Ang kamatayon makahaladlok gid nga kaaway. Ginatinguhaan gid naton nga madaug ini. Mahimo nga indi naton mabaton kon biktimahon sini ang aton pinalangga. Ukon bangod pamatan-on kita, mahimo nga mag-ilusyon kita nga indi kita mapatay.

Ang mga Paraon amo ang nagpaninguha gid nga matigayon ang kabuhi nga wala sing katapusan. Ginhinguyang nila ang ila kabuhi—pati ang kabuhi sang linibo ka ulipon—para madaug lang ang kamatayon. Ginapamatud-an mismo sang mga piramide nga gintukod nila ang ila pagpakig-away kag ang ila kapaslawan.

Pareho man sini ang dalamguhanon sang mga emperador sang China, pero tuhay ang ila pamaagi—ang paghimo sang ginasugidsugid nga elixir sang kabuhi. Ginmanduan ni Emperador Qin Shi Huang ang iya mga manugbulong nga maghimo sang bulong nga may birtud nga makapugong sang kamatayon. Pero madamo sang ila ginhimo ang may makahililo nga mercury, kag mahimo nga ang isa sini amo ang nagpatay sa iya.

Sang ika-16 nga siglo C.E., ang Espanyol nga manuglagulad nga si Juan Ponce de León nagkadto sa Caribbean para kuno mangita sang tuburan sang pagkapamatan-on. Sa baylo, nadiskobrehan niya ang Florida, U.S.A., pero napatay sia pila lang ka tuig pagkatapos makig-away sa mga Tumandok nga Amerikano. Kag wala gid sing may nakit-an nga tuburan sang pagkapamatan-on.

Ang mga paraon, emperador, kag mga manuglagulad nagpangita sing paagi para madula ang kamatayon. Indi bala nga amo man sini ang luyag naton bisan pa indi kita ugyon sa ila pamaagi? Ang matuod, tanan kita luyag nga mabuhi sing dayon.

Ngaa indi naton luyag mapatay? Ginpaathag sang Biblia ang rason. Parte sa aton Manunuga, si Jehova nga Dios, * ini nagsiling: “Ang tagsa ka butang ginhimo  niya nga matahum sa iya tion; ginbutang man niya ang wala sing katubtuban sa ila [katawhan] tagiposoon.” (Manugwali 3:11) Luyag naton nga magkalipay sing dayon sa duta, indi lang sang mga 80 ka tuig. (Salmo 90:10) Amo ini ang ginahandum sang aton tagipusuon.

Ngaa ginbutangan sang Dios sing “wala sing katubtuban” ang aton tagipusuon? Para lang bala nga masubuan kita? Daw indi ini nagakaigo. Kay nagasaad ang Dios sa aton nga puede madula ang kamatayon. Pirme ginasambit sang Biblia ang pagdula sang kamatayon kag ang saad sang Dios nga kabuhi nga wala sing katapusan.—Tan-awa ang kahon nga  “Pagdula sang Kamatayon.”

Maathag ang ginsiling ni Jesucristo: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Gani, may paglaum pa nga madaug ang kamatayon. Pero ginpat-od ni Jesus nga ang Dios lang ang makadaug sa sini nga pagpakig-away.