“MAY handum ako.” Singkuenta ka tuig na ang nagligad, sang Agosto 28, 1963, ginhambal ini sang lider nga nagapakigbato sang kinamatarong sa Amerika nga si Martin Luther King, Jr., sa iya bantog nga pamulongpulong. Paagi sining makatalandog nga pulong, ginpabutyag ni King ang iya damgo, ukon paglaum, nga isa ka adlaw ang mga tawo mahilway na sa pagpasulabi sa rasa. Bisan pa ginhambal niya ini sa mga Amerikano, ang kahulugan sang iya damgo ginbaton man sang mga tawo sa madamo nga pungsod.

Tatlo ka bulan pagkatapos sang iya pamulongpulong, sang Nobiembre 20, 1963, masobra 100 ka pungsod ang nagbaton sang United Nations Declaration on the Elimination of All Forms of Racial Discrimination. May iban pa nga deklarasyon nga ginhimo pagligad sang mga tinuig. Ina nga mga panikasog nagpautwas sang pamangkot, Ano ang resulta?

Sang Marso 21, 2012, ang Secretary-General sang U.N. nga si Ban Ki-moon nagsiling: “Madamo sing mga importante nga mga kasugtanan kag mga programa—subong man sang masangkad nga agenda—para punggan kag dulaon ang rasismo, diskriminasyon sa rasa, kahadlok sa tawo kag kaangay sini. Pero, ang rasismo padayon nga nagapaantos sa minilyon sa bilog nga kalibutan.”

Bisan pa sa mga lugar nga daku na ang nahimo para dulaon ang rasismo kag iban pa nga sahi sang pagpasulabi, nagautwas gihapon ang pamangkot: Nadula gid bala sini ang ginabatyag sang mga tawo, ukon gintudluan lang bala nila ang mga tawo nga indi pag-ipakita ang pagpasulabi? Ang pila nagapati nga ang pinakamaayo lang nga nahimo sini amo nga punggan ang diskriminasyon pero wala ini sing mahimo para dulaon ang pagpasulabi. Ngaa? Kay ang diskriminasyon isa ka buhat nga makita kag masilutan sang kasuguan, pero ang pagpasulabi ara lang sa hunahuna kag balatyagon nga indi dayon madula.

Gani, ang panikasog nga dulaon ang pagpasulabi indi lamang nga punggan ang diskriminasyon kundi bag-uhon ang panghunahuna kag balatyagon sang isa ka tawo sa iban nga grupo. Posible gid bala ini? Paano? Binagbinagon naton ang pila ka eksperiensia nga nagapakita nga indi lamang posible nga magbag-o ang tawo kundi kon ano ang makabulig sa iya nga himuon ini.

Linda: Natawo ako sa South Africa. Para sa akon, ang mga taga-South Africa nga indi puti mga kubos, wala sing tinun-an, indi masaligan, kag mga suluguon lang. Wala ko matalupangdan nga nagapasulabi na ako. Pero nagbag-o ini sang nagtuon ako sa Biblia. Natun-an ko nga “ang Dios wala sing ginapasulabi” kag mas importante ang tagipusuon sangsa pamanit ukon lenguahe. (Binuhatan 10:34, 35; Hulubaton 17:3) Ang teksto sa Filipos 2:3 nakabulig sa akon nga kon tamdon ko ang iban nga mas mataas sangsa akon, madula ko ang pagpasulabi. Ang pagsunod sa sini nga mga prinsipio sa Biblia nakabulig sa akon nga magpakita sing interes sa iban bisan ano man ang ila pamanit. Subong, nahilway na ako sa pagpasulabi.

Michael: Nagdaku ako sa lugar nga kalabanan mga puti nga Australiano, amo kon ngaa mas kubos ang pagtan-aw ko sa mga taga-Asia, ilabi na  sa mga Intsik. Kon nagamaneho ako, kag makakita ako sang daw taga-Asia, ginabuksan ko ang bintana kag ginasinggitan sila nga “Puli kamo ’to!” Sang nagtuon ako sa Biblia sang ulihi, nahibaluan ko ang pagtamod sang Dios sa mga tawo. Ginahigugma niya sila bisan diin man sila naghalin ukon ano man ang ila hitsura. Natandog gid ako sini kag ang akon dumot nabuslan sing gugma. Makatilingala gid ini nga pagbag-o. Subong malipayon ako nga nagapakig-upod sa mga tawo bisan ano man ang ila ginhalinan. Bangod sini, nagsangkad ang akon pagtamod sa kabuhi kag nangin mas malipayon ako.

