MAY nakita ka na bala nga nagahimo sing malain?— * Si Samuel may nakita na. Yara sia sa isa ka lugar nga ang mga tawo indi mo gid mapaabot nga maghimo sing malain. Nagaistar sia sa tabernakulo sang Dios, ang lugar kon diin nagasimba ang mga tawo sa siudad sang Shilo. Ngaa nakaistar sa tabernakulo si Samuel? Tan-awon naton kon ano ang natabo kapin sa 3,000 ka tuig na ang nagligad.

Sang wala pa matawo si Samuel, luyag gid sang iya nanay nga si Ana nga makabata. Sang nagbisita sia sa tabernakulo, ginpangamuyo gid niya ini sa Dios. Nangamuyo sia sing hugot nga nagakutibkutib ang iya bibig. Nasal-an pa gani sia nga hubog sang mataas nga saserdote nga si Eli. Apang sang nahibaluan ni Eli nga tuman gali ang iya kasubo, ginpakamaayo niya si Ana kag nagsiling: “[Kabay nga] ang Dios sang Israel maghatag sa imo sang imo pangabay nga ginpangayo mo sa iya.”​—1 Samuel 1:17.

Sang ulihi, ginbun-ag ni Ana si Samuel. Nalipay gid sia, amo nga ginsilingan niya ang iya bana nga si Elcana: ‘Kon malutas na si Samuel, dalhon ko sia sa tabernakulo, agud nga mag-atubang sia sa GINOO.’ Gani, sang mga apat ukon lima ka tuig si Samuel, gindala sia ni Ana sa tabernakulo!

Tigulang na si Eli, kag ang iya mga kabataan nga si Hofni kag si Finehas mga salawayon. Gani, naakig si Jehova sa ila. Nagahulid pa gani sila sa mga babayi nga nagakadto sa tabernakulo! Ano sa banta mo ang dapat himuon sang ila tatay?— Huo, dapat gindisiplina niya sila kag wala ginpasugtan nga maghimo sing malain.

Nagdaku si Samuel sa tabernakulo, gani mahimo nakita niya ang malain nga ginahimo sang mga anak ni Eli. Ginsunod bala sila ni Samuel?— Wala. Gintuman niya ang gintudlo sang iya nanay kag tatay nga magpadayon sa paghimo kon ano ang husto. Naakig gid si Jehova kay Eli. Gani, nagpadala sia sing manalagna agod isugid kay Eli kon paano silutan ang iya pamilya, ilabi na ang malain  niya nga mga kabataan.​—1 Samuel 2:22-36.

Padayon nga nangin kaupod ni Samuel si Eli sa pag-alagad sa tabernakulo. Isa ka gab-i, sang nagakatulog si Samuel, nabatian niya nga may nagatawag sa iya ngalan. Gani, dalidali sia nga nagkadto kay Eli, apang nagsiling si Eli nga wala man niya sia gintawag. Kag nabatian naman niya ini liwat. Pagkatapos sang ikatlo nga beses, ginhambalan sia ni Eli nga magsabat: “Hambal ka, GINOO, kay ang imo alagad nagapamati.” Sang ginhimo ini ni Samuel, may ginhambal si Jehova sa iya. Nakahibalo ka bala kon ano ang ginhambal ni Jehova?—

Ginsugid niya kay Samuel ang ginhambal niya sa propeta nga silutan ang pamilya ni Eli. Pagkaaga, nahadlok si Samuel nga isugid kay Eli kon ano ang ginhambal ni Jehova sa iya. Pero, ginpilit gid sia ni Eli nga nagasiling: “Indi pag-ilikom ini sa akon.” (1 Samuel 3:1-17) Gani, ginsugid ni Samuel kay Eli ang tanan nga ginhambal ni Jehova sa iya, pareho man sa ginhambal sang manalagna sadto sa iya. Kag nagsabat si Eli: “Himuon [ni Jehova] ang bisan ano nga ginahunahona niya nga maayo.” (1 Samuel 3:18, Maayong Balita) Sang ulihi, napatay si Hofni kag Finehas, kag amo man si Eli.—

Sadto man nga tion, “Si Samuel nagtubo, kag ang GINOO kaupud niya.” Mahimo nga tin-edyer na sadto si Samuel, kag importante gid ini nga bahin sa iya kabuhi. Sa banta mo, mahapos bala kay Samuel nga magpadayon sa paghimo sing maayo bisan pa napalibutan sia sing malain nga mga tawo?— Siempre indi, mabudlay gid ini para kay Samuel. Apang padayon sia nga nangin matutom kay Jehova sa bug-os niya nga kabuhi.​—1 Samuel 3:19-21.

Kamusta naman ikaw? Ilugon mo bala ang halimbawa ni Samuel pagdaku mo? Padayon mo bala nga himuon kon ano ang husto? Padayon mo bala nga tumanon ang mga panudlo sang Biblia, kag sundon ang ginasiling sang imo nanay kag tatay? Kon himuon mo ini, mapahalipay mo sila kag si Jehova.