PERO lain ang pagtamod sang mga nagasuporta sa interfaith sa sini. “Wala sing relihion nga wala nagatudlo sang kaluoy . . . , nga wala nagatudlo sang pagkabalaka sa palibot, . . . , nga wala nagatudlo sang pagkamaabiabihon,” siling ni Eboo Patel, tagtukod sang Interfaith Youth Core.

Amo nga kon kaisa ang mga Budhista, Katoliko, Protestante, Hindu, Muslim, kag iban pa nagatipon para matapna ang kaimulon, nagapakigbato para sa kinamatarong sang mga tawo, nagahimo sang paagi batok sa mga land mine, ukon nagahatag sing atension sa mga problema sa palibot. Nagatipon ang lainlain nga mga relihion para istoryahan ang solusyon nga pabor sa isa kag isa sa ila. Ginaselebrar nila ini paagi sa pagsindi sang mga kandila, kapiestahan, musika, pangamuyo, kag iban pa.

Ang pagtipontipon bala sang mga relihion amo ang paagi para madula ang indi nila paghangpanay? Ang interfaith bala paagi sang Dios para mangin maayo ang kalibutan?

Ang isa sa pinakadaku nga organisasyon sang interfaith nagapabugal nga may miembro ini nga sobra 200 ka relihion kag aktibo sa 76 ka pungsod. Ang katuyuan sini amo ang “pagpasanyog sang padayon nga kooperasyon sang mga interfaith.” Pero, mahapos lang ini isiling sangsa himuon. Halimbawa, suno sa mga nagaorganisar sini, dapat pilion sing maayo ang mga tinaga nga gamiton sa ila kasuguan agod indi maglain ang buot sang mga relihion kag grupo nga magapirma sa dokumento. Ngaa? Ang isa sang mga ginabaisan amo nga kon dapat bala ilakip ang Dios sa ila kasuguan. Gani, ginlikawan na lang nila nga ibutang ukon sambiton ang Dios.

Kon wala nila ginlakip sa sini ang Dios, ano pa ang kapuslanan sang pagtuo? Dugang pa, ano ang kinalain sining grupo sang interfaith sa mga grupo nga nagahimo sing pagbulig sa mga kubos? Amo nga ang ginsambit nga interfaith nga grupo nagalaragway sang iya mismo kaugalingon, indi subong relihioso nga organisasyon, kundi “organisasyon nga nagapasanyog sing paghiusa.”

“Sa masami ang tanan nga dalagku nga relihion may isa lang ka mensahe: amo ini ang gugma, kaluoy, kag pagpatawad,” siling sang Dalai Lama, kilala nga tagsakdag sang interfaith. Nagdugang sia: “Ang importante amo nga dapat mangin bahin ini sang aton kabuhi.”

 Huo, importante ang gugma, kaluoy, kag pagpatawad. Sa Bulawanon nga Pagsulundan, si Jesus nagsiling: “Ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Pero ang matuod bala nga pagtuo amo lang ang pagtudlo sang maayo?

Nagsiling si apostol Pablo sa mga nagapangangkon nga nagaalagad sa Dios sang iya tion: “Nagapanaksi ako tuhoy sa ila nga may kakugi sila sa Dios; apang indi suno sa sibu nga ihibalo.” Ano ang problema? “Kay wala sila magpasakop sa pagkamatarong sang Dios,” siling niya, “kundi nagatinguha [sila] sa pagtukod sang ila kaugalingon.” (Roma 10:2, 3) Bangod kulang ang ila ihibalo parte sa luyag sang Dios nga himuon nila, wala sing pulos ang ila kakugi kag pagtuo.—Mateo 7:21-23.

“Malipayon ang mga makihidaiton,” siling ni Jesus. (Mateo 5:9) Ginahimo niya ang iya ginatudlo paagi sa pagpasanyog nga indi mangin masingki kag nagdala sia sing mensahe sang paghidait sa mga tawo nga may lainlain nga relihion. (Mateo 26:52) Yadtong mga namati nangin bahin sang mabakod nga higot sang gugma. (Colosas 3:14) Pero ang katuyuan lang bala ni Jesus amo nga hugpungon ang mga tawo nga may lainlain nga ginhalinan agod mangin mahidaiton sila? Nag-entra man bala sia sa iban sa paghimo sang ila relihioso nga mga ritwal?

Ginpamatukan gid sang mga lider sang relihion sang sekta sang mga Fariseo kag mga Saduceo si Jesus. Ginplano pa gani nila nga patyon sia. Ano ang iya ginhimo? Ginsugo ni Jesus ang iya mga disipulo: “Pabay-i ninyo sila. Bulag sila nga mga manugtuytoy.” (Mateo 15:14) Wala sila ginkilala ni Jesus nga mga utod sa espirituwal.

Sang ulihi, nahuman ang kongregasyon sang mga Cristiano sa Corinto sa Gresya. Kilala ini nga siudad nga madamo sing relihion. Paano dapat manghikot ang mga Cristiano didto? Ginsulatan sila ni Pablo nga indi gid sila makigbahin sa pagsimba sang iban. Sia nagsiling: “Indi kamo magpagota sing sampihakan upod sa mga di-tumuluo.” Ngaa? Nagrason sia: “Ano ang paghisantuanay ni Cristo kag ni Belial? Ukon ano ang bahin sang isa ka matutom nga tawo sa isa nga di-tumuluo?” Dayon naglaygay sia: “Busa gua kamo sa tunga nila, kag magbulag kamo.”—2 Corinto 6:14, 15, 17.

Maathag, ginapamatukan sang Biblia ang interfaith. Pero basi mamangkot ka, ‘Kon amo, paano matigayon ang matuod nga paghiusa?’

Ang International Space Station, isa ka tumalagsahon nga produkto sang teknolohiya nga nagalibot sa duta, resulta sang nahiusa nga pagpanikasog sang 15 ka pungsod. Mahuman bala ini nga proyekto kon wala ginkasugtan sini nga mga pungsod ang isa lang ka plano?

Amo man sini ang kahimtangan sang mga interfaith subong. Bisan pa ginapadaku nila ang kooperasyon kag pagtahod, wala sila sing ginkasugtan nga plano para palig-unon ang pagtuo. Bilang resulta, may pagbahinbahin man gihapon sa isyu sang moral kag doktrina.

Nagaunod ang Biblia sing mga talaksan sang Dios, nga pareho sang plano. Mahimo naton sundon ang ginasiling sang Biblia. Ang mga nagasunod sa sini nakalandas sang pagpasulabi sa rasa kag relihion kag nakatuon nga manghikot nga may paghidait kag paghiusa. Gintagna ini sang Dios: “Palisoon ko sa mga katawohan ang putli nga bibig, agud nga sila tanan magtawag sa ngalan sang GINOO sa pag-alagad sa iya sa isa ka paghilisugut.” Ang paghiusa epekto sang “putli nga bibig” ukon talaksan sang Dios sa pagsimba.—Sofonias 3:9; Isaias 2:2-4.

Ginaagda ka sang mga Saksi ni Jehova nga magkadto sa Kingdom Hall agod makita mo mismo ang paghidait kag paghiusa sa tunga nila.—Salmo 133:1.