5. Paglaglag sang Duta

‘Ang Dios magalaglag sa mga nagalaglag sang duta.’—BUGNA 11:18.

● Si Mr. Pirri nagapananggot sa Kpor, Nigeria. Ginhalitan sang grabe nga oil spill sa Niger Delta ang iya palangabuhian. “Nagkalamatay ang mga isda, nahalitan ang amon panit, kag nahigkuan ang mga sapa,” siling niya. “Wala na ako sing palangitan-an.”

ANO ANG GINAPAKITA SANG MGA REPORT? Suno sa pila ka eksperto, 6.5 milyones ka tonelada nga basura ang nagakadto sa dagat kada tuig. Ginabulubanta nga 50 porsiento sini nga mga basura ang mga plastik nga ginatos pa ka tuig antes madunot. Madasig man nga ginaubos sang mga tawo ang manggad sang duta. Ginapakita sang mga pagtuon nga isa pa ka tuig kag lima ka bulan ang kinahanglan para makapasag-uli ang duta sa isa ka tuig nga nakonsumo sang mga tawo. “Kon padayon nga nagadamo ang tawo kag nagadaku ang konsumo, kinahanglan naton ang duha ka Duta sa 2035,” report sang pamantalaan sa Australia nga Sydney Morning Herald.

ANO ANG PILA KA PAGPATI? Maalam ang mga tawo. Masarangan naton ini nga mga problema kag masalbar ang duta.

HUSTO BALA INA NGA PAGPATI? Madamo nga tawo kag mga grupo ang naglansar sing mga programa para atipanon ang palibot. Pero labi pa nga naglala ang polusyon sa duta.

ANO SA BANTA MO? Dapat na bala magpasilabot ang Dios para masalbar ang aton planeta suno sa iya ginpromisa?

Luwas sining lima ka tagna, nagtagna man ang Biblia sing maayo nga mga butang nga matabo sa katapusan nga mga adlaw. Binagbinaga ang ikan-om nga tagna.

[Blurb sa pahina 8]

“Imbes nga paraiso, makahililo nga basura ang ara sa palibot ko.”—ERIN TAMBER, PUMULUYO SANG GULF COAST, ESTADOS UNIDOS, PARTE SA EPEKTO SANG OIL SPILL SA GULF OF MEXICO SANG 2010.

[Kahon sa pahina 8]

Ang Dios Bala ang Balasulon?

Ang Dios bala ang balasulon sa malain nga mga butang nga gintagna sang Biblia? Ginapaantos niya bala kita? Makita mo ang sabat sa sini nga mga pamangkot sa kapitulo 11 sang libro nga Ano Gid ang Ginatudlo Sang Biblia? nga ginhimo sang mga Saksi ni Jehova.

[Picture Credit Line sa pahina 8]

U.S. Coast Guard photo