Tugutan bala sang Dios nga padayon nga gamhan sang mga tawo ang isa kag isa kag mabutang sa katalagman ang palaabuton sang katawhan? Indi. Subong sang natun-an naton, magapasilabot sia kag tapuson niya ang siniglo na nga pag-antos kag pagpamigos. Luyag sang Manunuga sang katawhan kag sang duta nga mahibaluan naton nga malapit na lang niya ini himuon. Paano niya ginasugid inang importante nga impormasyon?

Binagbinaga ini nga ilustrasyon: Kon nagabiyahe ka, mahimo nagtan-aw ka anay sa Internet, sa mga mapa, kag sa nasulat nga mga direksion. Sang nakita mo ang mga karatula kag mga palatandaan nga sibu sa ginasiling sang direksion, kumbinsido ka nga malapit ka na sa imo destinasyon. Sing kaanggid, ginahatag sa aton sang Dios ang iya Pulong, nga nagalaragway sang talalupangdon nga mga hitabo karon sa kalibutan. Kon makita naton nga nagakatuman ining palatandaan nga mga hitabo, makumbinsi kita nga malapit na kita sa katapusan.

Ginapaathag sang Biblia nga matabo ang pinasahi kag daku nga pagbag-o sa kasaysayan sang kalibutan nga magadul-ong sa katapusan. Sa sina nga tion makita naton ang lainlain nga hitabo sa kalibutan kag ang mga kahimtangan nga wala pa gid natabo sa kasaysayan sang tawo. Binagbinaga ang pila ka kahimtangan nga ginsambit sa Pulong sang Dios.

1. KINAGAMO SA BILOG NGA KALIBUTAN Ang tagna sa Mateo kapitulo 24 naglista sang mga hitabo sa kalibutan nga nalakip sa kabilugan nga tanda. Amo ini ang tanda sang “hingapusan sang sistema sang mga butang” nga magadul-ong sa ‘pag-abot sang katapusan.’ (Bersikulo 3, 14) Ini nga hitabo nagalakip sang dalagku nga mga inaway, kakulang sa pagkaon, linog sa lainlain nga duog, pagdamo sang kalautan, pagbugnaw sang gugma, kag panikasog sang lider sang mga relihion sa pagpatalang sa mga tawo. (Bersikulo 6-26) Matuod, nagakatabo na ini sa sulod sang mga siglo. Pero, samtang nagahilapit ang katapusan, matabo ini tanan sa isa lang ka magamo nga panag-on. Sa sina nga panag-on, matabo man ang masunod nga tatlo ka paandam.

2. PAMATASAN SANG MGA TAWO Ang Biblia nagasiling nga sa “katapusan nga mga adlaw”—ang panag-on nga nagadul-ong sa katapusan—matabo ang grabe nga paglain sa pamatasan sang mga tawo. Aton mabasa: “Ang mga tawo mangin mahigugmaon sa kaugalingon, mahigugmaon sa kuarta, bugalon, matinaastaason, manugpasipala, indi matinumanon sa mga ginikanan, indi mapinasalamaton, indi mainunungon, indi mapinalanggaon, indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis, wala sing gugma sa kon ano ang maayo, maluib, matig-a sing ulo, nagapahambog, mahigugmaon sa kinasadya sa baylo nga mahigugmaon sa Dios.” (2 Timoteo 3:1-4) Matuod, indi na bag-o ang indi pagtahod sa isigkatawo, pero sa “katapusan nga mga adlaw” lang nga magalain gid ini nga pamatasan. Gani, ina nga panag-on malaragway gid subong “makahalanguyos nga mga tion nga mabudlay atubangon.” Natalupangdan mo bala ining malain nga pamatasan sang mga tawo?

3. GINALAGLAG ANG DUTA Ang Biblia nagasiling nga ‘laglagon sang Dios ang mga nagalaglag sang duta.’ (Bugna 11:18) Sa ano nga paagi ginalaglag sang mga tawo ang duta? Kaanggid sa sini ang paglaragway sang panahon ni Noe: “Napuno ang duta sang kasingki, kag nangin malain ini sa panulok sang matuod nga Dios. Gintan-aw sang Dios ang duta kag nakita niya nga malain ini.” Gani nagsiling ang Dios parte sa sinang malain nga katilingban: “Laglagon ko sila.” (Genesis 6:11-13) Natalupangdan mo bala ang madamo nga ebidensia nga ang duta puno sing kasingki? Dugang pa, grabe na gid ang masarangan himuon sang tawo subong: Mahimo na nila laglagon sing literal ang duta paagi sa pagpapas sa mga tawo. Madamo na sila sing armas. Kag ginalaglag pa gid ang duta sa lain nga paagi. Ang mga butang nga nagasakdag sa kabuhi sa duta—ang hangin nga aton ginahaklo,  ang kadagatan, ang sistema sang ekolohiya sa sapat kag tanom—padayon nga nahalitan bangod sa indi maayo nga pagdumala sang mga tawo.

