Abraham—Tawo nga Mahigugmaon

Nasubuan gid si Abraham kay napatay ang iya pinalangga nga asawa nga si Sara. Madamo sia sing nadumduman samtang nagapaalam sia sa iya asawa. Indi na niya mapunggan ang iya nabatyagan, gani naghibi sia. (Genesis 23:1, 2) Ang iya mga luha wala nagapakita nga maluya sia, kundi pamatuod ini sang isa pa niya ka maayo nga kinaiya—ang gugma.

ANO ANG GUGMA? Ang gugma amo ang pagbatyag sang suod nga kaangtanan ukon pagpalangga. Ginapakita sang mahigugmaon nga tawo ang iya nabatyagan sa iya mga ginahigugma, bisan pa kinahanglan sia magsakripisyo.

PAANO SI ABRAHAM NAGPAKITA SING GUGMA? Ginhigugma ni Abraham ang iya pamilya. Bisan pa masako sia, wala niya ginpabay-an ang emosyonal ukon espirituwal nga kinahanglanon sang iya pamilya. Nahibaluan ni Jehova nga ginadumalahan ni Abraham ang iya pamilya sa pagsimba. (Genesis 18:19) Luwas sini, ginsambit mismo ni Jehova ang gugma ni Abraham. Sang nakighambal Sia kay Abraham, ginpatuhuyan Niya si Isaac bilang ‘anak nga ginahigugma’ ni Abraham.—Genesis 22:2.

Makita man naton ang gugma ni Abraham sa iya reaksion sang napatay ang iya pinalangga nga asawa. Ginhibian niya si Sara. Maisog sia nga tawo, pero wala sia nahuya nga ipakita ang iya kasubo. Ginapakita sini nga bisan pa maisog si Abraham, mapinalanggaon sia.

 Ginhigugma ni Abraham ang Dios. Ginpakita niya ini sa bilog niya nga kabuhi. Paano? Mahimo nadumduman naton ang ginasiling sang Biblia sa 1 Juan 5:3: “Amo ini ang kahulugan sang gugma sa Dios, nga tumanon naton ang iya mga sugo.” Gani, maayo gid nga halimbawa si Abraham sa pagpakita sang gugma sa Dios.

Ginatuman dayon ni Abraham ang mga sugo ni Jehova. (Genesis 12:4; 17:22, 23; 21:12-14; 22:1-3) Wala na niya ginapamensar kon bala mahapos ukon mabudlay ang sugo, ukon ginapalibugan pa kon ngaa ginapatuman ini ni Jehova sa iya. Kon may ipahimo ang Dios sa iya, handa sia sa pagtuman. Para kay Abraham, mapakita niya ang iya gugma kay Jehova paagi sa pagtuman sang mga sugo.

ANO ANG MATUN-AN NATON? Mailog naton si Abraham kon palanggaon man naton ang iban, ilabi na ang aton pamilya. Indi naton pagtugutan ang kasakuon nga mag-ubos sang aton panahon para sa aton mga hinigugma.

Dapat man naton higugmaon si Jehova. Ina nga gugma may daku nga epekto sa aton kabuhi. Halimbawa, makapabag-o ini sang aton batasan, panghambal, kag paggawi para mapahalipay ang Dios.—1 Pedro 1:14-16.

Ang pagtuman sa mga sugo ni Jehova indi pirme mahapos. Pero makasalig kita nga ang Isa nga nagbulig kay Abraham kag nagtawag sa iya nga “akon abyan” magabulig man sa aton. (Isaias 41:8) Ang iya Pulong, ang Biblia, nagapromisa: “Palig-unon niya kamo, pabakuron niya kamo.” (1 Pedro 5:10) Makalilipay gid ini nga promisa halin sa sining masaligan nga Abyan ni Abraham!

[Kahon sa pahina 11]

Indi Bala Bagay sa Lalaki nga Maghibi?

Mahimo madamo ang nagaugyon sa sini. Pero basi makibot sila kon mahibaluan nila sa Biblia nga si Abraham isa sa maisog kag matutom nga mga lalaki nga naghibi sang ginsubuan. Ang iban amo sanday Jose, David, apostol Pedro, mga gulang sa kongregasyon sang Efeso, kag bisan gani si Jesus. (Genesis 50:1; 2 Samuel 18:33; Lucas 22:61, 62; Juan 11:35; Binuhatan 20:36-38) Ginapakita sini nga wala ginatudlo sang Biblia nga indi bagay sa lalaki nga maghibi.