Sang umpisa sang dekada ’30, ang Indonesia, Malaysia, kag ang Papua New Guinea wala pa gid mabantalaan sang mga Saksi ni Jehova. Paano mabantalaan sang maayong balita ining mga pungsod? Para mahimo ini, nagbakal ang sanga sa Australia (Australasia subong) sang 16 ka metro nga de-motor nga sakayan nga may duha ka palo para sa mga layag. Gintawag ini nga Lightbearer bangod gamiton ini nga sakayan para magdala sang kapawa sang kamatuoran sa malayo nga mga pungsod, kag ang tanan nga sakay sini mga payunir. a—Mateo 5:14-16.

Sang Pebrero 1935, ang pito ka payunir naglayag halin sa sidlangan nga baybayon sang Australia paaminhan sang Sydney, pakadto sa Port Moresby, New Guinea. Nagapangisda sila samtang nagabiyahe kag nagadungka sa pila ka pantalan para magpatughong kag magkay-o sang sakayan, kag magbakal sang dugang nga pagkaon. Sang Abril 10, 1935, naglayag sila halin sa Cooktown, Queensland. Sang malapit na sila sa Great Barrier Reef, ginpaandar nila ang makina sang sakayan bangod delikado ang ila agyan nga ruta. Pero nagbisyo ang makina gani kinahanglan nila patyon ini. Dapat bala sila magbalik ukon padayon nga maglayag pakadto sa New Guinea? Ang kapitan sang sakayan nga si Eric Ewins nagsiling nga indi nila gusto magbalik. Gani nagpadayon sa paglayag ang Lightbearer, asta nga nakaabot sila sa Port Moresby sang Abril 28, 1935.

Samtang ginakay-o sang mekaniko ang makina, nagbantala sang maayong balita ang mga utod sa Port Moresby magluwas kay Frank Dewar. Si Frank, nga isa ka “mapisan” nga payunir suno sa isa sa ila, nagsiling, ‘Halin sa siudad, naglakat ako sing mga 32 ka kilometro ukon sobra pa. Nagdala ako sang madamo nga libro para magbantala sa mga residente.’ Sa pagbalik niya, lain ang iya gin-agyan kag kinahanglan niya mag-ubog sa gamay nga suba nga may mga buaya. Pero naghalong gid sia kag nakabalik sia sa siudad nga wala maano. Nangin madinalag-on ang mga panikasog sang mga utod sa ila ministeryo. Ang pila sa mga nagbaton sang literatura sa Biblia nangin mga Saksi ni Jehova sang ulihi.

Pagkatapos makay-o ang makina, nagbiyahe halin sa Port Moresby ang Lightbearer pakadto sa isla sang Java sa Dutch East Indies (bahin sang Indonesia subong ang kalabanan nga mga isla). Nagadungka sila sa pila ka pantalan para magbakal sang ila mga kinahanglanon asta nga nakaabot sila sa Batavia (Jakarta subong) sang Hulyo 15, 1935.

Sa sini nga tion, wala na nag-upod sa Lightbearer si Charles Harris bangod nagpabilin sia sa Java kag matutom nga nagbantala sang maayong balita didto. b “Sadto,” siling niya, “masami nga ginatanyag lang ang mga literatura sa Biblia sa isa ka banwa kag nagasaylo sa masunod nga banwa. Nagadala ako sang mga publikasyon sa Arabic, Chinese, Dutch, English, kag Indonesian nga lenguahe. Masami nga ginabaton sang mga tawo ang aton literatura, gani nakatanyag ako sang mga 17,000 ka literatura kada tuig.”

Natalupangdan sang Dutch nga mga opisyal si Charles bangod sang iya katutom sa pagbantala. Isa ka bes, ginpamangkot sang isa ka opisyal ang isa ka Saksi nga nagabantala sa Java kon pila ang nagabantala sa East Java, ang lugar nga ginabantalaan ni Charles. “Isa lang,” sabat sang brother. “Ano? Sa banta mo mapatihan ina?” singgit sang opisyal. “Siguro puerte gid kadamo sang inyo miembro didto kay may mga literatura ninyo bisan diin.”

Halin sa Indonesia, naglayag ang Lightbearer pakadto sa Singapore, kag nakaabot ini didto sang Agosto 7. Kada dungka sang sakayan, ginapatokar sang mga utod ang ginrekord nga mga pamulongpulong gamit ang amplifier kag mga loudspeaker sang sakayan. Masami nga makakuha sang atension sang madamo nga tawo ini nga pamaagi sang pagbantala sang maayong balita. Ang Singapore Free Press nagreport nga “may mabaskog nga tingog nga nabatian ang mga tawo halin sa dagat . . . sang gab-i sang Mierkoles.” Ini nga newspaper nagpadayon: “May pinasahi nga wali . . . nga mabatian . . . halin sa ‘Lightbearer’ nga sakayan, nga nagapatokar sang mga ginrekord nga mga pamulongpulong sang Watch Tower umpisa sang nag-abot ini sa Singapore halin sa Australia.” Mabasa man sa report nga “kon maayo ang tiempo, mabatian sing klaro ang mga pamulongpulong . . . 3 asta 4 ka kilometro halin sa dagat.”

