Ginakapoy ka bala bangod sa COVID-19? Kon amo man sina ang imo ginabatyag, wala ka nagaisahanon. Pila na ka bulan nga ang mga tawo sa bilog nga kalibutan nag-adjust sang ila pagkabuhi bangod sa sini nga pandemic. Madamo ang “nagsakripisyo gid para mapunggan ang paglapta sang COVID-19,” siling ni Dr. Hans Kluge, ang World Health Organization Regional Director para sa Europe. “Sa sini nga mga sitwasyon, natural lang nga maluoy sa kaugalingon ang isa, matamaran, kag makapoy.”

 Kon nagabatyag ka sang ginatawag nga pandemic fatigue, indi maluyahan sing buot. Ang Biblia nagabulig sa madamo nga tawo nga maatubang ining makapa-stress nga mga tion. Makabulig man ini sa imo.

•  Ano ang pandemic fatigue?

•  Ngaa delikado gid ang pandemic fatigue?

•  Ano nga mga prinsipio sa Biblia ang makabulig sa imo nga maatubang ang pandemic fatigue?

•  Mga bersikulo sa Biblia nga makabulig sa may pandemic fatigue

 Ang pandemic fatigue indi balatian kundi isa ka termino nga ginagamit para ilaragway ang ginabatyag sang mga tawo bangod ginbag-o sang pandemic ang ila kabuhi kag indi na sila sigurado sa palaabuton. Indi pareho ang reaksion sang kada isa, pero ari ang pila sa mga ginabatyag sang may pandemic fatigue:

•   Kakulang sang motibasyon

•   Pagbag-o sang mga batasan sa pagkaon ukon pagtulog

•   Pagka-iritable

•   Gina-stress bisan sa mahapos lang nga mga ulubrahon

•   Nabudlayan magkonsentrar

•   Nagakadulaan sang paglaum

 Ang pandemic fatigue mahimo gid mangin delikado para sa aton kag para sa iban. Kay kon indi naton ini pagbatuan, mahimo amat-amat kita nga madulaan sang motibasyon nga sundon ang mga pagsulundan para maproteksionan kita sa COVID-19. Sa ulihi, mahimo nga indi na kita mahadlok sa virus, samtang padayon gihapon ini nga nagalapta kag nagapamatay. Bangod natak-an na kita sa mga pagsulundan, basi gusto na gid naton nga maggua, kag mahimo mabutang sa katalagman ang aton kaugalingon kag ang iban.

 Sa sining makapa-stress nga mga tion, naeksperiensiahan sang madamo nga matuod gid ang ginasiling sang Biblia: “Kon maluya ang imo buot sa tion sang kalisdanan, magaluya man ang imo kusog.” (Hulubaton 24:10) Sa Biblia, mabasa naton ang mga prinsipio nga makabulig sa aton nga maatubang ang makapaluya nga mga sitwasyon, pati ining pandemic.

•   Padayuna ang physical distancing—pero makigkomunikar gihapon sa imo mga abyan

   Ang ginasiling sang Biblia: “Ang matuod nga abyan . . . masaligan sa tion sang kalisdanan.”—Hulubaton 17:17.

   Ngaa importante ini? Ang matuod nga abyan nagapabaskog sa aton. (1 Tesalonica 5:11) Sa pihak nga bahin, mahimo maapektuhan ang aton panglawas kon indi kita magkomunikar sa iban sa malawig nga tion.—Hulubaton 18:1.

   Testingi ini: Padayon nga magkomunikar sa imo mga abyan paagi sa pag-video chat, pagtawag, pag-e-mail ukon pag-text. Makig-istorya sa imo mga abyan kon daw indi maayo ang imo adlaw, kag kamustaha man sila pirme. Magbayluhanay sing mga ideya kon paano ninyo ginaatubang ang pandemic. Magpamensar sing mga paagi kon paano ka makahimo sing maayo nga mga butang sa imo abyan. Kon himuon mo ina, indi lang sia ang malipay kundi malipay ka man.

•   Panginpusli ang imo sitwasyon subong

   Ang ginasiling sang Biblia: ‘Gamita sing maayo ang inyo tion.’—Efeso 5:16.

