Magtuon sa Pulong sang Dios
Matukod Bala ang Dios sang Isa Lang ka Gobierno sa Kalibutan?
Makita sa sini nga artikulo ang mga pamangkot nga mahimo ginapaligban mo kag kon diin sa Biblia mabasa ang mga sabat. Nalipay gid ang mga Saksi ni Jehova nga buligan ka sa pagbinagbinag sini.
1. Ngaa kinahanglan sang katawhan ang isa lang ka gobierno?
Ang mga problema subong nagaapektar sa bilog nga kalibutan. Sa pila ka pungsod, ang kalabanan imol kag ginapigos. Sa iban naman, madamo ang manggaranon. Gani kinahanglan ang isa lang ka gobierno para mapartida sing husto ang manggad sang duta.—Basaha ang Manugwali 4:1; 8:9.
2. Sin-o ang masaligan nga maggahom sang isa lang ka gobierno?
Indi mabaton sang kalabanan nga isa lang ang maggahom sa bilog nga kalibutan kay wala man sing tawo nga makasarang sa paghimo sini. Wala sing tawo nga makapahamuot sa tanan. Isa pa, may posibilidad nga mangin korap ang isa nga ara na sa puesto. Makahaladlok pensaron nga gamhan ang kalibutan sang isa ka diktador.—Basaha ang Hulubaton 29:2; Jeremias 10:23.
Ginpili ni Jehova nga Dios ang iya Anak nga si Jesus nga maggahom sa katawhan sing wala katapusan. (Lucas 1:32, 33) Nakaistar si Jesus sa duta. Sang diri sia, gin-ayo niya ang mga masakiton, gintudluan ang mga mahagop, kag may tion sia sa mga bata. (Marcos 1:40-42; 6:34; 10:13-16) Gani, si Jesus amo ang nagakabagay nga Gumalahom.—Basaha ang Juan 1:14.
3. Posible bala nga isa lang ang gobierno sa kalibutan?
Gintangdo sang Dios ang iya Anak nga maggahom sa duta gikan sa langit. (Daniel 7:13, 14) Pareho sa isa ka gumalahom nga indi kinahanglan nga mangin presente sa kada siudad nga iya ginagamhan, indi man kinahanglan ni Jesus nga mangin presente sa duta para gamhan ang katawhan.—Basaha ang Mateo 8:5-9, 13.
Batunon bala sang tanan si Jesus bilang Gumalahom? Indi. Ang mga nagahigugma lamang sang maayo ang magabaton sa iya. Laglagon ni Jehova ang mga nagasikway sa mahigugmaon kag matarong nga Gumalahom nga gintangdo niya.—Basaha ang Mateo 25:31-33, 46.
4. Ano ang himuon sang Gumalahom sang kalibutan?
Pareho sang manugbantay nga nagatipon sang iya mga karnero, ginatipon na ni Jesus ang mga mapainubuson halin sa tanan nga pungsod kag ginatudluan sila sang mga dalanon sang Dios. (Juan 10:16; 13:34) Ina nga mga tawo handa magsakdag kay Jesus kag sa iya paggahom. (Salmo 72:8; Mateo 4:19, 20) Sa bilog nga kalibutan, ang matutom nga mga sakop ni Jesus nahiusa nga nagawali nga si Jesus Hari na.—Basaha ang Mateo 24:14.
Sa indi madugay, gamiton ni Jesus ang iya gahom para dulaon ang korap nga gobierno. Nagpili sia sang pila niya ka matutom nga sumulunod nga maggahom sa duta bilang mga hari upod sa iya sa langit. (Daniel 2:44; 7:27) Pun-on sang Ginharian ni Jesus ang duta sang ihibalo parte kay Jehova kag ipanumbalik ang paraiso nga nadula sadto.—Basaha ang Isaias 11:3, 9; Mateo 19:28.
Basi Manamian Ka Man
ANG LALANTAWAN
Ngaa Ginpadala sang Dios si Jesus sa Duta?
Hibalua kon ngaa nagkadto sa duta si Jesus kag kon paano kita makabenepisyo subong.
ANG LALANTAWAN
Mabuhi Ka Bala sing Wala Katapusan?
Si Jehova nga Dios, ang Tuburan sang kabuhi, sarang makahatag sing kabuhi nga wala katapusan sa iban kag nagpromisa sia nga himuon ini.
ANG LALANTAWAN
Ano ang Matabo sa Adlaw sang Paghukom?
May lainlain nga pagpati parte sa Adlaw sang Paghukom. Makahaladlok bala ini? Ano ang pahanabuon sini?
ANG LALANTAWAN
Sin-o si Jesucristo?
Ngaa napatay si Jesus? Ano ang ginahimo ni Jesus subong? Hibalua ang sabat sa sini kag sa iban pa nga pamangkot sa Biblia.
