May rason gid ang kauturan nga nagsiling nga indi ako makapadugay sa pagpayunir, kay man indi ako matutom sa pag-alagad. Wala ’ko nanamian mag-preaching kag ginapangamuyo ’ko nga tani mag-ulan kon Domingo para indi ako makaministeryo. Kon mag-preaching gid man ako, nagatanyag lang ako sing mga magasin pero wala ko gid ginagamit ang Biblia kon mag-istorya ako sa mga tawo. Ginasuhulan pa gani ako ni Nanay para kuhaon ko ang akon bahin nga magbasa sang Biblia sa kongregasyon. Wala ako nanamian magtuon kag wala man ako sing goal kon parte sa pag-alagad kay Jehova.

 Sina nga tingadlaw, may distrito nga asembleya (subong ginatawag nga rehiyonal nga kombension) sa Cardiff, Wales. Sina nga tion nagbag-o ang akon kabuhi. Ang isa sa mga speaker may mga pamangkot nga nakapahunahuna sa akon. Ginpamangkot niya ang mga tumalambong: “Nakadedikar kag nabawtismuhan ka na bala?” ‘Huo,’ sa pensar ko. “Nagpromisa ka bala nga alagaron si Jehova sa imo bug-os nga tagipusuon, kalag, hunahuna, kag kusog?” ‘Huo.’ “May balatian ka bala ukon responsibilidad sa pamilya amo nga indi ka makapayunir?” ‘Wala.’ “May rason bala nga indi ka makapayunir?” ‘Wala.’ “Kon ang imo sabat sa katapusan nga pamangkot wala, ti ngaa wala ka nagapayunir?”

 Naathagan gid ako. Sa pensar ko: ‘Ginausikan ko lang ang akon kabuhi. Wala ko ginatuman ang akon promisa sang nagdedikar ako kay Jehova. Wala ko ginaalagad sing bug-os kalag si Jehova.’ Ginahunahuna ko nga kon ginapaabot ko nga tumanon ni Jehova ang mga promisa niya sa akon, dapat ko man tumanon ang akon promisa sa iya. Gani sang Oktubre 1956, ginsugdan ko ang pag-vacation pioneer. Subong, ginatawag ini nga pag-auxiliary payunir.

 Pagkadason nga tuig, nangin regular payunir ako kag nagsaylo ako sa isa ka kongregasyon nga may 19 ka manugbantala. Halin sang pag-abot ko, may bahin ako kada semana. Sa bulig sang mapinasensiahon nga mga kauturan, nag-uswag ako sa akon mga ginasiling kag sa akon pagdeliber sang akon mga pamulongpulong. Duha ka tuig sang ulihi, sang 1959, nangin special pioneer ako kag gin-asayn sa Aberdeen, sa aminhan sang Scotland. Pagkatapos sang pila ka bulan, gin-agda ako nga mag-alagad sa London Bethel. Nakapribilehiyo ako nga mag-obra sa printery didto sa sulod sang pito ka tuig.

 Nanamian gid ako sa Bethel pero gusto ko man sang iban nga porma sang pag-alagad sa gua. Bata pa ako, mapagros, kag handa ako nga gamiton ni Jehova bisan diin. Gani sang Abril 1965, nag-aplay ako sa Gilead School para mahanas bilang misyonero.

 Sina nga tuig, nagdesisyon kami sang akon roommate nga magkadto sa Berlin, Germany, para mag-attend sa kombension kag para makita ang Berlin Wall nga gintukod mga pila ka tuig antes sini.

 Isa ka adlaw sa tion sang kombension, nakigbahin kami sa ministeryo, kag gin-partner ako kay Susanne Bandrock. Nagpakasal kami sang 1966, kag duha ka tuig sang ulihi, gin-imbitar kami sa ika-47 nga klase sang Gilead. Isa gid ato ka daku nga pagpakamaayo! Daw kadasig lang natapos ang amon lima ka bulan nga pag-eskwela. Ang amon asaynment amo ang Zaire, nga subong ginatawag nga Democratic Republic of the Congo. Nakibot gid kami! Halos wala kami sing nahibaluan parte sa sini nga pungsod. Nangalag-ag kami sang primero, pero ginbaton namon ang asaynment kag nagsalig kay Jehova.

 Pagkatapos sang inoras sa mga erport kag sa mga eroplano, nag-abot kami sa gamay nga banwa sang Kolwezi, nga isa ka minahan. Natingala kami nga wala sang kauturan nga nagsugat sa amon. Nabal-an namon sang ulihi nga ang telegrama nga nagapahibalo sa mga kauturan sang amon pag-abot, duha ka adlaw nga naulihi sangsa amon. Ginpalapitan kami sang opisyal sa erport kag may ginhambal sia sa amon sa French, nga isa ka lenguahe nga indi namon maintiendihan. Ang babayi sa atubang namon nagbalikid kag gin-translate niya ang ginhambal sang opisyal, “Ginaaresto kamo.”

