Nakita gid sa kinagamo sa Ukraine nga madamo nga Cristiano nga mga lider ang aktibo nga nagasuporta sa inaway. Talupangda kon paano ginsuportahan sang mga lider sang relihion ang isa ka pungsod kag ang iban naman sa kaaway sini nga pungsod:

•   “Dapat gid padunggan kag pasalamatan ang tanan naton nga soldado nga nagapakig-away para sa ila pungsod nga Ukraine batok sa nagasalakay sini . . . Palangga namon kamo, sinsero kami nga nagapangamuyo para sa inyo, kag pirme gid kami nagasuporta sa inyo.”—Metropolitan Epiphanius I sang Kyiv, nga ginreport sa The Jerusalem Post, Marso 16, 2022.

•   “Sang Domingo, ang lider sang Russian Orthodox Church naghiwat sang isa ka espesyal nga programa para sa mga soldado sang Russia kag ginpalig-on niya sila nga depensahan ang ila pungsod ‘bilang isa ka matuod nga Russian’ samtang ginapadayon sang Russia ang aktibidad sang ila militar sa Ukraine.”—Reuters, Abril 3, 2022.

 Dapat bala mag-entra sa inaway ang mga Cristiano? Ano ang ginasiling sang Biblia?

 Ginapakita sang Biblia nga ang matuod nga mga sumulunod ni Jesus wala nagaentra sa inaway.

•   “Itagob ang imo espada, kay ang tanan nga nagagamit sang espada mapatay sa espada.”—Mateo 26:52.

   Ginasunod bala sang isa ka tawo nga nagapalig-on sang inaway ukon nagaentra sa inaway ang ginhambal ni Jesus?

•   “Ginahatag ko sa inyo ang isa ka bag-o nga sugo, nga maghigugmaanay kamo; subong nga ginhigugma ko kamo, maghigugmaanay man kamo. Paagi sini mahibaluan sang tanan nga mga disipulo ko kamo, kon nagahigugmaanay kamo.”—Juan 13:34, 35.

   Ginapakita bala sang tawo ang gugma nga ginsiling ni Jesus nga magapakilala sang iya mga disipulo ukon mga sumulunod kon nagasuporta sia sa inaway?

 Para sa dugang nga impormasyon, basaha ang artikulo nga “Puede Bala Mag-entra sa Inaway ang mga Cristiano?”

 Puede gid bala malikawan sang mga Cristiano ang pagpakig-away subong? Huo. Ang Biblia nagtagna nga sa aton tion subong, nga ginatawag nga “katapusan nga mga adlaw,” may mga tawo halin sa tanan nga pungsod nga ‘indi na magtuon sa pagpakig-away,’ suno sa mga panudlo ni Jesus.—Isaias 2:2, 4, footnote.

•   Basaha ang artikulo sa Ang Lalantawan nga may tig-ulo nga “Ano ang Pagtamod sang Dios sa Inaway?” para mahibaluan pa ang parte sa sini.

 Sa indi madugay, gamiton ni Jehova, a “ang Dios sang paghidait,” ang iya gobierno sa langit para luwason ang mga tawo nga nagaantos bangod sa “pagpamigos kag sa pagpamintas.”—Filipos 4:9; Salmo 72:14.

•   Para mahibaluan kon paano ini matabo, tan-awa ang video nga Ano ang Ginharian sang Dios?