MATUOD gid ini nga mga pulong! Ang kabuhi sa sini nga kalibutan masami nga puno sing “kagamo kag kalisod.” Mahimo nagapalibog ka, ‘Posible bala nga matigayon ang may kahulugan nga kabuhi subong?’

Binagbinaga ang halimbawa ni Maria. Isa sia anay ka mapagsik nga babayi, pero subong, sa edad nga 84, indi na sia makahalin sa iya balay kon sia lang. Maayo pa ang iya panghunahuna, pero ang iya lawas maluya na. Paano niya masiling nga may kahulugan ang iya kabuhi?

Kamusta sa imo bahin? Mahimo nga napamangkot mo na ang imo kaugalingon kon bala may kahulugan ang imo kabuhi. Mahimo nga ang imo trabaho rutina na lang, makakalapoy, kag makatalaka. Ayhan wala ginapabaloran sang iban ang imo pagpangabudlay. Bisan pa maayo ang imo kahimtangan subong, mahimo nagakabalaka ka sa imo palaabuton. Kon kaisa, mahimo man nga ginasubuan ka. Ayhan magamo ang inyo pamilya ukon namatyan ka sing pinalangga. Si André suod gid sa iya amay, nga hinali lang nga nagmasakit kag napatay. Para sa iya, daw imposible nga maatubang niya ang tuman nga kasubo kag kadulaan.

Bisan ano man nga problema ang aton maatubang, may isa ka butang nga gusto gid naton mahibaluan: Posible gid bala ang may kahulugan nga kabuhi? Makita naton ang sabat sa kabuhi sang isa ka tawo nga nagkabuhi sa duta mga 2,000 ka tuig na ang nagligad—si Jesucristo. Bisan pa sang tanan nga kabudlayan nga iya naatubang, ang kabuhi ni Jesus may kahulugan gid. Kon ilugon naton sia, may kahulugan man ang aton kabuhi.