   Ngaa importante ini? Ang paggamit sing maayo sang imo tion makabulig sa imo nga magpabilin nga positibo kag malikawan ang sobra nga pagkabalaka.—Lucas 12:25.

   Testingi ini: Imbes nga magpokus sa mga butang nga indi mo na mahimo, pensara ang maayo nga mga butang nga mahimo mo sa sini nga sitwasyon. Halimbawa, may mga proyekto ka bala ukon mga hobby nga puede mo na himuon subong? Makahinguyang ka bala sing mas madamo nga tion upod sa imo pamilya?

•   Sunda ang isa ka iskedyul

   Ang ginasiling sang Biblia: “Himua ninyo ang tanan . . . suno sa kahimusan.”—1 Corinto 14:40.

   Ngaa importante ini? Madamo nga tawo ang mas relaks kag mas malipayon kon may iskedyul sila.

   Testingi ini: Maghimo sing iskedyul base sa imo sitwasyon subong. Ilakip sa iskedyul ang pag-eskwela, pag-obra, mga ulubrahon sa balay, kag ang pagsimba sa Dios. Ilakip man ang mga buluhaton nga makapaayo sa imo pareho sang pagpakig-upod sa imo pamilya, paggua sa balay, kag pag-exercise. Rebyuha ini kon kaisa, kag bag-uha kon kinahanglanon.

•   Mag-adjust depende sa klima

   Ang ginasiling sang Biblia: “Makita sang tawo nga maalamon ang katalagman kag nagapanago sia.”—Hulubaton 22:3.

   Ngaa importante ini? Depende sa kon diin ka nagaistar, ang pagbag-o sang klima mahimo magbuhin sang imo kahigayunan nga makahaklo sang preska nga hangin kag makapainit sa adlaw, nga makapaayo sa imo lawas kag hunahuna.

   Testingi ini: Kon dali na lang ang tigtulugnaw ukon winter, i-adjust ang plastada sang imo sala ukon ginaobrahan para masilakan ini sing maayo sang adlaw. Magplano sang mga hilikuton nga puede mo himuon sa gua bisan pa matugnaw ang tiempo. Kon posible, magbakal sing mga bayo nga pangtigtulugnaw para makatener ka sa gua.

   Kon dali na lang ang tig-ilinit, mas madamo nga tawo ang magagua sa ila balay, gani maghalong. Planuha kon diin ka makadto kag pilia ang tion nga indi gawa damo ang tawo.

•   Padayon nga sunda ang mga pagsulundan para indi malatnan sang COVID-19

   Ang ginasiling sang Biblia: “Ang buangbuang harasharas kag sobra ang pagsalig sa kaugalingon.—Hulubaton 14:16.

   Ngaa importante ini? Makamamatay ang COVID-19 kag posible kita malatnan kon magkompiansa kita kag indi na maghalong.

   Testingi ini: Regular nga hibalua ang lokal nga mga pagsulundan kag binagbinaga kon bala nagahalong ka pa. Pamensara kon ano ang mangin epekto sang imo mga ginahimo sa imo kaugalingon, sa imo pamilya, kag sa iban.

•   Pabakura ang imo relasyon sa Dios

   Ang ginasiling sang Biblia: “Magpalapit kamo sa Dios, kag magapalapit sia sa inyo.”—Santiago 4:8.

   Ngaa importante ini? Ang Dios makabulig sa imo nga maatubang ang mga problema.—Isaias 41:13.

   Testingi ini: Magbasa kada adlaw sang pila ka teksto sa pulong sang Dios, ang Biblia. Ining plano sa pagbasa sang Biblia makabulig sa imo nga masugdan ini.

 Puede mo makontak ang mga Saksi ni Jehova para mabal-an mo kon paano ka makabenepisyo sa ila mga miting nga padayon nila nga ginahimo bisan pa may COVID-19 nga pandemic. Halimbawa, naga-videoconference sila sa bilog nga kalibutan para mahimo nila ang ila mga miting sa kongregasyon, ang selebrasyon sang kamatayon ni Jesus kada tuig, kag ang ila mga kombension kada tuig.

 Isaias 33:24: “Wala sing pumuluyo nga magasiling: ‘Nagamasakit ako.’”

 Buot silingon: Ang Dios nagpromisa nga dulaon ang tanan nga klase sang balatian.