Pamangkuta ang imo kaugalingon, ‘Sang nagligad lang nga siglo, may ikasarang bala ang mga tawo sa paglaglag sang ila kaugalingon?’ Pero karon ginapanikasugan sang mga tawo ina nga ikasarang paagi sa pagpadamo sang moderno nga mga armas kag paagi sa paghalit sang palibot. Daw indi na makontrol sang tawo ang malain nga resulta sang moderno nga teknolohiya. Pero indi tawo ang magadesisyon ukon magakontrol sa palaabuton sang duta. Antes mapapas ang tanan nga kabuhi diri sa duta, laglagon sang Dios ang mga nagalaglag sang duta. Amo ina ang iya saad!

4. BUG-OS KALIBUTAN NGA PAGBANTALA Ang isa pa ka bahin sang tanda sang katapusan amo ang gintagna nga hilikuton nga wala pa gid matabo: “Ining maayong balita sang Ginharian ibantala sa bug-os nga duta subong panaksi sa tanan nga pungsod, kag dayon magaabot ang katapusan.” (Mateo 24:14) Ini nga pagbantala lain gid sa pagpangumbertir sang kalabanan nga relihion nga natabo sa sulod sang mga siglo. Sa tion sang katapusan nga mga adlaw, ipadaku ang isa ka espesipiko nga mensahe, “ining maayong balita sang Ginharian.” May nahibaluan ka bala nga grupo sang relihion nga nagapadaku sini nga mensahe? Kag bisan daw ginabantala sang pila ina nga mensahe, sa inyo lang bala sila nga lugar, ukon ginpalapnag bala nila ining maayong balita sa “bug-os nga duta subong panaksi sa tanan nga pungsod”?

Ang Web site nga www.jw.org nagapadaku sa sining “maayong balita sang Ginharian.” May mga publikasyon sa Web site nga nagapaathag sina nga mensahe sa sobra 700 ka lenguahe. May iban ka pa bala nga nahibaluan nga nagapanikasog sa pagpadaku sang maayong balita sang Ginharian sa bilog nga kalibutan? Antes pa sang Internet, madugay na nga kilala ang mga Saksi ni Jehova sa ila panikasog sa pagpalapnag sing maayong balita sang Ginharian sang Dios. Sugod sang 1939, mabasa na sa kober sa tagsa ka isyu sang Ang Lalantawan nga magasin ang mga tinaga nga “Nagabantala sang Ginharian ni Jehova.” Ang libro parte sa mga relihion nagkomento nga ang pagbantala sang mga Saksi ni Jehova “indi gid matupungan sa kapisan kag sa kasangkaron.” Ini nga pagpanaksi nagapadaku sang maayong balita nga sa indi madugay “magaabot ang katapusan” paagi sa pagpanghikot sang Ginharian sang Dios.

Natalupangdan mo bala nga ang apat ka kahimtangan nga gintagna sang Biblia sa sini nga artikulo nagakatabo sa imo panahon? Kapin na sa isa ka gatos ka tuig nga ini nga magasin nagasugid sa mga bumalasa sini sang impormasyon parte sa mga  hitabo sa kalibutan nga nagabulig sa ila nga mausisa nga malapit na gid kita sa katapusan. Siempre, ang pila indi magpati, kay nagasiling sila nga ina nga impormasyon kag estadistika mahimo nga indi matuod kag indi eksakto. Nagasiling man sila nga bangod sa pag-uswag sang komunikasyon nahibaluan sang mga tawo ang nagakatabo sa bilog nga kalibutan, amo nga kon tan-awon daw nagalala ang mga kahimtangan sini. Apang nagadamo ang ebidensia nga yara na kita sa hingapusan sang talalupangdon nga tion sa kasaysayan sang tawo.

Ang pila ka eksperto nagapati nga nagahilapit na kita sa daku nga mga pagbag-o sa sini nga duta. Halimbawa, sang 2014, ang Science and Security Board sang Bulletin of the Atomic Scientists nagpaandam sa United Nations Security Council parte sa daku nga katalagman nga mapapas ang mga tawo. Ini nga mga sientipiko nagsiling: “Sang mahalungon namon nga ginbinagbinag ini nga katalagman, naghinakop kami nga daku gid ang katalagman nga mapapas ang sibilisasyon bangod sang teknolohiya.” Madamo nga tawo ang kumbinsido gid nga yara na kita sa tion nga may daku nga pagbag-o sa kasaysayan sang kalibutan. Napat-od gid sang manugbalhag sini nga magasin kag sang madamo nga bumalasa sini nga ining talalupangdon nga tion amo gid ang katapusan nga mga adlaw kag malapit na ang katapusan. Pero imbes nga kahadlukan ang palaabuton, mangin malipayon ka sa matabo. Ngaa? Bangod mahimo ka maluwas sa katapusan!