Isa ka adlaw, sang si Eliso, nga Saksi ni Jehova, nagadumala sang pagtuon sa Biblia sa isa ka interesado nga babayi, may nag-abot nga mga bisita ang babayi. Isa ka klero kag ang iya asawa ang nag-abot. Nabalitaan ni Eliso nga bag-o lang napatay ang bugtong nga bata nga lalaki sang mag-asawa.

 Sang ginsilingan sila ni Eliso nga nagabuylog sia sa ila kalisod, grabe gid ang hibi sang mag-asawa. Dayon, akig nga nagsiling ang klero, “Indi ’ko kaintiende kon ngaa ginhatag sang Dios sa amon ini nga pagtilaw! Ngaa ginkuha ’ya ang bata ko? Biente otso na ’ko ka tuig nga nagaalagad sa Dios kag nagahimo man ’ko sang maayo, tapos amo pa sini ang ginbalos ’ya sa akon! Ngaa ginpatay sang Dios ang akon bata?”

 Ginpaathag ni Eliso sa mag-asawa nga wala ginkuha sang Dios ang ila bata. Ginpaathag man niya ang parte sa gawad, pagkabanhaw, kag kon ngaa gintugutan sang Dios nga matabo ang malain nga mga butang. Ginsilingan sang mag-asawa si Eliso nga ginsabat gid niya ang tanan nila nga pamangkot nga ginapangamuyo nila nga masabat.

 Sang masunod nga semana, nag-upod sa pagtuon sa Biblia ang mag-asawa. Ginatun-an nanday Eliso kag sang interesado nga babayi ang kapitulo nga “Matuod Gid nga Paglaum Para sa Imo Napatay nga mga Pinalangga,” sa libro nga Ano Gid ang Ginatudlo sang Biblia? Madamo gid sang komento ang mag-asawa sa ila pagtuon.

 Nagtambong sang ulihi ining mag-asawa sa espesyal nga kombension sang mga Saksi ni Jehova sa Tbilisi, Georgia, kag nanamian gid sila sa gugma kag paghiusa nga ila nakita—mga kinaiya nga madugay na nila ginatudlo sa ila mga miembro pero wala gid sing may nagasunod.