 Ginpuersa sang opisyal ang isa ka tawo nga pasakyon kami sa iya daan nga sports car, nga two-seater lang kag ang makina ara sa likod. Makatilingala kon paano kami nag-igo ni Susanne sa sini nga salakyan upod sa opisyal kag sa drayber. Kon tan-awon, daw pareho lang kami sa comedy nga pelikula nga nagaundag-undag sa batsihon nga dalan samtang ang hood sang salakyan naganganga pareho sang baba sang isda nga nagausang sang amon bagahe.

 Nagdiretso kami sa missionary home. Wala kami makatultol sini pero tultulan sang opisyal. Wala sing tawo kag naka-lock ang gate. Ang mga misyonero nagtambong gali sa internasyonal nga mga kombension kag nagbakasyon. Nagatindog kami sa initan, kag nagpalibog kon ano ang matabo. Sang ulihi, nag-abot ang isa ka brother nga taga-didto. Sang nakita niya kami, kanami gid sang iya yuhum, kag naumpawan kami. Kilala niya ang opisyal, nga nagalaum nga makakuha sang kuarta sa amon. Gin-istorya sang brother ang opisyal, amo nga sang ulihi naglakat ini. Sa katapusan, nakasulod gid man kami sa missionary home.

 Nakita namon nga kaupod namon ang malipayon kag mapinalanggaon nga mga tawo nga grabe gid ang inagihan sa kabuhi. Kay sa sulod sang napulo ka tuig antes kami mag-abot, grabe nga kinagamo kag rebelyon ang natabo sa pungsod, nga nagresulta sa pagpamintas. Dayon sang 1971, gin-ban ang mga Saksi ni Jehova sa pungsod. Gani ginpamensar namon kon ano ang matabo sa amon.

 Indi ini ang tion para mag-isol sa kahadlok, kag diutay gid lang nga kauturan ang nag-untat sa pag-alagad bisan sa grabe nga pressure nga ikompromiso ang ila Cristianong neutralidad paagi sa pagdala sang kard sang isa ka partido sa pulitika kag pagsuksok sang pin sang partido. Kon indi sila magsuksok sang pin, indi sila makabaton sang serbisyo sang gobierno, kag gina-harass sila sang militar kag pulis. Madamo nga kauturan ang nadulaan sang obra, kag ang mga bata ginpahalin sa eskwelahan. Ginatos man ka kauturan ang ginpriso. Mabudlay gid ato nga tion. Bisan pa sini, padayon nga ginasugid sing may kaisog sang mga Saksi ang maayong balita.

 Sina man nga mga tuig, pirme kami nagabiyahe ni Susanne pakadto sa mga uma bilang manugtatap sang sirkito kag sang distrito. Nagatener kami sa mga baryo kag naagyan namon ang mga kabudlayan kag kon kaisa, ang pinasahi nga mga eksperiensia. Magagmay ang mga balay nga human sa nipa kag halos igoigo lang ini para makahigda kami. Indi ko na maisip kon pila ka beses ako nakabunggo sa manubo nga mga puertahan. Ang tubig nga ginapaligo namon ginsag-ub halin sa mga sapa kag mga suba. Kon gab-i, nagakandila kami para makabasa. Uling ang ginagamit namon magluto. Pero para sa amon, amo ini ang matuod nga kabuhi sang misyonero. Amo ini ang rason kon ngaa nagkadto kami diri kag nabatyagan namon nga ara kami sa unahan sang hilikuton para kay Jehova.

 Ang pag-istar upod sa mga Saksi nga pamilya nagtudlo sa amon nga pabaloran ang mga butang nga daw sa wala lang sa amon sadto: pagkaon, tubig, bayo, kag ilistaran. (1 Timoteo 6:8) Ang iban nga butang bonus na lang. Indi gid namon malipatan asta subong inang simple nga kamatuoran.

 Bisan pa indi gid pareho sa inagyan ni apostol Pablo ang mga kabudlayan nga amon naagyan, kon kaisa nagabatyag kami nga daw ginatestingan gid ang amon pagtuo kag motibo. Kinahanglan kami magbiyahe sa grabe gid kabudlay nga mga dalan, kag kon kaisa wala gid sing mga dalan. Kon batuhon naman ang dalan, daw ginalugo kami sa salakyan. Kon kaisa, nagaguot ang amon salakyan sa madalom nga balas. Kon tingulan naman, nagalubong ini sa lunang nga puerte ka pilit nga daw glue. May bes nga isa ka adlaw kami nga nagbiyahe, pero 70 ka kilometro lang ang amon nabiyahe kay 12 ka beses gid kami nga nagguot.

