila sang iban.

   Prinsipio sa Biblia: “Mapainubuson nga kabiga ang iban nga labaw sa inyo, samtang ginapangita ninyo indi lamang ang inyo personal nga kaayuhan, kundi ang iya man sang iban.”—Filipos 2:3, 4.

   “Kis-a nagahimo kami sing hampang parte sa pagpasalamat samtang nagapanyapon. Ang kada isa masugid sang isa ka butang nga ginapasalamatan gid niya. Nakabulig ini sa amon tanan nga mangin positibo kag pamensaron ang mga butang nga dapat namon pasalamatan, sa baylo nga mangin negatibo kag kaugalingon lang namon ang amon pamensaron.”—Tamara.

 Tip: Mangin maayo nga halimbawa. Mahapos lang matun-an sang kabataan nga magpasalamat kon pirme ka nila mabatian nga nagapasalamat sa iban kag sa ila.