Pagkatapos sang lima ka bulan nga kurso sang maid-id nga pagtuon sa Biblia, ang ika-136 nga klase sang Gilead naggradwar sang Sabado, Marso 8, 2014. Sa sini nga eskwelahan, natun-an sang eksperiensiado nga mga ministro sang mga Saksi ni Jehova kon paano mangin mas epektibo sa ila ministeryo kag kon paano mapalig-on ang pagtuo sang pareho nila nga mga Saksi. Sa kabilugan, 11,548 ang nagtambong sa programa, sa educational center sang mga Saksi ni Jehova sa Patterson, New York, sing personal man ukon paagi sa video tie-in sa pila ka lugar sa Canada, Jamaica, Puerto Rico, kag United States.

“Hupti Ninyo Ining Panghunahuna.” Si David Splane nga miembro sang Nagadumala nga Hubon sang mga Saksi ni Jehova kag tsirman sang programa, naghatag sang iya nagabukas nga pamulongpulong base sa Filipos 2:​5-7: “Hupti ninyo ining panghunahuna nga yara man kay Cristo Jesus.” Sang ari sia sa duta, si Jesus wala naglagas sang posisyon, kundi mapainubuson nga nagpokus sa mga hilikuton sang Dios.

Halimbawa, ginsikway ni Jesus ang kada pagsulay sang Yawa paagi sa pagsiling, “Nasulat na,” nga halin sa pamulongpulong ni Moises sa pungsod sang Israel. (Mateo 4:​4, 7, 10; Deuteronomio 6:​13, 16; 8:3) Subong hinaplas nga Anak sang Dios, makahambal si Jesus suno sa iya awtoridad pero mapainubuson niya nga gin-apresyar ang hinimuan ni Moises. Sing kaanggid dapat man naton kilalahon ang ikasarang sang iban kag pirme sila hatagan sing komendasyon.

Ginpadaku man ni Brother Splane kon paano ginpakita ni Jesus ang husto nga panghunahuna sang madali na lang matapos ang paghanas sa iya diri sa duta. Sa pangamuyo, si Jesus nagsiling: “Ginhimaya ko ikaw sa duta, kay natapos ko ang buluhaton nga ginhatag mo sa akon. Gani karon, Amay, himayaa ako sa imo tupad kaangay sang himaya nga yara sa akon sadto upod sa imo sang wala pa ang kalibutan.” (Juan 17:​4, 5) Wala na naghandum si Jesus sing dugang pa nga mga pribilehiyo. Nangabay lamang sia nga ibalik sa iya posisyon, ukon ‘ibalik sa iya obra anay,’ kon magpalangit na sia. Dapat man ilugon sang mga maggradwar sa Gilead si Jesus paagi sa pagpokus sa ila hilikuton sa baylo nga sa posisyon kag mangin kontento bisan pa indi sila makabaton sing dugang nga pribilehiyo kon magbalik sila sa ila mga asaynment.

“Mga Sakripisyo nga Wala Ginhinulsulan.” Si William Malenfant nga kabulig para sa Teaching Committee sang Nagadumala nga Hubon, nagpalig-on sa mga estudyante nga ilugon ang pagkamasinakripisyuhon ni apostol Pablo. Sa baylo nga balikdon ang iya ginbiyaan para sa pag-alagad sa Dios, si Pablo nagsiling: “Ginakalimtan ko ang mga butang sa likuran kag ginalab-ot ang mga butang sa unahan, nagatinguha ako nga mabaton ang padya.”​—Filipos 3:​13, 14.

Paagi sa mga sakripisyo nga wala ginahinulsulan, ginailog sang mga estudyante ang matutom nga mga alagad sang Dios sadto kag sa moderno nga tion. Ginsambit ni Brother Malenfant si Clara Gerber Moyer, nga nag-alagad kay Jehova halin sang bata pa sia. Nagsulat si Clara: “Pribilehiyo ko gid nga balikdon ang sobra 80 ka tuig sang bug-os tagipusuon nga pag-alagad sa Dios​—nga wala gid sing ginhinulsulan! Kon suliton ko ang akon kabuhi, himuon ko gihapon ini.”

“Pagbantala sang Ginharian Upod sa mga Anghel kag Subong mga Anghel.” Si Gerrit Lösch nga miembro sang Nagadumala nga Hubon, nagbulig sa mga estudyante nga maapresyar ang duha ka espesyal nga pribilehiyo nga ara sa mga nagabantala. Una, nagaalagad sila subong mga anghel sang Dios kon ginadul-ong nila ang iya mensahe sang maayong balita sang Ginharian, kay ang Hebreo kag Griego nga mga tinaga nga ginagamit sang Biblia para sa “anghel” puede man ma-translate nga “mensahero.” Ikaduha, ginagiyahan sang mga anghel ang mga estudyante sa ila pagbantala sang maayong balita, pareho sang naeksperiensiahan sang disipulo nga si Felipe.​—Binuhatan 8:​26-​35.

