Ang adulto nga mga kabataan may importante nga responsibilidad nga atipanon ang ila tigulang na nga mga ginikanan. Ang Biblia nagasiling nga ang adulto nga mga kabataan dapat ‘magtuon anay sa pagtuman sang ila diosnon nga katungdanan sa ila kaugalingon nga panimalay, kag sa sini nga paagi ginabalusan nila ang ila mga ginikanan, kay amo ini ang nahamut-an sang Dios.’ (1 Timoteo 5:4, Maayong Balita nga Biblia) Kon ginasigurado gid sang adulto nga mga kabataan nga maatipan ang ila tigulang nga mga ginikanan, ginasunod man nila ang sugo sang Biblia nga padunggan ang ila mga ginikanan.—Efeso 6:2, 3.

 Wala sing espesipiko nga mga instruksion ang Biblia parte sa pag-atipan sa nagatigulang na nga mga ginikanan. Pero, may ara ini sing mga halimbawa sang matutom nga mga lalaki kag babayi nga naghimo sini. May ara man ini sing praktikal nga mga laygay nga makabulig sa mga nagaatipan.

•  Paano ang pila ka miembro sang pamilya nag-atipan sa ila tigulang nga mga ginikanan sang panahon sang Biblia?

•  Ano nga praktikal nga laygay sang Biblia ang makabulig sa mga nagaatipan?

•  Nagasiling bala ang Biblia nga kinahanglan sa balay gid atipanon ang tigulang nga mga ginikanan?

 Ginhimo nila ini sa lainlain nga paagi, depende sa ila kahimtangan.

•   Si Jose nagaistar malayo sa iya tigulang na nga amay nga si Jacob. Sang makasarang na si Jose, ginpaistar niya si Jacob malapit sa iya. Dayon, ginhatagan niya ang iya amay sing balay, pagkaon, kag ginsigurado nga ara sa maayo nga kahimtangan ang iya amay.—Genesis 45:9-11; 47:11, 12.

•   Si Rut nagsaylo sa lugar sang iya ugangan nga babayi kag nagbakabaka obra para maatipan sia.—Rut 1:16; 2:2, 17, 18, 23.

•   Si Jesus, antes sia mapatay, nagpili sang magaatipan sa iya iloy nga si Maria, nga mahimo balo na sa sina nga tion.—Juan 19:26, 27. a

 May mga prinsipio sa Biblia nga makabulig sa mga nagaatipan kon paano atubangon ang pisikal kag emosyonal nga kabudlayan kon kaisa sa pag-atipan sa tigulang nga mga ginikanan.

•   Padunggi ang imo mga ginikanan.

   Ang ginasiling sang Biblia: “Padunggi ang inyo amay kag ang inyo iloy.”—Exodo 20:12.

   Paano maaplikar ini nga prinsipio? Padunggi ang imo mga ginikanan paagi sa paghatag sa ila sing kahilwayan nga himuon ang gusto nila suno sa ila masarangan kag limitasyon. Kon posible, tuguti sila sa pagdesisyon parte sa pag-atipan sa ila. Padunggi man sila paagi sa paghimo sang imo bug-os nga masarangan para buligan sila.

•   Mangin mahinangpanon kag mapinatawaron.

   Ang ginasiling sang Biblia: “Ang paghangop sang tawo nagapahaganhagan sang iya kaakig, kag katahom sa iya bahin nga palampason ang sala.”—Hulubaton 19:11.

   Paano maaplikar ini nga prinsipio? Kon may nahambal nga indi maayo ang imo tigulang nga ginikanan ukon daw wala niya ginaapresyar ang imo pag-atipan, pamangkuta ang imo kaugalingon, ‘Ano ayhan ang akon batyagon kon nagaatubang man ako sang pareho nga mga limitasyon kag kabudlayan?’ Kon ginatinguhaan mo nga mangin mahinangpanon kag mapinatawaron, malikawan mo nga maglala ang kahimtangan.

•   Pamangkuta ang iban.

   Ang ginasiling sang Biblia: “Mapaslawan ang mga plano kon wala sing paghambalanay, apang magamadinalag-on ini kon may madamo nga manuglaygay.”—Hulubaton 15:22.

   Paano maaplikar ini nga prinsipio? Mag-research kon paano atipanon ang imo mga ginikanan kon nagamasakit sila. Hibalua kon ano nga mga serbisyo sa inyo lugar ang makabulig sa pag-atipan sa ila. Istoryaha ang iban nga nagaatipan man sa ila tigulang nga mga ginikanan. Kon may mga utod ka, istoryahan ninyo ang parte sa mga kinahanglanon sang inyo mga ginikanan, kon paano sila atipanon, kag kon ano ang responsibilidad sang kada isa.

•   Mangin maugdang.

   Ang ginasiling sang Biblia: “Ang kaalam yara sa mga maugdang.”—Hulubaton 11:2.

   Paano maaplikar ini nga prinsipio? Hibalua ang imo mga limitasyon. Halimbawa, kita tanan limitado ang tion kag kusog. Ini nga mga limitasyon may epekto sa kon ano ang aton masarangan nga himuon para sa aton mga ginikanan. Kon nabudlayan ka sa pag-atipan sang imo tigulang nga mga ginikanan, magpabulig sa mga miembro sang inyo pamilya ukon sa iban.

•   Atipana man ang imo kaugalingon.

   Ang ginasiling sang Biblia: “Wala sing tawo nga nagadumot sa iya kaugalingon nga lawas, kundi ginapakaon kag ginapalangga niya ini.”—Efeso 5:29.

   Paano maaplikar ini nga prinsipio? Bisan pa may responsibilidad ka nga atipanon ang imo mga ginikanan, dapat mo man atipanon ang imo mga kinahanglanon kag sang imo kaugalingon nga pamilya kon minyo ka. Dapat ka magkaon, magpahuway, kag magtulog sing maayo. (Manugwali 4:6) Kinahanglan mo magpabulos kon kaisa. Kon himuon mo ini, mas mangin handa ka sa emosyonal, mental, kag pisikal para maatipan mo ang imo mga ginikanan.

 Wala sing espesipiko nga ginasiling ang Biblia kon sa balay gid atipanon sang adulto nga mga kabataan ang ila mga ginikanan. Tubtob masarangan sang pila ka pamilya, ginaatipan nila ang ila tigulang nga mga ginikanan sa ila balay. Pero kon kaisa, mahimo magdesisyon ang mga kabataan nga mas maayo kon ipaatipan nila ang ila mga ginikanan sa home for the aged. Mahimo istoryahan sang pamilya kon ano ang pinakamaayo para sa tanan.—Galacia 6:4, 5.