Ngaa Daw Wala sing Katuyuan ang Kabuhi?

NGAA dapat ka magpati nga ang kabuhi indi lamang “malip-ot kag wala sing pulos” diin nagalipas kita “pareho sa landong,” subong sang ginsiling ni Hari Solomon? (Manugwali 6:12, Ang Pulong sang Dios, APD) Ang Biblia—nga isa ka masaligan nga ginahalinan sang impormasyon—nagapromisa nga may katuyuan gid ang kabuhi sa palaabuton.—2 Timoteo 3:16, 17.

Ginasugid sang Biblia ang katuyuan sang Dios sa duta. Ginapaathag man sini kon ngaa grabe gid ang inhustisya, pagpamigos, kag pag-antos. Ngaa dapat naton ini mahibaluan? Bangod ang panguna nga rason kon ngaa nagabatyag ang mga tawo nga wala sing katuyuan ang kabuhi amo nga wala nila mahibaluan, ukon ginabalewala pa gani, ang katuyuan sang Dios sa duta kag sa katawhan.

Ano ang Katuyuan sang Dios sa Duta?

Ginhimo ni Jehova nga Dios * ang duta nga mangin paraiso nga puluy-an para sa katawhan, diin ang mga  tawo magakabuhi sing malipayon kag wala sing katapusan. Ining importante nga kamatuoran lain gid sa pagpati sang kalabanan nga ang duta isa ka lugar nga ginatilawan ang mga tawo kon bala nagakabagay sila nga magkabuhi sa langit. Ini nga pagpati wala ginatudlo sang Biblia.—Basaha ang kahon nga  “Dapat Bala Kita Magbiya sa Duta Para May Katuyuan ang Aton Kabuhi?” sa pahina 6.

Gintuga sang Dios ang mga tawo sa Iya larawan kag ginhatagan sila sing ikasarang nga mailog ang Iya maayo nga mga kinaiya. (Genesis 1:26, 27) Gintuga niya sila nga perpekto. Ginhatag sa ila ang tanan nila nga kinahanglanon para mangin mabungahon kag may katuyuan ang ila kabuhi asta san-o. Gani, dapat nila pun-on ang bilog nga duta, dumalahan ini, kag himuon nga paraiso pareho sang hardin sang Eden.—Genesis 1:28-31; 2:8, 9.

Ano ang Natabo?

Natabo ang daku nga sala. Wala gin-ilog sang halos tanan nga tawo ang mga kinaiya sang Dios. Indi na paraiso ang duta. Ngaa? Gin-abusuhan sang aton una nga mga ginikanan, sanday Adan kag Eva, ang ila kahilwayan sa pagpili. Gusto nila nga “manginkaangay sang Dios,” kag sila ang nagdesisyon kon ano ang “maayo kag malaut.” Gani, nagrebelde sila pareho kay Satanas nga Yawa.—Genesis 3:1-6.

Indi katuyuan sang Dios nga magluntad ang kalautan. Nagluntad lamang ini sang si Satanas, kag sang ulihi sanday Adan kag Eva, nagrebelde sa paggahom sang Dios. Gani, nadula sang aton una nga mga ginikanan ang Paraiso kag indi na sila perpekto, nga nagresulta sing sala kag kamatayon indi lamang sa ila kundi sa tanan nila nga kaanakan. (Genesis 3:17-19; Roma 5:12) Amo ini ang rason kon ngaa daw wala sing katuyuan ang kabuhi subong.

Ngaa Wala Dayon Gindula ang Kalautan?

Ang iban namangkot, ‘Ngaa wala dayon gindula sang Dios ang kalautan? Ngaa wala na lang ginlaglag si Satanas kag ang iban pa nga rebelde kag mag-umpisa liwat?’ Amo bala sini dapat ang ginhimo sang Dios? Ano ang imo reaksion kon mabalitaan mo nga ginpatay dayon sang isa ka gamhanan nga gobierno ang mga nagrebelde sa awtoridad? Malipay ayhan sa sini ang makatarunganon nga mga tawo? Manamian ka bala sa sini nga gobierno?

Nagdesisyon ang Dios nga indi anay paglaglagon ang mga rebelde. Ginpaligad niya ang tion para masolbar sing bug-os ang mga isyu nga nag-utwas sa Eden parte sa iya paggahom.

Pagdula sang Tanan nga Kalautan

Dapat naton dumdumon nga ginatugutan sang Dios ang kalautan sa limitado lamang nga tion. Kon masolbar na ang importante nga mga isyu parte sa iya paggahom, masarangan niya dulaon sing bug-os ang malain nga mga resulta sang kalautan.

Wala ginkalimtan sang Dios ang iya katuyuan sa duta kag sa katawhan. Paagi kay propeta Isaias, ginapasalig kita ni Jehova nga Sia ang naghimo sang duta, nga ‘wala magtuga sini nga walay pulus, nga naghuman sini nga pagpuy-an.’ (Isaias 45:18) Sa indi madugay, himuon niya ang iya orihinal nga katuyuan  sa duta. Sa tapos mapamatud-an nga matarong ang iya paggahom, may kinamatarong sia nga gamiton ang iya gahom para himuon ang iya kabubut-on kag dulaon ang tanan nga kalautan. (Isaias 55:10, 11) Ginlakip ini ni Jesus sa modelo nga pangamuyo nga gintudlo niya sa aton: “Matuman ang imo kabubut-on sa duta, subong sang sa langit.” (Mateo 6:9, 10) Ano ang nalakip sa kabubut-on sang Dios?

