May Katuyuan Gid Bala ang Kabuhi?
May Katuyuan Gid Bala ang Kabuhi?
“MAY katuyuan bala ang kabuhi?” Madamo nga tawo ang nagapamangkot sini. Makapasubo nga bisan lainlain ang ila pagtamod sa kabuhi, nabatyagan nila ang ginsiling sang neurologist nga taga-Austria nga si Viktor E. Frankl nga ang kabuhi “wala sing katuyuan kag wala sing pulos.”
Ngaa amo sina ang ila ginabatyag? Kada adlaw, minilyon ka tawo sa bilog nga kalibutan ang nagaatubang sang mabudlay kag makaluluoy nga mga kahimtangan pareho sang kaimulon, balatian, krimen, kag pagpigos. Ang ila kabuhi “puno sang kagamo,” pareho sang ginsiling ni Job parte sa pag-antos sang tawo. (Job 14:1) Ang importante lamang sa ila amo nga makatibawas sila kada adlaw.
Minilyon man ang may masulhay nga kabuhi. Daw ara na sa ila ang tanan. Pero, madamo sa ila ang indi gihapon malipayon. Ngaa? Bangod naeksperiensiahan nila ang ‘kabudlayan kag kasubo.’ Halimbawa, naguba ang ila mga handum bangod sang wala ginapaabot nga problema sa pinansial ukon mga trahedya pareho sang pagkapatay sang ila bata.—Salmo 90:10.
May isa pa ka rason kon ngaa daw “wala sing katuyuan kag wala sing pulos” ang kabuhi. Ano ina? Ang tuman kalip-ot nga kabuhi. Para sa madamo, indi gid makatarunganon nga malip-ot lang ang kabuhi sang tawo nga makahimo sing madamo nga butang sa iya kabuhi. Indi nila mabaton ang masakit nga kamatuoran nga bisan pa malikawan naton ang mga trahedya, mapatay kita gihapon sa ulihi.—Manugwali 3:19, 20.
Wala Gid Bala sing Katuyuan ang Kabuhi?
Nahibaluan gid ni Hari Solomon sa Israel sang una ang kabuhi sang tawo. Nakita niya kon paano nagapangabudlay ang mga tawo nga nagagamit sang ila ikasarang kag abilidad sa pagtanom, pagkultibar, pagpatindog, kag pag-atipan sa ila pamilya, pareho sang ginahimo naton subong. Daw namangkot sia, ‘Para sa ano ini tanan?’ Suno sa iya, ang tanan nga ginahimo sang tawo, “wala sing kapuslanan kag paglagas sa hangin.”—Eclesiastes 2:17, Biblia sang Katilingban sang mga Kristiano, BKK.
Nagapati bala si Hari Solomon nga ang tanan nga ginahimo sang tawo pirme lang “wala sing kapuslanan kag paglagas sa hangin”? Wala. Ginpabutyag lang niya ang matabo sa kabuhi sang tawo sa sining indi perpekto nga kalibutan. Pero, ginapasalig kita sang Biblia nga indi amo sini pirme ang kabuhi!
Ngaa? Ang masunod nga duha ka artikulo makabulig sa imo nga maintiendihan kon ngaa daw wala sing katuyuan ang kabuhi, kon paano ini masolusyunan, kag kon ano ang himuon mo para mahatagan sing katuyuan ang imo kabuhi bisan subong.
