Nahibaluan Mo Bala?

Ano ang buot silingon ni Jesus sang nagsiling sia nga mag-upod sing duha ka kilometro?

▪ Sa iya bantog nga Sermon sa Bukid, si Jesus nagsiling: “Kon ang isa nga may awtoridad magpilit sa imo sa pag-alagad sing isa ka kilometro, updi sia sa duha ka kilometro.” (Mateo 5:41) Nahibaluan sang mga tagpalamati nga ang ginapatuhuyan ni Jesus amo ang obligado nga pag-alagad, nga ginapatuman sang awtoridad sa mga pumuluyo.

Sang unang siglo C.E., ginsakop sang mga Romano ang Israel. May awtoridad sila nga paobrahon ang mga tawo ukon mga sapat, ukon kontrolon ang bisan ano nga butang nga makapadasig sang ila hilikuton. Halimbawa, ginpilit sang Romano nga mga soldado si Simon nga taga-Cirene nga pas-anon ang usok sang pag-antos ni Jesus pakadto sa lugar nga ilansang sia. (Mateo 27:32) Ini nga pagpatuman mapintas kag ginkaugtan gid sang mga Judiyo.

Wala mahibaluan kon diin asta dapat magtuman ang mga pumuluyo. Pero kabudlay hunahunaon nga handa sila nga maghimo sing sobra pa sangsa ginapatuman sa ila. Gani sang ginsilingan ni Jesus ang iya mga tagpalamati nga mag-upod sing duha ka kilometro, ginapahangop niya nga tumanon nila sing kinabubut-on ang ginapatuman sang mga awtoridad kon indi ini supak sa kasuguan sang Dios.—Marcos 12:17.

Sin-o si Anas nga ginsambit sa mga Ebanghelyo?

▪ Sang ginbista si Jesus, ginsambit si Anas (Ananus) bilang “puno nga saserdote.” (Lucas 3:2; Juan 18:13; Binuhatan 4:6) Ang matuod, ugangan sia sang mataas nga saserdote sang Israel nga si Caifas, kag nag-alagad man sia bilang mataas nga saserdote sang mga 6 ukon 7 C.E. asta sang mga 15 C.E., sang ginpahalin sia sang opisyal sang Roma nga si Valerius Gratus. Bisan pa sini, si Anas, bilang mataas nga saserdote sang una, may daku gihapon nga impluwensia sa Israel. Ang lima niya ka anak nga lalaki kag isa ka umagad nangin mataas man nga saserdote.

Sang wala pa nasakop ang Israel, ang mataas nga saserdote nagapabilin sa iya posisyon tubtob buhi sia. (Numeros 35:25) Pero sang ginsakop na ini sang mga Romano, ang mataas nga saserdote kontrolado sang Romano nga mga gobernador kag sang mga hari nga gintangdo sang Roma, kag puede nila sia mapahalin. Ang historian nga si Flavius Josephus nagreport nga ginpahalin ni Quirinius, nga Romano nga gobernador sang Siria, si Joazar bilang mataas nga saserdote sang mga 6 ukon 7 C.E. kag ginbulos sa iya si Anas. Ginapakita sini nga halin sa mga saserdote mismo, nagapili ining pagano nga mga manuggahom sang bag-o nga mataas nga saserdote.

Ang pamilya ni Anas sakon kag manggaranon katama. Mahimo nga nagmanggaranon sila bangod sila ang nagakontrol sang mga baligya nga ginahalad sa templo, pareho sang mga pating, karnero, lana, kag alak. Suno kay Josephus, si Ananus (Ananias), nga anak ni Anas, may “mga tinawo nga puerte kadaya kag ginapuersa nila nga kuhaon ang mga ikapulo sang mga saserdote; kag ginasakit nila ang indi maghatag.”