Mangin Suod sa Dios

“Matutom Ka sa mga Matutom sa Imo”

2 SAMUEL 22:26, APD.

MASAKIT gid kon paslawon ukon traiduran kita sang aton ginasaligan. Pirme ini nagakatabo sa sining indi masaligan nga kalibutan. (2 Timoteo 3:1-5) May masaligan bala kita nga mangin matutom gid sa aton? Binagbinagon naton ang ginsiling ni Hari David sang dumaan nga Israel.

Sa iya panahon, naeksperiensiahan ni David ang masakit nga pagtraidor sa iya. Napilitan sia nga mangin pugante kag ginhingabot sang mahisaon nga si Saul, ang una nga hari sa Israel. Bisan ang iya asawa nga si Mical ‘nagtamay sa iya sa iya tagiposoon,’ imbes nga mangin matutom sa iya. (2 Samuel 6:16) Ang iya salaligan nga manuglaygay nga si Ahitofel nagtraidor sa iya kag nagbuylog sa isa ka rebelyon batok sa iya. Kag sin-o ang lider sa sini nga rebelyon? Wala sing iban kundi ang iya anak nga si Absalom! Bangod sining sulitsulit nga pagtraidor sa iya, wala na bala sing may ginsaligan si David kag magsiling nga wala gid sing bisan isa nga mangin matutom?

Mahibaluan naton ang sabat sini sa ginsiling ni David sa 2 Samuel 22:26. Si David may mabakod nga pagtuo, gani nag-amba sia para kay Jehova nga Dios: “Matutom ka sa mga matutom sa imo.” Nagasalig gid si David nga bisan paslawon sia sang bisan sin-o nga tawo, matutom gihapon si Jehova sa iya.

Binagbinagon naton sing maayo ang ginsiling ni David. Ang Hebreo nga tinaga nga “matutom” mahimo man ihambal nga “buhat sang mahigugmaon nga kaayo.” Ang matuod nga katutom nabase sa gugma. Mahigugmaon nga nagapakigsuod si Jehova sa mga matutom sa iya. *

Talupangda man nga ang katutom indi lang isa ka balatyagon kundi nagadalahig ini sing buhat. Ginpakita ni Jehova ang iya katutom paagi sa mga buhat, subong sang naeksperiensiahan ni David. Sa tion sang mabudlay nga mga kahimtangan ni David, naghulag si Jehova sa pagbulig sa iya, matutom nga nag-amlig kag naggiya sa sining matutom nga hari. Ginpasalamatan ni David si Jehova sa pagluwas sa iya “gikan sa kamut sang tanan niya nga kaaway.”—2 Samuel 22:1.

Ano ang kapuslanan sa aton sang ginsiling ni David? Si Jehova wala nagabag-o. (Santiago 1:17) Matutom gihapon sia sa iya mga pagsulundan kag nagatuman sa iya saad. Sa iban nga salmo, si David nagsulat: ‘Ang GINOO wala nagapabaya sa mga matutom sa iya.’—Salmo 37:28, APD.

Ginapabaloran ni Jehova ang aton katutom, kag ang aton pagkamatinumanon sa iya. Gani, ginapalig-on niya kita nga ilugon sia sa pagpakita sing katutom sa iban. (Efeso 4:24; 5:1) Kon magpakita kita sing katutom, masaligan naton nga indi niya kita pagbiyaan. Bisan paslawon pa kita sang iban, makasalig kita nga mangin matutom si Jehova sa aton, nga magabulig sa aton para malandas ang mga pagtilaw. Gusto mo bala mangin suod kay Jehova, “ang Isa nga mainunungon” ukon matutom?—Bugna 16:5.

[Nota]