ANO nga kalig-unan ang dapat ihatag sang bana sa iya asawa? Madamo ang ginpadaku nga ang panguna nga tulumuron sang bana amo ang pagpat-od nga mangin bastante sa pinansial ang iya pamilya. Pero ang pila ka asawa nga bastante sa materyal indi malig-on sa emosyon kag nahadlok pa gani sila. Halimbawa, ang Katsila nga si Rosa nagsiling parte sa iya bana, “Kabuot sa iya kon sa iban nga tawo, pero kon sa balay kapintas sa iya.” Si Joy nga taga-Nigeria nagsiling: “Kon wala ko ginasunod ang akon bana, nagasiling sia, ‘Dapat mo ako sundon kay bana mo ako.’”

Paano mahimo sang bana ang iya obligasyon sing mahigugmaon? Ano ang himuon sang bana para mangin malig-on ang iya puluy-an kag makakita sing “pahuway” ang iya asawa?—Rut 1:9.

Bisan pa alalangay ang paglantaw sang Dios sa mag-asawa, ang Biblia nagasiling nga ang kada isa sa ila may obligasyon sa pamilya. Ang Roma 7:2 nagasiling nga dapat sundon sang asawa ang “kasuguan sang iya bana.” Kaangay sang madamo nga institusyon nga nagatangdo sing ulo agod magtatap sang ila mga hilikuton, gintangdo sang Dios ang bana nga mangin ulo sang iya asawa. (1 Corinto 11:3) Ang mga bana dapat manguna sa ila panimalay.

Subong bana, paano mo gamiton ang awtoridad nga ginhatag sang Dios sa imo? “Padayon nga higugmaa ang inyo asawa,” siling sang Biblia, “subong nga si Cristo naghigugma man sang kongregasyon.” (Efeso 5:25) Bisan pa wala magminyo si Jesus, makabulig sa imo ang iya maayo nga halimbawa agod mangin maayo ka nga bana. Tan-awon naton kon paano.

Gintinguhaan ni Jesus nga paumpawan ang iban kag pamag-anon ang ila lulan. Nagsaad si Jesus sa mga ginapigos kag ginabug-atan sa ila mga problema: “Kari sa akon, . . . kag paumpawan ko kamo.” (Mateo 11:28, 29) Pirme niya sila ginapaumpawan kag ginabuligan nga mangin suod kay Jehova. Indi katingalahan nga madamo ang nangin suod sa iya, kay kumbinsido sila nga pamag-anon niya ang ila lulan!

 Kon paano mailog sang mga bana si Jesus. Buligi ang imo asawa. Ang iban nga mga asawa pareho kay Rosa nga nagareklamo: “Daw suluguon lang ako.” Sa kabaliskaran, ang bana nga si Kweku nga malipayon sa ila pag-asawahay, nagsiling: “Pirme ko ginapamangkot ang akon asawa kon ano ang akon himuon. Bangod palangga ko sia, pirme ako nagamatumato nga buligan sia.”

Si Jesus mapatugsilingon kag mahinuklugon. Sa sulod sang 12 ka tuig, nagaantos ang isa ka imol nga babayi bangod sang malala nga balatian. Sang mahibal-an niya nga si Jesus may gahom sa pagpaayo sang balatian, “padayon sia nga nagasiling: ‘Kon matandog ko lamang ang iya mga panapton magaayo ako.’” Husto gid sia. Sang ginpalapitan niya si Jesus kag gintandog ang sidsid sang iya bayo, nag-ayo sia dayon. Bisan pa nga ang pila ka tumalan-aw mahimo maghinakop nga indi nagakadapat ang ginhimo sini nga babayi, nahantop ni Jesus nga desperado na gid sia. * Malulo sia nga nagsiling sa babayi: “Anak, . . . magaayo ka na sa imo malubha nga  balatian.” Wala sia ginpakahuy-an ni Jesus ukon gin-akigan kundi gin-ayo niya ang iya balatian. Gani ginpakita niya kon ano sia nga tawo—mahinuklugon sia.—Marcos 5:25-34.

Kon paano mailog sang mga bana si Jesus. Kon malain ang pamatyag sang imo asawa, mangin mapinasensiahon. Tilawi nga hangpon sia. Halimbawa, si Ricardo nagpaathag, “Kon matalupangdan ko nga daw kadali mangakig ang akon asawa, ginapanikasugan ko gid nga indi magsige wakal.”

Si Jesus nakig-istorya sa iya mga disipulo. Nagapakig-istorya gid si Jesus sa iya mga abyan. “Ang tanan nga butang nga nabatian ko sa akon Amay ginapahibalo ko sa inyo,” siling niya. (Juan 15:15) Matuod nga kon kaisa luyag ni Jesus nga mag-isahanon para makapamalandong sia kag makapangamuyo. Pero pirme niya ginasugid sa iya mga disipulo ang iya ginabatyag. Sang gab-i antes sia ginpatay subong isa ka ginpakamalaut nga kriminal, ginprangka niya ang iya mga disipulo nga “nagakasubo [sia] sing tuman.” (Mateo 26:38) Bisan pa nga nalugaw-an sia sa ila mga ginahimo, wala sia mag-untat sa pagpakig-istorya sa ila.—Mateo 26:40, 41.

Kon paano mailog sang mga bana si Jesus. Isugid sa imo asawa ang imo ginahunahuna kag ginabatyag. Mahimo magreklamo ang asawa nga ang iya bana palaistorya sa iban pero hipuson sa balay. Pero talupangda ang ginsiling ni Ana kon makig-istorya ang iya bana sa iya. “Pamatyag ko palangga gid niya ako,” siling niya, “kag nangin suod gid ako sa iya.”

Likawi nga gamiton ang paghipos para silutan ang imo asawa. “Kon maakig sa akon ang akon bana,” siling sang isa ka babayi, “wala niya ako ginabugno sing pila ka adlaw. Ginapakonsiensia gid niya ako.” Pero gintinguhaan ni Edwin nga ilugon si Jesus. “Kon maakig ako, wala ako nagasabat dayon. Ginahulat ko anay ang husto nga tion para hambalan ini.”

Natalupangdan ni Joy nga nasambit na ang mga pagbag-o sang iya bana sang nagtuon sia sa Biblia upod sa mga Saksi ni Jehova. Siling niya, “Nagbag-o na sia kag ginatinguhaan gid niya nga mangin mahigugmaon pareho kay Jesus.” Minilyon ka mag-asawa subong ang nagabenepisyo sa sini man nga pagtudlo sing Biblia. Gusto mo man bala? Palihug pangabaya ang isa sa mga Saksi ni Jehova para sa libre nga pagtuon sa Biblia.