Sang Marso 2020, gindeklarar sang World Health Organization nga pandemic ang COVID-19. Madamo ang wala gid nagdahom nga pagligad sang sobra isa ka tuig wala gihapon natapos ini nga pandemic. Bangod sini, minilyon ka tawo ang naapektuhan gid lakip ang mga Saksi ni Jehova. Ang iban sa ila nalatnan sang virus, na-depress, kag namigado gid. Ano ang ginhimo sang mga Saksi ni Jehova para maorganisar sing maayo ang pagbulig sa mga naapektuhan?

 Para mabuligan ang mga naapektuhan sang COVID-19, gin-aprobahan sang Coordinators’ Committee sang Nagadumala nga Hubon sang mga Saksi ni Jehova ang pagporma sang sobra 950 ka Disaster Relief Committee (DRC) sa bilog nga kalibutan. Sa masami, sila ang nagapanguna para makabuligay ang mga kauturan. Pero may mga bes man nga makabaton ang mga kauturan sang ayuda halin sa gobierno. Ang DRC man ang nagaorganisar para buligan ang mga kauturan sa mga lugar nga naapektuhan gid sang pandemic.

 Halimbawa, binagbinaga ang natabo sa Paraguay. Suno sa report sang isa ka newspaper, grabe gid ang pagpamigado sang mga tawo bangod sa pandemic. Gani, “madamo nga tawo sa Paraguay ang wala na gid sing makaon.” Pero antes pa sini nga report, ginsugdan na sang DRC sa Paraguay ang pagbulig sa mga kauturan. May ginhimo sila nga mga kit nga may unod nga bastante nga pagkaon, mga gamit sa pagpaninlo, kag mga kinahanglanon para sa personal hygiene. Ini nga kit bastante na para sa sulod sang duha ka semana sa pamilya nga may apat ka miembro. Kag ini nga kit nagabalor sing mga $30 (U.S.).

 Ano nga paghalong ang ginahimo sang mga nagabulig para indi sila malatnan ukon ang iban sang COVID-19? Nagasuksok sila sang mask kag ginasunod nila ang physical distancing. Ginasigurado man nila nga ang mga kompanya nga ginabaklan nila sang pagkaon may matinlo nga mga pasilidad kag nagasunod gid sa mga safety protocol. Para mahimo ini, ginasigurado nila nga ang tanan nga nagadala sang mga kit naka-PPE (personal protective equipment), ang salakyan nga ginkargahan sang mga kit natinluan kag na-disinfect, kag ang ginataguan sang mga kit na-disinfect man. Kag kon i-deliver na ang mga kit, ginasigurado sang mga naga-deliver nga malayo sila sa mga kauturan nga magabaton sang kit.

 Sang Enero 2021, gin-aprobahan sang Coordinators’ Committee nga gamiton ang sobra 25 million dollars (U.S.) nga pondo para sa pagbulig sa mga kauturan nga naapektuhan sang COVID-19. Ginasigurado sang mga branch kag sang mga DRC nga ang mga donasyon magamit sing maayo. Para mahimo ini, ginatinguhaan gid nila nga mabakal ang kinahanglanon nga mga suplay sa pinakamaayo nga presyo. Halimbawa, ang mga kauturan nga nagaorganisar sang pagbulig sa Chile gusto magbakal sing 750 ka kilo nga lentil ukon lentejas. Pero nagdoble ang presyo sini sa sulod sang isa lang ka bulan. Duha ka oras pagkatapos sila magsugtanay nga baklon nila gihapon ang mga lentil bisan mahal ini kaayo, ginpabalo sila sang manugbaligya nga ginbalik sang isa niya ka kostumer ang gin-order sini nga mga lentil. Gani, imbes nga ibaligya sa mga kauturan ang mga lentil sa ginkasugtan nila nga presyo, nagsiling ang manugbaligya nga ihatag na lang niya ini sa mga utod pareho sa presyo sang nagligad nga bulan.

 Pero sang kuhaon na sang mga kauturan ang mga lentil, ginsilingan sila sang manugbaligya nga indi na sia magsugot sa ila ginkasugtan nga presyo kay indi kuno patas ang pagpanagtag sang pagkaon sang mga kauturan naton, pareho sa ginahimo sang iban nga organisasyon. Gani, nangamuyo sing hipos ang isa sa mga utod, kag ginsilingan niya ang manugbaligya nga gin-survey nila ang kada kongregasyon para mabal-an kon sin-o gid ang nagakinahanglan. Ginpaathag man sang mga kauturan sa manugbaligya nga bangod sarisari ang ginhalinan sang mga bululigan, ginapili nila ang mga ibutang nila sa kit para masigurado nga ang mabaton sang kada pamilya amo gid ang ila kinahanglanon. Dayon, ginpasalig nila ang manugbaligya nga ang tanan nga donasyon kag pagbulig sang mga Saksi ni Jehova ginahimo sing boluntaryo. Nagdayaw gid ang manugbaligya. Gani, nagpasugot sia nga buhinan ang presyo. Pero indi lang ina, nag-donate man sia sing 400 ka kilo nga lentil sang nag-order liwat ang mga kauturan.

 Si Lusu, nga isa ka may edad na nga balo nga taga-Liberia, nagaistar sa isa ka balay upod sa iya pamilya. Samtang nagapamahaw sila kag nagabinagbinag sang teksto para sa sina nga adlaw, natalupangdan sang iya pito ka tuig nga apo nga lalaki nga wala na sila sing sunod nga kaunon. Namangkot sia, “Ano ang kan-on ta karon?” Ginsilingan sia ni Lusu nga ginpangamuyo na niya ini kag nagasalig sia nga amanan sila ni Jehova. Sa sina mismo nga hapon, gintawgan si Lusu sang mga gulang kag ginsilingan sia nga kuhaon ang ila suplay sang pagkaon. Nagsiling sia: “Hambal sang akon apo nga sigurado na sia subong nga ginapamatian kag ginasabat ni Jehova ang mga pangamuyo kay ginsabat ni Jehova ang akon pangamuyo.”

 Ang isa ka babayi sa Democratic Republic of Congo tupad-balay sang isa ka pamilya nga Saksi. Sang nakita niya nga ginhatagan sang mga kauturan sang pagkaon ang tupad-balay niya nga Saksi, nagsiling sia, “Pagkatapos sang pandemic, ma-Saksi ni Jehova kita kay nagaulikid gid sila sa ila mga kauturan kon may mga kabudlayan.” Ginpamangkot sia sang iya bana, “Ma-Saksi ni Jehova ka bangod lang sa isa ka sako nga bugas?” Nagsabat sia, “Siempre indi, pero inang isa ka sako nga bugas ebidensia sang matuod nga gugma.”

 Bangod sa imo maalwan nga donasyon, nabuligan gilayon sang mga Saksi ni Jehova ang mga kauturan nga nagakinahanglan gid sa sining tion sang pandemic. Ginapasalamatan gid ang imo mga donasyon nga ginahatag gamit ang sarisari nga paagi sang pag-donate sa donate.jw.org.