KUMBINSIDO ka nga nagatudlo sing kamatuoran parte sa Dios ang imo relihion. Nagapati ka nga ginatudlo sang Biblia ang pinakamaayo nga pagkabuhi. Gani natural lang nga itudlo mo sa imo bata ang imo mga natun-an. (Deuteronomio 6:6, 7) Pero paano kon pagdaku niya, nadulaan na sia sing gana sa espirituwal nga mga butang? Paano kon duhaduhaan na niya ang pagtuluuhan nga nagustuhan niya sang bata pa sia?—Galacia 5:7.

Kon matabo ini, indi pagpensara nga may kakulangan ka bilang Cristiano nga ginikanan. Mahimo may iban pa nga rason. Pero tandai ini: Nagadepende sa imo pag-atubang sa sini nga problema kon bala batunon sang imo bata ang imo pagtuluuhan ukon indi. Kon akigan mo ang imo bata, daw pareho lang nga ginhangkat mo sia sing inaway nga labanlaban ikaw gid ang pierde.—Colosas 3:21.

Maayo nga sundon ang laygay ni apostol Pablo. “Ang ulipon sang Ginuo indi kinahanglan makig-away,” sulat niya, “kundi kinahanglan mangin malulo sa tanan, kalipikado sa pagpanudlo, nagapugong sang iya kaugalingon sa idalom sang malaut.” (2 Timoteo 2:24) Paano ka mangin “kalipikado sa pagpanudlo” kon duhaduhaan sang imo bata ang imo pagtuluuhan?

Una, hibalua ang mga rason kon ngaa amo sina ang pagtamod sang imo bata. Halimbawa:

• Nasubuan bala sia kay daw wala sia sing abyan sa Cristianong kongregasyon? “Gusto ko nga may mga abyan ako, gani nangin barkada ko ang pila ko ka schoolmate, kag tinuig nga wala ako nag-uswag sa espirituwal. Nadulaan  ako sing gana sa espirituwal nga mga butang bangod sa malain nga kaupdanan. Naghinulsol gid ako.”—Lenore, 19.

• Wala bala sia sing kompiansa, amo nga nabudlayan sia magsugid sang iya ginapatihan? “Sang nagaeskwela pa ako, nahuya ako nga isugid sa akon mga klasmeyt ang akon ginapatihan. Basi tawgon nila ako nga ‘weird’ ukon ‘pastor.’ Kon lain ka sa iban indi ka nila pagbatunon, kag indi ko gusto nga matabo ina sa akon.”—Ramón, 23.

• Nabudlayan bala sia nga sundon ang Cristiano nga mga prinsipio? “Para sa akon, ang promisa sang Biblia nga kabuhi nga wala sing katapusan daw ara sa ibabaw sang mataas nga hagdanan, kag wala pa gani ako makaumpisa saka. Nahadlok ako magsaka sa hagdanan, gani biyaan ko na lang ang akon relihion.”—Renee, 16.

Paano mo mahibaluan ang problema sang imo bata? Ang pinakamaayo nga paagi amo nga pamangkuton sia. Pero maghalong nga indi kamo magbaisay. Sunda ang laygay sang Santiago 1:19: “Mangin maabtik sa pagpamati, mahinay sa paghambal, mahinay sa pagpangakig.” Dapat nga ‘mapinasensiahon’ ka kag ‘malantipon sa pagpanudlo,’ pareho sa ginahimo mo sa indi mo kapamilya.—2 Timoteo 4:2.

Halimbawa, kon indi na magtambong ang imo bata sa Cristiano nga pagtilipon, hibalua kon ngaa. Pero mangin mapinasensiahon. Sa masunod nga eksena, wala nalab-ot sang ginikanan ang tagipusuon sang iya bata.

Bata: Indi na ’ko magtambong Tay.

Tatay: [akig] Ngaa indi ka na magtambong?

Bata: Natak-an na ’ko!

Tatay: Ano, natak-an ka na sa Dios? Indi gid ina maayo! Samtang ara ka pa sa poder namon, matambong ka sa gusto mo kag sa indi!

Ginapatuman sang Dios nga tudluan sang mga ginikanan ang ila kabataan parte sa Iya kag tumanon sang kabataan ang ila ginikanan. (Efeso 6:1) Pero, indi mo man gusto nga magsunodsunod lang sa imo ang imo bata kag mapilitan nga magtambong sa Cristiano nga pagtilipon. Gusto mo nga himuon niya ini sing tinagipusuon.

Mahimo mo ini kon nahibaluan mo ang rason kon ngaa nagaamo sina ang imo bata. Balikan naton ang eksena kaina kag tan-awon naton kon paano kuntani gin-istorya sang amay ang iya bata.

Bata: Indi na ’ko magtambong Tay.

Tatay: [kalmado] Ngaa haw?