Sandra: Ang akon iloy taga-Umunede sa Delta State, Nigeria. Pero ang pamilya sang akon amay taga-Edo State kag nagahambal sing Esan. Bangod sini, ang akon iloy biktima sang grabe nga diskriminasyon sa pamilya sang akon amay asta nga napatay sia. Gani nanumpa ako nga indi ako makig-upod sa nagahambal sing Esan kag indi gid mamana sang taga-Edo State. Pero sang nagtuon ako sa Biblia, nagbag-o ang akon pagtamod. Bangod nagsiling ang Biblia nga ang Dios wala sing ginapasulabi kag ginakahamut-an niya ang bisan sin-o nga nagakahadlok sa iya, sin-o ako nga magdumot sa tawo bangod sang iya tribo ukon lenguahe? Ginbag-o ko ang akon pagtamod kag nakighidait sa pamilya sang akon amay. Nangin malipayon ako kag may kalinong sa panghunahuna bangod sang pag-aplikar sang mga prinsipio sa Biblia. Nakabulig man ini sa akon nga makigbagay sa iban bisan ano man ang ila ginhalinan, rasa, lenguahe, ukon nasyonalidad. Kag ang akon napamana? Taga-Edo State sia kag nagahambal sang Esan!

Ngaa nabuligan sila sang Biblia kag ang madamo pa nga madula ang grabe nga dumot kag pagpasulabi? Bangod ang Biblia Pulong sang Dios. May gahom ini sa pagbag-o sa panghunahuna kag balatyagon sang isa para sa iban. Dugang pa, ginapakita man sang Biblia kon ano pa ang kinahanglan para madula ang tanan nga pagpasulabi.

Bisan pa ang ihibalo sa Biblia makabulig nga makontrol kag madula ang mabaskog nga emosyon, may duha pa ka butang nga dapat himuon antes madula sing bug-os ang pagpasulabi. Una, ang sala kag ang pagkadiperpekto. Ang Biblia nagasiling: “Walay tawo nga wala nagapakasala.” (1 Hari 8:46) Gani bisan ano man ang aton himuon, pareho gihapon ang aton ginabatyag kay apostol Pablo, nga nagsulat: “Kon luyag ko himuon ang husto, ang malain yari sa akon.” (Roma 7:21) Gani, kon kaisa bangod sang aton indi perpekto nga tagipusuon makahimo kita sing “makahalalit nga mga pangatarungan” nga nagaresulta sa pagpasulabi.—Marcos 7:21.

Ikaduha, ang impluwensia ni Satanas nga Yawa. Ginalaragway sia sang Biblia nga “manugpatay” kag “nagapatalang sa bug-os napuy-an nga duta.” (Juan 8:44; Bugna 12:9) Amo nga lapnag gid ang pagpasulabi kag daw indi madula sang mga tawo ang dumot, diskriminasyon, pagpapas sang rasa, kag iban pa nga sahi sang pagpasulabi.

Gani, antes madula sing bug-os ang pagpasulabi, dapat anay dulaon ang sala, pagkadiperpekto sang tawo, kag ang impluwensia ni Satanas nga Yawa. Ginapakita sang Biblia nga himuon ini sang Ginharian sang Dios.

Gintudluan ni Jesucristo ang iya mga sumulunod nga mangamuyo sa Dios: “Magkari ang imo ginharian. Matuman ang imo kabubut-on sa duta, subong sang sa langit.” (Mateo 6:10) Ang Ginharian sang Dios amo ang magadula sang tanan nga inhustisya, lakip ang tanan nga sahi sang pagpasulabi.

Kon magkari na ang Ginharian sang Dios kag maggahom sa duta, ‘gapuson’ si Satanas ukon punggan sing bug-os, agod “indi na niya mapatalang pa ang mga pungsod.” (Bugna 20:2, 3) Magaluntad na ang “bag-ong duta,” ukon katilingban, diin “magapuyo ang pagkamatarong.” *—2 Pedro 3:13.

Ang magaistar sa sining matarong nga katilingban ibalik sa pagkaperpekto, kag hilwayon sa sala. (Roma 8:21) Subong mga sakop sang Ginharian sang Dios, “indi sila maghalit ukon maglaglag.” Ngaa? “Kay ang duta matugub sang pagkilala sa GINOO.” (Isaias 11:9) Sa sina nga tion, ang tanan makatuon sa mga dalanon ni Jehova nga Dios kag magailog sa iya mahigugmaon nga kinaiya. Amo ini ang magadula sang tanan nga pagpasulabi, “kay wala sing ginapasulabi ang Dios.”—Roma 2:11.