Dayon, ginsaysay ni Brother Lösch ang pila ka eksperiensia sang mga Saksi ni Jehova sa ila pagbantala sang Ginharian. Halimbawa, ang isa ka Saksi sa Mexico nga si Gabino, nga sa masami kaisa ukon kaduha lang manuktok, nanuktok sing apat ka beses sa isa ka balay. Ang lalaki nga nagbukas nagsiling kay Gabino nga mahikog na tani sia. “Sang manuktok ka sa ikap-at nga bes,” siling sang lalaki, “may higot na ang akon liog. Pero ginhukas ko ini para abrihan ka. Salamat gid kay nagsige ka panuktok. Kay kon wala, nagbitay na ako.”

Bisan pa ang mga eksperiensia pareho sini natabuan lang kon kaisa, kabalo kita nga ang kalabanan sini wala natabuan. Sa baylo, pamatuod ini nga ginagiyahan sang mga anghel sang Dios ang pagbantala sa bilog nga kalibutan.​—Bugna 14:6.

“Ang Ginpadunggan Pakamaayuhon.” Si Michael Burnett, nga instruktor sang Gilead, nagbase sang iya tema sa halimbawa ni Jabez, nga kaliwat ni Juda, nga ‘mas ginpadunggan sangsa iya mga utod.’ Si Jabez nangamuyo sa Dios: “Kabay pa nga pakamaayuhon mo ako kag palaparon ang akon teritoryo kag buligan mo ako kag luwason mo ako sa katalagman, agod indi ako mahalitan!”​—1 Cronica 4:​9, 10.

Mailog sang mga estudyante ang dungganon nga halimbawa ni Jabez kon mangin espesipiko sila sa ila mga pangamuyo, ilabi na kon ginapangabay nila ang Dios nga buligan sila nga matuman ang katuyuan sang paghanas sa ila sa Gilead. Husto man nga pangabayon nila ang Dios nga luwason sila sa kalamidad, pero indi buot silingon nga ilikaw sila sa sini, kundi buligan sila nga masarangan ang kasubo kag kalautan. Ginsabat sang Dios ang pangamuyo ni Jabez, kag amo man sini ang himuon Niya sa mga estudyante sang Gilead.

“Indi Pagpalunga ang Inyo Kalayo.” Si Mark Noumair nga instruktor man sang Gilead kag kabulig para sa Teaching Committee, nagbase sang iya pamulongpulong sa 1 Tesalonica 5:​16-​19. Pareho sang literal nga kalayo nga nagakinahanglan sing gatong, oksiheno, kag init para indi mapalong, ang mga estudyante may tatlo man ka butang nga magamit nila para indi madula ang ila kakugi sa ministeryo.

Una, ‘magkasadya pirme.’ (1 Tesalonica 5:​16) Ang mga estudyante makabatyag sing kalipay​—nga makagatong sang ila kakugi​—kon pamalandungan nila nga nahamuot si Jehova sa ila kag pagpakamaayo gid ini. Ikaduha, ‘padayon nga magpangamuyo.’ (1 Tesalonica 5:​17) Ang pangamuyo pareho sang oksiheno nga nagapadabdab sa kalayo. Dapat naton lawigon ang aton mga pangamuyo, nga ginabubo ang aton tagipusuon sa Dios. Ikatlo, ‘magpasalamat tungod sa tanan nga butang.’ (1 Tesalonica 5:​18) Ang pagkamapinasalamaton nagapabakod sang aton kaangtanan kay Jehova kag sa aton mga kauturan. “Padayon nga ipakita ang mainit nga pag-apresyar,” siling ni Brother Noumair, “subong pangontra sa matugnaw nga espiritu sang pagpakalain.”

“Pagdayaw kay Jehova Upod sa Kalangitan.” Si Sam Roberson nga instruktor sang teokratiko nga mga eskwelahan, nagbase sang iya introduksion sa ginasiling sang Biblia nga ang adlaw, bulan, kag mga bituon nagadayaw kay Jehova. (Salmo 19:1; 89:37; 148:3) Nagsiling sia nga ang mga estudyante nakapribilehiyo man nga dayawon si Jehova, dayon ginpa-reenact sa mga estudyante ang ila mga eksperiensia sa pagbantala. Halimbawa, ginpasalamatan sang isa ka estudyante ang lalaki nga naka-wheelchair sa tapos ini magpakita sing apresasyon bangod ginpadulog sang estudyante ang iya salakyan para makatabok ini. Nag-istoryahanay sila kag ginbaton sang lalaki ang tanyag nga libre nga pagtuon sa Biblia. Sa nagsunod nga mga semana samtang nagadumala sang pagtuon ang estudyante sang Gilead, napanaksihan man niya ang mga nagabisita sa lalaki. Gani, pito pa ka pagtuon sa Biblia ang nasugdan subong resulta sang ila pag-istoryahanay sang lalaki.

