Si Jehova Nagbukas sang Akon mga Mata

Panugiron ni Patrice Oyeka

Hapon na. Manugtapos naman ang isa ka adlaw sang kadulom. Bangod bulag ako, masinulub-on, kag bilog nga adlaw nga nagapamati lang sang radyo, nagdesisyon ako nga maghikog. Ginbutangan ko sing hilo ang isa ka tasa nga tubig kag ginbutang ini sa lamesa nga ara sa akon atubangan. Gusto ko maligo sa katapusan nga tion kag magsuksok sang manami nga bayo antes ko imnon ining hilo. Ngaa luyag ko maghikog? Kag ngaa buhi gihapon ako sa pagsugid sini nga sugilanon?

NATAWO ako sang Pebrero 2, 1958, sa probinsia sang Kasaï Oriental, sa Democratic Republic of the Congo. Napatay si Tatay sang nuebe anyos ako, kag ginsagod ako sang akon magulang nga lalaki.

Sang nakatapos ako eskwela, nakaobra ako sa plantasyon sang goma. Isa ka aga sang 1989, samtang nagahanda ako sang isa ka report sa akon opisina, hinali lang nga nagdulom ang akon panan-awan. Abi ko sang primero nagbrown-out lang, pero nagaandar man ang generator kag aga pa! Kinulbaan ako, narealisar ko nga indi na ako makakita, bisan gani sang akon ginasulat!

Gintawag ko dayon ang isa ko ka tinawo para dal-on ako sa infirmary. Pero ginsilingan ako sa infirmary nga magkadto sa mas eksperiensiado nga doktor sa siudad. Sang makita sang doktor nga nagisi ang akon kalimutaw kag delikado ang akon kahimtangan, ginpadala niya ako sa kapital nga siudad, ang Kinshasa.

Kabuhi sa Kinshasa

Sa Kinshasa, madamo nga espesyalista sa mata ang akon ginkadtuan, pero wala gid sila sing mahimo. Pagkatapos ma-admit sing 43 ka adlaw, ginsilingan ako sang doktor nga mangin bulag na ako asta san-o! Gindala ako sang mga miembro sang akon pamilya sa nagkalainlain nga relihion para milagruso nga mag-ayo, pero wala gid ako mag-ayo.

Sang ulihi, nadulaan na ako sing paglaum nga makakita. Nangin madulom ang akon kabuhi. Nadula ang akon panan-aw kag nadula man ang akon obra. Ginbayaan man ako sang akon asawa kag gindala niya ang tanan namon nga pagkabutang. Nahuya ako maggua ukon makig-istorya sa iban nga tawo. Ginapain ko ang akon kaugalingon kag nagapabukot lang sa balay. Daw ermitanyo ako kag sa pamatyag ko wala ako sing pulos.

Duha ka beses ako nga mahikog kuntani. Ang ikaduha nga tion amo ang ginsambit ko kaina. Ginluwas ako sang isa ka bata sa amon pamilya. Indi hungod nga ginkuha niya ang tasa kag gin-ula ini samtang nagapaligo ako. Maayo lang kay wala niya ini gin-inom. Pero naglalain ako kay ayawan ako pangapkap kon diin na ang tasa. Dayon ginsugid ko sa akon pamilya kon ngaa ginapangita ko ini kag kon ano ang tuyo ko nga himuon.

Nagapasalamat ako sa Dios kag sa akon pamilya kay ginabantayan nila ako. Wala nadayon ang plano ko nga maghikog.

