Nahibaluan Mo Bala?

Ano ang ginahimo ni Jesus bilang isa ka panday?

Si Jose nga nag-adoptar kay Jesus isa ka panday. Nakatuon man si Jesus sa pagpamanday. Sang nagsugod sia sa iya ministeryo sa edad nga “mga katluan ka tuig,” wala lamang sia nakilal-an nga “anak sang panday” kundi isa mismo ka panday.​—Lucas 3:23; Mateo 13:55; Marcos 6:3.

Sa lugar nga gindak-an ni Jesus, mahimo nga madamo ang nagakinahanglan sing mga gamit sa pagpanguma subong sang arado kag gota, nga masami human sa kahoy. Kinaandan na nga ginahimo sang panday ang mga gamit sa balay. Nalakip sa sini ang mga lamesa, mga pulungkuan, kag mga baul. Subong man, nagahimo sila sing mga puertahan, bintana, trangka, kag mga balayan. Sa pagkamatuod, pati ang pagpanukod sing balay, trabaho man sang panday.

Sa isa ka ilustrasyon, ginsambit ni Juan Bautista ang wasay, nga mahimo gingamit ni Jesus kag sang iban nga panday sa pagpamulod sing mga kahoy. Pagkatapos ini mapulod, mahimo nga didto nila mismo tablunon ang kahoy ukon dal-on ini sa ila ginapamandayan. Pat-od nga kinahanglan gid mamuersa sa sini nga sahi sang trabaho. (Mateo 3:10) Ginsambit ni Isaias ang iban nga gamit sang mga panday sa iya panahon: “Ang panday nagauntay sing latid, napat-inan niya ini sing lapis, ginasapiyohan niya ini, kag ginapat-inan niya ini sing mga kompas.” (Isaias 44:13) Ang mga natukiban sang mga arkeologo nagapamatuod nga sa panahon sang Biblia, ginagamit na ang mga lagari, maso, kag bronse nga mga lansang. (Exodo 21:6; Isaias 10:15; Jeremias 10:4) Gani, nagakaigo lamang hunahunaon nga ginagamit man ini ni Jesus.

Sin-o ang “mga manugbangko” nga ginsambit ni Jesus sa isa sa iya mga ilustrasyon, kag paano sila nagapanghikot?

Nagpamulong si Jesus tuhoy sa isa ka agalon nga naakig sa iya uyaya nga ulipon nga nagasiling: “Dapat mo kuntani ginpatago ang akon mga kuarta nga pilak sa mga manugbangko, agod sa akon pag-abot mabaton ko kon ano ang akon nga may saka.”​—Mateo 25:27.

Sang panahon ni Jesus, wala sing dalagku nga mga bangko kaangay sa aton karon. Apang sang panahon niya, madugay na nga ginapasakaan sang mga manugpautang ang kuarta nga ginadeposito sa ila, kag ginapautang man nila ini sa mas mataas nga interes. Suno sa The Anchor Bible Dictionary, kinaandan na sa Gresya sang ikap-at nga siglo B.C.E ang pagpautang nga may saka. Kag sa tion nga napaluntad sang mga Romano ang kalinong, ang tuigan nga saka sa pagpautang sa bug-os nga Emperyo sang Roma yara sa mga 4 tubtob 6 porsiento.

Ginadumilian sang Mosaikong Kasuguan ang pagpautang nga may saka sa mga nagakinahanglan nga Israelinhon. (Exodo 22:25) Ini nga pagsulundan mahimo panguna nga naaplikar sa mga imol. Apang, subong sang ginpakita sa ilustrasyon ni Jesus, normal lamang nga makabaton sing saka sa kuarta nga gindeposito sa mga manugpautang, ukon “mga manugbangko.” Gani, subong kinaandan, naggamit si Jesus sing ilustrasyon nga pamilyar sa iya mga tagpalamati.