May suod ka bala nga abyan nga indi mo kilala ang ngalan? Mahimo nga wala gid. Natalupangdan sang taga-Bulgaria nga babayi nga si Irina, “Imposible gid nga mangin suod sa Dios kon wala ka makahibalo sang iya ngalan.” Subong sa ginsambit sa nagligad nga artikulo, gusto sang Dios nga mangin suod kita sa iya. Gani paagi sa Biblia, daw pareho lang nga ginpakilala niya ang iya kaugalingon sa imo sa pagsiling: “Ako si Jehova. Amo ina ang akon ngalan.”—Isaias 42:8, Bag-ong Kalibutan nga Badbad sang Balaan nga Kasulatan.

Luyag gid bala ni Jehova nga mahibaluan kag gamiton naton ang iya ngalan? Binagbinaga ini: Ang ngalan sang Dios, nga ginsulat sa apat ka Hebreo nga letra nga ginatawag Tetragrammaton, makita sa orihinal nga Hebreo nga Kasulatan sing halos 7,000 ka beses. Mas madamo ini sa bisan ano nga ngalan nga ginsambit sa Biblia. Pamatuod ini nga luyag gid ni Jehova nga mahibaluan naton kag gamiton ang iya ngalan. *

Pero ang pila mahimo magbatyag nga indi matinahuron kon gamiton ang ngalan sang Dios kay balaan sia kag gamhanan. Siempre, sala gid man kon gamiton ini sa wala sing pulos, pareho man nga indi mo paggamiton sa wala sing pulos ang ngalan sang imo suod nga abyan. Pero kabubut-on ni Jehova nga padunggan kag ipakilala sang mga nagahigugma sa iya ang iya ngalan. (Salmo 69:30, 31; 96:2, 8) Dumduma nga gintudluan ni Jesus ang iya mga sumulunod nga mangamuyo: “Amay namon nga yara sa langit, pakabalaanon ang imo ngalan.” Makapakigbahin kita sa pagpakabalaan sa ngalan sang Dios kon ipakilala naton ini. Sa paghimo sini mangin suod kita sa iya.—Mateo 6:9.

Ginapakita sang Biblia nga ginatalupangod sang Dios ang mga “nagpainoino sa iya ngalan” ukon nagapakabahandi sa sini. (Malaquias 3:16) Parte sa sini, si Jehova nagsaad: “Luwason ko sia . . . bangud nga ginkilala niya ang akon ngalan. Magatawag sia sa akon, kag ako magasabat sa iya; magaupud ako sa iya sa kalilisdan.” (Salmo 91:14, 15) Importante gid nga kilalahon kag gamiton naton ang ngalan ni Jehova kon luyag naton nga mangin suod sa iya.