“Magbaskog Paagi sa Edukasyon sang Dios.” Si Donald Gordon nga kabulig para sa Publishing Committee, nag-interbyu sang duha ka mag-asawa nga estudyante. Ang isa ka brother nga gin-interbyu nagdumdom nga ang Efeso 3:​16-​20 ginpadaku gid pirme sa ila klase. Nakabulig ini sa mga estudyante nga “magbaskog” paagi sa pagpabilin nga mapainubuson kag mahapos palapitan kag pagkilala nga madamo pa si Jehova sing ipahimo sa tagsa ka Saksi. Ang isa ka sister nagsiling nga naapresyar niya kon paano ang isa ka instruktor sang Gilead nagpalig-on sa mga estudyante nga indi mangin daku nga isda sa gamay nga aquarium nga wala sing lugar para magdaku kundi mangin gamay nga isda sa malapad nga dagat. Sia nagsiling: “Natun-an ko ang leksion nga kon mangin kubos ako sa organisasyon ni Jehova, buligan niya ako nga magtubo sa espirituwal.”

“Kabay nga si Jehova Magadumdom sa Inyo nga May Kahamuot.” Si Mark Sanderson nga miembro sang Nagadumala nga Hubon, amo ang naghatag sang panguna nga pamulongpulong sang programa sa gradwasyon. Ginkuha niya ang iya tema sa pangamuyo ni Nehemias: “O Dios ko, dumduma ako nga may kahamuot.” (Nehemias 5:​19; 13:31) Wala nahadlok si Nehemias nga basi malipatan sia ni Jehova kag ang iya hinimuan sa pag-alagad sa Dios. Sa baylo, ginpangabay niya ang Dios nga dumdumon sia sing mapinalanggaon kag pakamaayuhon.

Sing kaanggid, makasalig man ang mga estudyante nga dumdumon sila ni Jehova sing may kahamuot kon iaplikar nila ang panguna nga mga leksion nga natun-an nila sa Gilead. Halimbawa, dapat ang ila panguna nga motibo sa pagsimba amo ang bug-os tagipusuon nga gugma kay Jehova. (Marcos 12:30) Ginhigugma ni Abraham si Jehova sing bug-os tagipusuon, kag may pagpalangga nga gindumdom sia sang Dios. Bisan pa linibo ka tuig na nga napatay si Abraham, gintawag gihapon sia sang Dios nga “akon abyan.”​—Isaias 41:8.

Ginpahanumdom man ni Brother Sanderson ang mga estudyante nga higugmaon ang ila isigkatawo, ilabi na ang ila Cristianong kauturan. (Marcos 12:31) Pareho sang maayo nga Samaritano, nga “nagpakita nga isigkatawo sia sang tawo nga ginbanggaan sang mga kawatan,” dapat man sila magmatumato kag magbulig sa mga nagakinahanglan. (Lucas 10:36) Para ipadaku ang punto, gingamit niya nga halimbawa si Nicholas Kovalak, nga naggradwar sa Gilead kag nag-alagad subong manugtatap sang distrito. Kilala gid si Brother Kovalak nga mainabyanon kag mapinalanggaon. Isa ka bes, ginpalig-on niya ang isa ka nagalakbay nga manugtatap kag ang asawa sini nga mangin mapisan sa ila ministeryo. Gingamit niya ang ekspresyon nga, “Temprano nga bahin sang adlaw, temprano nga bahin sang semana, temprano nga bahin sang bulan, temprano nga bahin sang tuig.” Pero sang mapanilagan niya ang sister sing pila ka adlaw, ginsilingan niya ini: “Kalimti ang akon ginhambal. Grabe na ang imo pagpangabudlay. Magpahuway ka man, para makapadayon ka sa pag-alagad kay Jehova.” Ang iya mainayuhon kag may simpatiya nga laygay nakabulig sa sister nga makapadayon sa bug-os tion nga pag-alagad sa sulod sang madamo nga tinuig.

Dayon ginpalig-on ni Brother Sanderson ang mga estudyante nga tumanon ang katuyuan sang ila pag-eskwela paagi sa pagtudlo kag paghanas sa iban. (2 Timoteo 2:2) Samtang ginahimo nila ang ila asaynment, ginapalig-on nila kag ginapabakod ang paghiliutod, kag makasalig nga dumdumon sila ni Jehova nga may kahamuot.​—Salmo 20:​1-5.

Konklusion. Pagkatapos mahatag ang ila mga diploma, ginbasa sang isa sa mga naggradwar ang sulat sang pagpasalamat sang bilog nga klase. Dayon gintakpan sang 15 ka estudyante ang programa paagi sa pagkanta sang ambahanon numero 123 halin sa Mag-amba kay Jehova, nga may tig-ulo “Mga Manugbantay​—Dulot nga mga Lalaki.”