Paano Mo Maintiendihan ang Biblia?

2. Magbasa nga May Bukas nga Hunahuna

May ginpakalain bala sa imo ang imo abyan nga isa ka tawo nga wala mo pa makilala? Sang nakilala mo na ina nga tawo, naapektuhan bala ang imo pagtan-aw sa iya maayo nga mga kinaiya bangod sa malain nga komento sang imo abyan? Amo man sini ang mahimo matabo sa Biblia.

NAGPAANDAM si apostol Pablo sa mahimo matabo kon indi naton pagbasahon ang Biblia nga may bukas nga hunahuna. Nagsiling si Pablo parte sa mga Judiyo sang iya tion: “Nagapanaksi ako tuhoy sa ila nga may kakugi sila sa Dios; apang indi suno sa sibu nga ihibalo.”—Roma 10:2.

Wala ginbaton sang pila ka Judiyo sang unang  siglo nga si Jesus amo ang Mesias bisan pa maathag nga ginpakilala sia sa Hebreong Kasulatan. Natuman kay Jesus nga taga-Nazaret ang tanan nga ginlaragway sa Hebreong Kasulatan parte sa Mesias lakip na ang iya pagahimuon. Pero bangod sarado na ang hunahuna sang iya mga kasimanwa, wala nila ginbaton ang Pulong sang Dios.

Ano ang matun-an naton sa sini nga hitabo sa Biblia? Importante gid nga basahon ang Biblia nga may bukas nga hunahuna. Indi maintiendihan sang nagabasa ang kamatuoran sang Biblia kon indi gid niya pagbayluhan ang iya daan nga pagpati.

Halimbawa, ang isa ka propesor sa mga pagtuon sa relihion sa North Carolina, U.S.A. nagsiling nga ang Biblia “ginsulat lamang sang mga tawo nga may lainlain nga ideya, kag wala sing bisan isa sini ang makahatag sing masaligan nga giya kon paano kita magkabuhi.” Kon kabigon sang isa ang Biblia nga “ginsulat lamang sang tawo,” mahimo nga indi niya pagsundon ang mga prinsipio diri nga wala niya naluyagan.

Pero ang Biblia nagasiling nga dapat naton ini tun-an sing maayo. Parte sa mga taga-Berea sang panahon ni Pablo, ang Biblia nagasiling: “Nalangkag gid sila sa pagbaton sa pulong, nga ginausisa sing maayo ang Kasulatan sa adlaw-adlaw kon bala matuod gid ini nga mga butang.” (Binuhatan 17:11) Pareho sa mga taga-Berea, kinahanglan nga dulaon mo ang bisan ano nga negatibo nga pagtamod sa Biblia. Basaha ang Pulong sang Dios nga may bukas nga hunahuna, kag hibalua ang matahom gid nga mensahe sang Dios.