Samtang ara sa Singapore ang Lightbearer, ginsugdan ni Frank Dewar ang iya bag-o nga asaynment. Gin-istorya niya kon ano ang natabo: “Nagapayunir kami sa Singapore samtang nagaistar sa sakayan. Sang manuglakat na ang Lightbearer, nakibot ako sa ginsiling sa akon ni Eric Ewins. Nagsiling sia: ‘Ti, Frank, siling mo gusto mo mangin teritoryo ang Siam (Thailand subong). Asta diri ka na lang namon madul-ong.’ Nakibot gid ako kag daw indi na makahambal sing tadlong: ‘Pero indi ako kabalo magkadto sa Siam halin diri!’” Ginsilingan ni Eric si Frank nga makakadto sia didto kon magsakay sia sa tren halin sa Kuala Lumpur, sa Malaysia. Gani nagbiyahe si Frank pakadto sa Kuala Lumpur kag nakaabot sia sa Thailand pagligad sang pila ka bulan. c

Samtang nagalayag ang Lightbearer sa nakatundan nga baybayon sang Malaysia, nagdungka ini sa Johore Bahru, Muar, Malacca, Klang, Port Swettenham (Port Klang subong), kag Penang. Sa kada pantalan, ginapatokar sang mga utod ang ginrekord nga mga pamulongpulong sa Biblia gamit ang loudspeaker sang sakayan. “Bisan siguro flying saucer indi makapainteres sa mga tawo sing amo sini,” siling ni Jean Deschamp, nga isa ka Saksi nga nagaalagad sa Indonesia sadto nga tion. Pagkatapos mapatokar ang mga pamulongpulong, nagapanaug ang mga utod sa sakayan para magtanyag sang literatura sa mga interesado.

Halin sa Penang, naglayag ang mga utod tabok sa Strait of Malacca pakadto sa Medan, Sumatra (bahin sang Indonesia subong). Si Eric Ewins nagsiling: “Maayo gid ang amon eksperiensia sa distrito sang Medan, kag madamo ang nagpamati sa maayong balita.” Nakatanyag ang mga utod sang mga 3,000 ka literatura didto.

Nagpadayon sa paglayag ang Lightbearer pabagatnan, kag nagbantala sila sa dalagku nga mga pantalan sa sidlangan nga bahin sang Sumatra. Sang Nobiembre 1936, nagbalik ang sakayan sa Singapore kag nagpabilin didto si Eric Ewins. Pagligad sang pila ka semana, nagpakasal sila sang isa ka Saksi nga nagaistar sa Singapore nga si Irene Struys. Nagpadayon sa pagpayunir sanday Eric kag Irene sa Sumatra. Gani nagakinahanglan sang bag-o nga kapitan ang Lightbearer.

Si Norman Senior, nga isa ka eksperiensiado nga marinero, amo ang bag-o nga kapitan. Nag-abot sia halin sa Sydney sang Enero 1937. Dayon naglayag ang mga utod halin sa Singapore pakadto sa Borneo kag Celebes (Sulawesi subong). Nagpanaksi sila sa madamo nga lugar didto, kag nakalab-ot sila sa lugar nga mga 480 ka kilometro ang kalayuon halin sa pantalan.

Sang nagdungka ang Lightbearer sa pantalan sang Samarinda sa Borneo, wala sila ginpasugtan sang opisyal sang pantalan nga magbantala sa mga tawo. Pero sang ginpaathag ni Norman sa iya ang aton pagbantala nga hilikuton, nagpasugot sia kag nagkuha pa gani sang pila ka literatura.

Sa isa pa ka higayon, gin-imbitar si Norman sang isa ka ministro nga magpamulongpulong sa iya simbahan. Pero imbes nga sia ang magpamulongpulong, ginpatokar ni Norman sa radyo pono ang lima ka ginrekord nga mga pamulongpulong sa Biblia. Nagustuhan ini sang ministro. Nagkuha pa gani sia sang pila ka literatura para ipanagtag sa iya mga abyan. Pero, sia lang ang ministro nga interesado sa maayong balita. Ang iban nga mga lider sang relihion wala gid nalipay sa hilikuton sang mga Saksi ni Jehova. Ang matuod, naakig gid sila sa maisog nga pagpanaksi sang mga utod kag gin-pressure pa gani nila ang mga opisyal sang pungsod nga dumilian ang pagdungka sang Lightbearer sa iban nga mga pantalan.

Sang Disiembre 1937, bangod sang pagdumili nga resulta sang pagpamatok sang mga lider sang relihion, nagbalik ang Lightbearer sa Australia. Nagdungka ang sakayan sa Sydney Harbor, kag tayming gid ini kay makatambong sila sa kombension sang mga Saksi ni Jehova sang Abril 1938. Nakabalik ang Lightbearer sa Sydney pagligad sang sobra tatlo ka tuig. Ginbaligya ang sakayan sang umpisa sang dekada ’40, pagkatapos gindumilian ang hilikuton sang mga Saksi sa Australia. “Daku gid ang nabulig sang sakayan,” siling ni Brother Ewins. Nagsiling sia nga ang iya mga eksperiensia sa Lightbearer amo ang pila sa “pinakamalipayon nga mga tuig” sang iya kabuhi.

Ang mga payunir nga sakay sang Lightbearer nagbantala sang maayong balita sa malapad nga teritoryo kag sa madamo nga tawo. Kag bisan may pagpamatok, amat-amat nga nagbunga ang ila pagpanikasog. (Lucas 8:11, 15) Subong, may sobra sa 40,000 ka manugbantala sang Ginharian sa mga pungsod nga ginbantalaan sini nga mga payunir. Maayo gid ang resulta sang ginhimo sining maisog nga mga utod kag sang ila sakayan nga gintawag nga Lightbearer! Maayo gid sila nga halimbawa para sa aton subong.