Ang Kabubut-on sang Dios sa Duta

“Ang mapainubuson magapanubli sang duta.” (Salmo 37:9-11, 29; Hulubaton 2:21, 22) “Luwason [ni Jesucristo] ang imol nga nagapangayo sing bulig” kag “ang napiutan man.” Luwason niya sila sa “mga nagapamigos kag sa mga nagapamintas.” (Salmo 72:12-14, NW) Wala na sing inaway, kamatayon, paghibi, kasakit, ukon pag-antos. (Salmo 46:9; Bugna 21:1-4) Ang madamo nga napatay sang  ginatugutan pa sang Dios ang kalautan pagabanhawon para magkabuhi diri sa duta, kag matigayon nila ini kag ang iban pa nga pagpakamaayo.—Juan 5:28, 29.

Dulaon ni Jehova ang halit nga resulta sang pagrebelde ni Satanas. Himuon niya ini sing bug-os amo nga ‘ang una nga mga kalisdanan [ang tanan nga nagahatag sing kasubo kag kasakit subong] malipatan.’ (Isaias 65:16-19) Masaligan gid ini. Wala nagabutig ang Dios. Matuman ang tanan niya nga promisa. Ang kabuhi indi na mangin “wala sing kapuslanan kag paglagas sa hangin.” (Eclesiastes 2:17, BKK) Sa baylo, may katuyuan na ini.

Pero kamusta subong? Ang paghibalo bala sa ginatudlo sang Biblia kag sa katuyuan sang Dios sa duta makahatag sing katuyuan sa imo kabuhi? Binagbinagon ini sang masunod nga artikulo.

[Nota]

[Kahon sa pahina 6]

 Dapat Bala Kita Magbiya sa Duta Para May Katuyuan ang Aton Kabuhi?

Madugay na nga ginatudlo sang mga tawo nga wala sing ihibalo sa katuyuan sang Dios sa duta nga dapat kita magbiya sa duta para may katuyuan gid ang aton kabuhi.

Suno sa iban, ang kalag “nagluntad na sa mas mataas nga kahimtangan antes ini magsulod sa lawas sang tawo.” (New Dictionary of Theology) Suno naman sa iban, ang kalag “ginpriso sa lawas sang tawo bilang silot sa mga sala nga ginhimo sini sa langit.”—Cyclopedia of Biblical, Theological, and Ecclesiastical Literature.

Gintudlo sang Griego nga mga pilosopo, pareho nanday Socrates kag Plato, ini nga ideya: Kon makagua na ang kalag sa lawas sang tawo “mahilway na ini sa pagdalangdalang kag kabuangan kag kahadlok, sa indi makontrol nga handum sini kag sa iban pa nga halit sa katawhan” kag magapuyo ini “upod sa mga dios asta san-o.”—Plato’s Phaedo, 81, A.

Sang ulihi, ginlakip sang nagapangangkon nga Cristiano nga mga lider sa ila mga panudlo ang “mga pagpati [sang Griego nga mga pilosopo] parte sa kalag nga wala nagakapatay.”—Christianity—A Global History.

Binagbinaga kon bala ini nga mga ideya nagaugyon sa tatlo ka kamatuoran nga ginasiling sang Biblia:

1. Katuyuan sang Dios nga ang duta mangin permanente nga puluy-an sang mga tawo, kag indi isa ka lugar para tilawan kon sin-o ang puede mag-istar upod sa iya sa langit. Kon gintuman nanday Adan kag Eva ang mga kasuguan sang Dios, magakabuhi sila gihapon sa paraiso nga duta.—Genesis 1:27, 28; Salmo 115:16.

2. Ginatudlo sang kalabanan nga relihion nga ang tawo may kalag, ang indi makita nga butang nga nagapuyo sa lawas. Pero maathag ang ginatudlo sang Biblia nga ang tawo amo ang ‘buhi nga kalag’ nga ginhimo gikan sa “yab-ok sang duta.” (Genesis 2:7) Wala ginasugid sini nga ang kalag indi mapatay, kundi mahimo patyon ukon laglagon. (Salmo 146:4; Manugwali 9:5, 10; Ezequiel 18:4, 20) Ang una nga kalag nga si Adan napatay kag nagbalik sa yab-ok nga iya ginhalinan. Wala na sia nagluntad.—Genesis 2:17; 3:19.

3. Ang paglaum sang tawo sa palaabuton wala nagadepende sa pagtigayon sing kalag nga indi mapatay nga nagakadto sa lugar sang mga espiritu, kundi sa promisa sang Dios nga pagkabanhaw para magkabuhi sa paraiso nga duta.—Juan 5:28, 29; 11:24-26; Binuhatan 24:15.