“Makita Sia Nimo”
Mangin Suod sa Dios
“Makita Sia Nimo”
KILALA mo bala ang Dios? Indi ini mahapos sabton. Para makilala gid naton ang Dios, dapat kabalo kita sang iya kabubut-on kag mga ginapatuman. Kon himuon naton ini, magasuod kita sa iya kag daku ang epekto sini sa aton kabuhi. Pero, posible gid bala nga mangin suod kita sa Dios? Paano? Ang sabat ara sa laygay ni Hari David sa iya anak nga si Solomon, nga mabasa sa 1 Cronica 28:9.
Naghari si David sa Israel sing halos 40 ka tuig, kag nag-uswag ang pungsod sa iya paggahom. Ang magabulos sa iya nga si Solomon bata pa katama. (1 Cronica 29:1) Ano ang ginlaygay ni David sa iya anak sang dali na lang sia mapatay?
Base sa mga naeksperiensiahan ni David sa pag-alagad sa Dios, nagsiling sia: “Salomon (Solomon) nga anak ko, kilalahon mo ang Dios sang imo amay.” Indi lang pagkilala sa Dios ang buot silingon ni David, kay si Solomon nagasimba na sa Dios ni David nga si Jehova. Mga 30 porsiento na sang Hebreo nga Kasulatan ang kompleto sadto, kag sigurado nga nabasa na ni Solomon ang ginasiling sining sagrado nga sinulatan parte sa Dios. Suno sa isa ka iskolar, ang Hebreo nga tinaga nga “kilalahon” nagakahulugan man sing “pinakasuod nga kilala.” Gusto ni David nga tinguhaan man sang iya bata nga mangin suod sa Dios, pareho sa iya ginhimo.
Ining suod nga relasyon magaimpluwensia sa pagtamod kag pagkabuhi ni Solomon. Ginsilingan ni David ang iya bata: ‘Alagda ang Dios sa himpit nga tagiposoon kag sa handa nga hunahuna.’ Talupangda nga ginsilingan sia nga alagdon ang Dios pagkatapos sang sugo nga kilalahon ini. Kon kilala na naton ang Dios, mapahulag man kita nga alagaron sia. Pero ang aton pag-alagad dapat wala nagapangduhaduha ukon pakitakita lamang. (Salmo 12:2; 119:113) Ginsugo ni David ang iya bata nga alagaron ang Dios sing kinabubut-on kag bug-os tagipusuon.
Ngaa ginsugo ni David ang iya anak nga dapat husto ang iya motibo kag panghunahuna kon mag-alagad sia sa Dios? Si David nagsiling: “Kay ang GINOO nagausisa sang tanan nga tagiposoon, kag nagahangup sang tanan nga painoino sang mga hunahuna.” Indi dapat pag-alagdon ni Solomon ang Dios para lang malipay si David. Gusto sang Dios nga alagaron sia sing kinabubut-on.
Sundon bala ni Solomon ang iya amay kag makigsuod man kay Jehova nga Dios? Depende ini kay Solomon. Ginsilingan ni David ang iya anak: “Kon pangitaon mo sia, makita sia nimo; apang kon bayaan mo sia, isikway ka niya sing dayon.” Para mangin sumilimba sia nga suod sa Dios, dapat tinguhaan gid ni Solomon nga makilala sing maayo si Jehova. *
Ang laygay ni David sa iya anak nagapasalig sa aton nga gusto ni Jehova nga magsuod kita sa iya. Pero para mahimo ini, dapat naton ‘sia pangitaon.’ Para makilala naton sia sing maayo, tun-an naton ang Biblia. Kon makilala na naton sia, alagaron naton sia sing bug-os tagipusuon kag kinabubut-on. Amo ini ang gusto ni Jehova kag dapat lang nga himuon sang mga nagasimba sa iya.—Mateo 22:37.
[Nota]
^ par. 6 Makapasubo nga bisan nag-alagad si Solomon sing bug-os tagipusuon sang primero, nagbiya sia sa Dios sang ulihi.—1 Hari 11:4.