 Pero bisan amo sini kabudlay ang sitwasyon sa kaumhan, nabatyagan gid namon nga suod kami kay Jehova. Natun-an namon nga sa bulig ni Jehova, makabatas kami sing malipayon bisan indi namon mabag-o ang mabudlay nga mga sitwasyon. Sa tuod lang, si Susanne balaynon, kag indi sia mahilig mag-adventure. Pero sa tanan nga mabudlay namon nga inagyan, wala gid sia nagreklamo. Makalilipay gid ato nga mga tion kag madamo kami sang natun-an.

 Sa pila ka tuig nga pagtener namon sa Zaire, pila ka beses ako nga gin-aresto. May bes pa gani nga gin-akusar ako nga ilegal nga nagapamaligya sang diamante. Siempre nagalalain gid kami, pero ginapensar namon nga kon gusto ni Jehova nga himuon namon ang amon asaynment, buligan niya kami. Kag ginbuligan niya kami!

 Sang 1981, gin-agda kami nga mag-alagad sa branch office sa Kinshasa. Isa ka tuig antes sini, nangin legal liwat ang aton hilikuton. Gani ang mga kauturan nagbakal sang isa ka lote para patindugan sang mas daku nga branch facility. Pero gulpi lang, sang Marso 1986, ginpirmahan sang presidente sang pungsod ang isa ka mando nga ang hilikuton sang mga Saksi ni Jehova gina-ban liwat. Gani gin-untat ang konstruksion, kag wala madugay, ang kalabanan nga misyonero naghalin sa pungsod.

 Nakatener pa kami sing malawiglawig. Ginhimo namon ang tanan namon nga masarangan para mapadayon ang pagbantala, bisan pa bal-an namon nga ginabantayan sang mga opisyal ang amon hulag. Nagahalong gid kami, pero isa ka bes gin-aresto ako samtang naga-Bible study. Ginbutang ako sa isa ka malapad nga daw kueba nga kuarto nga puno man sing mga priso. Magin-ot ini, mabaho, madulom, kag nabuot. Ang sanag kag gamay nga hangin nagahalin sa isa ka gamay nga buho sa ibabaw sang pader. Gindala ako sang iban nga priso sa ila liderlider. “Kantaha ang amon pungsudnon nga ambahanon!” sugo niya. “Indi ’ko kabalo,” sabat ko. “Kantaha ang inyo pungsudnon nga ambahanon!” siling nila. “Indi man ’ko kabalo sina,” sabat ko. Ginpatindog niya ako sa tupad sang dingding sa sulod sang mga 45 minutos. Sang ulihi, nakignegosyar ang mga kauturan didto amo nga nakagua ako.

 Narealisar namon nga indi na mag-ayo ang sitwasyon sa pungsod, gani ginsaylo kami sa Zambia. Pagtabok namon sa border, naumpawan kami pero nasubuan man. Ginapensar namon ang nagligad nga 18 ka tuig sa amon asaynment kaupod sa matutom nga mga misyonero kag mga kauturan didto. Bisan pa mabudlay ang sitwasyon kon kaisa, pero nabatyagan namon nga ginpakamaayo kami ni Jehova didto. Bal-an namon nga kaupod namon pirme si Jehova. Natun-an namon maghambal sing Swahili kag French, kag natun-an pa gid ni Susanne ang Lingala. Makalilipay man ang resulta sang amon ministeryo kay nabuligan namon ang sobra sa 130 ka tawo nga mag-uswag asta sa pagpabawtismo. Nalipay gid kami nga ini nga hilikuton nangin pundasyon para mabuligan ang mas madamo nga tawo nga makatuon sang kamatuoran sa ulihi. Kag natabo gid ina! Sang 1993, gindula sang Supreme Court ang pag-ban sa mga Saksi sang 1986. Subong, may sobra na sa 240,000 ka manugbantala sang Ginharian sa Congo.

 Diri sa Zambia, nakita namon ang pagpatindog sang bag-o nga branch kag sang iban pa nga pasilidad. Sobra sa tatlo ka pilo na subong ang aktibo nga mga manugbantala sangsa pag-abot namon sang 1987.

 Ti, kamusta na ang pamatan-on nga daw indi makasarang bisan isa lang ka bulan nga pagpayunir? Sa pagpakamaayo ni Jehova kag sa bulig sang akon pinalangga nga asawa nga si Susanne, 65 ka tuig na ako subong sa bug-os tion nga pag-alagad. Makalilipay gid ini kag natestingan ko kag nakita nga si Jehova maayo!—Salmo 34:8.

 Kabalo kami nga indi kami special. Gintinguhaan lang namon nga mangin matutom kag tumanon ang amon promisa sang nagdedikar kami kay Jehova. Nagasalig kami nga padayon kami nga buligan ni Jehova nga indi ‘mag-isol’ kundi padayon nga may pagtuo ‘sa pagtipig sang amon kabuhi.’—Hebreo 10:39.

 Tan-awa ang video nga Dayrell and Susanne Sharp: We Promised to Serve Jehovah Whole-Souled.