“Kay ginhatagan kita sang Dios indi sing espiritu sang katalaw, kundi sang gahom kag sang gugma kag sang maligdong nga hunahuna.”—2 Timoteo 1:7, Bag-ong Kalibutan nga Badbad.

 “Kay ang Dios wala maghatag sa aton sang espiritu sang katalaw kondi sang gahom kag gugma kag kabut-anan.”—2 Timoteo 1:7, Ang Biblia sang Philippine Bible Society.

 Mabuligan sang Dios ang isa ka tawo nga mangin maisog sa paghimo sang insakto. Indi gusto sang Dios nga may bisan sin-o nga madaug sang “katalaw.” Amo ini ang indi maayo nga kahadlok nga nagapugong sa isa ka tawo nga himuon ang makapalipay sa Dios.

 Binagbinaga ang tatlo ka kinaiya halin sa Dios nga ginsambit sa sini nga teksto nga makabulig para madula ang kahadlok ukon katalaw.

 “Gahom.” Ang mga Cristiano makaalagad sa Dios sing maisugon bisan pa madamo sila sang kaaway kag nagaatubang sila sang mabudlay nga mga kahimtangan. Wala sila nagkunol sa kahadlok. (2 Corinto 11:23-27) Paano nila ini nahimo? Ginpaathag ini ni apostol Pablo: “Sa tanan nga butang may kusog ako paagi sa isa nga nagapabakod sa akon.” (Filipos 4:13) Ang Dios makahatag sa iya mga sumilimba sang “gahom nga labaw sa kinaandan” para mabatas ang bisan ano nga kabudlayan.—2 Corinto 4:7.

 “Gugma.” Ang daku nga gugma sa Dios nagabulig sa isa ka Cristiano nga pangapinan sing maisugon kon ano ang matarong. Sing kaanggid, ang gugma sa isigkatawo nagapahulag man sa isa ka Cristiano nga unahon ang mga kinahanglanon sang iban, bisan pa nagaatubang sia sang pagpamatok ukon katalagman.—Juan 13:34; 15:13.

 “Maligdong nga hunahuna.” Sa Biblia, ang maligdong nga hunahuna nagapatuhoy sa ikasarang sang isa ka Cristiano nga maghimo sing maalamon nga desisyon base sa Biblia. Ang tawo nga may maligdong nga hunahuna makapamensar sing maayo kag makatarunganon bisan nagaatubang sang mga kabudlayan. Makahimo sia sing mga desisyon nga nahisuno sa panghunahuna sang Dios, kay ginakabig niya nga mas importante ang iya relasyon sa Dios sangsa panan-aw sang iban nga tawo.

 Ang libro sa Biblia nga Ikaduhang Timoteo ginsulat ni apostol Pablo para sa iya palangga nga abyan kag kaupod sa hilikuton nga si Timoteo. Sa sini nga sulat, ginpalig-on ni Pablo ang pamatan-on nga si Timoteo nga padayon nga magpangabudlay sa ministeryo. (2 Timoteo 1:1, 2) Mahimo nga mahuluy-on si Timoteo, kag posible nagpugong ini sa iya nga ihatag ang iya pinakamasarangan sa Cristianong kongregasyon. (1 Timoteo 4:12) Pero ginpahanumdom ni Pablo si Timoteo nga nakabaton sia sang isa ka dulot—isa ka pinasahi nga asaynment sa pag-alagad sa kongregasyon. Ginpalig-on niya si Timoteo nga indi magduhaduha kon ginagamit niya ang iya awtoridad bilang manugtatap sa kongregasyon, kon nagabantala sang maayong balita, kag kon nagabatas sing kabudlayan bangod sa pagtuo.—2 Timoteo 1:6-8.

 Bisan pa ginsulat ini para kay Timoteo, ginapasalig sini ang tanan nga gusto mag-alagad sa Dios subong nga buligan Niya sila para mangin madinalag-on, bisan ano pa nga kabudlayan ang ila maatubang.