PADAYON NGA MAGBANTAY!

2022: Tuig sang Grabe nga Kabudlayan—Ano ang Ginasiling sang Biblia?

I-PLAY

Sang 2022, pirme naton mabatian sa balita ang mga report parte sa inaway, kapigaduhon, kag mga kalamidad. Ang Biblia lamang ang makapaathag kon ano gid ang buot silingon sini nga mga hitabo.

Kon ano gid ang buot silingon sang mga hitabo sang 2022

Ang mga hitabo sang nagligad nga tuig dugang pa gid nga ebidensia nga nagakabuhi na kita sa ginatawag sang Biblia nga “katapusan nga mga adlaw.” (2 Timoteo 3:1) Nagsugod ina nga tion sang 1914. Talupangda kon paano ang mga hitabo sining karon lang insakto gid sa gintagna sang Biblia nga matabo sa aton panahon:

“Mga inaway.”—Mateo 24:6.

“2022 ang Tuig nga Naeksperiensiahan Liwat sang Europe ang Epekto sang Inaway.” a

Tan-awa ang artikulo nga “Gin-atake sang Russia ang Ukraine.”

“Kakulang sa pagkaon.”—Mateo 24:7.

“2022: Tuig sang Grabe Gid nga Tiggulutom.” b

Tan-awa ang artikulo nga “Nagalala Pa Gid ang Kakulang sa Pagkaon sa Bilog nga Kalibutan Bangod sang Inaway sa Ukraine.”

“Mga balatian.”—Lucas 21:11.

“Ang pagbalik sang polio, samtang nagalala ang monkeypox kag padayon nga nagapanghalit ang COVID-19, nagapakita kon daw ano ka delikado ang makalalaton nga balatian kag wala gid sing mahimo ang tawo sa sini.” c

Tan-awa ang artikulo nga “6 ka Milyon ang Napatay Bangod sa COVID.”

“Makahaladlok nga mga talan-awon.”—Lucas 21:11.

“Mga heatwave, tigpalamangag, wildfire, kag mga baha. Ang tingadlaw sang 2022 madumduman bangod sang grabe ka abnormal nga tiempo nga nagresulta sa kahalitan, pagkapatay sang linibo, kag pagbakwit sang minilyon ka tawo sa bilog nga kalibutan.” d

Tan-awa ang artikulo nga “Grabe Kainit nga Tiempo sa Bilog nga Kalibutan.”

“Mga kinagamo.”—Lucas 21:9.

“Akig gid ang mga tawo bangod sa grabe nga kapigaduhon, labi na sang sigesige nga pagmahal sang mga balaklon, gani nagdamo gid ang nagaprotesta sa gobierno sang 2022.” e

Tan-awa ang artikulo nga “Sigesige nga Pagmahal sang mga Balaklon sa Bilog nga Kalibutan.”

Ano ang matabo sa masunod nga tuig?

Wala gid sang makasiling kon ano ang sigurado nga matabo sa 2023. Pero kabalo kita nga sa indi madugay, ang Ginharian sang Dios, ukon ang gobierno sa langit, mahimo sang daku nga pagbag-o diri sa duta. (Daniel 2:44) Dulaon sina nga gobierno ang tanan nga rason sang pag-antos sang tawo kag siguraduhon sini nga matuman ang kabubut-on sang Dios diri sa duta.—Mateo 6:9, 10.

Ginapalig-on ka namon nga sundon ang laygay ni Jesucristo kag ‘padayon nga magbantay’ kon paano nagakatuman subong ang mga tagna sa Biblia. (Marcos 13:37) Palihug kontaka kami para mabal-an mo pa gid kon paano ka mabuligan sang Biblia kag kon paano ini makahatag sa imo kag sa imo pamilya sang matuod nga paglaum para sa mas matahom nga palaabuton.

a AP News, “2022 Was Year the Horror of War Returned to Europe,” ni Jill Lawless, Disiembre 8, 2022.

b World Food Programme, “A Global Food Crises.”

c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” ni Lawrence O. Gostin, JD, Septiembre 22, 2022.

d Earth.Org, “What’s Behind the Record-Breaking Extreme Weather Events of Summer 2022?” ni Martina Igini, Oktubre 24, 2022.

e Carnegie Endowment for International Peace, “Economic Anger Dominated Global Protests in 2022,” ni Thomas Carothers kag ni Benjamin Feldman, Disiembre 8, 2022.