Bata: Natak-an na ’ko!

Tatay: Makatalaka gid man magpungko sing duha ka oras. Pero ano gid bala ang natak-an mo?

Bata: Ambot a. Basta indi lang ko magtambong.

Tatay: Amo man bala sina ang gusto sang mga amigo mo?

Bata: Daw ina gani ang problema ko Tay. Wala na ako amigo. Halin sang nagsaylo ang akon best friend, wala na ako sing maistorya! Ang tanan malipayon. Ako ’ya indi!

Bangod gintinguhaan sang amay nga pasugiron ang iya bata sang ginabatyag sini, nahibaluan niya kon ano gid ang problema —ang pagbatyag nga nagaisahanon. Nakuha man niya ang pagsalig sang iya bata, gani nagpadayon ang ila pag-istoryahanay.—Basaha ang kahon nga  “Mangin Mapinasensiahon!”

Natun-an sang madamo nga pamatan-on nga kon atubangon nila ang mga problema nga magaupang sa ila espirituwal nga pag-uswag, nagabakod ang ila kompiansa kag pagtuo. Binagbinaga liwat si Ramón, ang pamatan-on nga nahuya magpakilala nga Cristiano sa ila eskwelahan. Sang ulihi, napamatud-an ni Ramón nga maayo man gali kon isugid niya ang iya ginapatihan, bisan pakalainon pa sia. Nagsiling sia:

“Isa ka bes sa amon eskwelahan, ginkadlawan ako sang isa ka pamatan-on bangod sa akon relihion. Ginkulbaan gid ako kay nagapamati ang bilog nga klase. Pero mas ginkulbaan pa sia sangsa akon sang ginpamangkot ko sia parte sa iya ginapatihan. Didto ko narealisar nga madamo nga pamatan-on ang naligban sa ila pagtuluuhan. Nalipay ako kay mapaathag ko ang akon ginapatihan. Gani kon relihion ang istoryahan, ang mga klasmeyt ko dapat ang mahuya, indi ako!”

Natun-an sang mga ginikanan kag mga eksperto nga indi pareho ang panghunahuna sang gamay nga mga bata kag sang mga pamatan-on. (1 Corinto 13:11) Kinaandan nga mas madalom mamensar ang mga pamatan-on sangsa mga bata. Halimbawa, mahapos itudlo sa mga bata nga gintuga sang Dios ang tanan nga butang. (Genesis 1:1) Pero ang mga pamatan-on mahimo mamangkot pa: ‘Paano ko mahibaluan nga may Dios? Ngaa gintugutan sang mahigugmaon nga Dios ang kalainan? Ano ang pamatuod nga madugay na nga nagaluntad ang Dios?’—Salmo 90:2.

Bangod sini nga mga pamangkot, mahimo mamensar ka nga nagaluya ang pagtuo sang imo bata. Pero mahimo man nga tanda ini sang iya pag-uswag. Kay man, ang pagpamangkot  importante para magbakod ang pagtuo sang isa ka Cristiano.—Binuhatan 17:2, 3.

Dugang pa, matun-an sang imo bata nga gamiton ang iya “ikasarang sa pagpangatarungan.” (Roma 12:1, 2) Gani maintiendihan niya “ang kasangkaron kag kalabaon kag kataason kag kadalumon” sang Cristianong pagtuo nga wala niya mahimo sang bata pa sia. (Efeso 3:18) Labaw sa tanan, ini na ang tion nga buligan mo ang imo bata sa pag-usisa sa iya mga natun-an para magbakod ang iya pagtuo.—Hulubaton 14:15; Binuhatan 17:11.

Ginsambit sa Biblia ang pamatan-on nga si Timoteo nga “kutob sa pagkalapsag” nakahibalo sang balaan nga mga sinulatan. Pero, ginsilingan ni Pablo si Timoteo: “Magpadayon ka sa mga butang nga imo natun-an kag nabuyok ka nga patihan.” (2 Timoteo 3:14, 15) Pareho kay Timoteo, mahimo natudluan ang imo bata sang mga prinsipio sa Biblia halin sang gamay sia. Pero subong, kinahanglan mo sia buyukon ukon kumbinsihon para makatigayon sia sing kaugalingon nga panindugan.

Ang libro nga Questions Young People Ask—Answers That Work, Volume 1, nagsiling: “Samtang ara sa imo poder ang imo bata, may kinamatarong ka nga ipatuman sa iya ang espirituwal nga rutina sang inyo pamilya. Pero ang imo tulumuron amo nga maapresyar sang imo bata ang gugma sa Dios, kag indi nga magsunodsunod lang sa imo.” Kon himuon mo ini, mabuligan mo ang imo bata nga ‘maglig-on sa pagtuo,’ kag ini ang mangin dalanon sang iya pagkabuhi—pareho mo. *—1 Pedro 5:9.