 Nangin Malipayon Liwat

Isa ka Domingo sang 1992, nagapungko ako kag nagapanigarilyo sa amon balay sang ginpalapitan ako sang duha ka Saksi ni Jehova samtang nagapamalaybalay sila. Natalupangdan nila nga bulag ako, gani ginbasa nila sa akon ang Isaias 35:5: “Niyan ang mga mata sang mga bulag pamuklaton, kag ang mga idulungug sang mga bungul mabuksan.” Grabe ang akon kalipay sang nabatian ko ini! Lain ini sa nabatian ko sa mga simbahan nga ginkadtuan ko. Ang mga Saksi wala nagapang-ayo paagi sa milagro, kundi ginpaathag nila nga makakita ako liwat sa bag-o nga kalibutan nga ginpromisa sang Dios, kon kilalahon ko Sia. (Juan 17:3) Nagtuon ako dayon sa Biblia sa mga Saksi nga ginagamit ang libro nga Mahimu Ka Mabuhi Sing Dayon sa Paraiso sa Duta. Nagtambong man ako sa tanan nga pagtilipon sang mga Cristiano sa Kingdom Hall kag ginbag-o ko ang akon kabuhi. Nag-untat ako sa pagpanigarilyo.

Pero ginapunggan ako sang akon pagkabulag nga mag-uswag sa espirituwal. Gani nag-eskwela ako sang Braille para makahibalo ako magbasa kag magsulat. Amo nga nakapakigbahin ako sa paghanas nga ginahimo sa Kingdom Hall. Nagwali ako dayon sa akon mga kaingod. Nangin malipayon ako liwat. Nagpadayon ako sa pag-uswag kag gindedikar ko ang akon kabuhi kay Jehova. Ginbawtismuhan ako sang Mayo 7, 1994.

Samtang nagadugang ang akon gugma kay Jehova kag sa mga tawo, gusto ko dugangan ang akon tion sa pagwali. Gani sang Disiembre 1, 1995, nangin regular payunir ako, isa ka ministro nga nagahinguyang sing daku nga tion sa pagwali. Nakapribilehiyo man ako nga magdumala sa amon kongregasyon umpisa sang Pebrero 2004. Kon kaisa ginaimbitar ako nga magpamulongpulong parte sa Biblia sa iban nga kongregasyon sa amon lugar. Tanan ini nga pagpakamaayo nagpahalipay sa akon kag nagbulig sa akon nga apresyahon nga bisan may sablag kita, indi ini makapugong sa aton handum nga alagaron si Jehova nga Dios.

Ginhatagan Ako ni Jehova sing “Mata”

Ginsambit ko kaina nga ginbayaan ako sang akon asawa kay nabulag ako. Pero ginhatagan ako ni Jehova sing dugang pa nga pagpakamaayo. Ginhatagan niya ako sing pinasahi nga mata. Sia amo si Anny Mavambu, nga nagbaton sa akon bilang bana bisan bulag ako. Nagaupod sia pirme sa akon sa pagwali kay pareho kami nga nagahinguyang sing madamo nga tion sa sini nga buluhaton. Sia man ang nagabasa sang mga reperensia sa akon mga pamulongpulong para masulat ko ini sa Braille. Pinasahi gid sia nga pagpakamaayo sa akon. Nangin matuod sa akon ang ginsiling sang Hulubaton 19:14: “Ang balay kag ang manggad panublion gikan sa mga ginikanan, apang ang mahalongon nga asawa gikan sa GINOO.”

Ginpakamaayo man kami ni Jehova sing duha ka bata, isa ka lalaki kag isa ka babayi. Ginahandum ko gid nga makita sila sa Paraiso! Ang isa pa ka pagpakamaayo sa akon amo nga ang akon magulang, nga nagpaistar sa amon sa iya duta, nagbaton sang kamatuoran sa Biblia kag nagpabawtismo! Isa lang kami ka kongregasyon.

Bisan pa bulag ako, handum ko gid nga padayunon ang pag-alagad sa Dios kay tuman gid kadamo sang iya pagpakamaayo sa akon. (Malaquias 3:10) Nagapangamuyo ako adlaw-adlaw nga magkari ang iya Ginharian para madula na ang tanan nga pag-antos sa duta. Sugod sang nakilala ko si Jehova, makasiling gid ako: “Ang pagpakamaayo sang GINOO nagapamanggad, kag wala sia nagadugang sing kasubo sa sini.”—Hulubaton 10:22.

[Mga Retrato sa pahina 13]

Nagapamulongpulong parte sa Biblia; upod sa akon pamilya kag magulang