Masulhay ang pangabuhi nanday Madián kag Marcela sa Medellín, Colombia. Daku ang sueldo ni Madián, amo nga makaistar sila sa manami nga apartment. Pero may nagpahulag sa ila nga usisaon kon ano gid ang importante sa ila kabuhi bilang mga alagad ni Jehova nga Dios. “Sang 2006, nagtambong kami sa ‘Hupti nga Simple ang Imo Mata’ nga pinasahi nga asembleya. Madamo sa mga pamulongpulong ang nagapalig-on nga pasimplehon ang amon kabuhi para makaalagad kami sing bug-os sa Dios,” siling nila. “Pagpauli namon, narealisar namon nga baliskad ang amon ginaobra. Mahilig kami mamakal kag damo amon utang.”

 Nakamarasmas sanday Madián kag Marcela, gani ginpasimple nila ang ila kabuhi. “Amat-amat namon nga ginbuhinan ang amon paggasto,” siling nila. “Nagsaylo kami sa gamay nga apartment, ginbaligya namon ang amon salakyan, kag nagbakal kami sang motor.” Gin-untatan man nila ang pagkadto sa mga mall para indi sila masulay nga magbakal. Nangin mas masako sila sa pagsugid sa iban parte sa Biblia. Nakig-abyan man sila sa mga espesyal nga payunir nga matutom nga nagaalagad kay Jehova nga Dios. a

 Wala magdugay, nagdesisyon sanday Madián kag Marcela nga pasangkaron ang ila ministeryo paagi sa pagsaylo sa isa ka gamay nga kongregasyon sa uma nga nagakinahanglan sang bulig. Para makasaylo sila, naghalin si Madián sa iya obra. Indi maintiendihan sang iya superbisor kon ngaa mahalin sia. Gani ginpamangkot sia ni Madián: “Daku ang imo sueldo, pero malipayon ka bala?” Gin-ako sang iya superbisor nga indi sia malipayon bangod madamo sia sang problema nga indi niya masolbar. Dayon ginsilingan sia ni Madián: “Buot silingon, indi makahatag sing matuod nga kalipay ang kuarta. Ang importante amo nga pangitaon mo kon ano ang makapalipay sa imo. Malipayon kami sang akon asawa kon ginatudluan namon ang mga tawo parte sa Dios, kag gusto namon nga dugangan pa gid ang amon tion sa sini para mangin mas malipayon pa gid kami.”

 Sanday Madián kag Marcela kontento kag malipayon gid bangod ang pag-alagad sa Dios amo na ang pinakaimportante sa ila kabuhi. Sa nagligad nga 13 ka tuig, nag-alagad sila sa mga kongregasyon nga nagakinahanglan sang bulig sa aminhan-katundan sang Colombia. Kag subong, pribilehiyo man nila nga mag-alagad bilang mga espesyal nga payunir.