Sa nagligad nga 30 ka tuig, madamo nga tawo ang nagpensar nga naganami ang relasyon sang sarisari nga mga pungsod. Pero, ang mga natabo sining karon lang nagapakita nga daw indi ini matuod.

•   “Nagakabalaka ang mga tawo nga ang inaway sa Gaza makaapekto sa iban nga pungsod sa palibot samtang nagsugod sa pag-inaway ang Israel kag Hezbollah sa border sang Lebanon.”—Reuters, Enero 6, 2024.

•   “Ginaatake sang mga grupo nga ginakontrol sang Iran ang sarisari nga lugar, kag gulpi naghimo liwat ang Iran sang mga nuclear weapon. Dugang pa, kaalyado na subong sang Iran ang Russia kag China. Ini tanan nagresulta sa daku nga peligro para sa mga pungsod sa West.”—The New York Times, Enero 7, 2024.

•   “Ang pagpang-atake sang Russia padayon nga nagaresulta sa daku nga kahalitan sa bilog nga Ukraine.”—UN News, Enero 11, 2024.

•   “Ang pag-uswag sang ekonomiya kag puersa militar sang China, ang nagabaskog nga pagtinguha sang Taiwan nga mangin independiente nga pungsod, kag ang indi maayo nga relasyon sang China kag U.S., mahimo magresulta sa isa ka sitwasyon nga puede matabo ang inaway.”—The Japan Times, Enero 9, 2024.

 May ginasugid bala ang Biblia parte sa wala sang kasiguruhan nga sitwasyon sa kalibutan subong? Magaresulta bala ini sa inaway sa bilog nga kalibutan?

 Wala gintagna sang Biblia ang bisan ano nga inaway nga nagakatabo subong. Pero, gintagna sini ang madamo nga inaway nga nagakatabo sa aton tion kag ‘nagakuha sing paghidait sa duta.’—Bugna 6:4.

 Ang libro sang Daniel nagtagna nga “sa tion sang katapusan,” ang gamhanan nga mga pungsod sa kalibutan “magadis-uganay” ukon magakompetensiahanay kon sin-o ang mas gamhanan sa ila. Ina nga pagkompetensiahanay magalakip sa pagpakita sang ila daku nga puersa militar kag paggasto sing daku nga “bahandi,” ukon kuarta.—Daniel 11:40, 42, 43.

 Ginasugid sang Biblia nga ang sitwasyon sa kalibutan magalala antes ini mangin maayo. Gintagna ni Jesus nga “magaabot ang dakung kapipit-an nga wala pa gid matabo halin sa ginsuguran sang kalibutan.” (Mateo 24:21) Inang “dakung kapipit-an” magapadulong sa inaway sa Armageddon, nga gintawag nga “inaway nga mahanabo sa daku nga adlaw sang Dios nga Labing Gamhanan.”—Bugna 16:14, 16.

 Pero, ang Armageddon magadala sang kaluwasan sa mga tawo, indi sang kalaglagan. Paagi sina nga inaway, tapuson sang Dios ang paggahom sang mga tawo nga nagresulta sa madamo nga makahalalit nga mga inaway. Para mahibaluan kon paano ang Armageddon magaresulta sa wala katapusan nga paghidait, basaha ang masunod nga mga artikulo:

•   “Ano ang Inaway sa Armageddon?”

•   “Ang Armageddon Isa ka Maayong Balita!”